اولدوزلار اله نیر - 6
اوتوز ایل بوندان اول، شن حیاتا گؤز آچیب(1344جو ایلده) مهربان آنسی نین محبتلی باخیشلاریندان ایلهام امه ن ایوب، بوگون شهریمیزین خسته لرینی درمان ائده ن حاذیق بیر طبینی، هابئله معنویت دونیاسیندا سوسوزلوقدان آغیزلاری گؤیه آچان اوره کلری شعر دامجیلاریلا سوواران دوکتور نوری زاده اولموشدور. شاعیر اوشاق ایکن عؤمور بویو باشاریلار عامیلی ساییلان قرآنی آناسیندان اؤیره نیب، ایلهام قاپیسینی دا آناسی اونون اوزونه آچمیشدیر. دوکتور نوری زاده بو ایل زنگانین طب بیلیم یوردوندا خسته لری طبابت ائتمک اوچون مشغول اولوبدور. بو مهربان طبیب، عینی حالدا شهریمیزین درین دویغولو شاعیری کیمی تانینیر. بوتون شعر آخشاملاریندا اشتراک ائده رک، تاماشاچیلارین و شعر هوسکارلارین آلقیشلاریلا قارشیلانیر.
شاعیر خیال دنیزینه جوموب؛ سئوینج ایسته ییر؛ یوردونون زینه بولاقلاریلا گولسه ده، آلیش – وئریش بازاریندا اینسانین ساتیلماسینا آجینیر:
منی ده گولدورور چمن دؤشونده،
زینه بولاقلارین سرین گولوشو.
منی ده آغلادیر آلقی – ساتقی دا،
اینسانین قوزو تک ساییلسا دیشی.
شاعیر،سئوینج دونیاسیندا تیکانلاری لاله ایله باسدیرماغا جان آتیر:
من ده توخویاران ایستک تورونو،
خیال دنیزینده سئوینج ایستیرم.
ایستیرم لاله دن، گولدن بیر اؤرتوک،
بوتون تیکانلیقلار اوستونه سه رم.
شاعیرین بوتون شعرلری اینسان اوره یی نین پاک دویغولاری چولقاییبدیر؛ بیرده، بیر غم اورتویو شعرلرینب باسدیرمیشدیر. بیر غزلینی بیرگه اوخویالیم:
او قارا زولفونو نازیله دولاشدیرما گولوم،
منی آهیمله شراریله ساواشدیرما گولوم.
لاله روخسارینی گؤستر، بو حزین بولبولونو،
هئی بو گولدن او گولون اوستونه قاشدیرما گولوم.
قاشلارین: هه! دوداغین : یوخ! دئدی؛ هانسین اینانیم؟
کفری ایمانه قاتیب، کؤنلومو چاشدیرما گولوم.
هر قاشین مصرعی دیوانلارا سیغماز سؤز اولور،
خالقی بیر بیت ایله اشعاره داراشدیرما گولوم.
منده موسا کیمی شک یوخ، گؤرونور روخسارین،
گؤزومو طور تجلاده قاماشدیرما گولوم.
باخیشین اوخلاری ده یدیکجه یارام تازه له نیر،
منده بیر عؤمر دولاشمیش غمی آشدیرما گولوم.[1]
آذربایجان ادبیاتی، تاریخی و اینجه صنعتی