یوخسول

چؤل، صحنه نین اورتاسیندا بیر قویو وار، چئوره سینه تیکانلی مفتیل لر چکمیشلر. بؤیوک بیر دولچانی پرچینین دیره یی یانینا قویموشلار و یوغون بیر ایپ دولچانین چئوره سینه بورولموش. یولچو  یورغون – آیاق یالین، تکجه بیر کؤینک و شالوارلا، تر تؤکه رک صحنه یه گیریر. بتردن سوسوزدور، له له وورور. قویویا ساری قاچیر. پرچین چئوره سینه ندچه دؤنه فیرلانیر، باش اوزالدیب ایستیر مفتیللر آراسیندان کئچسین، باجارمیر. مفتیللری توتور و چکیر، بارماقلاری یارلانیر. یئنه قویونون چئوره سینه قاچیر و له له وورور. دایانیر. فیکره گئدیر. دیره ک لرین بیری نین یانیندا اوتورور و دیرناغی ایله دیره یین چئوره سینده کی تورپاقلاری قازیر و گوجه نیر. دیره ک یئریندن چیخیر. ایکینجی و اوچونجو دیره یی ده قازیر. مفتیللری توپلور، قویونون بیر یؤنو حفاضسیزلاییر.

   بوش دولچانی گؤتوروب قویویا سالیر. ایپین باشی الینده دیر. قویو درین دی. آغیر و دولو دولچانی یوخاری چکیر. دولو و بؤیوک بیر تولوغو دولچایا قویموشلار. تعجوبله تولوغا باخیر. اونو دولچادان گؤتوروب ترپه دیر. سویون سه سی ائشیدیلیر. وامجا تولوغون آغزینی آچیر، تولوق سودان بوشدور و دولودور یئلینند. قویونون ایچیندن تولوغو یئنه تولازلاییرلار ائشیگه.

   دولچانی قویویا سالیر، ایپی ترپه دیر و یوخاری چکیر؛ بؤیوک و کؤهنه بیر کتاب اوسته گلیر. کتابی گؤتوروب واراقلاییر. کتاب بویالی و عکسلرله دولودور. یولچو ذوق وورموش کیمی تاماشا ائدیر. قویونون ته هیندن آغلیرلار. کتاب یولچونون الیندن قویویا دوشور. کیشی گؤزله یه رک باخیر، آنجاق کتابی داها یوخاری آتماییرلار.

    دولچانی قویویا سالیر، ایپی ترپه دیر و یوخاری چکیر.بیر کسیلمیش ال و آیاق دولچادادیر. کیشی قورخور. قویونون ته هیندن گولورلر. یولچو کسیلمیش ال – آیاغی آتیر قویویا. یئنه ائشیگه آتیرلار.

   دولچانی قویویا سالیر، ایپی ترپه دیر و چکیر یوخاری و باخیر. یئککه بیر الماس دولچادادیر. کیشی کئفله نه رک الماسی الینه آلیب دولانیر. قویودان آغلاماق سه سی گلیر. یولچو فیکره گئدیر، الماس بارماقلاری آراسیندان قویویا دوشود. الماسی ائشیگه آتمیرلار.

   کیشی، حیرسله نه رک دولچانی قویویا سالیر، ایپی ترپه دیر و چکیر یوخاری. بؤیوک بیر ایلانین لشی دولچادادیر. قورخور. قویودان گولورلر. کیشی ایلان لشینی قویویا آتیر. یئنه آتیرلار ائشیگه.

   یولچو اوتورور تورپاق اوسته. فیکره گئدیر، ایلن لشینی، کسیلمیش ال – آیاغی و بوش تولوغو بیر – بیری نین یانینا قویور. دوروب دولچانی سالیر قویویا و ایپی ترپه دیر و چکیر یوخاری. بؤیوک بیر نار دولچادادیر. کیشی قویودان آرالانیر، ایستیر ناری دیشله سین، باجارمیر. قویونون ته هیندن زهله گئتمیش گولوش سه سی گلیر. یولچو حیرسلی قویو آغزینا گلیر و ناری قویویا تولازلاییر. ناری یوخاری آتمیرلار.

   یولچو دولچانی قیراغا قویور. باشینی اللرینی آراسینا آلاراق نئچه دؤنه قویونون باشینا فیرلانیر. گؤیه و دان یئرینه باخیسر، هر یان سؤنوکدور.

   گلیر قویونون قیراغینا. دولچا گؤتورور و آتیر قویویا، ایپی ترپه دیر و چکیر یوخاری. بیر شماییل دولچادا واردیر. شماییلی گؤتورور، باغرینا باسیر. قویودان بیر نئچه کیشی و قادین آغلاماغی نبین سه سی ائشیدیلیر. کیشی نین گؤزلری یاشینان دولور. شماییل الیندن زویوب و دوشور قویویا. شماییلی ائشیگه آتمیرلار.

   کیشی بیر نئچه آن فیکره دالیر، یئنه دولچانی گؤتورور و آتیر قویویا، ایپی ترپه دیر و یوخاری چکیر. بیر توپتنچه دولچادادیر. اونو گؤتورور. قویودان گولمه سه سی گلیر. توپانچانی آتیر قویویا. توپانچانی آتیرلار ائشیگه. کیشی یئنه توپانچانی آتیر قویویا. ائشیگه آتیرلار. گولمه سه سی صحنه نی دولدورور.

   یولچو توپانچانی گؤتورور، اگیلیر، قویونون ایچینه باخیر، گولمه سه سی قیریلیر. کیشی توپانچانین آغزینی آغزینا داییر و ماشانی چکیر. گولله سه سی صحنه ده بورولور.

   یولچونون اؤلوسو قویویا دوشور. قویونون ایچیندن بیر نئچه آدامین بتردن گولمه سه سی قولاغا گلیر. بیر آن سکوت. یولچونون اؤلوسونو آتیرلار ائشیگه.

***