33

کاظم تیموری (اومود زنگانلی)

   کاظم تیموری (اومودزنگانلی)  1351جی ایلده زنگان بولگه­ سینین قارا پوشلو ماحالیندا یئرلشن بایرام بئی کندینده دونیایا گؤز آچدی، اوشاقلیق ایللرینی دوغولدوغو کندده کیتی داغی ­نین اته ­یینده درس اوخودو. اون ایکی 12 یاشیندا 1363جی ایلده عائیله ­سیله برابر زنگان شهَرینه کؤچوب تحصیلین زنگاندا داوام ائتدیریر. یاشاییشین چتینکلرینه گؤره اورتا تحصیلاتا کیفایتله­ نیب، آکادئمیا تحصیلینه چاتا بیلمه ­ییر. ولی یازیب - اوخومادان بیر آن دا دایانماییر. تورک ادبیاتينا ماراقلانیب و بو یولون داوامچیسی اولور.

ائل هاواسی

یئللی یوردون گه دیگیندن آشاندا

ائلیم بوتون جیلوه له نیر گؤزومده

سرین سللیم تومارلاییر ساچیمی

ائل هاواسین حیس ائدیرم اؤزومده

 

روحوم اوچور جیسمیم قالیر ­گدیگده

داغلار منی  مندن آلير گدیکده

چوللر باشقا حالا سالیر گدیکده

هی دالیرام خیاللارا اؤزومده

 

باشدان باشا ائليميزى گؤرورم

هر باخيشدا مين ايل عومور سورورم

كئچن عومرون ساچین آچیب هؤرورم

گنجله شیرم طاقت آرتير ديزيمده

 

ائللريمدن ائلدن آيرى سولورام

کیتی داغین گؤروب (اومود) اولورام

دومانليدا يئنى شئعيره دولورام

گول چیچه ­یی عطیر ساچیر سؤزومده

   کاظم تیموری (اومود زنگانلی) تخلوصیله شعیریازماغا اوره ک سؤزلرین یازماغا باشلاییر؛ او خالق یونیوئرسیته سینده تحصیل آلیر و شعرلریله خالقیندان اؤیرندئیگینی خالقینا قایتاریر. بو یولدا شعرلری استاندا یاییلان درگی­لرده یاییلیر، اشراق رادیو – تئلئویزیاسیندا شعرلر اوخویور و برنامه ­لر ترتیب وئریر. اؤلکه ­میزین سینیرلاریندان ائشیکده ده شعرلری چاپ اولوب یاییلیر. اومود شعر آخشاملاریندا، خالق ییغینجاقلاریندا چیخیش ائدیب خالق طرفیندن آلقیشلارلا اوز اوزه گلمیشدیر.اومود دا باشقا زنگان شاعیرلری کی سئوگی شعری سؤیله مه گی داها آرتیق سئویر و شعرلرینی محبت، باریش و انسان سئورلیگه حصر ائتمیشدیر.

   شاعیر سئوگی­سیز اولاماز، او دا سئوگی شعری سؤیله ­مه ­یی سئویر. آنجاق شعرینی اوتانقاچ بیر قیزه بنزه ­دیر کی یئریندن چیخان دئییلدیر:

شعیریم اولوب آداخلانمیش قیزکیمی

اوجا سسله گوله بیلمیر کوچه ده

اورتور داها، اوزون گؤزون، تئللرين

اوينانماغا گله بیلمیر کوچه ده

 

ائل قیزی دك گلین اولوب ائلینه

نشان اوزوک تاخیب ائللر الینه

دئییه بیلمز هرنه گلسه دیلینه

ال خيناسين سیله بیلمیر کوچه ده

و یئنه باشقا بیر سئوگی شعری "کوسوب پنجره" عنوانلی شعرینی بئله باشلاییر:
داریخیب خیابان کوچه ­میز سنه
چیرپیلیر قاپیمیز آجیقدان سنسیز
پنجره باغلیدیر کوسوب ائشیکدن
آچیلمیر اورتولوب آچیقدان سنسیز . .  .

   آنجاق هر شاعیر ائلینه باغلانماسا، ائل دردینی سؤیله­ مه ­سه ائل ایچینده تانینماز قالار.  شاعیریمیز ده ائل دردینی سؤیله ­مه­ گه چالیشیر. ائله بونا گؤره ده زنگاندا تانیمیش شاعیرلر آراسیندا اعتبارلی بیر شاعیر تانینیر. " ائل دردین بیلنلر" شعرینی اوخویالیم:

تکجه من دئییلم بو سیرری بیلن

ندن آغلار گئدیب، سئوینجله گولن

اولماییب یازارین گؤز ياشين سيلن

آدلاری گزسه ده دیلده، غریبدیر

ائل دردین بیلنلر ائلده غریبدیر

 

عالیم وار شوهرتی سرحددن آشیب

بیلگیسی ائل ايچره حددیندن داشیب

ائللر فایدالانا قايناييب جوشوب

چوخلاری سارای دک سئلده غریبدیر

ائل دردین بیلنلر ائلده غریبدیر

 

ساغلیغیندا بیلمه میشیک قیمتین

بیلمه دن پوزموشوق ائلین زینتین

یاد ائللر آپاریب چکیب میننتین

ائلدن آیری،گون، آی، ایلده غریبدیر

ائل دردین بیلنلر ائلده غریبدیر

 

(اومود)ام ائلیمه بئلین بوکمورم

قلمله ثمرسیز توخوم اکمیرم

کیمسه نین آدینی میثال چکمیرم

بولبولده غریبدیر گولده غریبدیر

ائل دردین بیلنلر ائلده غریبدیر.

   اومود مختلف شعر فورمالاریندا سؤزلرینی سؤیله ­ییر؛ آنجاق آذربایجان شعر قالیبلارینی داها آرتیق بگه­نیر. اونون شعرلری ماهنی­لار کیمی اوخونور و آشیقلارین سازلاریندا دیلله نیر. اومودون شعر دفتری حاضیرلانمیش و بؤیوک بیر حجمده اولاراق چاپا تاپشیریلمیشدیر. ایشاللاه بو تئزلیکده اونون کتابی­نین اوخوجوسو اولاجاییق.

بورادا شاعیرین شعر نمونه­لریندن وئرمه یی صلاح بیلیرم:

 

"بایاتیلار"

من     عاشیقام        زنگانا

قیزیل               آزربایجانا

حاضیرام          یوللاریندا

بله نم       قیزیل       قانا

 

وطن ­سیز جان  نه گره­ ک

طاباق   دؤلوسو   چؤره­ ک

وطن    وارسا       اولاجاق

هر ائوده  قیزیل   دیره­ ک

 

من     عاشیقام        دیلیمه

ائلدن     باغلی         بئلیمه

زنگان   تورک  ماحالی  دیر

قوربان    گوجلو     سئلیمه

***

توتولما کؤنول

دونيا بئله گلیب، بئله گئده­ جک

چوخ اؤزون اينجيتمه، توتولما كؤنول

ازلدن سويوقدور اوزو دونيانين

چوخ شیکایت ائتمه توتولما کؤنول

 

سانكى گؤيول كوسر اومان يئرلردن

مئه گلر سورونر دومان یئرلردن

هردن گلمز، گئدن گومان یئرلردن

چوخ فيكيره گئتمه، توتولما کؤنول

 

گؤز اؤيوندن گئدن کؤنولدن گئدر

دوشگونو باتغینی هامی ترک ائدر

خالقدان گیلئیلنمک اوره­ک اینجیدر

چوخ گؤزلردن ايتمه، توتولما كؤنول

 

(اومود) اول، وار اولسان يادا دوشرسن

دوستو يادا سالسان يادا دوشرسن

قالخ قورخما قالارسان يادا دوشرسن

چوخ اؤزون اينجيته توتولما كؤنول

***