امپراتورون سیفاریشی

کافکا
چئویره ن: مسیح آغامحمدی
  بئله نقل ائديرلر کي، ايمپئراتور سيزه - تنها بير آداما، اؤزونون ان آشاغي مؤقع لي تبه سينه، ان اوزاق مسافه دن ايمپئرييا گونشي نين قارشيسيندا ايکي قات اَييلميش جيليز کؤلگه يه سيفاريش گؤندرميشدير؛ ايمپئراتور اؤلوم ياتاغيندا شخصن سيزه سيفاريش گؤندرميشدير. او، ائلچي يه امر ائتدي کي، ياتاغي نين کناريندا ديز چؤکسون. سونرا سيفاريشي چوخ اهميتلي سايديغي اوچون ائلچي يه گؤستريش وئردي کي، آغزيني اونون قولاغينا ياخينلاشديريب دئديکلريني تکرار ائله سين. سونرا باشي ايله تصديقله دي کي، سيفاريشي دوزگون تکرار اولونوب. بلي، اونون اؤلومونون شاهيدي اولماق اوچون توپلاشان - آراکسمه لر گؤتورولموشدو و ايمپئرييانين بوتون گؤرکملي شخصيتلري هوندور، گئنيش پيللَه کانين باشيندا دؤوره وورموشدولار - اعيانلارين قارشيسيندا ايمپئراتور ائلچي يه گئتمک امري وئردي.  
  او جثه لي و يورولماز شخص دورمادان حرکت ائدير، گاه بير، گاه دا باشقا الي ايله جاماعات ايچريسينده اؤزونه يول آچير، هاردا مانعه يه راست گليرسه، دؤشونده کي گونشلي اوردئني گؤسترير و کيمسه نين باجارماياجاغي بير آسانليقلا اؤزونه يول آچير. آمما جاماعات حددن آرتيق چوخدور، اوتاقلار دا کي، قورتارماق بيلمير. يقين کي، اونون قارشيسيندا آچيق ساحه اولسايدي، سورعتله قاچاردي و سيز بير قدر سونرا اؤز قاپينيزدا اونون يومروغونون سسيني ائشيدردينيز. آمما وضعيت عکسينه دير و اونون بوتون سعي لري عبثدير؛ او هله داخيلي قصرين اوتاقلاريني کئچمکده دير کي، هئچ زامان اونلارين آخيرينا چيخا بيلمه يه جک. لاپ اونلاري باشا وورسا دا، ائله بير ايش گؤرموش ساييلا بيلمز، چونکي سونرا پيلله لرين آشاغيسينا قدر ائنمه ليدير. اگر بونو دا ائتميش اولسا، يئنه بير شئي ائله ميش ساييلماماليدير، چونکي مئيدانلاردان کئچمه ليدير و مئيدانلاردان سونرا اونون قارشيسيندا بيرينجي قصري احاطه ائدن ايکينجي، خاريجي قصر دايانير؛ اونون ايسه داها چوخ پيلله لري و داها چوخ مئيدانلاري وار. اونلاردان سونرا داها بير قصر ده واردير. بو ساياقلا مين ايللر کئچه جکدير. اگر نهايتده او، چيخيش قاپيسينا چاتسا، - هرچند بو، چوخ-چوخ موشکول بير مسئله دير - او زامان هله دونيانين مرکزي ساييلان و اينسان قارالتي لاري ايله دولو اولان پايتخت قارشيسيندا دايانير. هئچ کسين اورادان کنارا چيخماغا قدرتي يوخدور، او دا قالسين بير اؤلونون سيفاريشيني اؤزو ايله آپارانين…  
  آرتيق آخشام دوشدويو اوچون سيز اؤز ائوينيزين پنجره سي قيراغيندا اوتورورسونوز و ائله بيل بوتون بو ماجراني گئرچک بير رؤيادا گؤرورسونوز.