36

سایین قالالی رستمعلی جعفری

   زنگاندان ائشیگه چیخیب تهرانا ساری یولا دوشنده یول اوستونده زنگاندان 50 کیلومتر اوزاقلاشاراق سایین قالادا نئچه – نئچه گؤزل شعر سؤیله ین لریمیز واردیر. البتده اون کیلومتر اویاندا کئچدیکده هیدجه چاتیریق؛ اورادا دا ده یرلی و حکمت دوشونجه ­لی شاعیرلر او جمله دن رهگذر هیدجی واریمیز، یئنه اون کیلومتر کئچمه­دن خرمدره شهرینه چاتیب اونلارجا ده یرلی شاعیرلرله اوز اوزه گلیریک. یئنه اون کیلومتر اویانا ابهرده خاکسار ابهری کیمی نهنگ شاعیریمیز وار. آنجاق ایندی سایین قالادا دایانیب رستمعلی جعفری دن دانیشاجاغام. رستمعلی جعفری­ نین ایندی­لیکده نئچه شعر دفتری چاپ اولوب یاییلیبدیر. او جمله دن غنچه های غزل عنوانلی اثری فارسیجا – تورکجه شعر توپلومودور کی تورکجه شعرلری داها آرتیقدیر. جعفری بیر یئتگین شاعیردیر. او عروض وزنینه و شعر اؤلچولرینه مسلط اولان بیر شاعیردیر؛ ایرانین باشا باشیندا اولان چوخلو شاعیرلرله شاعیرانه ایلگی­لری وار، گل – گئت­لری وار و شاعیرلر آراسیندا تانینمیش بیر سیمادیر.

   رستمعلی جعفری 1331جی ایلده سایین قالادا دونیایا گلیب، نه قدر تحصیل آلدیغینی قیراغا قویاراق، اؤزو دئمیشکن توپلوم یونیوئرسیته­ سیندن مأذون اولموش و مختلف صینیف ­لرله اوتور – دور تئدیب، خالقین روحیه­ سینی، گئدیشاتینی و ایستک­لرینی ده دویموش و تانیمیشدیر. او کلاسیک ادبیاتلا ماراقلی اولاراق دئمک اولار اوشاقلیقدان آنادیلینده یازیب اوخوماغا هوس گؤسته ­ریب، کلاسیک فورمالاردا و اسکی موضوعلاردا یازیب یارادیر:

ای کؤنول عالمده سعی ائیله همیشه خوش یاشا

درد و غم پیمانه سین ذوقیله، جانا، چال داشا

اول گدای کوی جانان، افتخار ائیله مدام

دولتیندن کسب فیض ائت، تاج عزت قوی باشا

جد و جهد ائت دائما ، کسب ائیله علم و معرفت

قوی سنونچون نخل امید سعادت یارلاشا

بو گؤزللر بیوفادور، سعی ائیله آلدانمایان

دین و ایمان گؤزله الدن وئرمین هر گؤز قاشا

گر قضا حکم ائیله سه اجرا ائدن اولسا قدر

چاره یوخدور امرینه انسان گرکدور تابلاشا

   گؤردویونوز کیمی جعفری ­نین غزللرینده بیر موضوع اؤنملی­ دیر، او دا تورکجه قافیه­ لردن و ردیف ­لردن یارارلانماسی دیر. بیلیرسینیز تورک کلاسیک شعرینده بیر زامانلار فارسیجا قافیه ­لر حؤکوم سورموش آما قدرتلی شاعیرلریمیز بو سیخینتیدان قورتولا بیلیبدیر کی جعفری جنابلاری بو سیرا شاعیرلردن­دیر:

قتلیمه خنجر چکیب ابرولرین جان آلماغا

دویموشام بو جانیدن سنسیز جهاندا قالماغا

صفحه رخسارین از بس که گؤزلدیر، دلبریم

گلسه گر مانی، باشارماز صورتیوی چکمه­ گه

ائتمیشم امضا اورک قانیله عشقین دفترین

راضی یم راه وفاده باش و جاندان گئچکه گه. . .

   جعفری­نین شعرلری ساده، کلاسیک و عئینی حالدا آخیجی­دیر. دیل باخیمیندان اسکی شعرلریمیزه باغلی­دیر. باشقا بیر غزلینده نئچه بیت تقدیم ائدیرم:

بیوفا چیخدی منه بو گؤزو شهلا نییه بس؟

ترک ائدیب ائیله ­مه­ دی درده مداوا بییه بس؟

داشا تأثیر ائله­ دی، ائتمه ­دی بو داش اوره­ گه

آهِ جانسوزوم اثر بیلمورم آیا نییه بس؟

من کی بیر عمردی میخانه­لرین خادمی­ یم

سوروشون وئرمه دی ساقی منه صهبا نییه بس؟

یوسفین حسن رخی رونق بازار اولدی

بیر خبر قالدی بو بابتده زلیخا نییه بس؟. . .

***