12 جیلدلیک "تاریخ ادبیات آذربایجان" کتابی رونمایی اولدو

خمسه آدینا دیل و مدنیت اوجاغی نین آچیلیش مراسیمینده 12 جیلدلیک تاریخ ادبیات آذربایجان کتابیندان رونمایی اولدو. بو 12 جیلد کتاب اوچ شهرده – تبریز، زنگان و تهراندا یاییلیب تهران بین الخالق کتاب سرگیسینده ساتیشا بوراخیلیر. آنجاق بو مراسیمده اوندان اؤرتوک گؤتورولدو. ایندی بو 12 جیلد ایله قیسا صورتده تانیش اولالیم:

بیرینجی جیلد آذربایجان تاریخی، ایران تاریخی ایچینده 2500 ایل یوخ، بلکه آریالاردان 4500 ایل اؤنجه یه گئدیب چاتان اسکی بیر تاریخ آراشدیریلیر و آذربایجاندا آغیر مدنیت قوران هورری لر، گوتتی لر، آراتتی لر، اورارتولار، ماننالار، مادلار، پارتلار التصاقی دیللی مدنیتلر صاحابلاریلا تانیش اولوروق، بونلار مین ایللر بویو بورادا مدنیت قورموش و دیلیمیزین کؤکلرینی درینلشدیرمیشلر. بو جیلدده تاریخ ان درینلریندن زامانلاردان اسلام دؤورونه قدر آراشدیریلیب آچیقلانیر. هابئله تورک دیلی نین اؤزه للیکلری و گؤزه للیکلری آچیقلاناراق، آذربایجان تورکجه سی نین کؤکلری آراشدیریلیر. بورادا اوخون و یئنی سئی آبیده لریندن اؤنجه الده ائدیلن تورک دیللی سندلر ده آچیقلانیر. بورادا 10 یازیلی سند گؤسته ریلیر.

2 – ایکینجی جیلدده تورک دونیاسی نین اورتاق ادبیاتی و اثرلری آراشدیریلیر و قوتادغو بیلیک، دیوان لغات التورک، عتبه الحقایق و بیر چوخلو اثرلر تانیتدیریلیر. هابئله آذربایجاندا عرب و فارس دیللی ادبیات دا آچیقلانیر.

3- اوچونجو جیلدده خزرلرین تاریخی آچیقلاناراق، اسلام دینی نین گلیشمه سیندن دانیشیلیر  و تورکلرین ایراندا حکومت اله آلدیقلاری آچیقلانیر. هابئله ادبیات ساحه سینده تورک شاعیرلرین غزنویلرله برابر ایراندا کلاسیک ادبیاتینی قوراراق، تورکجه اثرلرین اورتایا گلمه سی قونو ساییلیب، ایلک دفعه تورک اثرلری تانیتدیریلیر. بورادا زمخشری نین الکشاف –  قرآن تفسیری تورکجه یازیلاراق، مقدمه الادب – ایکی دیللی عربجه و تورکجه اثری اورتایا قویولور و تورک دیلینده اولان یوزلرجه کتابلار تانیتدیریلیر. بو دؤر دوغرودان دا اسلام گؤزه للیکلری نین بایراقچیسی اولان و بو گؤزه للیکلری گؤسته رن تورک ادبیاتیلا تانیش اولوروق.

4 و 5- جی جیلدلرده آذربایجان کلاسیک ادبیاتی اله آلیناراق نظامی گنجوی نین تورکجه اثرلریله برابر یوزلرجه باشقا شاعیرلرین شئعر یارادیجیلیقلاریندان علاوه، بؤیوک خطاطلار، رساملار، موسیقی دانلار و باشقا صنتکارلار تانیتدیریلیر. بورادا سلطان شاعیرلریمیز اؤنملی بیر موقعیت قازانیرلار. سلطان شاعیرلر او جمله دن سلطان احمد برهان الدین، سلطان حسیین بایقارا، بابر شاه، سلطان یعقوب قاراقویونلو، جهانشاه حقیقی، شاه خطائی و باشقا شاعیر شاهلار و خاقانلارین اثرلری و یاشاییشلاری ایله تانیش اولوروق.

6- جی جیلدده آذربایجان اوسطوره لری و فولکولورو بوتون ساحه لری سؤز قونوسو اولور و اوسطوره لرله برابر ان اسکی داستانلار، ناغیللار، افسانه لر و سونرا آشیق ادبیاتی ایله تانیش اولوب، باشقا فولکولوریک قونولار: بایاتیلار، ماهنیلار، سایالار، تاپماجالار، آتالار سؤزو و تامام فولکولور خزینه میزله تانیشلیق وئریلیر.

7 و 8- جی جیلدلرده آذربایجان رئالیزم ادبیاتی و یارادیجی شاعیرلری و صنتکارلاری نین یارادیجیلیق و یاشاییشلاری تانیتدیریلیر. بورادا یئنه یوزلرجه شاعیر ، خطاط، رسام، فیلسوف، عالیملر ایله تانیش اولوروق. بورادا ادبیاتیمیز واقف له باشلاییب، مشروطه انقلابینا قدر گلیشیر

9 و 10- جو جیلدده انتقادی رئالیزم ایله تانیشلیق سؤز قونوسو ساییلیر و مشروطه انقلابینا حاضیرلیق یارادان ادبیاتدان سؤز گئدیر. بورادا آذربایجان ادبیاتی خالق ایچینه گله رک، ایلک رومانلارین یازیلماسی، ایلک نمایشنامه لرین صحنه یه چیخماسی،  موسیقی ده اوپئرت لرین و سیمفونی لرین یارانماسی، ایلک درگیلر و یوزلرجه داستان و حیکایه لرین تاثیری ایله تانیشلیق وئریلیر.

11 و 12- جی جیلدلر چاغداش آذربایجان ادبیاتینا توخوناراق، مشروطه انقلابیندان بوگونه قده ر تورک ادبیاتی نین گلیشمه سی ایران تورپاقلاریندا – گونئی آذربایجاندا تانیش اولوروق. بورادا یوزلرجه تاثیر یارادان شاعیرلر و یازیچیلارین یاشاییشی و اثرلری بحث قونوسو اولور. چاغداش ادبیاتیمیز بیر درین گرگینلیکله اوز – اوزه گلمه سی نین سببلری و اونون چئشیدلی دؤورلره آراشدیریلیر.

   آنجاق یازار بو گئنیش ساحه ده میدان آچیرسا دا، هئچ زامان بو ایشی یئترلی بیلمه ییب، تکجه بو چالیشماغا یول آچیرسا خوشبخت اولدوغونو بیلدیریر.