طالع

بؤیوک بیر آلان، بیر طرفدن کوچه یه آچی آچیلیر؛ باشقا ایکی طرفدن ده ایکی آچی واردیر. آلانین اورتاسیندا بیر بؤیوک دمیر قفس قویموشلار، بیر بؤیوک قیفیل دا اونا باغلامیشلار. میله لرین آراسیندان ائنلی بیر تاختا کئچیریب و قفسین ایچینه – یئردن بیر آز یوخاری قویموشلار. بیر بالاجا تاختا قوطونو قفسین بئلینه باغلامیشلار، ایچی " فال" کاغازلاریلا دولودور. قفسین یانیندا بیر قلاب واردیر کی اوندا سنگک چؤره یی آسیلمیشدیر.

قفسین ایچینده بیر کیشی واردیر، اللرینی دالدان باغلامیشلار. کیشی، قوشلار کیمی تاختا اوستونده اوتورموش، هردن بیر باشینی او یان – بو یانا دولاندیریب، هردن بیر قفسده اولان قوشلار کیمی تاختا اوستونده آتیلیب – دوشور، او یان – بو یانا گئدیر، حسرتله سنگک چؤره یینه گؤز تیکیر.

قفس یانیندا، قوجا بیر کیشی بیر چارپایا اوستونده اوتورموش، اؤزونه بیر عبا چولقامیشدیر. اوزون شاللاق، دالینداکی دوواردان آسلامیش، الینده بیر دخیل واردیر کی ترپه دیر، قولاغی سکه پوللارین سسینده دیر.

آخشام اوستودور. گونشین ایشیغی آلاندا یاییلیبدیر. اوز به اوز اولان آچیدان بیر کیشی ایچه ری گیریر. یاخینلاشیر. قفس قارشیندا دایانیر. قوجا کیشی یه و قفس ایچینده کی کیشی یه باخیر. قوجا کیشی یه پارا وئریر. قوجا کیشی پارانی دخیله سالیر. قفسده کی کیشی سئوینیر. تاختا اوستونده او یان – بو یانا آتیلیر. بوینون اوزالدیر. قوجا کیشی بیر تیکه چؤرکدن قوپاریب میله لره یاخینلبادیر. قفسده کی کیشی قاباغا اگیلیر. دوداقلارین اوزالدیب چؤره یی قوجا کیشیدن آلیر و اوتور. یئنه اگیلیب فال کاغاذلارین بیرینی دوداقلاریلا ائشیگه چکیر. بیرینجی کیشی فالی قفسده کی کیشیدن آلیب اوخویور. اوجا – اوجا گولور؛ خوشحال بیر حالدا ساغداکی آچیدان ائشیگه گئدیر.

ایکینجی کیشی ایچه ری گیریر. یاخینلاشیر. قفس قارشیندا دایانیر. قوجا کیشی یه و قفس ایچینده کی کیشی یه باخیر. قوجا کیشی یه پارا وئریر. قوجا کیشی پارانی دخیله سالیر. قفسده کی کیشی سئوینیر. تاختا اوستونده او یان – بو یانا آتیلیر. بوینون اوزالدیر. قوجا کیشی بیر تیکه چؤرکدن قوپاریب میله لره یاخینلبادیر. قفسده کی کیشی قاباغا اگیلیر. دوداقلارین اوزالدیب چؤره یی قوجا کیشیدن آلیر و اوتور. یئنه اگیلیب فال کاغاذلارین بیرینی دوداقلاریلا ائشیگه چکیر. بیرینجی کیشی فالی قفسده کی کیشیدن آلیب اوخویور. قیلیغی توتولور. فال کاغاذینی جیریب قفسین اؤنونده یئره تؤکور. توتولموش قیلیقلا سولداکی آچیدان ائشیگه چیخیر.

قوجا کیشی دوروب شاللاغی دوواردان گؤتورور. قفسده کی کیشی قورخاراق قفسین بوجاغینا سیغینیر. قوجا کیشی قیفیلی آچیب، بیر آیاغینی قفسین ایچینه قویوب قفسده کی کیشینی وورماغا باشلاییر. قفسده کی کیشی زاریما سسیلن اوجالدیر. چالیشیر اؤزونو شاللاق ضربه لرینده قورتارسین. قوجا کیشی قفسین قاپیسین باغلاییب، شاللاغی دوواردان آسلاییر و چاپایا اوستونده اوتورور.

اوچونجو کیشی ایچه ری گیریر. یاخینلاشیر. قفس قارشیندا دایانیر. قوجا کیشی یه و قفس ایچینده کی کیشی یه باخیر. قوجا کیشی یه پارا وئریر. قوجا کیشی پارانی دخیله سالیر. قفسده کی کیشی سئوینیر. تاختا اوستونده او یان – بو یانا آتیلیر. بوینون اوزالدیر. قوجا کیشی بیر تیکه چؤرکدن قوپاریب میله لره یاخینلبادیر. قفسده کی کیشی قاباغا اگیلیر. دوداقلارین اوزالدیب چؤره یی قوجا کیشیدن آلیر و اوتور. یئنه اگیلیب فال کاغاذلارین بیرینی دوداقلاریلا ائشیگه چکیر. بیرینجی کیشی فالی قفسده کی کیشیدن آلیب اوخویور. اوجا – اوجا گولور؛ خوشحال بیر حالدا ساغداکی آچیدان ائشیگه گئدیر.

دؤردونجو کیشی ایچه ری گیریر. یاخینلاشیر. قفس قارشیندا دایانیر. قوجا کیشی یه و قفس ایچینده کی کیشی یه باخیر. قوجا کیشی یه پارا وئریر. قوجا کیشی پارانی دخیله سالیر. قفسده کی کیشی سئوینیر. تاختا اوستونده او یان – بو یانا آتیلیر. بوینون اوزالدیر. قوجا کیشی بیر تیکه چؤرکدن قوپاریب میله لره یاخینلبادیر. قفسده کی کیشی قاباغا اگیلیر. دوداقلارین اوزالدیب چؤره یی قوجا کیشیدن آلیر و اوتور. یئنه اگیلیب فال کاغاذلارین بیرینی دوداقلاریلا ائشیگه چکیر. بیرینجی کیشی فالی قفسده کی کیشیدن آلیب اوخویور. قیلیغی توتولور. فال کاغاذینی جیریب قفسین اؤنونده یئره تؤکور. توتولموش قیلیقلا سولداکی آچیدان ائشیگه چیخیر.

قوجا کیشی دوروب شاللاغی دوواردان گؤتورور. قفسده کی کیشی قورخاراق قفسین بوجاغینا سیغینیر. قوجا کیشی قیفیلی آچیب، بیر آیاغینی قفسین ایچینه قویوب قفسده کی کیشینی وورماغا باشلاییر. قفسده کی کیشی زاریما سسیلن اوجالدیر. چالیشیر اؤزونو شاللاق ضربه لرینده قورتارسین. قوجا کیشی قفسین قاپیسین باغلاییب، شاللاغی دوواردان آسلاییر و چاپایا اوستونده اوتورور.

گونش آلاندان چکیلمیش، هاوا قارانلیقلانیر. قوجا کیشی دخیلی گؤتوروب ترپه دیر. دورور، عباسینی مرتب ائدیر. بیر نئچه آددیم ائشیگه گئدیر و بیردن دایانیر. قاییدیر و قفسده کی کیشی یه باخیر، بیر تیکه چؤرکدن قوپاریب میله لره یاخینلبادیر. قفسده کی کیشی قاباغا اگیلیر. دوداقلارین اوزالدیب چؤره یی قوجا کیشیدن آلیر و اوتور. یئنه اگیلیب فال کاغاذلارین بیرینی دوداقلاریلا ائشیگه چکیر. بیرینجی کیشی فالی قفسده کی کیشیدن آلیب اوخویور. قیلیغی توتولور. فال کاغاذینی جیریب قفسین اؤنونده یئره تؤکور.

قوجا کیشی دوروب شاللاغی دوواردان گؤتورور. قفسده کی کیشی قورخاراق قفسین بوجاغینا سیغینیر. قوجا کیشی فیکره گئدیر. پارا دخیلینی چارپایا اوستونه قویور و توتغون قیلیقلا سول آچیدان ائشیگه چیخیر.

قفسده کی کیشی تاختا اوستوندن آشاغی آتیلیر. قفس ایچینده گزیر. میله لر آراسیندان ائشیگی یوخلور. هاوا قارانلیقلاشیب. قفسده کی کیشی چابالیر، اؤزونو قفسین دووارلارینا چیرپیر و زاریلدیر.

بیر اوجا قد کیشی آچیدا تاپیلیر . الینده بیر ایشیقلی فانیس ساغ الینده، سول الینده ده بیر دسته آچار.

 

 

\