*** ایراندا تورک دیلی و ادبیاتی ***

گلین دیل، تاریخ و ادبیاتیمیزی اؤیره نک

1

1) 21جی یوزایلده مجازی دونیا چوخ گئنیش و الده ائدیلن بیر آراجدیر. ایلیشگی لر دونیاسی کئچن یوز ایلین (20جی یوزایلین ) شعاری ایدی و بوگونکو یاشادیغیمیز یوز ایل – مجازی دونیاسی دیر. ایلیشگی لر داها رادیو، درگی، تلویزیون و سایره دن یوخاری قالخیب و اینترنت دونیاسی تامام ایلگیلری یاخینلاشدیریب و بیر دوگمه ایله دونیانین بو تاییندان او تایینا نئچه ثانیه ده ایلگی قورماقلا چوخلو معلوماتی یئر به یئر ائتمک اولور. بیز ده بو دونیادان اوزاق گزه بیلمه ریک. اوندان دوزگون یارالانماق چوخ گؤزل و یاردیمچی اولا بیلر. آنجاق بو آراجدان دیلیمیزی .و ادبیاتیمیزی یایماغا چالیشماق بوگونکو تکلیف لریمیزدن دیر. من ده بورادا چالیشاجاغام قیسا یازیلارلا آذربایجانیمیزین دیل، تاریخ و ادبیاتینین گئنیش، گوجلو و گؤره للیگینی گؤسته رم.

2) بیز ایرانلی ییک. حقیمیزی ایراندا آراییب الده ائتمه لی ییک. گؤزوموز اؤز وطنیمیزده دیر. آنجاق قونشو و دیلداش اؤلکه لرله دوستلوق، و ساغلام گل – گئت بیر ابتدایی و انسانی ایستک کیمی ده ایسته ییریک.

3) تاسوفله مدرسه میز، بیلیم یوردوموز، سراسری درگی میز، تلویزیونوموز و باشقا امکانلاریمیز – آنایاسایا آرخالاندیقدا بیزیم ابتدایی و اساسی حقلریمیزدیر – اولمادیغیندان سؤزوموزو چاتدیرا بیلمه ییب، گؤزَل ادبیاتیمیزی دا تانیماییب، تانیندیرا بیلمه ییریک. بونا خاطیر مجازی دونیادا تارتیشمالار جانلانیر و ایش داعوالارا چاتیر. البته دوشمن ده بو بولانلیق سودان بالیق توتور. بو ساحه ده بیر گروه دیلیمیزه طرفدار و بیر گروه دا دوشمان دورورلار. آنجاق معلوماتین آز اولدوغو هر ایکی گروهدا گؤرونور و نهایت ایش چتین یئرلره چاتیر. بو اونو پان و او بونو شوونیست آدلاییر. اومورام معلومات آرتیریلسا هم تعصوبلر و هم عصبانیت لر آزالار؛ بلکه ده ایش آنلاشماق و تفاهم اوچون یول آچدی. بونو بیلمک لازیمدیر کی ادبیات سئوگی، سئوینج، و گؤزه للیک لر اوچوندور. دیلیمیز، ادبیاتیمیز باشقا دیللر کیمی گؤزَل، گوجلو و گوونمه لی دیر. ادبیات سئوگی دونیاسی دیر، نفرت قالسین انسانلاری سئوه ین لره. گؤزه للیگی سئوه ن انسانلارلا دانیشیرام.

4) یئنه تأسوف یئری واردیر کی آنادیلینی سئومه یی بیزه گوناه ساییرلار! تاسوف یئری اوندا داها چوخالیر کی گؤرورسن بیزه قارشی دایانانلار باشقا دیللی لر یوخ، بلکه اؤز ایچیمیزدن اولانلاردیر. دئمیشلر: آغاجی قورد ایچیندن یئیر! دوغرودان دا بئله آداملارا نه دئمک اولار؟ مانقورد!؟ منجه بونلارین بیر سیراسی ساتقین اولاراق، آنجاق چوخو معلوماتسیز آداملاردیر. اونلاری دوشوندورمک و باشا سالماق لازیمدیر یوخسا یامان – یوغوزلا داورانیش ائتدیگیمیز، بیز ایله اونلارین فرقلرینی پوزار.

5) ایران بیزیم وطنیمیزدیر و بیز تورک دیللی ایرانلیلار ایرانین جمعیت باخیمیندان باشقا ائللردن – فارس، عرب، کورد، بلوچ و سایره – داها چوخ و آرتیغیق. بیز مین ایللر بویو بورادا یاشاییب و یاشایاجاییق. دیلداشلاریمیز دا ایرانین قوزئییندن گونئیینه، دوغوسوندان باتیسینا قدر یاییلیبلار. بو یاییلمانین تاریخی ده اوزون بیر تاریخدیر، دونن – بوگونون سؤزو دئییل. بو اؤلکه بیزیم دیر و بورادا مین ایللر بویو باشقا دیللرده اولان وطنداشلاریمیز – عرب، کورد، لور، بلوچ و سایره ایله چیگین چیگینه آنا تورپاقلاریمیزدان مودافیعه ائتمیشیک و بو یولدا جانلار قوربان وئرمیشیک. عینی حالدا صمیمیت له یاشامیشیق غملرده - شادلیقلاردا اورتاق اولموشوق. یئنه ده بئله اولاجاقدیر.

6) آذربایجان تاریخ بویو بو فخره مالیک اولموشدور کی اوچ دیلده بیر ادبیاتا صاحاب چیخیب و اسلام دونیاسی نین ادبیاتی – عربجه، فارسجا و تورکجه – بورادا جانلانیب و دده – بابالاریمیز هر اوچ دیلده دوزغو و دوشونجه لرینی یاییبلار و کتابلار یازیبلار. دونیادا هئچ بیر ائل و ملت بئله بیر دورومدا اولمامیشدیر. بیز ده بونا فخر ائده رک هر اوچ ادبیاتی و دیلی باغریمیزا باسیب اؤزوموزونکو بیلیریک.

7) بیزه قارشی چیخانلار ایکی تیپ اولورلار: بیر سیراسی ذاتی خراب ساتقینلاردیر. اونلار تاریخین ملعونلاری دیر و اونلارین اصلاح اولمالارینا هئچ بیر اومود یوخدور. بیر سیراسی دا معلوماتلاری نین آز اولدوغو سبب لره گؤره بیرینجی گروها یاخینلاشیبلار. بونلاری اؤزوموزدن قووماماق گره ک. اینانیرام بو انسانلارین معلوماتی چوخالدیقدا و حقیقت لری، هابئله گؤزه للیک لری گؤروب – آندیقدا بیزه طرف گله جکلر.

8) اما اؤز آرامیزدا بیر سیرا یانلیش فیکیرلر و حرکتلر ده واردیر کی آدیمیزی پیسه چیخاریر. بونلاردا دا معلوماتین آز اولدوغو سبب لر اونلاری تارتیشمالار و عصبی لشمه لره یؤنلدیر و اللری بوش اولدوقلاری اوچون قارشی دوران گروهلار الینه باهانا وئریرلر و دوشمان بیزیم دوستلارین نقصاملارینی بوتون آذربایجانلی لارین حسابینا قویوب، دیلیمیزین و ادبیاتیمیزین نقصانی سایماغا چکیلیرلر. بیز بو یولداشلاری ملی دویغولارینا گؤره باغریمیزا باسیب، متانته، درین دوشونمه یه و معلوماتین آرتیریلماسینا چاغیریب و آرامش ایله علمی مباحثه لرده اشتراک ائتمه لرینی یئترلی بیلیریک.

9) بیز بورادا ساده بیر دیل ایله قونوشاجاغیق. بیزه باشقا دیلده دانیشماق یاراشماییر. دامین او طرفیندن و بو طرفیندن دوشمک ده بیزه یاراشماز. ساده خالق دیلینی علمی مباحثه لره دایاق گؤتوروروک.

10) هر سؤزون سونوندا کتابلار تانیتدیرماغی اؤزوموزه وظیفه بیلیریک. اینانیرام مجازی دونیا هر نه قدر یاخشی اولورسا دا، بیزه سند اولمور، چونکی بوگون یازدیغینی صاباحی گون تاپا بیلمیرسن. بیزه سند اولان کتابلاردیر. یازیلاریمیزی کتاب ائده رک سندلشدیرمک تکلیفینی بوینوموزدان آتا بیلمه ریک.

11) غرض بو باش آغریلاردان آذربایجانیمیزا، دیل و ادبیاتیمیزا دایاق دورماق، وطنیمیزی ایره لی سورمک و حقلریمیزی الده ائتمکدیر. بو یولدا چالیشماق مقدس ساییلیرسا ، یازار طرفیندن هر جوره یانلیش گئدیرسه یولداشلاردان منه اؤنری وئرمه یی دوستلوقدان بیلیرم. عئینی حالدا منه قارشی اولانلارین یامان یوغوزونو دا گؤزله ییرم. آنجاق بونلارین تنقیدلریمی اولماسا من ده اصلاح اولماییب و گئری قالاجاغام. دوستلارین الیندن اؤپوب، دوشمنلره صبر و دوشونجه آرزیلاییرام.

داها آرتیق معلومات ایسته ین لر، منله ایلگش قورماغا آشاغیداکی سایتا موراجیعه بویورسونلار:

www..qizilqelem.ir

*******