قیزیل قلم آذر      Qizil Qelem

شهادت

صحنه، اوزون بیر دالاندیر، کیمسه لر سولدان گیریب ساغدان چیخحیرلار. دووارین اوزه رینده – تاماشاچیلارین اوز به اوزونده، نئچه قویلاق باجاسینی آیاق اوسته قازیبلار، با باجالارین اوزونلوغو بیر عادی آدام بویوندادیر.

صحنه نین سول طرفینده ایکی یئککه پر کیشی، بیر – بیریندن بیر آز آرایلا دایانیبلار. هر بیری نین قارشیندا بیر قاندال (زنجیر) تاواندان آسیلیدیر. بیرینجی قاندالا دمیردن بیر گیرده باغلاییبلار و ایکینجی قاندالدان بؤیوک زنگ آسیلیدیر. ایکینجی قاندالین آستیندا کیشی نین آیاغی اؤنونده چوخلو جیغجیغا تؤکوبلر.

اؤرتویون آچیلماسیلا برابر، بیر کیشی جیغجیغانی ترپه دیر. صحنه نین ساغ طرفیندن ائشیگه چیخیر.

سول طرفدن بیر کیشی صحنه یه گیریر، بیرینجی کیشی قولوندان توتوب، اگیر؛ کیشی یاواش و سؤزه باخان کیمی اگیلیر، بیرینجی کیشی گیرده نی توتوب یاخینلادیر؛ کیشی نین باشینی سیناییر، کیشی نین باشی گیرده دن کئچیر.

بیرینجی نفر، کیشی نی ایکینجی آداما ایته لیر. ایکینجی آدام اگیلیر و جیغجیغانی یئردن گؤتوروب کیشی نین الینه وئریر و ساغا ساری ایته لیر، بیرینجی کیشی سئوینجک و راضی قالاراق جیغجیغانی ترپه ده رک صحنه دن چیخیر.

***

ایکینجی کیشی سول طرفدن صحنه یه گیریر، بیرینجی آدام قولوندان یاپیشیب و اگیر، کیشی یاواش و باش اگه رک اگیلیر، بیرینجی نفر گیرده نی توتوب یاخینلادیر و کیشی نین باشینی سیناییر؛ کیشی نین باشی گیرده دن کئچیر. بیرینجی نفر، کیشی نی ایکینجی کیشی یه ساری ایته لیر. اگیلیر و بیر جیغجیغانی گؤتوروب کیشی نین الینه وئریر و ساغا ایته لیر. ایکینجی کیشی سئوینجک و راضی قالاراق جیغجیغانی ترپه دیر و صحنه دن ائشیگه چیخیر.

***

اوچونجو کیشی سولدان صحنه یه گیریر. بیرینجی کیشی قولوندان توتوب اگیر؛ کیشی یاواش و سؤزه باخان کیمی اگیلیر. بیرینجی نفر گیرده نی توتوب یاخینلادیر. کیشی نین باشینی سیناییر. کیشی نین باشی گیرده دن کئچیر. بیرینجی نفر کیشی نی ایکینجی نفره ایته لیر، ایکینجی نفر اگیلیر و جیغجیغانی یئردن گؤتوروب کیشی نین الینه وئریر و ساغا ساری ایته لیر. اوچونجو کیشی سئوینجک و راضی، جیغجیغانی ترپه ده رک صحنه دن چیخیر.

***

دؤردونجو نفر سولدان صحنه یه گیریر، بیرینجی آدام قولوندان یاپیشیب اگیر، کیشی اگیلمیر. بیرینجی نفر تعجوبله باخیر و دؤردونجو کیشی نین چیگینلریندن یاپیشیب یئره فشار وئریر. کیشی چالیشیر، آنجاق قورتولا بیلمیر؛ دیزلری اگیلیر، آنجاق باشینی دیک توتور. بیرینجی نفر گیرده نی یاخینلادیب کیشی نین باشینی سیناماق ایسته ییر. کیشی باشینی دوز توتوب و اوزونو گیرده نین اؤنونه آپاریر؛ گیرده باشیندان کئچمیر. بیرینجی نفر، دؤردونجو کیشی نی ایکینجی نفره ایته لیر، ایکینجی نفر زنگی بتردن سسلندیریر. صحنه نین ساغیندان ایکی قولو زوربا گیریرلر و دؤردونجو کیشی یه ساری گلیب، قوللاریندان توتوب، صحنه نین دیبینه، دووارین ایچینده کی قویلاغا یاخین آپاریرلار. کیشی چالیشیر، آنجاق قورتولاماییر. ایکی قولوزوربا راحاتلیقلا اونو توتوب دووارین ایچینده کی قویلباغا سوخورلار. دؤردونجو کیشی ترپه نه بیلمیر. بوتون هئیکلی دووار آراسیندا قالیر، تکجه باشی ائشیکده دیر.

***  

بئشینجی کیشی سولدان صحنه یه گیریر. ایکی قولوزوربا صحنه دن چیخیرلار. بیرینجی نفر بئشینجی کیشی نین قولونو توتوب اگیر. دؤردونجو کیشی دووار آراسیندان های باسیر : "آهای!". بئشینجی کیشی باشینی قالدیریر و گؤیه باخیر ، یئنه قولاق آسیر. دؤردونجو کیشی یئنه های باسیر : "آهای!". بیرینجی نفر چالیشیر بئشینجی کیشینین باشینی اگسین، آنجاق بئشینجی کیشی اگیلمیر. بیرینجی آدام تعجوبله باخیر، بئشینجی کیشی نیت چیگینلریندن توتوب یئره باسیر. کیشی چالیشیر، آنجاق قورتولاماییر. بیرینجی آدام گیرده نی توتوب یاخینلادیر و کیشی نین باشینی سیناماق ایستیر. دؤردونجو کیشی یئنه های باسیر "آهای، آهای!". بئشینجی کیشی باشینی دوز توتوب اوزونو گیرده نین قاباغینا آپاریر، گیرده باشیندان کئچمیر. بیرینجی نفر بئشینجی کیشینی ایکینجی نفره ساری ایته لیر. ایکینجی نفر زنگی بتردن سسلندیریر. صحنه نین ساغیندان ایکی قولوزوربا گیریرلر و بئشینجی کیشی یه ساری گلیب قوللاریندان توتوب و صحنه نین دیبینه، دووارداکی قویلاقلارا آپاریرلار. کیشی چالیشیر، آنجاق قورتولاماییر، ایکی قولوزوربا راحاتلیقلا اونو قالدیریب، دووارداکی قویلاقلارین بیرینه سوخورلار؛ بئشینجی کیشی ترپه نه بیلمیر. بوتون هئیکلی دووارین ایچینده قالیب، تکجه باشی ائشیکده دیر.

***

آلتینجی کیشی سولدان صحنه یه گیریر. ایکی قولوزوربا صحنه دن چیخیرلار. بیرینجی آدام آلتینجی کیشینین قولوندان توتوب اگیر، دؤردونجو و بئشینجی کیشی دووارلار های باسیرلار : "آهای!". بیرینجی آدام چالیشیر آلتینجی کیشی نی اگسین، آنجاق آلتینجی کیشی اگیلمیر، بیرینجی آدام تعجوبله باخیر، آلتینجی کیشی نین چیگینلریندن توتوب یئره باسیر.

صحنه نین ساغیندان چوخلو آدام اللرینده جیغجیغا گؤرونورلر کی هامیسی سئوینجک و راضی، احتیاطلا یاواشجا صحنه نین آراسینا یاخینلاشیرلار؛ جیغجیغالارینی ترپه ده رک بیرینجی آدام و آلتینجی کیشی نین چالیشمالارینا باخیرلار. احمقلر کیمی و سسی سیز گولوشورلر و گولورلر. آلتینجی کیشی چالیشیر، آنجاق قورتولاماییر. بیرینجی نفر گیرده نی توتوب یاخینلادیر و کیشی نین باشینی سیناماق ایستیر، دؤردونجو و بدشینجی کیشیلر دووار ایچینده، چوخ غضبله های باسیرلار :"آهای! آهای!".

توپلوم جیغجیغانی الینه آلیب، دووار ایچینده کی کیشیلری گؤرورلر و قورخورلار. دوداقلاریندا گوروش قورور؛ قورخاراق، یاواش – یاواش دال گئدیرلر، دووار ایچینده کی کیشیلره باخیب ، جیغجیغالارینی ترپه دیب صحنه دن چیخیرلار.

***