اورمان

 

صحنه گئنیش بیر یولدور. تاماشاچیلارین اؤنونده اولان دووار داشدان دوزه لمیشدیر و بیر پوتوشقا دمیر میله لریله آز آرا ایله یئردن قویولموشدور. پوتوشقا دالیندا بیر ائو واردیر. گؤزه ل بیر اؤرتوک ائوین ایچینی تاماشاچیلارین گؤزوندن گیزله دیر.

***

گنج بیر کیشی صحنه یه گیریر. الینده قیرمیزی گول دسته سی وار. یاواش – یاواش بارماقلاری اوسته قاباغا گلیر، گؤزونون بوجاغیله پنجره یه باخیر، اؤرتویو گؤرور، امین عئینی حالدا ناراحاند پنجره نین اؤنوندن کئچیر، دایانیب فیکره دالیر. چئوره سینه باخیر. دؤنوب یئنه پنجره اؤنوندن کئچیر. دایانیب قولاق آسیر. دؤنور و پنجره اؤنونده دایانیر و قولاق آسیر. اؤسگورور و قولاق آسیر، نئچه آن اؤزونو ایتیرمیش پنجره قاباغیندا آددیم آتیر، پنجره یانیندا دایانیر و قولاق آسیر. بیر یاخینلاشان توپلومون های باشاراغی قولاغا چاتیر.

کیشی باشی دالینی باخیر، گلیب پنجره اؤنونده دایانیر، اوجا سسله اؤسگورور، اوتاغین ایچینی گؤزدن کئچیریر. های باساراق یاخینلاشیر. کیشی توپلوما ساری باخیر و گوللریله پنجره نین شوشه سینه چالیر. توپلومون های باساراغی داها یاخینلاشیر. کیشی بارماقلاری اوسته قالخیب پنجره سینه شوشه سینه وورور، دال – دالی گئدیب صحنه نین اؤنونه گلیر، بلکه اوتاغین ایچینی یاخشی راق گؤرسون. توپلوم صحنه یه گیریب چیغیریرلار :"هورا!".

کیشی ایستیر پنجره یه ساری گئتسین، آنجاق توپلوم قاباغا گلیب صحنه نی دولدورورلار و چیغیریرلار :"هورا!". و دایانیرلار. هامیسی جیددی و قورخولو قیلیقلاری واردیر. قاباغا باخیرلار. تکجه گنج کیشی پنجره یه دقت یئتیریر. هامی سوسورلار. توپلومون قارشیندان اوجا سیگنال سسی قالخیر. خالق چیغیریرلار :"هورا!:. گنج کیشی باش اوزالدیر بلکه پنجره دالینی یاخشی گؤرسون. سیگنال سسی اوجالاراق ائشیدیلیر، خالق حیرصلی قیلیقلارلا یومروقلارین قالدیریب چیغیریرلار :"هورا!". گنج کیشی پنجره یه ساری چیغیریر :"آهای!". هامی سوسور. آلچاق بوی بیر کیشی الینده بیر چارپایا خالقین اؤن سیراسیندا تاپیلیر. چارپایانی یئره قویور و اوستونه چیخیر؛، گؤزلویونو بورنونون اوستونه قویوب، دقتله توپلوموسئیر ائدیر.

خالق حرکتسیز دایانیبلار. نئچه آن سوسقونلوقلا کئچیر، کیشی چارپایا اوستونده یومروغونو قالدیریر و اوجل سسله چیغیریر :"هورا، هورا!". چارپایادان ائنیر. خالق چیغیریرلار :"هورا!".

گنج کیشی چارپایا اوستونه گئدیر، گول دسته سینی کؤکسونه سیخاراق پنجره یه بره لیر. سونرا گوللری پنجره یه ساری آتیر. گوللر داغیلیر. خالق اونو چارپایادان آشاغی چکیرلر و اوز به اوزه بره لیرلر. اوجا دانیشاندان دوشونمز بیر سؤزجوکلر قالخاراق توپلومون قارشیندان ائشیدیلیر. خالق ناراضی قیلیقلاری واردیر. ایشیق یانیب – کئچیر./ خالق چیغیریرلار :"هورا!".

گنج کیشی خالقین سیراسینی قیراغا ووروب پنجره یه ساری گئدیر. خالق اونو سیرادان ائشیگه آتیرلار. اوجا دانشانین سسی حیرصلی آنیلماز سؤزجوکلری چئینه ییر. خالق قولاق آسیرلار، گنج کیشی یئنه توپلومون سیراسینا گیریر. هوندور بیر کیشی اونو توتوب ساخلاییر، بیر حالداکی اؤزو قابغا بره لیبدیر. گنج کیشی چیغیریر :"آهای!". اوجا دانیشانین سسی داها اوجالیر. سیگنال سسی اوزاقدان ائشیدیلیر، توپلوم یئنه یاواشجا چیغیریرلار :"هورا، هورا!".

گنج کیشی اؤزونو هوندور کیشی نین الیندن قورتاریب صحنه نین اؤنونه گلیر، پوتوشقایا باخیر، اومودسوزلوقلا یئرده چومباتما وورور، باشینی ایکی الی آراسینا آلیر. اوجا دانیشانین سس سایاغی قورخودوجو اولور، بیر اینجه خانیم گولوشونون سسی توپلوم ایچیندن ائشیدیلیر. گنج کیشی تله سیک قالخیب قولاق آسیر. قادین گولوشو بیر ده ائشیدیلیر. گنج کیشی توپلوم سیراسینا گیریر. ایتی بیر ایشیق یانیر و کئچیر. خالق باغیریرلار :"هورا، هورا، هورا!".

نئچه آن سوسقونلوقلا کئچیر. خالق گؤزو یولدا و قورخهراق اوز به اوزه سوزورلر. بیردن گولله نین یاغمور سسی قالخیر. توپلوم سئلی دؤنورلر، قورخموش قیلقلارلا قاچیرلار و صحنه ده ائشیگه چیخیرلار. گولله سسی و آددیملارین سسی بیر زامانا قده ر ائشیدیلیر. صحنه بوشدور و توپلوم گنج کیشی نی ده اؤزویله آپارمیشدیر. ازیلمیش گوللری کوچه نین داش دؤشورونده گؤرونور. نئچه آن کئچیر، پنجره نین اؤرتویو قیراغا چکیلیر و پنجره تله سیک آچیلیر. گؤزه ل بیر قیز، گؤزلرینی اووکالایاراق تعجوبله کوچه یه و گؤیه باخیر و فیکره دالیر. سونرا توزون بیر نفس آلیر. بیردن یئرده ازیلمیش گوللره دقت یئتیریر، الینی میله لر آراسیندان گوللره ساری اوزالدیر، الی چاتمیر. بیر قارقا سسی یاخیندان، دامدان اوجالیر.

***