آذربایجان چاغداش شعری
آذربایجان چاغداش شعری
اورمیه شاعیرلریندن
عادل پیر شاه وئردی(آرمان)
چال آشیق، سازینی آل دؤشون اوسته،
ائلیمین سازیندان – سؤزوندن دانیش!
تونقال – تونقال حسرتلری سؤنمه ین،
کول آلتدا قیزیران کؤزوندن دانیش!
سؤزون شؤهرتیندن – صداقتیندن،
آنادیلیمیزین مهارتیندن،
ائلین قایغی سیندان – شرافتیندن،
غیرتلی اوغلوندان – قیزیندان دانیشس!
صدفلی سازینی کؤکله – چال آشیق!
دده علعسگری یادا سال آشیق!
اوره کلر مولکونو بیرده آل آشیق!
شیرین صؤحبه نیمدن – سازیندان دانیش!
چیلله قارپیزیندان، قوروت آشیندان،
شیرین ناغیللاردان کورسو باشیندان،
بابک قالاسیندان ، کاظیم داشیندان،
بالاجا قیزلارین نازیندان دانیش!
***
بهرام اسدی
سن نئجه گؤزلسن ای پری!
سنی گؤره ن گلیر های ایلن سنه.
حیرانین نه کی تک یئر کوره سیدیر،
گونش حیران اولوب آی ایلن سنه.
هر کیچیک، هر بؤیوک، هر خان، هر پاشا،
ایستر سنه گله، سنه یووشا،
دوشمه گه عشقی نین رمزینی باشا،
یوخسوللار یوگورور بای ایله سنه.
فرصت بیل "ایدی" یارین سسینی،
اوندان اؤزگه لری ائتمه بحثینی،
قویما اونسوز کئچه بیر نفسینی،
نفس لر وئریلیب سای ایلن سنه.
***
اسماییل مددی اوسالی – اولکر
بئله کی قاضی زیندان پایلیر،
پاسیبان دسبت
زنجیرلی بیر قلم بو اوتاقدا قالمالی البت!
***
بئله کی تورکه فارسجا اؤیره دیرلر،
فارسا – عرب،
عربه اینگیلیسجه!
اوغوللار آنالاری دیلمانج آپارمالی کی
I love you
نه دئمک دیر
بیزیم دیلیمیزجه؟!
***
بئله کی حق سؤزه گلینجه
هر کس هر کسه "اؤتور" دئیه جک دیر
بو اوبانی بیر گون
ماوال قوخوسو
گؤتوره جک دیر!
***
بیت اله جعفری
آنایوردوم منه شان و شرفدیر،
فخر ائده رک دوغما وطن ایرانا.
:باقر خان"لار، "ستارخان"لار اوغلویام،
جان دئمیشم قوربان آذربایجانا.
بو تورپاقدان سوموک – ایلیک ، حوهریم،
هر قاریشی ظولمه قارشی سنگریم،
"حب الوطن" ازل گوندن ازبریم،
گووه نه ره بو ایلقارا – ایمانا.
من قارتالام، زیروه لردن دوشمه رم،
دارلیق سئوه ن بایقولارا دوشمنم،
باشدان کئچیب وطنیمدن کئچمه رم،
باش اگمه رم اجنبی یه – دوشمانا.
آند ایچمیشیک گؤیدن گلن قورآنا،
خطر چاغی قان سوواراق میدانا،
سگگیز ایل دایاندیق مرد-مردانا،
ظفر چالدیق عجب بؤیوک شیطانا!
"جعفری"یم سؤز بحرینده اوزه رم،
اینجی تاپیب "ساری تئل"ه دوزه رم،
مضراب اولوب تئل اوستونده گزه رم،
اهل ایسته رم سؤز قاندیرا، سؤز قانا.
***
اکبر بزرگ امین – جنون
قله، دولان بو ائللره، حقیقتدن یاز شئعیر،
دونیا – عالم محتاجی دیر محبتدن یاز شئعیر؛
سن سوساندا قارانلیقلار توتور یئری، سمانی،
آل گونشه کؤرپو سالان طریقتدن یاز شئعیر.
سن انسانین سلاحی سان، چیرکین لیکلر اوستونه،
سن بشرینه انقلابی – جهالتین قصدینه،
سن شاعیرین یولداشی سان هر آلاندا دستینه،
انسان اوچون آرزو اولان سعادتدن یاز شئعیر.
سن قیلینجسان، دفتر قالخان، شعر دؤیوش زنگی دیر،
قیزیل جوهر قلبیمیزدن آخان قانین رنگی دیر،
انسان اوغلون داردا قویما، نورلا ظولمت جنگی دیر،
"جنون" دئییر بو میداندا جسارتدن یاز شئعیر.
***
آذربایجان ادبیاتی، تاریخی و اینجه صنعتی