مئی آیی نین بیری - ایشچی گونو موبارک!
بوگون مئی آیی نین بیری – دونیا ایشچی لر گونودور. من ده بوگون تبریک دئیه رک زحمت چکن – الی قابارلی ایشچی لره آزادلیق و حقلری نین آلینماسینی آرزو ائدیرم. بو گونون موناسیبتیله ایشچی لره حصر اولونموش بیر شعری اوخوماق گؤزل اولور. علیرضا اوختای آذربایجان مدرن شعری نین قوروجوسو ایشیق آدیندا بیر شعری وار. بؤیوک حبیب ساهیر اوختایی چوخ سئویر و دیرلی بیر شاعیر کیمی قبول ائدیر؛ اوختای مفتون امینی نین نئچه شعرینی ترجمه ائتمیش و او دا اوختای حاققیندا دانیشیر و اونو اؤزونه بیر معلم کیمی قبول ائدیر. هر حالدا ایشچی گونو اولدوغو اوچون، اوختایین ایشچی لره یازدیغی ایشیق شعرینی بورادا گتیریرم:
ایشیق
آمان ـ آمان، قارا تئللی کبریتچی،
دامجی ـ دامجی قارانلیقدا تر تؤکن،
اود یوردونون قیزیلجا داغلاریندان،
میلیونلار تُن گوگورد چکیب سؤکگیلن،
کرخانادا ائیله کبریت تؤکگیلن،
کی ظولمتین کؤکون یاندیریب یاخسین،
بوتون عالم بیزلره حیران باخسین...
آمان ـ آمان، ساری تئللی زنجانلی!
آمان، گؤزهل پیچاقلار یونان اوغلان،
آغ پولاددان، پولاد تکین سوموکدن،
ائله کسکین پیچاقلار یونگیلن کی،
ییرتا بیلسن ظولمون چیرکین اورهگین،
قیرسین اؤلوم قوشونون دا قانادین،
بلکه چوبان آزاد چالسین توتهیین...
آمان ـ آمان، اوزاق کندده، اۏبادا،
اوجا بویلو، خورما تئللی معلم!
ایشیقلیق آچ قارانلیق کلاسلارا!
ایشیقلیق آچ کلاسلاردا توپلانان،
آی ـ اولدوزسوز او کیچیک دونیالارا،
کورلوق چکمیش بالاجا اینسانلارین،
اوددان ایستی ـ قاردان آیدین قلبینده،
بشریت سؤزون تکجه یازگیلن،
اینسانلارین قول قانادین بالییان،
گؤیلردهکی قورخو فیکرین پوزگیلن.
آمان ـ آمان گون گؤرمهین توخوجو،
ایلمک سالان دفعه دؤین آه چکن،
چیراغ تکین یانان، قانین یاندیران،
کیرپیکلری پیلته کیمی گؤزلهنن.
او نهدیر هئی دؤیونلورسن کسیرسن،
اورهک سسین بوغازیندا بوغورسان.
بیرجه یولدا، خالچاندا بیر شکیل سال،
باخانلارین دیزلرینی قوروتسون،
ظالیملرین بارماقلارین دوگونله،
سلیمان تک قالخ دئولری زنجیرله،
قوی خالچانی ساتان ـ آلان بیلسین کی،
سنین دیلسیز اللرینده نهلر وار،
خالچا اوسته باشماقلی یئریینلر،
بیلسینلر کی دیلسیز دینسهنه قوپار.
آمان ـ آمان، رومدان گؤیچک اورمودا،
گوموش تئللی، قوجامان چاخیر چکن!
کئچمیشلرین اییین توتان کوپلرده،
عشقین دادین وئرهن چاخیر چکگیلن!
قوی حیاتین آغیر یولون کئچنلر،
دینجلسینلر اوزوم بولاقلاریندا...
ائله چاخیر چکگیلن کی یاندیرسین،
اورهگی ده، اورهکدهکی، دردی ده.
قوی چاخیرین، بیر چوخ سؤزلر اندیرسین،
خلقیمه کی، گول اکدی، خار دردی ده.
1344 ـ جی ایلین یایی، تبریز
آذربایجان ادبیاتی، تاریخی و اینجه صنعتی