علی اورمولودان نئچه شئعر:
آدسیز
سنین او باخیشین ایپک دی، نه دی!
دویورام روح اوخشار بیر ترانه دی.
یام – یاشیللیق یاغیر او گؤزلریندن
دئ گؤروم آ گؤزه ل عاشیقانه دی!
دردی درمان ائدیر سنین گولوشون
ایسته ییم گؤرمکدی
درد بهانه دی.
باخما کی دن دوشوب تئل – تئل ساچیما
بودا عاشیقلیکدن بیر نیشانه دی. . .
12/1/95
***
آدسیز
گوندوزومون سس – کویوندن خبر یوخ
سوکوت بوروموش اوتاقدا یالنیز سنی دوشونورم سنی!
ائشیدیرم سؤزلرینی، سسینی
سنین هاوان باشیمدا
دایانیرام آینا قارشیندا
باخیشین دئییر مندن گیلئیلیسن
دئییرم گیلئیلی لنمه گؤزه لیم سن کی لئیلی سن
لئیلیم، ای گیلئیلیم!
دوشوندویوم یالنیز سنسن
سن ده بیلیرسن. . .
3/1/88
***
آدسیز
یالقیزلیق سُفره سینده نئچه نیمچه خاطیره
ایکی ایستیکانلیق باش درمانلیغی
گوزگولرده گولوشون پرده لی
پنجره آرخاسیندا یاغیش گیله لری گوموشلنمیش
و بولودلانمیش بیر کومادا سنی آراییرام ای ایتگین یاز
بو اؤزو ده گئجه لرده بیر آهیم دیر
و پرده
سؤز سه گاهیم دیر.
***
چیلله
بعضی واختلار نئجه ده تئز گئج اولور
دوستونو گؤرمه یه واختین اولمور
ائشیدیرسن بیردن، او چیخدی سفره
و سالام سؤیله مه یین آیدا قالیر، ایلده قالیر
بئله کی گؤروش سؤزو دیلده قالیر
قاییدیرسان اوندا خاطیره لر دفترینه
اوره یینده یازیلیر
"روحون شاد"
ساخلییرسان او زامان چیلله سینی. . .
30/9/90
***
آذربایجان ادبیاتی، تاریخی و اینجه صنعتی