قیزیل قلم آذر      Qizil Qelem

قویونون روحو (تینی)

بیر قویو و قویو یانیندا پاسگاه. قویونون آغزیندا بیر یاتاق قویموشلار. بیر آز حلقه لنمیش ایپ پاسگاهین دوواریندان آسیلی دیر. یاتاغین یانیندا بیر سو دولچاسی ، بیر آز داش و قویو قاپاغی، چوخلو تخته ایله خیرت – پیرت.  قویونون ته هیندن بیر کیشی نین بیر هاوالی سسی گلیر. پاسدار یاتاق اوسته اوتورموش، غذا قابلاماسی و وسائیلینی باغلایاراق، آغزینداکی تیکه نی یاواشجا چئینیر. قویونون سسی بیردن قیریلیر. پاسدار چئینه مکدن دایانیر، دؤنوب قویویا باخیر. بیردن اوجا چیغراق قویودان قولاغا چاتیر. کیشی یاواش – یاواش تیکه نی چئینیر و قولاق آسیر. چیغراق اوجالاشیر. کیشی تیکه نی اوتور. قویودان گلن سس داها اینجیدیر. پاسدار قالخیب، حیرصلی قویونون آغزینا گلیر، اگیلیر، چیغراق قیریلیر. سس، یالواریشلی قولاغا چاتیر : "آقا، آقا، آقا!". پاسدار بیر اووج داش و کسسک قویونون یانیندان گؤتوروب قویویا چیرپیر.قویونون ته هیندن گلن سس قورخودوجو اولور : "های، های، های، آها!". پاسدار قالخیر، ساهاتینا باخیر، اؤزونو حاضیرلیر.  چئوره سینه باش چکیر، ایکینجی پاسداری گؤزله ییر. قویونون سسی آغلاییشا چئوریلیر. آغلاییش قیریلیب، یئنی دن چیغراق باشلانیر. کیشی قاییدیر، چیغراق اوجالیر. کیشی یاخینلاشیب قویویا باخیر. قویونون سسی یالواریشلی دیر : "آقا، آقا، آقا!". پاسدار اگیلیر و چیغیریر :"خفه!". و حیرصلی قویونون قاپاغین قویونون اوزونه چئویریر. قویودان گلن سس قورخودوجو اولور :"آهای، های، های!". نئچه آن سونرا، قویونون ته هیندن بیر شئی قاپاغا ده گیر، قویونون ته هیندن بیر ناله سسی گلندن سونرا، کیشی داش قاپاغین اوستونه قویور و ناله سسی قویودان چوخالیر.

ایکینجی پاسدار گلیر. بیرینجی پاسدار یوک کیفینی گؤتوروب تله سیک چیخیر. ایکینجی پاسدار یوک کیفینی یاتاق اوستونه قویور، بؤرکون گؤتوروب حاضیرلاشیر. ناله سسی ائله اوجادیر کی پاسدار قویویا دقت ائدیر. یاخینلاشیر، قاپاغین اوستونده کی داشی گؤتورور، قاپاغی قیراغا قویور. ناله سسی قیریلیر. یالواریشلی سس :"های!". سس یالواریشلی :"آقا، آقا!". کیشی قالخیر، گلیر و یوک کیفینی آچیر، بیر تیکه چؤره ک کسیب قویویا آتیر، گؤزله ییر؛ سس قیریلیر. کیشی قاییدیر، یاتاق اوسته اوتورور. یئمک اوچون حاضیرلاشیر. یاتاق اوسته اوتورور. سس یالواریشلی :"آقا، آقا!". کیشی دؤنور. یاتاق آستیندان قومقوما چیخاریب سویوندان دولچا دولدورور، قاپاغین باغلیر. گئدیر قویو آغزینا و چیغیریر :"هی!". قومقومانی آتیر قویویا. سس قیریلیر. کیشی دؤنوب یئمک باشیندا اوتورور. یئنه ناله سسی قویونون ته هیندن. پاسدار قویونون آغزینا گلیر. سس یالواریشلی :"آقا، آقا، آقا!". کیشی های باسیر :"هی!". قویونون ته هیندن سس :"آقا، آقا، آقا!؟. کیشی قالخیر، فیکره دالیر، دؤنور و ایپین حلقه سینه باخیر، یئنه اگیلیر، قویویا های باسیر :"هی، هی، هی!". سس یالواریشلی :"آقا، آقا، آقا!". کیشی گئدیر، شوبهه لی، ایپی میخدان آچیر و گتیریر. فیکره دالیر، چئوره سینه باخیر، ایپی قویویا ساللیر. قویونون سسی یاواش – یاواش ده ییشیلیر، سئوینجک، اومودلو و ممنون اولاراق :"آقا، آقا، آقا!". پاسدار ایپی ییغماغا باشلیر. زورلا ایپی یوخاری چکیر. قویو سسی یاواش – یاواش ده ییشیلیر؛ سئوینجک، اومودلو، کینه لی و قورخودوجو اولور :"آقا، آقا، آقا، آقا!". بیر جوت چوخ بؤیوک ال، قویونون آغزینا باغلانیر. پاسدار ال – آیاغینی ایتیرمیش و قورخولو قویویا باخیر. بیردن ایپی بوشلاییب، چارا فیکرینه دوشور. بیر قول زورلا اؤزونو قویودان اوسته چکیر. پاسدار ال – آیاغینی ایتیریب، قاچیر؛ قول اگیلیب، یئردن بیر آغاج گؤتوروب قهقهه ایله، پاسداری قووالاییر.

***