اولدوزلار اله نیر- 2
جعفری تکجه شعر یازماقدا یوخ، بلکه خطاطلیقدا و رساملیقدا دا بیر ماهیر اوستاد کیمی چیخیش ائدیر. شعر عالمینده اوستاد شهریاردان الهام آلاراق، حیدربابایا سلام و سهندیه اثرلری نی اولگو ائده رک، الهام قایناغی تک یارارلانیر. سونرا "سحر خانیم" چاغداش شعریمیزین باشقا بیر زیروه سی تانیناراق، گنج شاعیریمیزه ائتکی بوراخیر و بو ائتکی چوخ درین و اثرلی اولموشدور. "آغ آتیم" کتابیندا هله بیر یئنی یئتمه شاعیرله اوز به اوز اولورساق دا، دونیاسی ساده و هردن بیر قارما – قاریشیق اولورسا دا، بو مرحله لری گئریده قویوب ایندی داها اؤز ائلینی، اؤز دیلینی قوروماغا جان آتیب، بو گئنیش و درین الهام قایناغینی منیمسه ییب، قوشدوغو شعرلر داها آخارلی و داها اوره یه یاتان اولور. جعفری غزل ایله ده شعر دونیاسینا یاخینلاشیر و لیریک ماهنی لاری دا گؤزه ل اولور:
یارین بویون قوجاقلادیم، یار آغلادی، من آغلادیم،
ییغیشدی قونشولار بوتون، جار آغلادی، من آغلادیم.
باشیندا قارلی داغلارا دانیشدیم آیریلیق سؤزون،
بیر آه چکیب، باشینداکی قار آغلادی، من آغلادیم.
اوره ک سؤزون دئدیم تارا، سیملر اولدو پارا – پارا،
یاواش – یاواش سیزیلدادی، تار آغلادی، من آغلادیم.
ائله ایکی اسدی بیر خزان، تالاندی گوللریم منیم،
خبر چاتینجا بولبوله، خار آغلادی، من آغلادیم.
طاریمدا نار آغاجلاری، منی گؤروب دانیشدیلار،
بویومو زیتون اوخشادی، نار آغلادی، من آغلادیم.
دئدیم کی حق منیمکی دی، باشیمی چکدیلر دارا،
طناب کسنده بوینومو، دار آغلادی، من آغلادیم.
جعفری یم بویوم بالا، غم سینمده قالا – قالا،
یار جانیمی آلا – آلا، یار آغلادی، من آغلادیم.
جعفری "آغ آتیم" کتابیندا سربست شعرلر ده دئمیشدیر؛ ایندی ایسه غزلدن آرتیق، سربست شعرلر یازمادادیر. "ساوالان" شعرینده، شاعیریمیز میللی شعورا مالیک اولدوغونو گؤسته ریر. "آپارتومان" سریالیندا تورکلره اهانتلرین قارشیندا اعتیراض سه سینی قالدیریر و اوجادان بئله سؤیلور:
اوخو آشیق، اوخو سن بیل او کی تانری تانییبسان،
سؤزوزه دوز جالاییبسان،
سئودیگیم قوی سازا گلسین
بولبولوم آوازا گلسین
یازمیشام ائیوازا گلسین
گوج آلاق قوی ده لی لردن
باج آلاق اجنبی لردن
او کی بیلمیر نبی کیمدیر قویون آذر ائلینی مسخره سانسین
بیر عؤموردور کی فضولینی – نسیمی نی دانیب
ایندی ده دانسین
شهریار تک سن اوجالت باشیوی تا عرشه دایانسین
قوی باخا کور تر ایچینده جوموبان اؤلسون، اوتانسین
او کی آخساقدی یوبانسین.
او کی تورکی دیلین اسکیتمه گه تصویره سالیبدی،
او کی آذر بالاسین ایندی ده آشغالچی سانیبدی
او یازان بللی دی کی فیکرینی طاغوتدان آلیبدی
او رژیمدن دی قالیبدی!
یوخسا آذر بالاسیندا چیخیب علامه ی دوران
اونا دونیا باش اگیر فلسفه ده، بیرجه نه ایران؛
جعفری هر شهره گئده رکن اؤز شعرینی اوخوماقلا دینله ینلرده هیجان یارادیب، لاخلادیر و زنگان آدینی دیللره سالیر. او، تهراندا، تبریزده شعرلریله قیزغین قارشیلانمیشدیر. زنگاندا بوتون شعر مجلیسلرینده شعر سئوه رلری سئویندیرمیشدیر.
جعفری، کئچن ایللرده چکدیگی تابلولاردان بیر سرگی تشکیل وئرمیش و تاماشایا قویموشدور. او، ماهیر و باجاریقلی بیر رسام کیمی ده تانینمادادیر. طراحلیقدا ماهیر اولاراق، تامام بویالاری یاخشیجا تانییر، سویوق – ایستی نی یاخشی قاتیر، تابلولاریندا دا توپلومسال مسئله لره توخونور. بو استعدادلی شاعیر اوچون باشاریلار دیله ییب، آشاغیداکی شعر ایله سؤزوموزه سون قویوروق. بو شعر، زنگاندا بیر اوغلان و قیز – نغمه آدیندا – عشقلری اوچون اؤزونو اودا چکمیش و شهرده چوخلو هیجان یاراتمیشدیر. شاعیر، نغمه نین دیلیجه دانیشیر:
یئنه آرغین، یئنه یورغون،
یئنه بیر دولغون اوره ک، یارالی قوش کیمی چیرپینمادادیر
یئنه نیسگیللی اوره ک یانمادادیر.
کؤز، کؤز اوسته قالانیر، نئیله مه لی؟
آلیشیر، داغلانیری، نئیله مه لی؟
سیرریمی نه آتا بیلدی، نا آنا،
گئدیرم چیلله خانا، چیلله خانا.
***
من گره ک یار یانان اودلاردا یانام
یار دئییب یار دولانام، نه روا عشقی دانام؟
من باهار نغمه سی یم، نغمه آدیم،
گلمیشم عشق زولیخا یارادیم
هانی شیرین، هانی لیلا؟
قویام حسرتلی باشی دیزلرینه
بیر باخام غمله دولا گؤزلرینه
دییه م عاشیق اودو اودلاردا یانا
گئدیرم چیلله خانا، چیلله خانا.
***
گئدیرم، دونیا بویو داردی منه،
یانماسام عشق اودونا ، عاردی منه.
آجیمیش عشقی شیرینلشدیره رم
آیری دوشموش ائلی بیرلشدیره رم.
قوی دیریلسین اؤلن احساسلاریمیز
من او غفلت جاداسین تاپلامادیم
یانمییان لامپا کیمین لاپلامادیم
نازلی یار گئتدی آیاق ساخلامادیم
یار ائشیکده ن اؤزون اودلاندیردی
من ایچیم یاندی، منی یاندیردی
سانما ال – آیاق چالمادادیر
یارین عشقی جانیمی آلمادادیر.
لئیلی بو قرنده اولسایدی اگر
یاندیراردی اؤزونو عشقه مگر؟!
عشق سولطانی فرج وئرسه بیزه،
سئل اولوب گؤز یاشیمیز دؤنمز دنیزه
شیشه ی عمری چالیب سیندیرارام
عشق اودوندا اؤزومو یاندیرارام
دولدوروب کاسه ی صبری جالارام
چیخارام داغلارا، های – های سالارام
نازلی یار گئتدی، نه جور تک قالارام؟
ایسته ییر باشیما دونیا دولانا
گئدیرم چیلله خانا، چیلله خانا.
***
وامیقین جاندان کئچن عذراسییام
من یانان مجنونومون لئیلاسییام،
من محبت عشقی نین دریاسییام
نغمه ی والاسییام
عرشق شئیداسییام.
عشقده فرهاد و شیریندن باشام
اصلییه عشق عالمینده یولداشام
کیم تیکر دونیا باغین باعچاسینا
کیم بوکر عشقی عاغیل بوقچاسینا؟
سانمایین عشق اؤلوبدور، دیری دیر،
نغمه عاشقلر سیراسیندان بیری دیر.
تاپارام عشقیمی هر یئرده اولا
قویمارام تک دولانیب رنگی سولا
ایندی دای گئتمه لی یم، هر نه اولا!
عشق دریادی، عاغیل قطره سی دی
نغمه نین سون سه سی عاشیق سه سی دی
منه دونیاده اؤز عشقین بس ایدی
سؤیله مندن سورا بیر غملی سلام،
سئودیییمدن منی آیری سالانا
گئدیرم چیلله خانا، چیلله خانا.
***
سن آغیرز داغ کیمی داغلار باشی سان،
بیر عؤموردور سینه ده غم داشیسان
سن کی مندن سورا ایللر یاشیسان
سن کی زنگانلی لارین یولداشیسان
بیر چیغیر! بلکه یاتانلار اویانا،گئدیرم چیلله خانا، چیلله خانا.
***
آذربایجان ادبیاتی، تاریخی و اینجه صنعتی