زنگان شاعیرلری نین تانیتیمی - 33 / پیمان بازرگان
33
پیمان بازرگان
پیمان بازرگان زنگانین غزل شاعیری دیر. اونون چاغداش شاعیرلر ایچینده اؤز یئری و اؤز ده یری واردیر. پیمان زنگاندا آنادان اولموب، بویا – باشا چاتاراق، تحصیل آلمیش و یاشاییشی دولاندیرماق اوچون ایشه داخیل اولموشدور؛ آنجاق خالقینا خدمت یولو آختاراراق شعره اوز گتیرمیشدیر. پیمانین شعرلرینده دالغالانان سئوگی و محبتدیر. دیلینه، ائلینه خدمت اوچون خالقی نین دردلرینی یونگوللتمک اوچون شعر یازیر. آنجاق بونونلا راضیلاشماییب، داها آرتیق خدمت اوچون حکیملیک، توخناق بیتگیلری و تداوی اوچون چالیشمیش غربت اؤلکهلره سفر ائدیب، تحصیل آلیب، توختاق بیتگیلری ساحه سینده معلومات قازانمیش، نئچه ایللر چالیشاراق بیر اوزمان و حکیم کیمی انسانلارین دردلرینی و آغریلارینی تداوی ائتمهیه چالیشیر. پیمان آذربایجان جمهوروسو و چینده بیتگی داوالارلا نوخوشلوقلاری درمان ائتمه یوللارینی اؤیرنمیش و بوگون خالقیمیزین خدمتینده دیر
پیمان انسانلارین جسملریله برابر روحلارینی دا اوخشاییر و اونلاردا شاد، ساغلام و دوزگون انسانی روحیه یاراتماغا جان آتیر و شعر سؤیله مک گؤزل بیر وسیله اولموشدور.
چاناق - چاناق گونش آلدین جانیمدان آرامی،
یاواش یاواش دوداغیندان تؤکورسن الهامی.
جانیم جانیم سنه قرباندی سؤیلهدیم بیلهسن،
دیلیم دیلیم اولارام من سنین چون آرامی.
ائشیت ائشیت دئ گئنه خان چوبانه آختارما،
آخار آخار سویا تاپشیر گول اوزلو سارامی.
اتک اتک دولوسان سئوگیلیم سن آرزیمسان،
گونش گونش چاغیریردیم گلنده بایرامی.
هارای، هارای چکیرم سنسیز آغلاییرام من،
یئتیش، یئتیش دئییرم من سحرله آخشامی.
پیمان غزللرینده ده آنایوردو آذربایجانی اونودان شاعیر دئییلدیر. او، یئری گلدیکده آذربایجان قهرمانلارینا، بابکه، نسیمی یه، ستارخانا شعر قوشور و بو فداکار انسانلاری بوتون انسانلارا بیر اؤرنک اولدوقلارینی سؤیله ییر:
دونیامیز بیر اوزوک اولسا سن قاشی،
بابکین ده نسیمیدی یولداشی،
یاخدی قانی اوزه گؤرسه قارداشی،
سولمویا گول اوزو اولمویا خزان.
پیمانین گیزلین یاریم آدلی شعر دفتری چاپ اولمادادیر. آذربایجان شعریندن نئچه بند:
پارچالانمیش وطندن سوزولسه قان |
آذربایجان ادبیاتی، تاریخی و اینجه صنعتی