بایرام گله‌نک‌لری:

باهارین گلمه‌سیله طبیعت گؤزل‌له‌شیر، گول-چیچکلر آچیلیر، طبیعت یئنی‌دن جانلانیر. آذربایجان تورک خالقی دا بو بایرامی عزیزله‌ییب و بایرام ائدرلر و مختلف دبلر و گله‌نکلرله اونو قارشیلایارلار. بو گله‌نک‌لرین بیری بایرام سفره‌سینی آچماقدیر. بو سفره‌یه برکتلرین و یا نعمتلرین یئددی‌سین ییغیب سفره‌نی بزه‌یرلر. فارس خالقی دا بو گله‌نه‌یی بیزلردن- بو توپلاقلارین یئرلی خالقیندان آلیب آنجاق برکتین «یئددی‌سین» سؤزونو اؤز دیللرینه ترجمه ائده‌رک «هفت سین» دئییمینی چیخارمیشلار؛ بیر حالداکی بو سفره‌ده قویولان اشیاءنین سین حرفیله آراسی یوخدور. نییه یئددی ساییسی اورتایا گلیر؟ بیلیرسینیز ساییلارین بیر سیراسی مقدس ساییلیر او جومله‌دن ۷، ۱۲، ۳۰، ۶۰، ۷۲ و... همیشه حؤرمتله قارشیلانیر. مثلاً ۷ گؤی، ۷ شهر، ۷ گون، و... / ۱۲ امام، ۱۲ آی (بیر ایل)، ۱۲ بوی (دده قورقود کتابی نین داستانلاری نین ساییسی)، و...

ایندی سفره یه دوزلن اشیایا باخالیم؛ برکتلرین یئددیسین‌دن بیرینجیسی:

۱ گؤی (آسمان) برکتی: آینا، شمع و قرآن. قرآن اسلامدان سونرا مسلمانلیغی قبول ائتدیکدن سونرا آرتیریلمیشدیر. گؤروندویو کیمی بو اوچو: قرآن – آینا و شمع ایشیقلیق سیمگه‌سی‌دیر.

۲ یئر برکتی: یئردن بیتن تاخیل: بوغدا و تاخیلللار، او جمله‌دن قوورغا یا قوورولموش بوغدا، حتی بیر تیکه چؤرک ده سفره‌یه دوزلر.

۳ آغاج برکتی: آلما، ایگده و نارینج، آغاج میوه‌لریندن اولاراق سفره‌یه دوزولر. یئنه ده بونلارین هئچ بیری سین حرفینه باغلی دئییلدیر.

۴ گؤیرمک برکتی: گؤورنتیلردن اولان ایلک باشدا گول، اؤزللیکله نوروز گولو -آذربایجاندا بو گونلرده قار ایچیندن باشینی قووزاییب و یازین گلمه‌سینی مؤژده وئرر. اونون یانیندا سونبول، و باشقا گوللردن ده سفره‌یه قویاریق.

۵ آلیش-وئریش برکتی: یئنی ایل آلیش-وئریشلریمیز فایدالی و برکتلی اولسون دئیه، پول دا سفره‌یه قویاریق. قاباقلار اسکناس اولمادیغی اوچون میس و یا قیزیل سکّه قویاردیلار؛ بوگون اسکناس قویولور، مخصوص حاللاردا پولو قرآن آراسینا قویوب و گؤروشه گلن آداملارا – داها برکتلی اولسون دئیه، قرآن آراسیندان سیفته وئره‌ریک.

۶ سو: حیات سویا باغلی‌دیر و سودان عمله گلمیشدیر. اونا گؤره سویو دا سفره‌یه قویاریق، آیدینلیق سیمگه‌سی‌دیر و ایچینده قیرمیزی بالیق دا اویناراق.

۷ حیوان برکتی: حیوان‌دان گلن برکتلردن یومورتا قویاریق؛ اونو بزه‌ییب حیوان برکتی دئیه‌رک بالیقلا برابر سفره‌میزه دوزه‌ریک. گؤردویونوز کیمی سفره‌میزده واجب اولان شئیلردن بالیق، یومورتا، قرآن، آینا، شمع و باشقا باشقا اشیالار هئچ بیری هئچ بیر دیلده: تورکجه و فارسیجادا، سین حرفی ایله باشلانماییر. بو گؤسته‌ریر کی سفره دوزمه گله‌نه‌یی بیز آذربایجان تورکلرینه عاید اولان بیر دب یا رسم‌دیر.

ایل تحویل اولان چاغدا، بیر پیشمیشی ده قایناق حالیندا اولماسی برکت گتیرر. بونا گؤره مثلاً تبریزده دولما حاضیرلاییب ایلین تحویل چاغیندا قایناماقدا اولار. دولمادا گؤورنتیلر، تاخیللار و ات ده ایشله‌نیر و بونلار ایلین برکتلی اولما آرزیسینی گؤسته‌ریر.

سؤزومون سونوندا یئنه اوغوز بایرامینی سیز سئویملی خالقیمیزا تبریک دئییب، خوش ایلده خوش گونلر آرزیلاییرام. خوشجا قالین!