آذربایجان چاغداش شعری
1
سؤزو آستا دئنه دوستوم
دووارلاردا سیچان واردیر
سیچانلاردا قولاق واردیر!
آنجاق، سوسما دوستوم!
سؤزو دئمک لازیم
سیچانلار سیچقان اولدوقدا
نییه اونلاردان
آسلان و قافلانلار دوزه لدیرسیز؟!
س.س اوچون
بابل – 1354
***
2
اوچ شئیی چوخ سئویرم
یاشامی
اومودو
و سنی!
سن اولماسان
اومودوم یوخ
اومودسوز یاشاماق اولماز
نه گؤزه لدیر؟!:
سئومک
و
سن!
سن اولاندا،
هم اومودوم وار،
هم یاشامیم.
***
3
گلیرم
سئوگی دن بیر داغ بسله میشم
بوتون داغلاردان اوجا!
بیر سئودا بزه میشم
سئوگی لرینیز؟ اوندا بوغولا!
بیر ائل بسله میشم
باشی باشلاردان اوجا!
گلیرم، ها! گلیرم
اؤلومه حاضیر.
سیز ده حاضیر اولون:-
دار آغاجلارین قورون
قیلینج لارینیزی چکین
من حاضیرام!
بیلیرم کی
سیزین ای÷ لرینیز چوروک
قیلینج لارینیز کوند اولماسا دا
آنجاق
اوره ک لرینیزده جسارت یوخ!
17/6/84
***
4
بهشت – جهنم
بهشتده بوتون سئوگی، سئودادیر
و نه قده ر چوخدور.
جهنمده
سئوگی بیلن
"سئویره م " دییه ن
یوخدور.
***
5
سئومه ین اوره ک
بیر پارچا ات دیر
آت پیشیگه!
6
سئوگی بیر درین دریایا بنزه ر
خیردا بالیقلار قیراغیندا
نهنگ لر اورتاسیندا گزه ر!
7
سئوگی سیز دونیا آجی دیر
سئونلر موتلو اولسون!
"سنی سئویرم" دئمه سم،
دیلیم لال اولسون!
8
اؤلسم ده سؤزومدن دؤنمه یه جم
منی آتسان دا
اؤزگه سینی
سئومه یه جم!
9
سن منیم سؤزومسن
سن منیم گؤزومسن
سن مکنیم اؤزومسن
من، منده یوخام
سنده یم بلکه!
10
هر شئی ییم وار
بیر، سن اسگیک سن یانیمدا
اصلینده باشقا بیر شئییم یوخوموش
بو دونیادا!
آنجاق نه موتلویام سنله!
11
سنی سئومک چتین دیر
سئومه مک گوناه! سئومکله سنی
دونیانی تاپیرام
منه دونیا نه گره ک!
12
نه دولته ، نه مالا اویدوم
زورا – ظالیمه قول اولمادیم.
آددیمی ایناندیغیم یولا قویدوم
خنجره – نیزه یه بول اولمادیم.
13
شهید
کؤکسونه اوتوردو
دوشمانین درین ایشله ین یاراسی
آنجاق ییخیلمادین
سن
ای دایانان سؤیود!
سنین یولون بودور
اؤلنده ده ییخیلمازسان!
سنده
خنجر ایله قان ماهنی سی
سنده
کؤچری قوشلار
غلبه ماهنی سی وار.
سنین گؤزلرین
هئچ زامان
بئله پارلاق اولمامیشدیر.
سنین قانینلا
خالقین ظولمه اولان نفرتی
اویانیر.
خالق توپلانیر مئیدانلارا.
سنین قانیندیر
اویادیر خالقی
اویادیر نفرتی.
یولدان کئچنلر
بیلمیرلر سنین آدین
آنجاق سئویرلر سنی.
خالقیمیز سنی دوشونرکن
محراب اولار
قانیوین هر دامجی سی
اوندا بو خالق
سسله یه ر
هر میللی ماهنی سیندا
سنین اولو آدینی.
سنین آدین آذربایجان بایراغی
خزر دنیزی
سنین آدینلا دیری دیر
ای شهید!
***
14
گئتمک
قالماق ایله گئتمک آراسیندا
دؤزوم یاراماز!
تله سمک گره ک
گلین، بیر – بیریمیزین یاردیمیله
یئلکن قووزاییب
دالغالاردان قورخمایاق.
گلین
ساحیلده کی عاطل دوشموش گمی نی
عمل چایینا سالاق.
گل، دوستوم
سن ده گل!
اشکنجه دیر اوتورماق،
فصیل لردن قورخاراق
گؤوم – گؤی باغی
یئل – دومان تالانینا
قویمایاق!
قوشلارین اؤلومونه گؤزله مه ییب
اوچوشلارا گؤز تیکه ک
گل
دوستوم
گل......
15
گلین دوسلار بیرله شک
هر اوره ک دؤیونتوسو
بیر ماهنی اولسون ایندی
اؤلکه میزده هر ایگیدین آل قانی
بیر بایراق اولسون ایندی!
گره ک سئوه ک آ دوسلار
خالقیمیزی، بیرله شک.
گونش دان یئرینی سؤکنده
ساوالان اتیینده
ال بیر اولوب سئویشک!
16
یاشاییش
یاشاییشین،
سئوینجین
داش یاغدیران قالاسی وار.
دوشونورم-
هله ده وار.
بیر ایییدین قارا گونونده
قورخو
عاصی گؤزلری نین گیله سیندن بللی دیر.
سن نه گؤزه ل، قورخماز دؤیوشورسن
نه جسارتله
نه ایگیدلیکله
وطنیوی
سن جانینلا سئویرسن.
من ده وطندن آیری
غربت هاواسیندا نفسیم توتولور.
اوره ییمین چیرپینتی سی
وطندن آیری نیسگیل لرله
کؤکسومده دؤژیونور.
وطنیمده
یانقی واردیر
گولله واردیر
اؤلوم واردیر
ایگیدلر ده واردیر.
آنجاق
یاشاییش دا وارمی؟
30/11/56
آذربایجان ادبیاتی، تاریخی و اینجه صنعتی