گؤزله مه ده

 

میدانچا. بؤیوک بیر قاپی اوستونده بؤیوک میخلار، میدانچانین ساغیندا. بؤیوک بیر زنگی قاپی نین یانیندا دووارا چالیبلار. دؤرد کیشی، اوستو اؤرتولو تابوتلا سول طرفدن صحنه یه گیریرلر. گلیرلر، قاپی نیا قاباغیاندا دایانیرلار. زنگین قاباغیندا دایانان کیشی، الینی اوزالدیب زنگی سسلندیریر، نئچه آن گؤزله ییر. کیشی یئنه زنگی سسلندیریر. گؤزله ییرلر.بیر ده زنگی سسلندیریر. گؤزله ییرلر. خبر یوخدور. گئدیب تابوتو میدانچانین دیبینده، صحنه نین اورتاسینا قویورلار، سول طرفدن چیخیرلار.

تابوت میدانچانین یوخاریسیندادیر، بئلینه باغلانمیش بیر داشقا زنگی ایله. نئچه آن سوسقون کئچیر. تابوتون زنگی یانینداکی باجادان بیر ال ائشیگه گلیر، زنگین لاستیکلی حبابینی توتوب سیخیر. زنگ سسه گلیر. ال دایانیر، یئنه سیقنال چالیر، گؤزله ییر. بیر ده سیگنال چالیر و گؤزله ییر. خبر یوخدور. اؤلونون الی تابوتدا گیزله نیر.

نئچه آن سوسقونلوقلا کئچیر. آرالیق اوشاغی دالینا دولو بیر توربا باغلامیش، آیاق یالین ایچی ری گیریر. بیر دسته گول الینده وار. میدانچانین آراسیندا دایانیر. گوللری ساییر.

اؤلونون الی تابوتدان ائشیگه گلیب سیقنالین لاستیکلی حبابینی توتوب سیخیر. دایانیر، یئنه سیگنال چالیر. اوغلان تعجوبله چئوره سینه باخیر. ایره لی گئدیب تابوتون قارشیندا اوتورور، ال ائشیکده دیر. تابوت، اؤلونون الینی و سیگنالی گؤرور. یاخینلاشیب باخیر. اؤلونون الی بیر ده سیگنالی چالیر. اوغلان تعجوبله اگیلیر. دیزه چؤکور. گوللری تابوت اوستونه تؤکور. ال ایله سیگنالا تاماشا ائدیر. اؤلو الی تابوتدا گیزله نیر.

اوغلان سیگنالین حبابی ایله اویناییر. بیردن سیگنال چالیر. و گیزله نیر.اؤلو الی ائشیگه چیخیر. اوغلان اؤلونون الینی برکدن توتور، اگیلیر بارماقلارینا و دیرناقلارینا باخیر. اونلاری ساییر. یئنه نئچه آن اله بره لیر. اؤلونون بارماقلاری آراسینا بیر بوداق گول قویور. بارماقلار گول بوداغینی دوز ساخلیر. اوغلان ایکینجی گول بوداغینی بارماقلاری آراسینا قویور. اؤلونون بارماقلاری بوتون گوللری ساخلاییر. اوغلان قالخیر. تابوتدان آرا توتور. گوللره تاماشا ائدیر. میدانچانین باشقا بوجاغینا گئدیب گوللره تاماشا ائدیر. تابوتا یاخینلاشیب دیزه چؤکور. اوزونو یاخینلادیر. گوللری اینسیله ییر، گولوشور. گوللری اؤلونون الیندن آلیر. ساهمانلاییر. اؤلو الی اوزانیر. لاستیکلی حبابی توتور و تئز – تئز سیگنالی چالیب، سونرا تابوتون ایچینه گئدیر. بؤیوک قاپی آچیلیر. گوجلو – هوندور و اوجابویلو بیر کیشی ائشیگه گلیر، قیزارمیش اوزو وار، مئشین اؤنلوک باغلاییبدیر. ایکی بؤیوک دمیر میله الینده وار. اوز به اوزه باخیر. سونرا سول طرفده کی جادایا بره لیر. سیگنال اؤنونو آلیر. کیشی قاییدیب ائوه گیریر و قاپینی برکدن بیر – بیرینه چیرپیر.

اوغلان تورباسینی آچیر. دؤنوب زینقیل – مینقیللاری ایچیندن بیر گوزگو، سینیق داراق تاپیر. ائشیگه چیخاریر. گؤزله ییر. اؤلونون الی ائشیگه گلیر. اوغلان بارماقلاری توتور. گوزگونو اؤلونون بارماقلاری آراسینا قویور. اگیلیر. گوزگوده اوزونه باخیر، توکلرینی داریر. گوزگونو اؤلونون الیندن آلیب داراقلا برابر توربایا قویور. اؤلونون الی تله سیک لاستیکلی حبابی توتور. تئز – تئز سیگنال چالیر و سونرا گئدیب تابوتون ایچینه.

بؤیوک قاپی آچیلیر. هوندور کیشی گلیر. همان قیزارمیش اوز و همان مئشین اؤنلویو و همان ایکی دمیر میله سی وار. میدانچانین آراسینا دک گلیر. اوز به اوزونه باخیر، سئنرا سول طرفده کی جادایا بره لیر. اوغلان اگیلیر. سیگنالین قارشینی توتور. کیشی قاییدیب ائوه گیریر و قاپینی برکدن چیرپیر.

اوغلان الینی توربایا سوخوب و قورو بیر چؤره ک تیکه سی چیخاریر. گؤزله ییر. اؤلونون الی ائشیگه چیخیر. اوغلان بارماقلاری توتوب چؤره ک تیکه سینی بارماقلارین آراسینا قویور. بارماقلار چؤره یی برکدن ساخلاییر. اوغلان اگیلیر. بیر تیکه چؤره کدن دیشله ییر. چئینه یه رک اوزانیر و باشینی تابوتون قیراغینا قویور. سئوینجک و راضی گؤیه باخیر. چؤره یی اودور، یئنه قالخیب باشقا بیر تیکه نی دیشلیر. قالخیر. چئینه یه رک ماداندا دولانیر. گئدیر قاپییا ساری، قلاپی نین آراسیندان ایچه ری باخیر. اعتناسیز قاییدیر، اگیلیر. چؤره یین سون بؤلومونو دیشی ایله اؤلونون بارماقلاری آراسیندان ائشیگه چکیر. اؤلونون الی، تله سیک سیگنالین حبابینا ساری اوزانیر. اوغلان الی ایله اؤلونون بارماقلارینی توتور، باشقا الی ایله سیگنالی تابوتدان آییریر. اؤلو الینی بوشلور. ال، تابوت ایچینه گئدیر. اوغلان تابوت یانیندا یئره اوتورور. گؤزله ییر. ال ائشیگه چیخمیر. اگیلیب قولاق آسیر. گؤزله ییر. ال ائشیگه گلمیر. اگیلیر تابوتون ایچینه باخیر. گؤزله ییر. ال ائشیگه گلمیر. اوغلان سیگنالی تابوتون باجاسی قاباغینا توتور. لاستیکلی حبابی سیخیر. سیگنال بیر نئچه دؤنه میداندا سسله نیر.

بؤیوک قاپی آچیلیر. هوندور، اوجا بوی کیشی ائشیگه چیخیر. اوزو داها دا قیزارمیش، همان مئشین اؤنلویو وار و همان ایکی دمیر میله. اوغلان کیشینی گؤردوکده قورخولو قالخیر. کیشی میدانین آراسینا گلیر. اوز به اوزه باخیر. سونرا سولداکی جادایا بره لیر. دؤنور گئتسین اوغلانی گؤرور کی الینده سیگنال واردیر. تله سلک قاباغا گلیر. سیگنالی اوغلانین الیندن آلیر. ایچی ری گیریر. قاپینی برکدن چیرپیر.

اوغلان تابوتا یاخینلاشیب باجانین یانیندا اوتورور. اگیلیر قولاق آسیر. گؤزله ییر. ال ائشیگه گلمیر.اگیلیر تابوتون ایچینه باخیر. گؤزله ییر، ال ائشیگه گلمیر. گوللری تابوت اوستوندن گؤتورور. دسته لیر و تابوتون قاباغیندا یئره قویور. تورباسینی بیر – بیرینه وورور. گوزگونو تاپیر، چیخاریر و تابوتون اؤنونده یئره قویور. تورباسینی قاریشدیریر. داراغی تاپیر، چیخاریب تابوت اؤنونده یئره قویور. توربانی قاریشدیریر، بیر تیکه قورو چؤره ک تاپیر. چیخاریر و تابوت اؤنونده یئره قویور. اگیلیر. قولاق آسیر. قولاق آسیر. باخیر. خبر یوخدور. تابوت یانیندا یئرده اوزانیر. گؤزله ییر.