21

آزاده دارایی

آزاده دارایی زنگانین آدلی – سانلی عائیله سی اولاندارایی لار خانواده سیندن دیر. بو عائیله آذربایجانا نئچه – نئچه غیرتلی شاعیرلر وئرمیشدیر او جومله دن: عبدالله دارایی، - زنگانین بیرینجی رسمی حاکیمی (فتحعلی شاهین اوغلودور) و بوتون عائیله سی الی قلملی گؤزل تورکمجه یازان، حیکایه یازان، فولکلور توپلایان عالیم لر اولموشلار. امیرخسرو دارایی، آزاده دارایی، جهانسوز دارایی، جهانگیر دارایی، مهین دارایی، بهین دارایی و . . .  نهایت خسرو دارایی بونلاردان تکجه نئچه نمونه لردیرلر.

آزاده دارایی 1304 ایلینده آنادان اولدو، آنجاق اونون طالعی غربته دوشدو و بوگون ده غربتده یاشاییر و هردن بیر آناوطنینه – زنگانا گلیب، شاعیر اوره یی نین سؤزونو سؤیله ییر. دونیانین او باشیندا اولسا دا اوره یی وطنله چیرپینیر و ایراندا ائشیکده نئچه – نئچه تورکجه شعر دفترلری چاپ ائدیب، آذربایجان و زنگان عشقینه قوربان اولدوغونو دیله گتیریر و دفترلرینی بو سؤزلرله بزه ییر:

آنایوردو وطنیم زنگانیما قوربان اولوم

شهریمین اول یاراشیقلی آدینا قوربان اولوم

دولانیم باغچاسینا – باغینا – دروازاسینا

آغ چیچک لر آچیلاندا یازینا قوربان اولوم

او گؤزل منظره سی، بهشته بنزر هاواسی

او سرین دردیمه درمکان سویونا قوربان اولوم.

نفسی تازه ائدن صبح و سحر سلله مینه

آدی اوستونده اولان یایلاغینا قوربان اولوم.

یئل اسنده اوجا بوی آغاجلارین اویناماغی

آغ بولوتلاردان اوجا دورناسینا قوربان اولوم.

آزا ده دارایی شعرلرینده وطن سئوگیسی دالغالانیر، ائل قایغیسی سؤیله نیلیر و انسان­ سئورلیک سسه گلیر و اوخوجونون اوره ­یی­نی دؤیونتویه سالیر.

دارایی وطنینی سئویر و اونون باشی اوجالیغینا چالیشیر و بئله سؤیلور:

آذربایجان عزیزدیر، اورَک کیمی، گؤز کیمین

اگر اوستون کول توتوب، آلتدا یانیر کؤز کیمین.

گلین وئره­ک ال اله، سیلاق توزون – تورپاغین

تا گؤسته رک دونیایا پارلایان اولدوز کیمین.

آزاده شاعیره میز آذربایجان آدلی شعرینده بوتون شهرلردن آد چکیر، گؤزه ­للیک­لرینی ساییر و نهایت زنگانا چاتیر:

من قوربانام بوتون آذربایجانا

قافلانکودان آشیب گلن زنگانا

   آزاده یئنگی دونیادا یاشاییر، آما آذربایجان گؤزه ­للری همیشه گؤزو قارشیندا جانلانیر، تورک دیلی­نین گؤزه ­للیگینه و اؤزه ­للیگینه وورغون اولان شاعیره ­میز چالیشیر آنادیلینی گونو گوندن گوجلو، گؤزَل و پارلاق گؤرسون و اونا گؤره فارس اثرلرینی تورک دیلینه چئویرمه گه ده چالیشیر. او، عمر خیام رباعی­لرینی چوخ گؤزَل بیر صورتده تورکجه ­یه چئویرمیش و لُس­آنجلس شهرینده چاپ ائتدیرمیشدیر. البتده او بیر ده ­یرلی آراشدیریجی کیمی بو روباعی­لری اینجه ­له ­میش و تکجه 125 روباغینی خیاما منسوب اولدوغونو تائید ائدیر و اونلاری تورکجه­یه چئویریر. ایندی نئچه روباعینی اوخویاق:

بو کوزه منیم تک قوجا بیر عاشق تیمیش

بیر نازلی نگارین اودونا یانمی ایمیش

بوینونداکی بو چنبر اولان دستینه باخ

سانکی قولونو یار بئلیه سالمیش ایمیش.

***

دور گل گؤزه ­لیم بیرجه منی یاد ائیله

گؤستر اوزونی قلبیمی دلشاد ائیله

تا تورپاغیمیز بیر بالا کوزه اولمیوب

دولدور مئی ایلن کوزه ­نی، بیداد ائیله.

***

هئچ کیم گله ­جک گونلرینی بیلمه­ یه­ جک

خوش اول بوگونو، چونکی سنه قالمیه ­جک

مئی ایچ، آیا باخ، ای آیا اوخشار گؤزه­ لیم

بو آی دا بیزی آختاراراق تاپمیه ­جک.

***