گوهر مراد

چؤل. وحشی قوشلارین سسی قولاغا چاتیر. بیر دسته اوزاقلاشیر و باشقا دسته یاخینلاشیر.

نئچه آن سونرا. بؤیوک بیر قوش دسته سی نین قاناد سسی ائشیدیلیر کی یئیین و چیغیراراق اوزاقلاشیر. یئنه سکوت و یئنه قوشلارین قاناد وورماسی.

قوجا بیر کیشی ساغ یؤندن صحنه یه گیریر. بئلینه بیر پیچاق باغلامیش و داشینان دولو بیر خورجونو چیگنیندن آسلامیش. هر الینه نئچه داش آلمیشدیر. قاچیر و صحنه نین اورتاسیندا دایاناتراق گؤیه باخیر. بیر داش گؤیه توللاییر و باخیر. خوشحال و اومودلو قوشلارین سسی گلیر. یئنه نئچه آددیم قاچیر و دایانیر و گریه باخیر. باشقا بیر داش قوشلارا آتیر، گؤزله ییر. یئنه قاچیر و دایانیر. بیر داش آتیر و گؤزله ییر. عصبانیت له فیشقا چالیر. قاچیر و صحنه دن ائشیگه چیخیر.

گؤیدن کئچن قوشلارین نغمه لری و قاناد سسلری گلیر، هردن بیر، بیر قوشون سسی هامیدان اوجا اولاراق گؤیو دولدورور.

بیر گنج ایچه ری گیریر. الینده توفنگ و بئلینده گولله لرده دولو فانیسقا. قاچیر صحنه نین اورتاسیندا دایانیر و گؤیه باخیر. آستا آستا توفنتگین لوله سین یوخاری قالدیریر. نشانلاییر و ماشانی چکیر، بیر قوش چیغیریر، بیر گؤیرچین یئره دوشور. گنج، گؤیرچینی گؤتورور و باخیب یئره آتیر. گؤیه باخیر. نئچه آددیم ایره لی گئدیب و کئچن قوشلارا گؤز تیکیر، عجله ایله توفنگین لوله سین قالدیریر، نشانلاییر. ماشانی چکیر. بیر قوش چیغیریر و بیر قارقا یئره دوشور. شکارچی قارقانی گؤتوروب باخیر و یئره آتیر.

گؤیه باخیر. توفنگین لوله سین قالدیریر و گؤیون سول بوجاغینی نشانلاییر و اوندا آستا آستا توفنگین لوله سین ده ییشیر، سانکی بیر قوشو گؤیده ایزلاه ییر، صحنه نین گؤیونده ساغ بوجاغا چاتدیقدا ماشانی چکیر. بیر قوش چیغیریر و بیر تویوق – یئککه قانادلاریلا یئره دوشور. گنج اوغلان تویوغو گؤتورور، باخیر و یئره آتیر. گؤیه باخیر و نشانلاییر و ماشانی چکیر. بیر قوش گؤیده چیغیریر: "وای!" و یئره دوشور. شکارچی قوشو گؤتورور، قوشون اوزون آیاقلاری وار و بوینوندا بیر قاندال. قوشا باخیر و یئره آتیر. بیر داش اوستونده اگله شیر و گؤیه زیلله نیر. بیردن قالخیب نشانلاییر و ماشانی چکیر، بیر کیشی چیغراغی و بیر زنگ سسی گؤیدن ائنیر، بؤیوک بیر قاناد یئره دوشور، گنج قانادی گؤتورور و تعجب له باخیر. قانادین سونوندا بیر زنگ آسلانیب. قانادی ترپه دیر، زنگین سسی ائشیدیلیر: "دنگ، دنگ، دنگ". باشقا بیر زنگ گؤیدن، درین و بوغونتولو سس وئریر: "دنگ". گنج قانادی یئره آتیر و دایانیب فیکیرله شیر. اؤلموش قوشلارا تاماشا ائدیر. قوشلارین سسی گؤیدن گلیر. گنج یئنه داش اوستونده اوتورور و گؤیه زیلله نیر. داش اوسته اوتوردوغو حالدا گؤیو نشانلاییر و ماشانی چکیر. بیر آتین نعره سی ائشیدیلیر. بؤیوک بیر نال گؤیدن یئره دوشور. گنج ایره لی گئدیب و نالی گؤتورور و باخیر. گؤیه باخیر. یئنه نالا باخیر. شوبهه لی بیر حالدا یئره آتیر. قیلیغی توتغون و غملی دیر. داش اوستونده اوتورور. آستا – آستا گؤیدن بیر ایپ ساللانیر و گنج اوغلانین باشی اوستونده دایانیر. گنج بیردن ایپی گؤرور، اونا بیر مکتوب باغلانمیش؛ مکتوبو آچیر و یئیین اوخویور. ایپ گژله مکده دیر. گنج باخیر و یئنه مکتوبو اوخویور و یئنه یوخارییا باخیر، قیلیغی آچیلیر و گولور. توفنگی یئره آتیب ایپی یاپیشیر. ایپ یوخاری گئدیر، گنجین آیاقلاری یئردن اوزولور. ایپ دایانیر و گنج یوخاری قالخیر. ایپ یئنه قالخیر و دایانیر. گنج ایپی ترپه دیر. یوخاریدان بیر گولمک سسی ائشیذیلیر. گنج، ایپی ترپه دیر. ایپ بیر بالاجا قالخیر و دایانیر. اوستدن بیر گولمک سسی گلیر. گنج اوچونجو دؤنه ایپی ترپه دیر، ایپ یوخاری گئدیر و گنجین تکجه بدنی صحنه نین یوخاریسیندان آسلانمیش گؤرونور. اللری و باشی گؤرونمور. قوشلارین سسی داها دا اوجالیر، لاپ اوجا.

بیر قوجا کیشی سول یؤندن صحنه یه گیریر. خورجونو بوشدور، نئچه آددیم ایره لی گلیر و دایانیر، یئردن بیر داش گؤتوروب گؤیه آتیر. هله گنجی گؤرمه میش. یئنه نئچه آددیم قاچیر و اگیلیب بیر داش گؤتورسون، یئرده کی قوشلارین بیرینی گؤرور، گؤتورور، تحجبله یان – یؤره یه باخیر، ایکینجی و اوچونجو قوشو دا گؤتورور و هامیسینی خورجونونا ییغیر، بیردن توفنگی گؤرور، توفنگی گؤتورور.

آستا – آستا ایپ ترپه نیر و گنج توولانیر. قوجا کیشی اونو گؤروب دال – دالی گئدیر و صحنه نین سول طرفینده دایانیر. دیزه چؤکور، توفنگین لوله سین قالدیریب نشانلاییر و ماشانی چکیر. گنج بیر قوش جنده یی کیمی یئره دوشور. قوجا دال – دالی گئدیر و صحنه دن ائشیگه چیخیر. قوشلارین سسی و بیر آت، دلی کیمی شیهه چکیر.

*****