ائلیمیزین نیسگیل قالاغی
پروفسور محمدتقي زهتابي
م. کریمی
پروفسور محمد تقي زهتابي آذربايجان چاغداش ادبياتينين سؤنمز اولدوزو، پارلايان سيماسيدير. ائليميزين باشيني دنيا خالقلاري آراسيندا اوجالدان، تاريخيميزين قارانليق بوجاقلارينا ايشيق ساچان، چاغداش شعريميزين زيروه سينده دايانان بؤيوك شاعر، تاريخچي و ائل اوغلودور. خالقيميز بئله بير اوستاد، غيرتلي و عالم اوغلونا دونيا بويو و تاريخ بويو گووه نه جكدير.
محمدتقي ۱۳۰۲ اينجي گونش ايلي آذر آيينين ۲ سينده شبسترده دنيايا گلدي[۱]. عائلهسي كيريشچيليك ايشينده چاليشان، الي آغزينا چاتان صنعتكار بير عائله ايدي. آتا و آناسي مذهبي ايناملارا محكم ياپيشان و علمه ماراق گؤسته رن انسانلار ايديلر. بالاجا محمدتقي ۶ ياشينا چاتاركن، باجيسي صديقه ايله قران مكتبينه گئديبن قرآني اؤيره نير. ۱۳۱۰جو ايلده شبسترده تازا اوصولونان قورولان مدرسهني قورتارديقدا، مادي امكاناتين اولماديغي اوچون كيريشچيليكده، هابئله باغ واكين ايشلرينده چاليشير. همين ايللرده عميسينين كتابخاناسيندا بوللو ـ بوللو توركجه كتابلارلا تانيش اولوب، آنا ديلينه ماراق گؤسته رير. پرفسور اؤز ترجمهي حاليني يازاندا، بو حادثه يه اشاره ائديركي ۱۳۱۷جي ايلده آتاسينين دوستلاري و تجارب ايشداشلاري تبريزدن شبستره گلديلر، اونون درس اوخوماغا علاقهسي چوخلو سبب اولدو آتاسي دوستلاري تبريزه قاييداندا، اودا اونلارلا تبريزه گئتدي. البته گئتمه دي بلكه قاچدي؛ چونكي آتاسينين خبري اولمادان عماوغلوسو غلامرضا ايله قاچميشدي. قارداشي يوسوف دا تبريزده اورتا مكتبده اوخويوردو. محمدتقي، فيوضات مدرسه سينده ۹جو كلاسي بيتيرير. ۱۳۲۰جي ايلده رضاشاه ايراندان قاچيب، اوغلو محمدرضا، شاهليقا كئچير.
متفق اوردولاري دا ايرانا سوخولورلار. سياسي دوروم يارانير و مختلف سياسي پارتيالار باش قووزايير. همين ايللرده «آذربايجان» غزئتي، ميرزه علي شبستري همتي ايله تبريزده بوراخيلير. گنج محمدتقي بو غزئته ايله امكداشليق ائدير. اوردافارسيجا شعرلريني چاپ ائتديرير.
آناديليله لاپ ياخيندان تانيش اولور. همين ايللرده دانشسرايا دخل اولور. همين زامان تبريزده فرانسا ديليني اؤيره نير و دانشسرادان چيخيب، تبريزده «فردوسي» مدرسه سينده ادبي بؤلومو ديپلم آلير، اما تبريزده هله بيليم يوردو قورولماميشدير، تكجه تهران بيلم يوردو واريدي، لاكن گنج محمدتقينين مادي امكاني تهراندا درس اوخوماغا يوخودو. عاليمين علاقه سي درس اوخوماغا بير يئره چاتمادي. ۱۳۲۳ و ۱۳۲۴جو ايللرده تبريزده «فرياد»، «خاورنو» غزئتلري چيخيردي. زهتابي اثرلريني بو ايكي غزئته ده چاپ ائتمه يه چاليشدي، حتي نئچه اثري فرانساجادان ترجمه ائديب چاپ ائده بيلدي. ۱۳۲۴جو ايلده «آذربايجان» غزئتي تبريزده يايينلاندي. آنا ديليميز چيچكلنمه يه باشلادي. زهتابي اورادا مقالهلر يازماغا باشلادي. همين ايل «جوانلار» غزئتيني رهبرليك ائديب، مقاله لر و شعرلري چاپ اولاراق، سياسي فعاليته قاريشير و بير ايل ملي حكومتله ياناشي، اوز ائلي و يوردو خدمتينده چاليشير. ۱۳۲۵جي ايلين آذرين ۲۱ينده شاه اوردوسو تبريزه سوخولدوقدا، ملي حكومت ييخيلير و آنا ديليميزده اولان كتابلار اود ايچنده يانديريلير. عالي تحصيل آلماق اوچون جان آتان زهتابي، سوئت اتفاقينا گئتمك ايسته يير، آمما توتولوب مشهدده قند كرخاناسيندا ايشله ييب، اورادا تازادان ديپلم آليب، باكييا گئدير و دانشگاها داخل اولوب، «آذربايجان ديل و ادبياتي» تدريس ائدير، همين يئرده دوكتورلوك تئزيندهن مدافعه ائدهرك دؤكتورلوك پيتيگي آلير.
عالمين دؤكتورا رسالهسي «ابونواسين حيات و ياراد يجيليغي» ايدي. بو رساله ابونواس شناسليغين اهميتلي قايناقلاريندان ساييلير. عاليم باكي دانشگاهيندان دوكتورا درجه سيني آلير. اوردا درس وئرمهگه باشلايير و اورادان دو چنت (دانشيار) عنواني آلير. ۱۹۷۸ ايلينده عاليم پروفسورلوق درجه سيني بغدادين دانشگاهيندان آلير. [۲]
دؤكتور زهتابي باكي شهرينده خانيم دؤكتور خاور آسلان ايله ائوله نير. آنجاق ۱۳۵۰ ايلينده سياسي اويونلارا گؤره عائلهسيندن آيريليب شورويدن قاچماق مجبوريتينده قالير. بغدادا قاچيب و ۸ ايل اورادا اسكي تورك ديللريني تدريس ائدير، آمما همين ايللرده عالم «حزب توده»ني آتير و اونا خائن كيمي توخونور. اؤزو دؤنه ـ دؤنه اونلاردان ضربهلر يئديگينه اشاره ائديبدير. حزب توده نين ماهيتيني تانيماقلا سوئتلر اؤلكهسيندن قاچماغا جان آتير. نهايت ۱۹۷۱جي ايلده احمد حسن البكر عراقدا ايش اوستونه گلهرك، عراقين مسكووادا سفيري اولان «شاذل طاقه» يارديمي ايله بغدادا كؤچمه يه امكان تاپير. زهتابي نين محكوميت ايللري چوخ آغير كئچميش. بوايللرين خاطره لريني قلمه آلان عاليم چوخ آجيناجاقلي گونلريندن سؤز ائدير[۳]. اونون «سورگون ايللري» اثري، بيزيم چاغداش مقاومت ادبياتيميزين سئچگين يازيلاريندان ساييلاجاقدير. زهتابي بوتون عمرونده قاباقجيل، دوشونجه لي، ايشلك و مهربان بير انسان ايدي. او يورولمادان چاليشيب، اؤيره نيب ـ اؤيرتمه گه جان آتميشدير.
بورادا اشاره ائتمهليييك ۱۳ ايل آذربايجان جمهوروسوندا و داها دورزگون، سوئتلر اتفاقيندا ياشايان ايللرده چوخلو اثرلر يازير، اما چاپ امكاني تاپمير. عراقا كؤچمه سينده بونلاري اؤزويله آپارير. بغداد دانشگاهیندا شرقشناسليق دانشکدهسينده «فارس ديللر» و «قديم تورك ديللري»ني تدريس ائدير. ۸ ايل بو بیلیم یوردوندا تدريسه مشغول اولوب، ادبي فعاليتيني ده گئنيشلنديرير. همين ايللر ده «اتحاد يولو» آدلي غزئتهنين چيخماسينا همّت گؤسته رير. بو غزئت ايله، ايران ملتلري اوچون بئش ديلده راديو وئرليشلريني يولا سالير. همين زامان درين علمي تحقيقلره جوموب، آذربايجان و تورك ديللري و ملتلري حقينده بؤيوك باجاريقلا چاليشيب، اثرلر يارادير، علمي معلوماتيني گئنيشلنديريب، دنيا سويهسينده دنيا بيلگينلري آراسيندا يئني تئزلر آرايا قويوب، دنيا عالملرينين دقتيني جلب ائدير.
۱۳۵۷جي ايلده ايراندا اسلامي انقلاب غلبه چالديقدا، عالم اؤز آنا يوردونا قاييتماغا جان آتير. ايلك غلبه گونلرده «مهدي بازرگان»دان جواب آلاراق تير آيينين اوچونده ايرانا گلير (۱۳۵۸). تبريزه دؤنور و تبريز دانشگاهیندا عرب و تورك ديللريني تدريس ائتمه يه باشلايير. آمما ۱۳۶۲جي ايلده حزب تودهنين تهمتلريله دوستاق اولور. ۴ ايل دوستاقدا قالير. ۱۳۶۶ دا آزاد اولور. داها علمي ايشلره جدي صورتده باشلاييب، علمي اثرلريني ترتيبله ييب، چاپ اوچون جدي صورتده چاليشير.[۴] نهايت ۱۳۷۸جي ايلين آذر آيينين اوتوزونندا دنيادان گؤزونو يومور.[۵]
عاليمين اؤلومو
عالمين اؤلومو ائله بير زاماندا اوز وئردي كي دنيا دا بؤيوك تأثيرلر ياراتدي. اونونلا برابر شايعهلر ياييلدي، هر حالدا ائليميزه بؤيوك بير كَدَر و نيسگيل اولدو. يابانجي خبر قايناقلاري عاليمين اؤلدورولمه سيني ادعا ائتديلر، اما خالقيميز بونو اينانمادي، اينانسايدي نيسگيلي لاپ دا آغير اولاردي. دؤكتور صديق بئله ادعايا قارشي چيخاراق يازدي: «بو ادعانين پوچلوغو حقينده هئچ بحثه احتياج يوخدور، ولاكين من بونو دا تأكيد ائتمه لييم كي زهتابي عمر بويونجا مينلر دفعه گولله لنميشدير. وطندن ائشيكده، اجنبيلر و روس شوونيستلري طرفيندن و اؤز وطنينده ايسه شاهچيلار، عكس انقلابچيلار و اسلامي انقلابيميزي سئومه ينلر يوز مينلر دفعه توطئه يه معروض قالميش و گولله لنميش. نيسگيللي بير وارليغيني قوروماغا جان آتان مظلوم وارليق ايدي. زهتابي اؤز اجلي ايله اؤلموشدور.» [۶]
دؤكتور صديق عاليمين اؤز اجلي ايله اؤلمهسيني ثبوتا يئتيرمك اوچون، عاليمين ياخين آداملارينين و قونشولارينين شاهد اولدوقلاري صحنهلري گتيريب و اونلارين ديليجه اثبات ائتمهيه چاليشير. هر حالدا بؤيوك عاليمين اؤلومو اينانيلماز بير زاماندا اوز وئردي. عاليم تازا ايستيردي بؤيوك و درين دوشونجهلري يايماق اوچون زمينه ياراتسين، شاه اثري اولان ـ ايران توركلرينين اسكي تاريخي- لاپ تازا چاپدان چيخميشدي. بو اثر دنياني ترپه ده بيلردي، دوشمانلاري ترپتميشدي.
عالمين اؤلومو دنيادا بير بومبا كيمي پاتلاميشدير. دنيانين بؤيوك عالملري، اديبلري، شرقشناسلاري، ديلچيلر، تحقيقاتچيلار اونون اؤلومون آجيليغيني آيدينجاسينا بيان ائتمكده ن چكينمه ميشديلر. هر ياندا، هر شهرده، هر اؤلكه ده بؤيوك تؤرنلر، بؤيوك ييغينجاقلار قورولموش و مختلف بيلگينلر و عالملر اؤز تاثراتيني سؤيلهميشديلر. عاليمين اؤلومو، اونون دوشونجهسينين خلق ايچينده ياييلماسينا بير زمينه ياراتميشدير. خليقيميز بئله بير ده يرلي عالمي الدن وئرديگيني تازا دويوردو! اونا گؤره ده حقلي اولاراق اينانميردي. بو اؤلومو ساده اؤلوم سانا بيلميري.
عالمين بير طرفدهن گئنيش معلوماتي و بير طرفدهن گؤزهل دورانيشي، ياخشي اخلاق، اونون يازيجيلار ايچينده و عموم خلق ايچينده محبتله قارشيلاشديغينا سبب اولموشدو. بير ايل عرضينده مينلرجه مقاله چاپ اولدو. بوتون يازيچيلار طرفيندهن، عالمه اولان بورجلاريني شعر، مقاله و تحقيقي ايشلرده اؤدهمكده چاليشديلار. زهتابينين درين و گئنيش معلوماتي ايله ياناشي، تميز و انساني اخلاق و رفتاري هاميني اؤزونه جلب ائتميشدير. زهتابي آد ـ سان اهلي دئييل ايدي. تهراني، تبريزي، بوشلاييب شبسترده بير بالاجا ائوده قاليب، آمما بؤيوك ايشلر گؤرمه يي بؤيوك روحونا اويغون گؤروردو.
۷۵ ياشي اولاركن بير آن ايشلهمكدن دايانمادي، گئجه ني گوندوزه قاتيب، گوندوزي گئجه يه باغلادي. يورولمادان ائل اوغروندا تحقيقي ايشلري ايره لي آپاردي. چوخ متواضع اولاراق، ايرانين هر يانيندا الينه تازا قلم آلميشلارلا تلفونلا قرارلاشير، يول گؤسترمه دن دايانمير. اوشاقلارلا اوشاق، بؤيوكلرله علمله توخونوب، عامي جماعتله ساده توخونوردو و بو رفتاري، هاميني اؤزونه چكيردي.
زهتابي بير آن يورولمادي، هميشه ايشين چوخ اولدوغونو خاطرلاييردي. او، گنجلريميزده، گلهجهگه نسبت اومود ياراديب، گنجلري صاباح اوچون تربيه ائتمهگه چاليشيردي. عالمين انساني رفتاري، گؤزهل اخلاقي، درين علمي، ساغلام بدني، گولر سيماسي، آمما تئز اينجيهن، پيس رفتارلاري تحمل ائتمه ين بير ذات ايدي. قبري نورلا دولوب، روحون شادليغيني تانريدان ديله ييب، آرزيلاييريق يولوگل ـ گئدلي اولسون.عالمين اثرلري
عاليمين چوخلو اثرلري چاپ اولوب، بير سيرا اثرلري ده كامل صورتده و كتاب شكلينده يوخ، بلكه مقالهلر صورتينده مختلف درگیلرده چاپ اولموشدور.
بير سيرا اثرلري ده واردير كي هله گون اوزو گؤرمهييبدير. بوندان علاوه زهتابي اوچ ديلده توركجه، فارسجا و عربجه ـ اثرلر ياراتميش و بو ساحهده اولو بابالارينا تاي تعصبدهن ايراق، بشريته باغلي قالميشدير.زهتابينين اثرلريني بئله سيرالاماق اولار
۱ ـ پروانهنين سر گذشتي، شعر مجموعه سی، بغداد/ تبريز
۲ ـ ائل اوغلو باغبان، شعر منظومهسي، بغداد/ تبريز
۳ ـ بختي ياتميش، منظومه، بغداد.
۴ ـ بذ قالاسيندا، منظومه، برلين.
۵ ـ چريك حماسه سي، منظومه، برلين.
۶ ـ قوي اولسون اون، حكايه لر مجموعه سی، تبريز.
۷ ـ آنا ديليميزي نئجه يازاق؟ بالاجا كتاب، تبريز.
۸ ـ معاصر ادبي آذري ديلي/ علمي ـ تحقيقي اثر، تبريز.
۹ ـ ايران توركلرينين اسكي تاريخي، تحقيقي اثر، تبريز.
۱۰ ـ ايران توركلرينين اسكي تاريخي، تحقيقي اثر، ايكي جلد، تبريز.
۱۱ ـ ايران توركلرنين ديلي و ادبياتي، تحقيقي اثر، تبريز، مهد آزادي.
۱۲ ـ شاهين زنجيرده، شعر منظومه لري، تبريز.
۱۳ ـ دافعه سياستي، جاذبه سياستي اولماليدير، اروميه، نويد آذربايجان.
۱۴ ـ عروضون تورك فولكلوروندا كؤكلري، تحقيقي ـ علمي اثر، زنجان، اميدزنجان.
۱۵ ـ قاشقايي يايلاغا كؤچور، منظومه، زنجان، اميدزنجان.
۱۶ ـ زبان ادبي آذري معاصر (فارسي)، تبريز.
۱۷ ـ علم معاني (فارسي) تبريز.
۱۸ ـ هستي نسيم، شعر فارسي، بغداد.
۱۹ ـ جنايت ۲۵۰۰ ساله شاهان، (فارسي)، بغداد.
۲۰ ـ آيا زبان فارسي به زبانهاي ملل ديگر ايران برتريت دارد؟
۲۱ ـ القوائد الفارسيه (عربي)، بغداد.
۲۲ ـ آذربايجانين يئر آدلاري، تبريز، مهد آزادي.
۲۳ ـ آذربايجان ديلينين نحوي، تبريز فجر آذربايجان.
۲۴ ـ ابو نواس الحسن بن هاني ـ دؤكتورلوك تئزي.
عاليم لرين اثرلري مختليف اؤلكهلرده و شهرلرده دفعهلرله چاپ اولوب، ياييلميشدير.چاپ اولماميش اثرلري
۱ ـ بير اوخدا نئچه نيشان ـ نمايشنامه
۲ ـ سارا و محمد ـ نمايشنامه.
۳ ـ ملك محمد ناغيلي
۴ ـ ابدي دوستلوق ـ منظومه.
۵ ـ ميشوون افسانهلري ـ منظومه
۶ ـ گنجلر چلنگي ـ شعر و نثر.
۷ ـ ميرزه مهدي شكوهينين شعرلري و ياشاييشي.
۸ ـ حبيب ساهرين اثرلري
۹ ـ علي آقا واحيدين خاطيرهسينه ـ منظومه
۱۰ ـ بيرجه جوت گؤز ـ منظومه.
۱۱ ـ قرآن و مليت (فارسي)
۱۲ ـ مادران ميهن پرست (نمايشنامه) فارسي.
۱۳ ـ مجموعه مقالات فارسي.
۱۴ ـ مجموعه اشعار فارسي.
شوبههسيز، بو اثرلرين چاپ اولوب ياييلماسي، چاغداش ادبياتيمیزدا يئني بير حال – هاوا ياراداجاقدير.عالمين شعر دنياسي
آذربايجان شعر كروانيني عصرلر بويو مختلف شاعرلر ايرهلي آپارميش، آغير زحمتلر سايهسينده بو گونكو ادبيات بيزه قاليبدير. بو كروانين ايرهلي آپارماسيندا چوخلو دوستاقلارا، اشكنجه لره، دار آغاجلارينا معروض قالان عالميميز آز اولماميشدير. عمادالدين نسيمي، نابي، واقف و. . . نه اذيتلركي چكمه ميشلر. معاصر شعريميزي قوران شاعرلريميز ده بابالارينا تاي، بوتون اشكنجه لري، دوستاقلاري، سورگونلري تحمل ائديب، هئچ بير زامان سارسيلماييب، قهرمانجاسينا ظلمه قارشي دؤيوشده هميشه دوز يولو آراييب، حقيقت داليجا گئديبديرلر. دؤكتور زهتابي دا اؤز سلفلري كيمي، قارشينا آلديغي دوز يولدان دؤنمه ييب و خالقينا گؤزهل، درين معنالي شعرلر تقديم ائديبدير. زهتابي اوشاق ايكن شعره ماراق گؤستهريب، آمما ۱۳۲۵ اينجي آذر آيينين ۲۲سينده تبريزين ساهات قاباغيندا توركجه كتابلارين يانديرماسيني گؤردوكده[۷] فارس شعرينه دال چئويريب، آناديلينه ائله محبت بسلهدي كي، عمرونون آخيرينه دك اونا وفالي قالدي، بوتون وار قوّهسيله بو يولدا آدديم آتيب، جان قويدو. همان گونلرده «سن اوسان من ده بويام» عنوانلي شعريني سؤيله دي. بوشعر ۵۰ ايلدن سونرا، بوگون ده ديللر ازبريدير:
سودئييبديرمنه اولده آنام، آب كي يوخ
يوخو اؤيرتدي اوشاقليقدامنه خواب كي يوخ
ايلك دفعه كي چؤرك وئردي منه نان دئمه دي
ازليندن منه دوزدانه نمكدان دئمه دي
آنام اختر دئمه ييبدير منه، اولدوز دئمييب او
سو دوناندا دئمييب يخدي بالا، بوز دئييب او.
قاردئييب، برف دئمه ييب، دست دئمه ييب ال دئيب او
منه هئچ وقت بيا… سؤيله مه ييب، گل دئييب او
ياخشي خاطرلاييرام ياز گوني، آخشام چاغلار
باغچانين گون چيخانيندا ايليق گون ياييلار
گل دئييردي ـ داراييم باشيوي اي نازلي بالام
گلمه سن گر، باجيوين آستاجا زولفون دارارام
اودئمه زدي كي بياشانه زنم بر سر تو
گر نيايي بزنم شانه سر خواهر تو
بلي داش ياغسادا گؤيدن سن اوسان، من ده بويام
وارسنين باشقاآنان، واردي منيم باشقا آنام
اؤزومه مخصوص اولان باشقاائليم واردي منيم
ائليمه مخصوص اولان باشقاديليم واردي منيم
ايستهسن قردهش اولان، بير ياشاياق، بيرليك ائدهك
وئرهسن قول ـ قولا بوندان سورا بير يولدا گئدهك
اوّلا اؤزگه كولكلرله گرك آخميياسان
ثانياوارليغيما، خلقيمه خور باخميياسان
يوخسا گر زور دييه سن، ملتيمي خوار ائدهسن
گون گلر، صفحه چؤنر مجبور اولارسان گئده سن![۸]
همين بو شعر، اوگونلرده هامينين ديلينده اوخونوردو، شاعرين ده شعر عالمينده بير دؤنوش نقطه سي اولدو.
زهتابي عمرونو دوستاقلاردا، سورگونلرده كئچيرتدي، هله پهلوي استبدايندان قورتولماميشدي كي، سووئت حاكميتي الينده اسير اولدو. هر حالدا شاعر اوزولمه دي، بؤيوك بير جسارتله ظالملر قارشيندا داياندي و سسيني اوجالتدي:
آزاد دوغولان انسانا قاندال نه گركدير؟
قاندانلاري قيرميشلارا زندان نه گركدير؟ [۹]
انسانلارين آزاد دوغولوب، آزاد ياشامالاريني ايستهين شاعر، بو آزادليغين دليليني تاپيپ گؤستهرمك ايستهیير:
طبيعتين آناسي هر زادي دوغار آزاد
يئري، گؤيو، چيچهيي
آيي، گونو، فلهيي
نسيمي، هم كوله گي
مگر دوغولماز آزاد گؤي ائوينده قار پيله گي؟
بشر طبيعتين اوغلو طبيعتين گولودور؟
سبب نديركي بو آلچاقدي ديگري اولودور؟
عدالتين مي بويول؟ يا حقيقتين يولودور؟
عجب عدالتدير!
عجب حقيقتدير! [۱۰]
زهتابي بوتون حياتيني اؤز خالقينا حصر ائتميشدير. خالقينين تاريخينين كئچمیشيني دوشونوردو، هر نه شعر دئييردي خالقيني توشلاييب، خالقينا يول گؤستهرمك هدفيله يازيردي. وطن سئوه رليك، خالق پرستليك بوتون ايلك و سون آمالي ايدي: نه دونيا ماليندا گؤزو واريدي، نه شهرت آختاريردي، يوخسا فرانسه، آلمان، انگليس و آيري -آيري اؤلكهلرين دانشگاهلاري دؤكتور زهتابينين معاشيني ياخشي تأمين ائتمك قولونو وئره رك، اوستادي ساخلاماق ايستيرديلر، آمما يئنه وطنه باغلي، وفالي و محبتلي ياشادي و يازديغي اثرلر خاليقيميزا هويت سندي كيمي ده يرلي و قالارقيدير.اوستادين اثرلريني اوچ اصلي بؤلومه بؤلمك اولار
۱ . تحقيقي ايشلر ـ بواثرلر تاريخي، ديلچيليك، ادبي تنقيد و سياسي اجتماعي موضوعلاري احتوا ائدير.
۲ . شعرلر ـ مختلف مستعار آدلارلا ـ ميشوولو، شيسترلي، كريشچي و… يازديغي اثرلر گاهدان اوزون منظومه لر، گاهدان قيسا شعرلر اولور. هاميسيندا شاعرين مبارز و خالقا اوره يينين دويونتولريني دويماق اولار.
۳ . نثر ساحه سينده يازيلان حيكايه لر و خاطره لر.
هر اوچ بؤلومده، عالمين گوجلو بير يازيچي اولدوغونو گؤروروك.شعرلري بونلاردير
الف. پروانه نين سرگذشتي ب. ائل اوغلو باغبان ـ منظومه
ج. بختي ياتميش ـ منظومه د. بذقالاسيندا ـ منظومه
هـ. چريك حماسه سي ـ منظومه ز. شاهين زنجيرده
شعرله يازيلان بو منظومه لر، هر بيري، بير ديري رومان كيمي، قهرمانلارين ايچ دنيالاريني، فكر دنيالاريني آچيقلايير. شاعر روحي- معنوي دنياني او قدر دهيرلنديرير كي اوخوجو اؤزونو همان قهرمان سايير. شاعرين ديلي او قدر آخيجي و شيريندير، او قدر گوجله سؤزلري بير ـ بيرينه دوزوب ـ باغلاييركي آدام حيران قالير، منظومهني قورتارمايينجا يئره قويماق ايستهمير. شاعرين قهرمانلاري، ملي قهرمانلارديلاركي وطن اوغروندا، ائل يولوندا جاندان ال اوزوب، شرافت و منليكدن مدافعه اوچون جانلاريندان اسيرگهميرلر. وطن تعريفينده ديلي آچيلاندا، سانكي داغ ـ داش ديل آچيب انسانلارلا دانيشير. اونون وصفين اوخوياندا سانكي طبيعت ديله گلميشدير. مختلف موضوعلارلا وطن سئوگيسي، ائل قايغيسي بير ـ بيرينه قاريشير. ملتلر آراسي دوستلوق، قاباريق شكيلده اؤزونو گؤسته رير. عالمين ديلينده وورغو ايله هر ياتميشي اويادير، اونا ضربهلر وورور، وطن عشقي اويادير، قايغيسينا قالماغي اؤيره دير.
قدريني بيلمير بير چوخو
تئزده بو غفلتدن آييلماز اولار؛
تاكي دئشر سينه لرين غربتين
زهرلي تحقير اوخ
اوندا بيلرلر وطنين قيمتين.[۱۱]
شعر، عالمين الينده بير دؤيوش وسيله سيدير، اويانيش وسيله سيدير.[۱۲]
ملتي اويادير، مبارزهيه يؤنَلدیر، اوندا هيجان يارا دير و اونا شعور باغيشلايير و گؤزلجه سينه آتالار سؤزلريندن شعرينه بزك وئرير.
شاعرين شعرلرينده هر زاددان آرتيق آتالار سؤزو ايشلنميشدير:
تك الين اولماز سسي، ائل كيمي يولداش گرك.
( بختي ياتميش)
آنلاسا ائل قدرتين، اؤز وارليغين، ذلتهده، ظلمه ده أيمز باشين.
( بختي ياتميش)
قسمت اگر اولسان يمن ده ن گلر، اولماسا گر توخلو چمنده ن گئدهر،
لوقما دهندن دوشَر.
( بختي ياتميش)
پئنديري ساخلار دري، آروادي ساخلار اري.
( بختي ياتميش)
موفته سعادت قوشو گلمز اله.
( بختي ياتميش)
هر شئيه غالب گلن
ائل گوجودور،
يئل گوجودور،
سئل گوجو.[۱۳]
زهتابي وطندهن اوزاقدا ياشاييرسادا وطن اوچون ياشاييردي، ائلينين درديني، كدريني اورهيينده داشييردي. ديلينه، ائلينه و آنايوردونا دريندن بسله ديگي محبتله هله گنجليك سوروردو. زهتابي كيمي شاعر، منليك دردي اوچون، آنايوردو اوچون، شاعر اولموشدور. او، شعريله چاليشيردي اؤز ديلداشلاريني، تاريخ، فرهنگ و هويتلرينه تانيش ائديب، كولتورلرينين حل اولماسيندان ممانعت ائدسين. بوناگؤره اونون شعري بو گونكو گؤزلليكلر، فرم ايله محتوا نسبتلري رعايت ائتمه ده اؤلچولمور. بلكه اونون شعري مستقيم صورتده اوخوجولاردا هيجان، شور، شوق و اويانيش ياراتماق اوچون يازيلميشدير. بو شعر داوام تاپيرسا، شعريميز ظرافتدن دوشر. اما زهتابي شعرينده پيام، او قدر درين و دهيرليدير كي مستقيم دانيشيق اؤز اثريني گؤستهرير. هله ده اورهكلره ياتير، هله ده اوخوماغيندان لذت آپارماق اولور.
شاعرين موفقيتي تكجه صداقت و صميميتي اوچوندوركي هر اوخوجونو ايستر ـ ايسته مز ياراتديغي فضالارا آپاريب، شاعرين خيالي و ذهني ايله بيرلَشديرير و اوندا همدرد اولماغي اويادير؛ همين بو، شاعرين گوجونو گؤسته رير.
پروفسور زهتابي و انقلاب دوشونجه سي[۱۴]
پروفسور زهتابي بؤيوك بير عالم، ديرلي شاعر، دوزگون مورخ، بيلگين ديلچي، عيني حالدا بؤيوك بير انسان ايدي. او، خالقينين، يوردونون و زامانينين ايستكلرينه گؤره انقلابي و دوزگون بير دورومدا دايانميش، اونلارا اويغون جواب وئرميشدير. عاليمين قاباقجيل دوشونجهلري، دوزگون فكرلري، دهيرلي تاپينتيلاري، ديل، شعر، تاريخ و صنعت حقينده، دنيا بيلگينلريني اؤزونه جلب ائتميشدير. قديم دونيا ديللري حقينده ايرهلي سورولن نظريهلرين بوتون دوگماتيك، ساختاكار، محافظه كارانه فكرلريني بير- بيرينه ووروب، بو علمين عالمانه و حقيقت آختاران آراشديرمالاريندا بير دؤنوش نقطهسي ياراتميشدير.
اونون بو ساحهده كي باخيشلاري، دنيانين مختلف اؤلكهلرينده ايگيرمينجي يوزايلين آراسيندان ايرهلي گليبسه ده، اونون نسيمي اسلامي انقلابيميزدان سونرا بيزيم قولاغيميزا چاتميشدير.
دؤكتور زهتابي ۳۰ ايل دنيانين مختلف بیلیم یوردلاریندا ـ شوروي، آلمان، عراق و ايران دانشگاهلاريندا ـ فارسي، توركو و عربجهني درس وئرميش، اونلارجا كتاب بو ديللره يازميشدير. اونون توركو، فرانسه، روس، عرب، انگليس، آلمان و فارس ديللرينه تايسيز احاطهسي بو امكاني ياراتميشدير كي دنيانين مختلف علمي قايناقلاريندان فايدالانيب، درين و علمي آراشدير مالار ايرهلي آپارميش و نهايت دوزگون نتيجهلر الده ائتميشدير.
دؤكتور زهتابي تاريخ علمينده بؤيوك باجاريقلار گؤستهرميش، تاريخده حق و عدالت ايزلريني آختارميشدير. يالتاق مورخلر واسطهسيله، تاريخده كي ظالم و قولدورلارين ظلملري باسديريليب و حقيقتلر قويلانميشدير، تكجه خالق ايچينده، خالقين ياراديجيليغيندا بو حقيقتلري آراماق اولار. رسمي تاريخ، قتل و غارت، اؤلدورمه و ظلملري توجيه ائديرسه خالقين اصيل قهرمانلاريني اونودماغا چاليشير. سانكي تاريخ ياراديجيلاري خالق يوخ، بلكه جنايتكار شاهلار، اميرلر، سلطانلار و خاقانلار اولموشلار. آمما بيزيم بو عالميميز، خالق و اونون قهرمانلاريني تاريخ يارادان گؤرور.
ائله اونا گؤره بابك، ستارخان، باقرخان، كوراوغلو، قاچاق نبي، شيخ محمد خياباني، حسين خان باغبان و… قهرمان تانينير. هارادا بو قهرمانلارين عصيان روحوندان دانيشماق ايسته ييرسه، شاعرين و عاليمين محكم ايناميندان، خالقا باغلي اينانجيندان آلينميشدير.
پرفسور زهتابي زامان طلبلرينه نئجه جواب وئرمهسي اوغروندا ياشاييشين بوتون ساحهلرينده تحقيق و ياراتماغا ال وورموش و خالق حاقلاريني غصب ائدن ظالملر قارشيسيندا، اصولي و انقلابي موضع توتور. ايران معاصر تاريخي، بئله مبارز و حق طلب شاعر دنيا اؤزونه گؤرمه ييبدير. عالم، ايراندا گئچهن امپرياليزم سياستلريني ياخشي تانيردي و حقلي اولاراق شاهي، استعمار نؤكري بيليردي. شاعر، هر ياندا شاها حمله گتيرير، اونون اربابي آمريكاني اونودمور. بيليريك عالمين اوتوز ايل دوستاق و سورگون اولماسي بو مبارزهلره و حق سؤزلري دئمك اوچون اولموشدور؛ اما اونون شاعرانه روحو بير آن بو مبارزه دن دؤنمه ميش و مبارزهنين حقّانيتنده شبهه ائتمه ميشدير و اينانيردي كي خالقي ال ـ اله وئريب بوتون قانداللاري قيراجاقدير، داغلاري سؤكه جكدير و ظالملري ازهجكدير:
ائلين بيرليگي سيلكه لر داغلاري دايانماز اؤنونده نه سلطان، نه خان
چكيب اهرمن خلقي زنجيره، ليك هميشه گونو اؤرته بيلمز دومان
اونون چارهسي تكجه بيرليكدهدير!
شاعر، خالقي اوياتماق اوچون، اونون اليني توتوب اؤز قهرمانلاريلا، اونلارين ظالملرله نئجه دؤيوشدويونو تانيتديرير، اسير اولماغي خالقينا بگنمير. ۱۳۵۰جي ايلده شاه، مبارزلري قانا بله ديكده شاعر «سوسانماز ائليم» شعرينده هايقيرير:
«وئر ايچسين بو ائل بير دؤيوش بادهسين» !
بو ايللرده، بوغونتو بوتون اؤلكهميزي باسديقدا، شاعر خالق اورهيينده اومود قيغيلجيملاريني اكير و اونلارا اينانديرير كي بو تئزليكده حق توفان قوپاريب، ايلديريم شاخاجاق، قارانليقلار اؤلكه ميزدهن كؤچه جكدير. گؤركملي عالم، ايرانين نئچه ديللي خالقلارينين بيرليگيني ايستهيير: بو يولدا چاليشير، هاميدان آرتيق ديلداشلارينا و قهرمان آذربايجان خالقينا آرخالانير:
هميشه اولموش وطنيم ايران
آزادليق اوچون اولارام قوربان
ايران خلقلرين تانيير هر يان
سلاملار اولسون قارداش ائللره.
***
فارسيله توركلر دورسون ياناشا
عرب، كورد، توركمن گلسينلر قوشا
بلوچ، قشقايي داغ آشا ـ آشا
سلاملار اولسون قارداش ائللره.
***
گلسين قوشولسون بوشن دؤيوشه
شاهلارا قارداش گئده يوروشه
***
آلقيشلار دئسين قارداش ائللره.
بو ايللرده تكجه بئله بير بؤيوك مبارز شاعر لازم ايدي تا خالقلاريميزي بيرليگه دعوت ائتسين. بونلاري اوخوياندا اؤزوموزه گووه نيريك كي عالميميز شوونيستلر قارشيندا، اونلارا تاي يوخ، بلكه خالقلارين بيرليگينه چاليشير: ايراني بوتوؤلوكده ايسته يير و اوره يي بوتون ايرانليلارلا چيرپينير.
عالم، تبريزين تاريخيني تانيير؛ ۱۳۵۳ و ۱۳۵۴ جو ايللرده بو شهرين سوسماسيني گؤردوكده بئله بير سورغويا گلير:
كئچميشين اوخويوب واراقلاديقجا
يا زندان گؤرونور يا قانلي عصيان
چوخداندير گئنه ده سوسدورولوبدور
بواؤلوم سكوتون پوزماقچون هاچان
بير داها قايناييب جوشاجاق تبريز؟
ارلره بو قدر دؤزوم ياماندير!
سوسانلار ازيلير، سوسما آماندير.
ائللر سوروشور خئيلي زاماندير:
هاچان سون نغمه سين قوشاجاق تبريز؟[۱۵]
تبريزده بو سون نغمهسيني ۵۶جي ايلين بهمن آیينين ۲۹ اوندا قوشدو.
۱۳۵۵جي ايلدهن، خلق اعتراضلاري يوكسلديكده شاه رژيمي بير سيرا دهييشيكيليكلره بويون اگير، او جملهدن هويداني گؤتوروب، يئرينه آموزگاري قويور. شاعر خالق حاضرليغيني خاطرلادير و «قوللارين ائل چيرمالار» عنوانلي شعريله سياسي حركتلري قارشيلايير. شاعر بو شعريده، هويدانين تؤرهتديگي جنايتلري افشا ائدير.
دوزدور بو ايللرده، شاعر هله سورگونده و وطندهن اوزاقدا ياشايير، آمما درين بير باخشيلا و كامل دوشونجه ايله اؤلكه نين سياسي اولايلارين دالين توتور و اونلارا مناسب موضع توتور. اونون ديلي گاهدان هجو ايله، گاهدان طنز ايله و گاهدان جدي صورتده اولاراق شاه ظلمونون قالالاريني ييخماق هدفيله آچيلير. بورادا طنز ديليله بئله باشلايير:
قارقا گليب وئردي خبر قارهاقار
گئتدي هويدا، گلير آموزگار.
قوي كاكا توفيق ايشيني آنلاسين
جورجوقون سيلكهلهييب دانلاسين
صوبح آچيلير لاري خوروز بانلاسين
قارقا خبر وئردي چؤنور روزگار
گئتدي هويدا، گلير آموزگار. [۱۶]
بو شعرده، شاعر هويدانينوزارت و صدارت دؤره سينده بوتون تؤرهتديگي جنايتلري، ايرانين ملتينين ازديگيني، وطني ويرانليغا، آرادان گئتمه گه سوق وئرديگي ـ «اما تمدن بزرگ»[۱۷] ادعا ائدن اوچوروما ايتهلهمهگيني افشا ائدير و خلقي عصيانا چاغيرير، خالقدان ايسته یير استعمار اويونجاغيني قوام تاپماغا مجال وئرمه سينلر، بلكه او دا شاهلا برابر قاچسين.
خالقا بئله اورهك وئرير:
قويما يئرينده توتا حاشا قرار
قوللارين ائل چير مالار
ال آپارار كرپيجه
باش گؤتوروب تولكوتك
شاهلا برابر قاچار
حضرت آموزگار!
شاعر، خالق اورهيينده اومود چيراغي يانديرير، اينانديرير كي بو چتين گونلري ده باش اوجاليقلا كئچيرتسهلر، خيانت و جنايتلر قاشيسيندا باش اگمهسهلر، غلبه چالماق ياخيندادير.
بو ايللر، شاعرين ياراديجيليق و فعال زمانيدير. وطندهن اوزاقدا اولاركن، اؤلكه ميزده اولان اولايلاري دقتله گؤز آلتينا آلير، شاهين رياكارليق، دغلبازليقلارينا توخونوب، افشا ائدير. بو زامان آلمانيادا «بيرليك» آدلي نشريهني چيخاريردي و اورادا شعرلريني چاپ ائتديريردي.
بو نشريه، ايرانا چاتديقدا الدهن ـ اله گزيب، اؤلكهميز ضياليلاري آراسيندا دولانيردي. عاليمين سياسي شعرلري بو زمان خالق و سياسيلار ايچينده آلقيشلانير. شاهين مذهبه رياكارليقلا آرخالانماسي، آمما ظلمه، جلادليقا يول آچماسيني گؤزهلجه سينه قلمه آلير. شاهين حوققابازليغيني آچيقلايير. بونا بير اؤرنك اولاراق «جلاد آچير ملته عرفان يولو» شعريني بورادا گتيريريك:
بنده ووروب ديللري ـ عرفانلاري اوددا ياخيب شعريله ديوانلاري
دوستاق ائديب حق سئون انسانلاري دار قوروب انسانلارا هر يان دولو
جلاد آچير، ملته عرفان يولو!
آخارسي سام، هر ياني جلاد ـ نؤكر قان ايچن اسرائيل اولاردان بتر
آرخالانيب زنجيره، سؤز مختصر گولله ـ توفنگ، داردي بوتون ساغ ـ سولو
جلاد آچير ملته عرفان يولو!
گولله سيخير ائللره، ملتلره قان چيله يير هئي مدنيتلره
گؤندهرير عالملري غربتلره ديرسگه دك قيرميزي قاندير قولو
جلاد آچير ملته عرفان يولو!
سيلكه له نير خالقلار اصلان كيمي قالخاجاق آخيرده ده توفان كيمي
دار قوراجاق ظولمه باقرخان كيمي جلاد آچانماز ائله درمان يولو،
عصيان آچار ملته عرفان يولو، چاره دي چون دردلره عصيان يولو[۱۸]
زهتابي، همين ايللرده شاهين بير طرفدن جنايتلريني، اؤلدورمه لريني افشا ائدير؛ بير طرفدن ده علمي اوجاقلاري ـ بيليم يوردلارينين باغلانماسيني خاطيرلاییر. خالقين سئويملي اولادلارينين دوستاقلاردا چورومهسيني، هر كوچه باشيندا دار آغاجلارينين قورولماسيني، قهرمانلارين خياوان آسفالتيني قانا بوياماسيني دؤنه ـ دؤنه آچيقلايير و دئيير: بير حالدا كي شاهين قوللاري ديرسگه دَك خالق قانينا بلنميشدير، «تمدن بزرگ»؟ آزادليق و صلحدن دانيشير؛ آمما خالقيميزين چارهسي تكجه عصياندادير، بلكه رژيمين قصرينه ولوله ساليب، توفان قوپارسين. شاعر ۵۶جي ايلين بهمن آييندا تبريزي عصيانا چاغيرير و بئله دئيير:
اي هله ده سينه سي قان تبريزيم
يونجا يئييب حقين آلان تبريزيم
شير كيمي سنگرده ياتان تبريزيم
سيلكه له زنجيرلري قير بير داها،
ميدانا اصلان كيمي گير بير داها !
***
تاريخه زينت دي سنين مرد آدين
لرزه ساليب قرنلره فريادين
سنسن اؤزون آخري اؤز امدادين
دور كي اسارت ياراماز تبريزيم،
ظولمه اؤلوم فرماني ياز تبريزيم! [۱۹]
شاعر بو شعرده تبريزين يوكسك همتيني اؤيومكله ياناشي، بو شهرين اهلينه ظلمه دؤزمهيي بگَنمیر، بئله گؤزله يير كي بابكلر، كوراوغلولار، ستارخانلار بؤيودن آنا، عصريميزين يئني بابكلريني دوغمالي و عصريميزين فرياديني چكمهليدير. عصرين شيخ خيابانيسيندان ايستير بلكه دوشونجه يارادان دانيشغي ايله خالقي يوخودان اوياتسين.
دوغرودان شاعر حقلي اولاراق ايستهمير تبريزي دايانميش گؤرسون، بلكه بوتون ايرانين آزادليغين ايسته ميشدير. شاعر يئنه ده تبريزي عصيانا چاغيريب بئله باغيرير:
قوي غضبون گورلايا توفان كيمي قان جوشا قلبونده بير عمان كيمي
ميدانا گير قورخمايان آسلان كيمي سنگر ائله داغ ـ داشيني بير داها
قدرتيوي گؤستر او ساتقين شاها!
دوغرودان همان ايل بهمن آييندا قانلي تبريز آياغا قالخيب قانا بلندي. شاعر بو فاجعهلري گؤردوكده ايران ملتينه اوز چئويريب «شاه گنه قان ـ قان دئيير» شعريله شاهين جنايتلريني افشا ائدير:
قيزدي هاوا، واي! ده لي هذيان دئيير،
شاه گنه ملت لره قان ـ قان دئيير! [۲۰]
بو اوزون شعرده، شاعر شاهين يالانچيليغيندان، اؤلدورمهلريندن، كوروش و داريوش جنايتلرينه اؤرتوك ساليب، اؤزوده اونلارا تاي جنايتلره ال ووردوغوندا، مملكتي اوجوز قيمته آمريكايا و آيري اؤلكهلره ساتماغيني، يئرينه توپ و تفنگ آليب مظلوم خالقيميزين سسيني بوغماغا چاليشديغيني افشا ائدير. شاعر بورادا هر مبارز، هر خطيبدن قاطع اولاراق شاها قارشي دانيشير و شاه رژيمينين ييخلماسيني ايستير. «قوللارين ائل چيرمالار» شعرينده خالقين، رژيمي ييخماسينا حاضيرليغيني گؤستهرير.
شاعيرين ديلي گاه كسرلي، گاه توند سياسي، گاهدان دا طنزله دولودور؛ آمما هر حالدا حق آختاران، ناحقي باساندير. شاهين ۵۷جي ايلين سـونلاريندا اؤزونو مسلمانليغا وورماسي، شاعيرين اثرينده بئله گؤستهريلير:
موشدولوغون بورج اولا اي خوش خبر
شاه باباميز كهنه مسلمان اولوب!
ملت اسلامي قيراندان سورا
توبه ائديب قائل قرآن اولوب![۲۱]
اما انقلابين غلبه چالماسيني ياخين گؤرهن خائنلر، چانتالاريني دولارلارلا دولدوروب قاچيرلار. بورادا شاعر دئميشدي:
خالقي سويان بوينو يوغونلار بويون
چانتا دولو، قويما! قاچير اي دادش!
دؤكتور زهتابي بو گونلرده بوتون ايران خالقلاريني بيرليگه چاغيرير. و تكجه توركو يوخ، بلكه فارسيجادا شعر دئيير. «نداي شهيدان بلوچ» شعرينده بئله بير ايديياني آچيقلايير:
اي بلوچ شيردل!
تا بدست آري وطن را
تا براندازي زبن رسم كهن را
تا كه فرزند تو تندر ميهنش آزاد باشد
تا بلوچستان تو آباد باشد
و اندر آن نسل جوانت بختيار و شاد باشد
آن تفنگي را كه ماه هشتيم برگير؛
و بدين پيكان با تدبير
دست در بازوي فارس و ترك و كرد و عرب زن
چون نباشد دست تنها را صدايي.[۲۲]
زهتابي شاها قارشي مبارزهلري آلقيشلايير و «چريك حماسهسي»[۲۳] آدلي اثريني ۱۳۵۵ ايلينده يازير و اورادا امپرياليسم و شاها قارشي مسلحانه دؤيوشو مدافعه ائدير. شاعر ۱۳۵۰دن ۱۳۵۷يه قدر ايللرده ان آچيق انقلابي و حماسي شعرلر دئيير و شاهدان، جنايت و خيانتلريندن نفرت بسلهييب، خالق قهرمانلارينين شاها قارشي گئدهن مسلح گنجلري اويور. ۵۷جي ايلده ايران خالقلارينين شاها قارشي مبارزه سي آيدينلاشديقجا شاعرين ده ديلي آيدينلاشير؛ خالقدان قاباق يول گؤسته قانابليره؛ سونرا توبه ائديب مسلمان اولماغيني دئيير.
شاه بو حيلهلرله خالقين كسرلي مبارزهسينين قارشيني آلماغا چاليشير، اما انقلاب دايانمير، يولوندا هر نه وارسا ووروب – سينديرير و نهايت بهمن آيينين ۲۲سينده غلبه چالير. بوتون ايراندا بئله بير شاعر كي، اوتوز ايل ـ بوغونتولو گونلردهن انقلابين غلبه چالماسينا كيمي شاه قارشيندا دايانيب، بير آن سوسماييب، گئري قاييتمايا، … يوخدور؛ البتده ايرانين انقلابي حركتلرينده دوكتور زهتابينين انقلابي شعرلرينين ائتكي سيندن دانيشماق بوندان دا آرتيق مجال ايستير، آمما زهتابي تكجه انقلابي شاعر دئييل، بلكه بؤيوك بير عالم، محقق، اديب، ديلچي و اجتماعي مصلحدير؛ بوندان آرتيق بو ساحه ده دايانماق لازم دئييلدير.
عالمين اثرلريني اينجهله مك عروضون تورك فولكوروندا كؤكلري
عالمين دهيرلي علمي، تحقيقي اثرلريندن بيريسي ده بو كتاب «اميد زنجان» در گيسينده چاپ اولموش (۱۳۷۶جي ايلين مختلف ساييلاريندا) و اديبلر طرفيندن قارشيلانميشدير. بو اثري، عالمين ۳۰ ايل زحمتلرينين نتيجهسي كيمي قيمتلنديرمك گركدير. دؤكتور زهتابي باكيدا اولان ايللرده (۱۹۷۱ ـ ۱۹۵۴ اينچي ايللده) اورادا اولان ادبياتشناسليق ساحه سينده عروضا اولان منفي مناسبتي گؤروب و هر ياندا اوخويودو:«عروض بيزه گلمه دير، بيگانه دير».
عاليمين فيكرينده، باكيدا تدريس ائدركن، بوفكره قارشي شبهه يارانير. ائله بونا گؤره بو بارهده گئنيش بير مطالعه و تحقيقه اوز گتيرير و چوخلو يادداشتلار گؤتورور. بو ايشدَن اؤترو هر ملي ادبياتين منشايي و ايلك بولاغي اولان او ملّتين فولكلورونا دقت يئتيرير. فولكلورو موزدا منظوم و منثور اثريلري باشدان اوخويور. اؤزبكستان، توركمنستان، تاجيكستان و … هر يانا سفر ائدير. چاپ اولموش فولكلور نمونه لريني نظردن كئچيرديب، قيدلر گؤتورور. دوستلاريندان، شاگردلريندن كؤمك آلاراق، تورك دنياسيندان آغيز ادبياتينين اؤرنكلريني توپلايير. مسكو، لنينگراد و باكيدا الينه كئچهجن كتابلاري آراشديرير. تكجه تورك ديلينده آراشديرمالارا محدود قالمير، بلكه فارس و عرب ادبياتينين دا فولكلوروندا دقت ائدير. فولكلور نمونهلريني توپلايير، توتوشدورور و آراشديرير. بغداددا اولان ايللر، استانبول و آنادولودا اولان ايللرده بو آراشديرمالارا داوام وئرير. قديمكي اثرلريميزي بير ده باشدان اوخويور. دده قورقود، ديوان لغاتالتورك، حتي كوراوغلو داستانلاريني، عاشيقلارين شعرلريني اوخويور. عراق توركلري، توركمن، اوزبك، قازاخ، قيرقيز، تاتار، ياكوتلار، كريم تاتار لاري و … فولكلور نمونه لريني الده ائديب هيجا و عروض عنصرلري باخيميندان دقتله نظردن كئچيريب، قيدلر گؤتورور.
تبريزه گلديكده ايراندا چاپ اولان اثرلري دؤنه ـ دؤنه اوخويوب توتوشدورور. ۱۳۶۱جي ايلده بير واحيدهني بيان ائتمه يه چاليشير، چونكي داها بونا اينانميشيدير كي «عروض بيزه گلمه، ياد و بيگانه يوخ، بلكه دوغمادير». اما ايشي قورتولمور، دوستاغا دوشور. دؤرد ايلدن سونرا يئنه آزاد اولاراق بو فكريني داها بيان ائتمه يه دايانير. دؤرد آي گئجه ـ گوندوزونو بير ـ بيرينه باغلاييب، بو ۶۰۰ صحيفه ليك اؤلمز اثري يارادير و ۳۰ ايلليك زحمتينين نتيجه سي اولان اثريني خالقينا اتحاف ائدير[۲۴] و بئله يازير:
«بو اثري يازماقلاري باغلي اولان آذري خلقين مدنيت و ادبياتينا، ائلهجه ده عموم تورك كولتورو و ادبياتينا كيچيجيك خدمت ائتميش اولسام، اؤزومو خوشبخت و بختيار حساب ائدهرم.»[۲۵]
زهتابينين درين آراشديرمالاري نتيجهسي چوخ اؤنملي و دهيرليدير. بيليريك هر بير ملي ادبياتين ايلك قايناغي، اوميللتين فولكلورودور. آذربايجان ادبياتيدا بو عمومي قانوندان استثنا دئييلدير. قديم دورلردن ـ بوگون ايگيرمينجي يوزايلين سونلارينا قدر يازيلي تورك ادبياتينين شعري ايكي وزنده ـ هيجا و عروض وزنلرينده يازيلميشدير. ايگيرمينجي يوزايلين اوّللرينده آذربايجان دا وزنلرـ عروض و هيجا عالملريميز طرفيندن آراشديريلير. بير سيرا عالملر، عروضا قارشي چيخاراق، اونو ياد، بيگانه سانيب، شعريميزدن اوزاقلاشديرما فكريني ايرهلي سورورلر، بير سيرا عالملر ده، هيجا وزنيني دوغما بيلهرك عروضي ائشيگه آتماغا اورهكلريندن گلمير؛ اما دانشگاهلاردا بو عمومي قكر اولوب، رسمي بير شكل الاراق، داها عروض تدريس اولونمور. بونون نتيجهسي بو اولور كي گنج نسليميز عروضا قارشي چيخير و اونا بيگانه قالير و اونو يابانجي تانييير.
دؤكتور زهتابي بو وضعيتي گؤردوكده، ساكت اوتورا بيلمزدی. نتيجه ده آذربايجاندا اولان آراشديرير، علي اكبر طاهر زاده ـ صابرين بو ساحه ده فكرلريني آچيقلايير و هاميسينين حرمتيني دريندهن ساخلاياراق، اولان قكرلري آراشديرير، عرب ادبياتيندا دا بو آراشديرماني داوام ائدير.
بو بحث مختلف بينالخالق سئمينارلاريندا دانيشيغا آلينميش و دؤكتور زهتابي بونلارين هاميسيندا اؤز نظريه لريندن مدافعه ائتميشدير و دنيا سويه سينده يانليش فكرلره قارشي دايانميشدير.
اوستاد، تورك، فارس و عرب ادبياتيندا عروضون نئجه دوغما اولدوغونو آچيقلايير، عروضون ماهيتيني و كؤكلريني آختارماق اوچون يازيلي ادبياتدان چوخ قديم اولان فولكلورا اوز گتيرير.
اوستاد، بونا اينانير كي عروض بيزده ده واريميش. ايلامدان اؤنجه آتالار سؤزونده، مختلف فولكلوريك شعرلريميزده عروض وزني ايشه گئديب؛ آمما عروض علميني عربلر يارادير و بوگون دؤكتور ناتل خانلري، همان يولو داوام وئرير. اوستاد زهتابي، بو اوچ ديلين ـ تورك، فارس و عرب ـ عروضون بيري ـ بيريندن فرقلي اولدوغوغو دويور و بو فرقلرين كؤكلريني آراشديرير. پروفسور، آذربايجان شعر وزنلرينه گلديكده، هيجا وزنلريني دقيق بير صورتده آرايير، گؤتور ـ قوي ائدير و نهايت دوزگون علمي نتيجه لر آلير. گؤزلليكلريني آيدينلاشديرير. بئله ليكله بو ۶۰۰ صحيفه ليك اثر خالقيميز او چون اؤلمز ادبي آبيده كيمي قالير.
پروانه نين سرگذشتي[۲۶]
بو اثر «م. شبسترلي» تخلصو ايله ايلك دفعه بغداددا، سونرا تبريزده چاپ اولدو. بو اثري احتوا ائدهن شعرلر عبارتدي:
۱ . ساغ اول بغداد
سن اوسان، من ده بويام
باغلي قاپيلار
بير ديلَك
بير داها
رخشندهنين آرزوسو
قربتدهكيلر
توفان قوپاجاق، توفان!
سهنددن پيراما قرونا پيغام!
سوسانماز ائليم!
ائل قيلينجي
يوردومون قبلهسي
سعادت وطندهدير و نئچه بالاجا شعرلر
۲ . منظومهلر:
كيچيك قردشيمه مكتوب
پروانهنين سرگذستي
يوخي
غزللر
زهتابي بير مكتوبدا كيچيك قارداشيلا دانيشير. اوزامان شاعر سوئت اؤلكه سينده ياشاييردي. بوردا باشينا گلن حادثهلري قلمه آلير و بير وطن سئوهر انسانين ايچ حاللاريني، پاك دويغولاريني تصويره چكير.
«پروانهنين سرگذشتي» منظومه سينده، بوگون آذربايجانليلارين او تايا قاچماسي و اوراداكي چتين شرايطده ياشامالاري، كيملره بويون اييب، تحقيرلره دؤزمه لريني تصويره چكميش و پروانه ديليجه اؤز حاليني يازميشدير.
بو اثر نئچه منظومهني احتوا ائدير كي قاباقجا او بيري اثرلرده ده گلميشدير. بو منظومهلر بونلاردير:
ـ يوخي
ـ بختي ياتميش
ـ بذ قالاسيندا
ـ كيچيك قارداشيما مكتوب
ـ افسانه دي شمشيره دايانمازسا آزادليق
بو اثرين ايلك منظومهسي اولان «شاهين زنجيرده[۲۷]»، شاهين قوشونو، بير آزاد سمبوليك قوشو كيمي تصويره آليب، اونون ديليجه وطنداشلاريني وطن سئومهيه، دوست ـ دوشماني دوزگون تانيماغا، يادلار سؤزلرينه آلدانماماغا چاغيرير.
بو اثرينده ده، شاعرين بوتون بشريته آرزيلاديغي سعادت و كرامتي آنلاماق ساده دير، باشدان باشا وطنداشلاريني خطاب ائدهرك، وطنين مقدسليگيني آنلاتماق ايستهيير و ملتلر بشريتين عضو و اولاراق:
بير عائلهدير بشريت
دايم آراميشدير او سعادت
و كرامت
ملتلر اونون عضوو كيميندير
يوكسلمهسه لاكن، سورونر هميشه كاروان اوجالانماز.
انسانليغا لاييق اولان انسان
اؤز ملتين دردينه بيگانه قالانماز
اؤز قونشوسونو غمده گؤروب، كئفده اولانماز.
انسان دئييل همجنسيني بدبخت گؤروب، جام آرايانلار
خلقي ازيلن حالدا سوسوب نام آرايانلار!
شاعر وطندهن اوزاق غربتلري گزيب، خوشختليك آختارانلاري هارايلير، ائلين داردا اولماغيني سؤيلور.
شاعر سعادت آرديجا دنياني يئرسيز بيليب، آزادليغي آنا تورپاقدا بيلير و گوهري وطنده تاپماغي لازم بيلير. شاعر جسارتله ايللر بويو زنجيرده قالماغينا اشاره ائديرسه، ذرجه ده ايمانيني الدهن وئرمهديگيني خاطرلايير و اينانير كي بير گون زنجيرلريني قيراجاقدير:
شاهين گئنه زنجيريني دارتير
قوب بوپ! دئيير ـ آخير قيرارام من سني، زنجير!
چون قير مالييام من سني آخير!!
شاعر «بذ قالاسيندا» بابك قالاسيني گؤز اؤنونده جانلانديريب، اوندان الهام آلير و بوگون آنا وطنين يئني بابكلره احتياجي اولدوغونو سؤيلور.
و «افسانه دي شمشيره دايانمازسا، آزادليق» منظومه سي اؤزو بير سؤز دئمهميشدهن اؤزونو آچيقلايير.
بوعنوان اؤزو بير مقاله دير. «بختي ياتميش» منظومه سي ده يئنه شاعيرين بوتون مبارزه دويغو سونو احتواائدير، شاعرين آمال ـ آرزيلاريني، انسانلارين آزاد ياشاييشيني قلمه آلير.
باغبان ائل اوغلو
زهتابينين ده يرلي و اوزون منظومه لريندهن بيريسي «باغبان»[۲۸] اثريدير. حسين خان باغبان مشروطه انقلابينين اصيل قهرمانلاريندان، ستارخان، باقرخاندان سونرا بو انقلابين اوچونجو شخصيتي و قهرماني ايدي. پروفسور زهتابي بو اثرين اوّلينده گؤزل علمي و تاريخي بير مقدمه يازاراق، حسينخانين ياشاييشيني، هابئله اونون مشروطه انقلابي ايله مناسبتيني ده يرلي بير تحليل ايله آچيقلايير. آمما شعره گلديكده زهتابينين قلمي يئني بير قول ـ قاناد آچير، ايلهام پريسي گؤيلره يوكسه لير:
قوي آچسين قاناد اودلو شاهين كيمي
افقلرده الهام پريم بير داها
قوي عصيانچي طبعيم آتي
سمالار كيمي كيشنهييب بيرده قالخسين شاها.
سانكي شاعر بير داها فضا ايسته يير، بلكه او فضا دا اورك سؤزلريني ديله گتيرسين، اوناگوره قلمه اؤيونور؛ بو اؤيونمه نين دليلي بودور كي:
تانيتديرماق ايستير قلم
ائله بير ايگيدوار، اؤز وارليغين
ائل اوغروندا آتديقدا آتشلره
تشكّر بئله اومماميش
گؤرهن وارسا قوي سؤيله سين
ائله ساده بير انساني
كه اولموش جوانليقدا گُل باغباني.
ايگيد خلقينين عصياني
جوشان گونلر، ائل باغباني.
اوبير گون بئجرتميشدي بوستان، اكين
كي شاه خلقي آج قويماسين
و بير گون ده الده توفنگ
گريبسينه خاقانلارا
اولوب مظلوم انسانلارا باغبان.
اوجالديقدا مظلوملارين نالهسي
حياتي بوغاركن اساتدره چن
وطن توپراغين قاپساياركن دومان
و بوغدوقدا هرياندا مظلوملاري اهرمن
آلو ياغديران
ايلديريم تك شاخان
باغبان. [۲۹]
زهتابينين عصيانچي روحو دا «باغبان» كيمي جوشا گلير، بوتون مظلوملارا داياق، ظالملره قارشي دايانير، ايگيدلري اؤيورسه، نامردلري نفرت اوخونا توشلايير.
نعمت يارادانلاري نه قدر مرد اولورسا
سردارلاري هر قدر جوانمرد اولورسا
حق اوغرولاري بير او قدر تولكو صفتدير.[۳۰]
زهتابي شعرينده، هميشه خالق قهرمانلاري بير مقدس سيما ايله تصويره آليناراق، خالق دوشمانلاري همان قدر چيركين، ظالم، ييرتيجي گؤسته ريلير و هر ايكي طرفين سيماسي آيدينجاسينا ايشيق آلتينا آلينير. قهرمانلارا گوونمك، اونلاري اؤيمكله ياناشي، دوشمانلارا نفرت، زهتابي نين بوتون شعرلرينده گؤز اؤنوندهدير. بو اثرينده ده حسين خان باغبانين قهرمان و ايگيد سيماسي داها گؤزل، داها آيدين گؤسته ريلمكده دير. حسين خان، ملي سرداريميز ستارخانا داياق و انقلابا بايراقدار اولموشدور. هر ياندا سردار يالقيز قاليرسا، باغبان دادينا چاتير، ائل ايگيديني تك قويمايير. بو تاريخي حقيقتي زهتابي بئله قلمه آلير:
سردار اؤز ايچينده تك و تنها دؤيوشركن
هر ان تله سير عمرونه سون قويماغا دوشمن
لاكين بونو بيلميركي سردار قالا داردا
سيمرغ تك حاضر اولار اوردا.
باغبان
مشروطهيه بايراقدار اولاندان
بايراق گئجه ـ گون دالغالانيبدير
افسوس كي لالدير قوجا تاريخ
قادر دئييلدير اچسين كي حسين خان
اوخ نئجه رد اولدو يانار او ددان ـ الودان
شيمشك كيمي دوشمن صفيني ياردي بير آندا
ائل سرداري دوشمن صفينين آرخالاريندان
قورشون سهسي سنگردهن ائشيتديكده، دئميشديباخ، گلدي حسين خان!
شاعر، ائل اوغلونون بؤيوك رشادتلريندهن دانيشاركن، اونون اورك دؤيونتولريني ده تصويره چكير. قهرمانين ايگيدجه احوال روحيه سيني آچيقلايير. «نايب اصغر» كيمي ائل طرفداري، دوشمن صفينه قووشماقدا آجينير؛ چاليشير ائل سئوه ني ائله ساري چكسين.
باغبانين نايب اصغره سؤيله ديگينه بير باخاق:
باغبان: كيملردي بوگون آرخا دوران سيزلره، كيملر؟
قاجار دورور آرخاندا سنين، يوخسا يتيملر؟
كيمدن سن گولله آتيرسان؟
گولله ندن اؤلن اَلسيز ـ آياقسيزدي و يا خان؟
بيز قان تؤكوروك، تؤكمه يه سلطان
ناحق يئره تاقان!
بيز، قان تؤكوروك، اينله مه سين ظلمده انسان
بيز، قان تؤكوروك، حّر ياشاسين يوردوموز ايران!
بو دانيشقلاري سونرا «نايب اصغر» دوشونوب، يئنه ده انقلابا وائله قووشور. گؤروروك حسين خان تكجه قولونا، توفنگينه دايانماييب، بلكه ديلينه و عقلينه دا دايانماقدادير. چاليشير. دويدوغو حقيقتلري خالقينا يئتيرسين، خالقيندا دوشونجه ياراتسين و دوشمنلري آزالديب، ائل سئونلري آرتيرسين.
شاعر، تاريخه صادق قالاراق، ايگيدين قهرمان سيماسيني، رئال وارليغي كيمي قلمه آلير، اونون آتشين دؤيوشلريني، فداكار ايشلريني، ائله ـ يوردونا عاشقانه و مردانه جان وئرمه سيني شعره چكير.
دوغرودان دا بئله بير قهرمان هانسي ملت ايچينده اولموشدور؟
شاعرين بو حماسه ني يئنيدهن ياراتماسينا دليلي، تاريخي ثبت ائتمه مه سيندن ايره لي گلير و منظومهنين هر يئرينده بو موضوعا اشاره ائدير كي:
داش قلبليميش افسوس
بير كلمه سؤزوندن؛
شايد ده جواب آلمادي هئچ كيم
گر سوردو اؤزوندهن.
شاعر بئله اينانير كي تاريخ بويوبئله بير ايگيد دنيايا گلمه ميش و هئچ ايگيدي اونا بنزهتمك اولماز. باغبان ياشاييشي هئچ بير اري، هئچ بير آسلاني آنديرمير. او، مين بير ايكيدليك گؤستهريبسهده:
باغبان دونونون ساده دؤشوندن
آسلانمادي بير شانلي نشان دا
لاكين اؤزو بير شانلي نشان تك
حق عاشقي ايرانليلارين قيرميزي قان تك
قلبيندن آسيلدي.
باغبان ياشاييشي بير ياندا قالسين، زهتابينين عصيانچي روحو، ايگيدليك دوشونجه سي، مبارزه روحو دالغالانماقدادير. زهتابي بو اثري ياراتماقدان مقصدي، اؤز دوغما ائلينه قهرمان روحو باغيشلاماق و اونلارا مبارزه ضرورتيني آنلاتماق ايدي. شاعر هر صحفهده يئري گلديكده ائله گؤزل و سئوگيلي تصويره آلير كي اوخوجو اختيارسيز گؤزلري ياشا دولوروبئله اوركدن اؤيونور.
قوي اولسون اون[۳۱]
بؤيوك عالم هنر عالمينده، بوتون يازيچيلاريميزدان اوستون و علمي، آخيجيدير. ايستهر تاريخ مادهلري، ايستهر شعر آراشديرمالاري، ايستهرسه ده ادبي هنرده هاميدان با جاريقلي بير يازيچيدير. آدي كئچهن اثر، نثر اولاراق نئچه حيكايه و خاطرهني احتوا ائدير. بو يازيلار عاليمين وطندن اوزاق قالديغي ايللرده، ياد اؤلكهلرده يازييا آلينميشدير. البتده دئمك لازمدير كي بونلارين بير سيراسي مختلف درگيلرده قاباقجا ياييليب، ايلك دؤنه اولاراق ۱۳۷۰جي ايلده، يازيچي طرفيندن توپلانيب و ۱۳۷۲جي ايلده تبريزده چاپ اولموشدور.
موضوع جهتيندن حيكايه لرين مضمونو بيز ايران آذربايجانليلاري اوچون نامأنوس نظره گلير؛ اما يازار اؤزو تأكيد ائدير كي بونلارين هاميسي رئال حادثه لردير. ائله بونا گؤره ده بو خاطرهلر و حيكايهلر دقيق و ادبي- علمي جهتيجه آراشديرماغا گرهكير؛ بونا گؤرهكي بو خاطره لر عاليمين اؤز باشينا گلهن حادثه لردير.
اونودماماق كي عالم سولچولاردان ضربه و صدمه آلديغينا گؤره، عنادلي بير باخيشلا بئله موضوعلارا توخونور[۳۲]؛ بونون دا گناهي عاليمده يوخ، بلكه زامان شرايطيندن يارانان حادثه لر و آداملارا قاييدير؛ عاليم چاليشيب سولچولار طرفيندن خالقيميزا و ورورلان ضربهلري آچيب ـ گؤسترسين؛ آمما بو ساحهده تمام حقلري عالمه وئرمك اولماز.
بوگون سياسي شرايط دؤندوكده بيز ده دؤنمه لي دئيیليك؛ بو گونكو دوشونجهميزي، دويغوموزو تامام گونلره، بوتون زامانا تعميم وئره بيلمهريك؛
بلكه دهگيشيلمه، تكجه، حقدير و حقيقت. حقيقت آختاران هر زمان اولموش، حقيقت گيزلهنيبسه ده آرادان گئتمه ييبدير. حيكايه لر وطنيميزدن اوزاق يئرلرده باش وئرير و بئله گؤسته رير كي عالمين پسيكولووژودان نه قَدَر بيليكلي اولدوغو يوخ، بلكه اجتماعی موضوعلار، پسيكولوژيكال حاللارادا دريندن واقف اولدوغونو دويوروق.
علم معاني (لكسسيكولوژي)تركيب لغوي زبان آذري ادبي معاصر[۳۳]
بو اثر فارسيجا يازيليبدير. دؤكتور علي اكبر ترابي (حلاج اوغلو) اونون رداكتورلوغونو بوينونا آلميشدير. بو اثرده عالم ديلچيليك علمينه آرخالاناراق، چوخ علمي و دهيرلي اثريني ياراتميش و گؤستهرميشدير كي بو علمده هاميدان بير قاريش اوجادا دايانيبدير. بو اثرده عالم چاليشير كلمه لري و سؤزلري معنا جهتيندن آراشد يريب، گتيرديگي معنالاري چاغداش ادبياتيميزين و معاصر شاعرلريميزين اثرلريندن، هابئله چئشيدلي ژانرلاريندان اولسون. همن گتيرديگي مثاللار، اونون چاغداش ادبياتيميزين بوتون اينجهليكلرينه و بوتون كيچيك ـ بؤيوك شاعيرلرينين اثرلرينه دريندهن تانيش اولدوغونا تايسيز بيرسنددير.
چكيجي حال بوراسيدير كي، عالم هر بؤلومده بير موضوعو آراشديراراق، او موضوعون بوتون بوجاقلاريني نظرده توتوب، تام گوشه لريني آچيقلاميشدير و اؤيره نجيلري آنا ديليميزين گؤزلليكلريله، هابئله گئنيشليگي ايله تانيش ائدير. بو اثر، دنيا ديلچيليگينده، لئكسيكولوژي علمينده گؤزل بير اؤرنكدير. اديبيميزين بو جهتدن باجاريغي و گوجونو گؤسترمكده دير.
معاصر ادبي ـ آذري ديلي[۳۴]سس- صرف
ديليميزه عايد اولان و آز مدت ايچينده بوللو ـ بوللو يازيلان كتابلار ايچينده هلهده دهيرلي و علمي سؤيّه يه مالك اولان اثرلرين بيريسي پروفسور زهتابي نين بو كتابيدير.
بو اثر بير عمر آراشديرما، چاليشما و تحقيقلرين نتيجه سي اولان بير كتابدير. بؤيوك بيلگين بغداددا ياشايان ايللر، عائلهسي ايله هر ايل آوروپايا گئديب اونلارين آنا ديللريني اورادا مختلف علمي ـ ادبي چخيشلاري اولاردي ـ اورادا آذربايجانليلارين اؤيرهنمهگه ماراغيني گؤروردو. اونا گؤره بو اثري يازيب، ۱۳۵۵جي ايلده چاپ ائدير، هابئله بغداد دا آذري ديلليلرده بونو ايستهييرديلر؛ اونا گؤره بو كتابي بيرده باشدان حاضرلاييب چاپا وئردي. آمما اورادا بو كتاب اؤزگه نين آدينا چاپ اولدو. اسلامي انقلابدان سونرا، زهتابي وطنه قاييديب، اؤز وطنينده بئله بير اثرين يئريني بوش گؤرور. بيرداها يازماغا باشلايير. نئچه كتابي پلي كپي صورتينده چاپا حاضرلايير؛ او جملهدن «آنا ديليميزي اؤيرهنك»، «زبان ادبي معاصر آذري» اثرلريني پليكپي اولاراق علاقمندلرين الينه چاتديرير. ۱۳۶۸جي ايلده تبريز راديوسو اوچون راديو امكچيلرينه توركجهني تدريس ائتمهيه دعوت اولونور. اونون اوچون ده بئله بير اثر حاضيرلامالي اولور. بونلارين هاميسي ال ـ اله وئريب بو اثر يارانير واينديكي صورتده- علمي سويهيه مالك اولاراق مكمل اولموش صورتده ۱۳۶۸ ايلينده تبريزده چاپدان چيخير.
بو اثرده ديليميزي لاپ ساده دن باشلاييب، سون درجه چتين جملهلره قدر اؤيرتمه يه چاليشير، سس حقينده، حرفلر و الفبا، سسلرين مختلف طبقهلنديگي (اينجه، قالين، دوداقلانان دوداقلانمايان و …) سس اويغونلوغو، توالورقانونو، هيجانين نه اولدوغو، وورغو، كلمه، كلمهنين يارانماسي، ساده و دوزهلتمه سؤزلر، شكيلچيلر، سوزلرين يازيليش قايدالاري، جملهنين مختلف قسمتلريني تشكيل ائدهن اسم، صفت، فعل، ساي، ضمير، مصدر، زامانلار، حاللار و … بونلارين مختلف بؤلوملري و … هاميسي بيرـ بيرينين آراديجا گلير. جلب ائديجي حال، هر درسين آخيرينده تاپشيريقلاردير. بو اثر علمي سويه ده ديليميزي اؤيرتمه گه چاليشير.
دئديگيميز كيمي بو اثر عالمين ۲۵ ايلدهن آرتيق درس وئرمكلرينين و مختلف اؤيرنجيلرين ايستكلريني يئرينه يئتيرمك اوچون يازيلان اثريدير و اولدوقجا مكمل و ايستكلري قانع ائدهن بير اثردير.
آنجاق ممكوندور بوگون بو اثردهن كامل ده بو ساحهده كتاب يازماق اولسون كي بيز چوخ دا اونلان موافق اولماياق، آنجاق بئله اولورسادا، اونون دهيري هئچ ده آزالمايير.
زهتابي و مطبوعات عالمي[۳۵]
پروفسور زهتابي ۲۵ ايل سورگونده ياشاركن، بير آن وطنيندن غافل اولماميش، اوره يي خلق ايله دؤيونوب، وطنه خاطر چيرپينيري. غدار شاهليق رژيمي، عاليمين وطنيني استبدادا چولقاييب و بؤيوك استاد، ادبي ايشي ايله ياناشي، سياسي مبارزهيه ده قاريشميشدير. اونون يانيندا سياسي مبارزه ايله فرهنگي مبارزه و علمي مبارزه بيرلشميشدير. اوستاد آلمانيادا، روسيادا، و يا عراقدا اولان زامانلار بو مبارزهدن چكينمه ميش، گاه مطبوعات ايشينده چاليشيب، درگيلر يولا سالميش، گاه راديو وئرليشلريني سهمانلاييب آنا ديلينده، ملي مسئلهيه توخونماغي وائللريميزين، وطنيميزين اولان خالقلارين فرهنگي دردلريني سؤيله مك اوچون چاليشميشدير؛ هر حالدا بيليم يوردلاريندا چاليشمالاريلا بو مبارزهيه دوام وئرميشدير و هئچ زامان «يورولدوم» دئمهييب، يئره اوتورماميشدير. زهتابينين راديو وئرليشلريني آراشديرما اوچون هله الده سند يوخوموز، ائشيدهنلرين خاطرهلريندهن علاوه بير زاد الده ائده بيلمه ديك؛ آنجاق گله جكده بو امكانلار ياراناجاق و عاليمين بويولدا چاليشديغي فعاليتلر اوزه چيخيب، مبارزه يوللاري آيدينلا شاجاقدير.
مطبوعات طريقي ايله ايرهلي سوردويو مبارزهسي اوچون تانيش اولماغا، اليميزده نئچه ـ نئچه سند وار و اونون بير بؤلومو ساييلان «بيرليك» درگيسي چاپ اولوب و بوگون اللرده گزير.
«ايرانلي مترقي تورك روشنفكرلر جمعيتي»نين اورگاني اولان «بيرليك» نشريهسينين ايلك ساييسي ۱۳۵۴جو ايلين شهريور آييندا ـ آذربايجان دموكرات فرقه سينين رسميتله آچيليشي مناسبتله ۱۳۲۴جو ايل شهريورين ۱۲سي چيخميشدير. هر سايينين باشيندا بو عنوان يازيليردي:
«بيز ستارخان، علي مسيو، حيدر عمي اوغلو، خياباني، اراني، پيشهوري و بهرنگينين يولو ايله گئديريك».[۳۶]
بو نشريهنين ايلك نمرهسينده، روزنامهنين هدفي نه اولدوغونو ايضاح ائدركن يازير:
«ايران زحمتكشلري و ملتلرينين رژيم عليهينه مبارزه سينين غلبه سينه هئچ شبهه يوخدور» و ايضاح ائتميشدير: «داها سلطنت رژيمي اوزون عمر سورمه ييب، آرادان گئده جكدير».[۳۷] بو نشريهنين «ايلك هدفي ايرانلي مترقي تورك روشنفكري بيرينجي نؤبهده وطندن خارجده ياشايان تورك روشنفكري آراسيندا علاقه، فكر و هدف بيرليگي ياراتماق» ايدي. ايكينجي مسئله و يا هدف، ملي حقوق بارهده و ملي مسئله يه توخوناراق علمي معلومات وئرمه و ملي اويانيش ياراتماق اولموشدور. بو نشريه ايكي صحيفه ده و ايكي ديلده ـ توركجه و فارسيجا ـ چاپ اولوب ياييليردي. نشريهنين مجموعه سي ۱۳۵۸جي ايلده تبريزده ياييلدي. نشريهنين هر ساييدا آذربايجان چاغداش قهرمانلاري و روشنفكرلري اولان صمد بهرنگي، جعفر پيشهوري، شيخ محمد خياباني، ستارخان و … ياشاييشينا و فكرلرينه داير علمي مقاله لر يازيليب، هر ساييدا ملي مسئله يه بير زاويهدن توخوناراق، مهم شخصيتلر وسياسي گروهلارين باخيشيني بو بارهده آراشديريب آچيقلاييردي. بو نشريهنين سون ساييسي ۵۷ اينجي ايلين بهمن آيينا عايد اولور و اسلامي انقلاب غلبه چالديقدا، عاليم وطنينه قاييديب و هدفه چاتماغي ياخين گؤرموشدور.
بو نشريه ۴ ايل آيليق صورتينده چاپ اولاراق سياسي و فرهنگي مسئلهلري بيرگه ايرهلي آپاريب، شاه رژيمينين چركين خيانتلريني آچيقلاييب و اوخوجولاريندا ملي و سياسي اويانيش ياراديردي. هر ساييدا م. شبسترلي و يا م. ميشوولو تخلصو ايله عاليمين شعرلري چاپ اولوردو. زهتابينين يازديغي موضوع، گونون سياستلرينه مربوط اولوردو. دئمك لازمدير اسلامي انقلابين تاريخيني دوزگون آراشدير ماسي لازم گليرسه، بو درگينين شعرلرينين اينجه لمه سي ده لازم اولاجاقدير.[۳۸]
ايران توركلرينين اسكي تاريخي
بو دهيرلي كتاب انقلابدان سونرا ياييلان كتابلار آراسيندا بير پارلاق اولدوز كيمي پاريلدير. بو كتاب وطنيميز ايرانين ميلاددان ۴۵۰۰ ايل قاباقدان، اسكندرين هجومونا قدر تاريخيني احتوا ائدير.
ايندييه قدر وطنيميزين بودؤوروندن چوخلو متعصب تاريخچيلر واز كئچيب و بير سيراسي دا تام ترسينه گؤسترميشلر و تاريخيميزي هخامنشيلرله باشلانان بيلميشلر؛ حال بو كي بوگون تاريخ علمي، قطعي اولاراق گؤسته ريركي توركلر ۳۵۰۰ ايل فارسلاردان اوّل، ايران تورپاغيندا مدنيت و حكومت قورموشلار. پروفسور محمدتقي زهتابي بو اثري اوچ جلدده يازميشلار:
بيرينجي جلد: ۴۵۰۰ ايل ميلاد دان اؤنجهدن اسكندرين ايرانا هجومونا قدر.
ايكينجي جلد: اسكندردن ايسلاما قدهر.
اوچونجو جلد: اسلامدان سونرا كي تاريخي احاطه ائدير.
بيرينجي جلد ۱۳۷۷جي ايلين ايكينجي ياريسيندا چاپدان چيخيب، چوخ آز بير زاماندا بازاردان قورتولدو. ايللربويو چتينليكلرله اوز ـ اوزه دايانان و بوتون وارليغي ايله چاليشان اوستاد، بو كتابي يازماقدا گؤزلرينين ايشيغيني، اورهيينين ياغيني اريديب، اؤز خالقينين زنگين كئچميشيني دنيايا تانيتديرميشدير. اوستاد بو اثرينده كوله بورونموش ياناركؤزلري، قلم گوجو ايله دئشهلهييب، يئنيدن آلولانديرميشدير. بو اثره آرخالاناراق، بيزلر بوگون ياشيميزي اوجا توتوب اؤز كئچميشيميزدن مدافعه ائده بيليريك. حقيقتده اوستاد بو اثر يله آذربايجان تاريخينين گيزلين بوجاقلاريني آيدينلاشديريب، مزدور و ساتقین تاريخچيلرين گؤزونه تورپاق سپميشدير.
عالم بو اولمز اثرينده توركلر تاريخيني علمي بير مئتود ايله، مختلف تاپيتيلار والده اولان فاكتلار اساسيندا آچيقلاييبدير. اوستاد، نئچه ديله ـ توركو، فارسي، عربي، فرانسا، روس، آلمان، و انگليسجه يه تانيش اولدوغو مناسبته گؤره باجارا بيليبدير يازديغي تاريخي، چوخ درين مطالعه سايه سينده دقتلي و صداقتلي اولاراق، دنيايا باغشيلاسين؛ ائله اونا گؤره بو اثر حيرت ائديجي حالدا ائتكي بوراخيب و هر اوخوجونو يئني بير دنيايا آپارير؛ بئله اثر اؤلكه ميزده و شايد دنيا اوزونده تايي گؤرونمز اولسون. بو اثر شاهد گتيرديگي كتيبه لر، گؤسترديگي آبيده لر، سايديغي يئر اوستو و يئر آلتي قازينتيلاردان تاپيلان سندلر، استفاده ائتديگي قايناقلار هاميسي اوستادين درين و گئنيش معلوماتيني گؤستهرير.[۳۹]
دؤكتور زهتابي بو اثرينده، ميلادان ۴۵۰۰ ايل قاباقدان باشلاييب اسكندرين ايرانا هجوم گتيرديگي زمانا قدر تاريخيميزي آچيقلايير و بوتون ايران تاريخچيلرينه قارشي تاريخي اورتادان ـ هخامنشيلردن باشلاديقلارينا رغماً، ۴۰۰۰ ايل اونلاردان ايرهلي گئديب تاريخ و تمدن تاريخيني آراشديرير. اوستاد گؤسته رير كي آرياييلارين ايران تورپاغينا گلمه سيندن ۳۵۰۰ ايل اؤنجه بو اراضي ده تورك ديللي مدنيتلر قورولموشدور. عالم بو چاشديريجي معلومات اوچون، علمي قايناقلار، فاكتلار تانيتديرير و اينكار ائديلمز بير منطقله آرياييلارين بورايا گلمه سيندن اؤنجه، توركلرين بورالاردا ـ عراق و ايرانين بوتون دوغو، مركزي و خزرين گؤنئي و قوزئيينده و بو گونكو آذربايجاندا بشريتين ايلك مترقي و پارلاق مدنيتي ياراتميشدير.
بورادا سومئرلر، آراتتالار، ايلاملار، كاسيلر، هورريلر، قوتتيلر، لوللوبيلر، گيلزانلار، امردلر، كاسپيلر، ماننالار، اورارتولار حكومت قوروب، مدنيتلر ياراتميشلار.
عاليم بو مدنيتلري تانيتديراراق، علمي آراشديرمالاريندا گؤسته رير كي بونلارين هاميسينين ديللري التصاقي اولوب و آريا ديللريندن فرقلي اولاراق، تورك ديللرينين كؤكو ساييلير. عالم درين بير معلومات وئرهرك، هئچ بير سورغونو جوابسيز بوراخمير و دقتلي اوخوجونو قانع ائده بيلير.
اوستاد، موضوعلاري هر بوجاقلي طرح ائدهرك، بحثي او قدر آچير كي داها بير سورغويا يئرقالمير و علمي اثبات يوللاريلا ايران توركلرينين مدنيتيني آچيقلايير. تاريخدن علاوه، اونلارين ديل، دب، مدنيت و آيري ـ آيري موضوعلاريني آچيقلايير. بورادا گتيرديگي فاكتلار، انكار ائديلمز صورتده بوتون شووينيستلري رسواي ائتمه گه امكان يارانير و ادبي رياكارليغي افشا ائدير.
بو كتابدا آدلاريني چكديگيميز قبيله لردن سونرا ميلاددان ۹۰۰ ايل اؤنجه پاسارگاد قبيلهسينين رهبرليگي آلتيندا اولان اون پارس قبيلهسي شرقدن ايرانا گلمه سيني يازير و گؤسته رير كي بو ابتدايي حيات كئچيرن قبيله لر، بو اراضي نين اصيل مالكلري اولان و بؤيوك مدنيت يارادان التصاقي ديلليلر اونلارا قابا قجيل حيات، ياشاييش، يازي و ساير اؤيرهتميشلر. هابئله اوغوزلارين، ساكالارين آذربايجانا گلمه سي، ماد حكومتينين قورولماسي، هخامنشي سُلاله سي ايش اوسته گلمه سي، كوروش تومروس خانيم ايله دؤيوشوب اؤلمه سي، سونرا هخامنشلرين ملي ظُلمو قارشيندا قانلي قالخيشلار، هابئله اسكندرين ايرانا هجوم گتيرمه سينين سببلري ايضاح اولوناراق، مختليف مدنيت، ديللر، فولكلور، ادبيات، اوئستا كتابي، نوروز بايرامي و آيري ـ آيري مراسيملرين كؤكؤ آچيقلانير.
بئله بير اثري او خودوقدا اينانيريق دؤكتور زهتابي تكجه آذربايجان يا ايران عالمي يوخ، بلكه ۳۰۰ ميليون تورك ديللي خالقلارين، اوندان دا اوستون بشريت عالميدير.
او، حقيقت آختاران انسانيت عالميدير. «ايران توركلرینين اسكي تاريخي» نين ايكينجي جيلدي ۱۳۷۹دا چاپدان چيخدي. بو اثرده اسكندر هجوموندان سونرا آتروپاتن دولتي، پارتلار و ساسانيلر سُلاله لري آچيقلاناراق، اونلارين سياسي قورولوشي، مدنيت دورومو، مدنيت، ديل و ملي دوررومونو آراشديرير. اؤزلليكله ساسانيلر زامانيندا آذربايجان ملتينين تشكّولو و ادبي ديليميزين فورمالاشماسي ساحه ده چوخ گؤزل و علمي معلومات وئرير.
پروفسور زهتابينين بو اثري دنيا سوّيه سينده تايسيز علمي ـ تاريخي اثردير و توركلرين، اؤزلليكله بيز آذربايجانليلارين ايللر بويو تاريخيميزين اوستو باسديريلي قالديغيني درك ائده رك علمي سويه ده آچميش و تاريخ قارانليقلاريندا پارلاق بير گونش يانديرمشدير. بو گونشين ايشيغيندا، بيز گله جگه اطمينانلا آدديم آتاجاغيق.[۴۰]
بو دهيرلي اثري تانيماق اوچون، اونو اوخوماق لازمدير. هئچ بير ديل ايله اونو تعريف و توصيف ائتمك اولماز. گرهك اوخوماق.
اسلاما قَدَرايران توركلرينين ديلي و ادبياتي
دؤكتور زهتابينين دهيرلي اثرلريندن بيريسي ده بو كتابدير. بو كتابدا ايران توركلرينين ديلي و ادبياتيني ان قديم زامانلاردان اسلاما قدر آراشديرير. بو علمي آراشديرمادا، سياسي دوروملاري و اونلارين علمه قارشي آماجلاريني گؤسته رير و بيلينديرير كي حقيقت و علمه ضد اولان فكرلرين نتيجه سينده، بيزيم زنگين و قديم ادبياتيميزين كؤكو، ميلادي يوزايللرين ۱۳ندن ايرهلي گئتمه ميش و اوندان اؤنجه ده كي ديليميزي آراشديريب، فاكتلار اله گتيرمگه چاليشيردي. پان توركيست! آدلاناراق دامغالانيردي. بئله لیکله زنگين و نئچه مين ايله مالك اولان ديليميزين تاريخي و ماترياللاري دانيلير و هئچ ديلچي، اديب و آراشديرماچي بو ساحهده قلم اله آلماغا جرأت تاپمايير. يانديريجي حال بوايدي كي، كتاب دده قورقود دنيا سوّيهسينده تانيناراق، اونون تاريخيني ۵۰۰ ايلدن ايره لي آپاراندا، بير سيرا قلم صاحبلرينين تهمتلري باشلانيردي. نهايت حسن اوغلو و عمادالدين نسيمي ايله ادبياتيميزين باشلانغيجي يازيليردي و بونلارين درين فلسفي، ادبي فكرلري و هنرلري گؤيدن دوشمه، كؤكسوز و گؤبهلك كيمي يئردن چيخما تانينيردي.
آمما دؤكتور زهتابي بو كتابي ايله آذربايجان ديلي تاريخينده بير گونش يانديردي، بو قارانليقلاري ايشيقلانديري.
۱۳۵۸جي ايلده بو قلم صاحبينين «ادبيات باستان آذربايجان[۴۱]» عنوانلي كتابي چاپ اولموشدور و ميلاددان اؤنجهيه عايد اولان شعرلرين اؤرنهييني و ئرمهيي اوچون، شوونيستلرين گؤزلريني چيخمارتميشدي، ايندي پروفسور زهتابي بو اثرينده گؤسته ريردي آذربايجاندا «آريا»ييلرين گلمه سيندن ۴۰۰۰ ايل اؤنجه[۴۲]، زنگين بير ادبيات واريدي. بورادا علمي بير سوّيهده گؤسته ريركي اشكانيلر، ماننا، ماد، اورارتور، گيلزان، هورري، ساوير، قوتتي، لوللوبي، كاسي، كاسپي، اوتتي، ايلام و سومئر حكومتلري آرياليلاردان ۴۰۰۰ ايل قاباق يازيب ـ ياراديب و آذربايجاندا بؤيوك، زنگين و اينجه بير ديل و ادبياتلا برابر درين، محكم و بؤيوك مدنيت ياراتميشلار و بو مدنيتلرين نتيجهسي آذربايجانا عايد اولاراق، آذربايجان خلقي تورك ديللي اولموش و بو گونكو ديليميزين كؤكو ساييلير، يوخسا دده قورقود كيمي بير اثر، بير آنداگؤيدن دوشمه ييب و بيردن بيره يارانماييب، بلكه يوزايللر و مين ايللر ياراد جيليغين سونوچو اولموشدور.
مسلم بودور كي ديوان لغاتالتورك كتابيندا يازيلان شعرلر ۳۰۰۰ ايل بوندان اوّل يارانان واقعي و تاريخي حادثهلرين افسانهلنميش پارچالاري دير. آلپ آرتونقا، مادلار دؤرونده يارانان «داستانلارين قهرماني، عيني حالدا بير تاريخي سيما اولوب و اونونچون قوشولان شعرلر ۳۰۰۰ ايلليك شعر نمونه لريميزدير. دده قورقود كتابيندا يازيلان ۱۲ اوسطوره، مين ايللر بوندان قاباغا عايد اولان اوسطورهوي فكرين نتيجه سيدير. بوردا تاريخي حادثهلر انسانلارين ابتدايي دنيا گؤروشلرينه دوگونله نيب و بؤيوك اوسطوره لر يارانيبدير؛ يوخسا كيم ادعا ائده بيلر كي بو ۱۲ ناغيل بيردن – بيره انسانين ذهنيندن آخيب گلميشدير؟! بو كتاب مين ايللر بويو بؤيوك بير خالقين ائنيش ـ يوققوشلو تاريخين نتيجهسي اولا بيلر كي سونرا كي يوز ايللرده يازييا آلينميشدير.
دؤكتور زهتابي بو اثرينده هر تاريخي، بير دؤوره نين ديل خصوصيتلريني، ياراديلان اثرلري و يالانچي محققلرين، بيزي دانانلارين سياسي مقصدلريني آشكارا چيخارميش و اونلارين عمدي يا غير عمدي سهولريني، رياکارليقلاريني آچيقلاميشدير.
بورادا گؤسته رير سومئرلر ميلاددان ۴۰۰۰ ايل قاباق اورتا آسيادان، آذربايجان يولوايله، دجله و فرات چايلاري آراسينداكي تورپاغا گليب، اورادا ايلك بشر مدنيتيني قوروب، ايلك ميخي الفباني ياراتميشلار. سومئرلر تقريباً مين ايل سورهسينده ايكي چاي آراسيندا يوكسك مدنيت و بؤيوك شهرلر ياراتميشلار. بونلاردان بيزه چاتان ديلده اولان سؤزلر، كلمه لر، آدلار بو گونكو ديليميزده بير بالاجا ده ييشيكليكله ايشه آپاريلير. گرامري بو گونگي ديليميزه اويغوندور. بئله بير ديل، بيزيم توركجه ميزين كؤكو اولماسا، پس نه دير؟ اونلارين ديللري التصاقي اولموش و بيزيم ده بو گون ديليميز التصاقيدير. بوندان سونرا يارانان ايلام حكومتي و ايلام ديلي حكومتي و ايلام ديلي، سومئر مدنيتي و ديلينين طبيعي داوامچيسي اولور و داها سونرا ايرانين مركزي و غربي ايالت و ولايتلرينده، ائلهجه ده آرازين شمالي و جنوبي يئرلرينده ياشايان مختلف التصاقي ديللي، ائللر و خالقلار: قوتتي، لوللوبي، كاسسي، هورري، گيلزان، ساوير، اوتتي، آران، آلبان، ماننا، و ماد و … يوزايللر بويو، رسمي دولت و تجارت ديلي و همين ديلين الفباسي ميخي الفبا ـ ايلام ديلي و الفباسي اولموشدور.
ايلاملار ايلك اؤنجه هيروگليف خطيندن استفاده ائديب، سونرالار سومئرلرين ميخي الفباسيندان يارارلانيب و اوندان سونرا كي مدنيتلر ايلام اليفباسيني منيمسه ميشلر. بو الفبا بوتون توركلرين، هابئله ماد و ماننالارين دا الفباسي اولموشدور.
اكثر تاريخچيلر گؤسته ريرلر، هند آوروپا ديللي ائللر، ميلاددان قاباق دوققوزونجو يوز ايلين اوّللرينده اورتا آسيا و بلخ يولوايله ايران فلاتينا گلميشلر. دؤكتور زهتابي بو ساحه ده بوتون سندلري آراشديرير، حتي فردوسينين شاهنامه سيندن ده واز كئچمير و شاهنامه ده يازيلان بو بيتي:
نبـشتن به خـسرو بياموختـند دلش را به دانش بر افروختند
گؤستهرير آرياييلار ايرانا گلديكده، يئرلي خالق يازماغي پارس شاهلارينا اؤيرهتميشلر و يئرلي اهالي يعني ايلاملار، قوتتيلر، كاسيلر، ماننالار و مادلار نئچه يوز ايل سورهسينده مترقّي حيات، مدنيت و بيليك اؤيرتديلر و نهايت ۵۵۰ ايل ميلاددان قاباق ماد اوردوسونون باشچيسي هارپاكين خيانتي نتيجه سينده، هخامنش شاهلارينين ملي ظلمونه معروض قالديلار.
تاريخه آرخاناراق گؤرونور كي ايراندا سومئر مدنيتيدن هخامنش حكومتينه قدر، ۳۵۰۰ ايل سورهسينده بوتون ايراندا ياشايان خالقلارين ديلي، التصاقي ديللر اولموش و الفبالاري ميخي الفبا اولموشدور. مادلارين سون ايللرينده زردشت ديني، آذربايجاندايارانيب و اَوِستا كتابي ماننا ديلينده ـ آيري سؤزله دئسك آذربايجان تورك ديلينده يارانميشدير. بوگون اليميزده اولان اوستا همين تورك ديلينده يارانان اَوِستانين ساسانيلر اليله چئويرمه سيدير؛ بوندان بئله تورك ديلينين ائتكيلريندن قورتولا بيلمه ميشدير؛ هله ده فارسلاشديريلان اوئستا تورك ديلي و گرامري تاثيريني گؤسترمكده دير. ميلادان ۳۳۱ ايل اؤنجه اسكندر ايرانا حمله گتيرميش و هخامنشلره غلبه چالميش، آمما آذربايجان «آتروپات» رهبرليگي مستقل حكومتيني ساخلاميشدير. دؤكتور زهتابي بونو دا آيدينلاديركي اسكندر حمله ائدن زامان، بوتون اثرلري او جمله دن اوستا كتابيني داغيديب، نسخه لريني آرادان آپارميشدي. اوناگوره اوستا ساسانيلر دؤورونده باشدان يازيلاندا، تورك ديلينده يوخ، بلكه ساسانيلارين ديلينده يازيلير.
اسكندرين جانشينلري ـ سلوكيه حكومتي اوزون سورمهدي و ميلاددان ۲۵۰ ايل قاباق بو گونكو عشق آباد ـ اشك + اووا ـ دا تورك ديللي پارت ائللرينين رهبري ارشك ـ ار+ شك ـ سلوكيه حكومتينه سون قويدو و اشكاني سلسله سيني ياراتلاركي ۵۰۰ ايل بوتون ايرانا حكومت سوردولر. اشكانيلرين ۴ سياسي و مدني مركزلري واريدي كي
۱ . نيا شهري بو گونكو عشقآباد ياخينليغيندا
۲ . شيز = گزگ = گنجك بو گونكو تخت سليمان، اورمو گؤلونون جنوب شرقينده، سايين دژله زنگانين آراسيندا يئرله شير كي آلپ آرتوتقا تيكميشدير.
۳ . اُكباتان يا اوخ باتان مادلار مركزي ايدي
۴ . خوزستاندا يئرلهشن شوش شهري.
اشكانيلر دؤرو يارانميش فولكوريك اثرلر، ساساني شاهلاري زاماني فارس ديلينه چئوريلديكدهن سونرا، يازيلميش (كارنامه اردشير بابكان) و … كيمي اثرلرده ثبت اولموش و يازيلي شكله دوشموشدور.
فارس ساساني شاهلاري، حكومتي اله گتيرديكده ماد و اشكانيلرين دموكراتيك و ملي برابرليك سياستلرينين يئريني ديكتاتورلوق، استبداد، ملي ظلم و شوونيستي سياست توتدو. ساسانيلر دؤورونده اورتا آسيا و شمالي قافقاز توركلرينين آرديجـيل صـورتده هجـومـلاري داوام ائديـر و ساساني شاهلاري بو هجوملارين قارشيسيني آلماق اوچون ايران توركلرينين مهم مركزي اولان آذربايجاني فارسلاشديرماغا چاليشيرلار. بو سياست هئچ زامان نتيجه وئرمه دي و بو گون ده نتيجه وئرمه ييبدير.
پروفسور زهتابي بو اثرينده علمي شيوهلريله تاريخدن علاوه، ديلچيليك يولو ايله تاريخ بويو تورك ديللرين كؤكونو بوتون ايران فلاتيندا گؤستهرير: او جملهدن فونتيك و لئكسيك واحدلرين مقايسه سي يولو ايله، اساس لغت فوندو ـ آنا سؤزلرين مقايسهسي ايله، صرف ـ مورفولوژي قايدالارينين مقايسهسي يولوايله (اسملرين حاللانماسي، جمع علامتلري، مختلف شكيلچي لري) گؤستهرير كي بوتون ايران يئرلي اهاليسينين آناديلي تورك اولموش و اونون ايزلريني بو گونلره كيمي قالان آبيده لرده تاپماق چتين ايش دئييلدير.
بؤيوك عاليم هند ـ اوروپالي ديللرده، التصاقي و سامي ديللرده اولان قايدا ـ قانونلاري مقايسه ائديب هر جهتدن آنا ديليميزين كؤكونو و اوستونلوغونو گؤسته رير و بو اثرينين مهم بير حيصهسيني بو مسئله یه عايد ائدير.
اثرين داها بير حيصه سينده ديوان لغات التورك كتابيندا اولان شعرلر و داستانلار اساسيندا آذربايجان تورك ديلينين گوجونو و زنگين ادبياتا مالك اولدوغونو آچيقلايير. عالم، كتابينين سون حيصه سينده ماد ادبياتي، پارتلارين ـ اشكانيلرين ديليني، تورك فولكورو و ادبياتيني آراشديرميش و اونون گؤزهلليكلريني گؤسترميشدير. عالم يازيلي ادبيات حقينده بئله قناعتهگلير:
«دئمك اشكانيلر دؤورونون يازيلي ادبي اثرلري، ساساني شاهلاري طرفيندن يا آرادان آپاريلميش، يادا فارس ديلينه چئوريلهرك، منبعي گؤسته ريلمه دن، اصلي محو ائديلميشدير، يا دا كي، او دؤورون زنگين شفاهي ادبياتي و اثرلري فارس ديلينه چئوريليب، يازيلي حالا ساليناراق قالميش، لاكين اونلارين تورك ديلينده اولموش شفاهي اصيللري تدريجله اونو دولموشدور». اثرين سون حيصهسينده ديوان لغاتالتورك كتابيندا اولان آتالار سؤزلريني بير ـ بير گتيريب و بو گونكو ديليميزه، نه صورته دوشدويو شكليني گؤسته ريب و بو گونلو آتالار سؤزلرينين كؤكونو بو اثرده آختارير. همين كتابدا اولان شعرلري آراشديريب اسلامدان اؤنجه شعر اؤرنكلريني گؤسته رير و اونون اساسيندا اسلاما قدر تورك شعرينده فورما، وزن و صنعت گؤزلليكلريني آراشديرير.
دوغروسو بودور كي زهتابينين تكجه بو اثري، زهتابينين دنيا بويو جاويدان و قالارقي اولدوغونا كافيدير.
عالم حقينده يازيلان اثرلر[۴۳]
دؤكتور زهتابينين نفسي گله نه قَدَر، آذربايجان اوچون و دوغما ائلي اوغروندا چاليشدي؛ اؤزونو بير باشا اونودوب خالقيني توتموشدو. سانكي ائلينه گؤره ديري ايدي. او، بير اؤيرهتمن يارانميشدي. حتا ابتدايي تحصيليني بيتيرمهميشدن درس وئرمهيه باشلاميش، اوشاق ايكن ياشيتلارينا اؤيرتمه يه جان آتيردي. عمر بويو عشق و محبتله وطنداشلارينين معلوماتيني آرتيرماق اوچون چاليشيردي. بير عمر يازيب ـ ياراتدي؛ ائليميزين قهرمانلاري اونون شعرلريله، منظومه لريله ابديّته قوووشدو. آنجاق اؤزو حقينده، حياتي ـ اثرلري حقينده ايستهينده قيسا بير معلوماتا قناعت ائديردي. لازم ايدي اؤزگه لر اونون حقينده يازالار. ائليميزده، بيليردي بو عاشيقي، حق وورغونونون دهيهري نه قدر آرتيق و چوخدور. اونو الدن وئرن گون، خالقيميز توپلانيب عالمين بالا شهري، شبستره اوز قويدولار. شبستر اوگون بئله عالمي قوينوندا بسلهديگي اوچون گووهنيردي. اونون شاگردليگينه گووهنن يازيچيلار، گنج اؤيرهنجيلر اورهكلرينده آغير بير نيسگيل ايله بؤيوك اوستادي يئره تاپشيرماق اوچون گلميشديلر. نه سؤزلر، نيسگيللي سؤزلر كي اورهكلردن دوداقلارا سوزمهدي. دانيشماق لازم دئييل ايدي. باخيشلار سؤز دئييردي. عالمي تازا تانيماغا باشلاميشديق، تئز الدن وئرديك. آنجاق صاباحي گون، قلملر اله آليندي. تكجه زنجاندا بو بارهده يازيلان متنلر آرايا قويولسا، بيلينر ايراندا نه خبر ايدي. بو زامانلار «اميد زنجان» درگيسي ياييليردي، اونون صفحهلرينه بَزَك وئرهن اوستادين قلميندن سوزن مقاله لر و شعرلر اولموشدور. بودؤنه اوستادين شاگردلري، شاعرلر و يازيچيلار انجمنلري، اؤيرهنجي گروهلار، مؤسسه و شخصيتلر، اوستادين نيسگيللي اؤلومونه خاطره، ائليميزه باش ساغليغي وئريرديلر. بو گروهلارين، ياخود شخصيتلرين آديني چكمك، سؤزو اوزانديرار.
«اميد زنجان» نئچه سايي عالم حقينده اؤزل يازيلاري اولدو. عاليمه حصر اولموش نئچه ساييسي ـ ۲۵۵ نمرهلي، ۲۵۶، ۲۵۹، ۲۶۰ و نئچه ـ نئچه آيري ساييلاري اولدو. هر ساييدا ايكي صفحه، عالمين حياتي و اثرلري حقينده مقاله لر گئديب، دوشونجه عالمي آراشديريليردي. عالمين قيرخي، زنجان شاعرلري طرفيندن طنطنه لي بير مراسم ايله توتولدو. بونلارين هاميسي عالمين اورهكلرده قويدوغو ايزلي خاطرينه اولموشدور.
بوندان سونرا اؤيرهنجيسل درگيلر اونون حقينده يازماغا اؤزهل يئر آچديلار. درگيلرين اوز قابيغي، عالمين پورتره سينه و ايچهري صفحه لري اونون زنگين مقاله لرينه حصر اولوندو. بلكي ده بو اثرلري بير يئره توپلاياندا نئچه ـ نئچه كتاب اولار.
«ائليميزين نيسگيل قالاغي» عالم حقينده يازيلان اثرلرين ايلكيني اولدو؛ چونكي عاليمين اؤزو و اثرلري حقينده يازماق، آذربايجان حقينده يازماق يئريندهدير.
عالِمدن خاطره لريم
عالمين ايلك گؤروشو هميشه ليك گؤزومون اؤنوندهدير. دؤكتور زهتابي اؤز بؤيوكلوگو ايله آلچاق گؤيول و متواضع بير انسان ايدي. او اميد زنجانا محبتلي مكتوبلار يازيب، اثرلرينده بيزه تحفه گؤنده رردي. بيزده درگينين صفحه لريني اونلارلا بزهيرديك. درگيلر سرگيسينده و فستيواليندا عاليمين اميد زنجان غرفه سينه گلديگي هميشهليك و ابدي بير خاطره كيمي اورهييميزده قاليب اونودماياجاغيق.
دؤكتور زهتابي نئچه هفتهدن، بير تلفونلا دانيشيب درگيده اولان آخساقليقلاري خاطرلاديب، يول گؤسته رردي. بير دفعه تبريزدن تهرانا گئتمك حاليندا، يولونون اوستونده، زنجاندا دوشوب مني آختارير. گون اورتايا قالميش زنجانا چاتير، درگي نين دفترينه گلير، تأسفله اوستادا نه بير آدرس وئرهن اولور، نه حتا بير تلفون نمرهسي. اوستاد آخشاما دك قالير، من ده اوگون خبرسيز، دفتره گئتديم، دفتره داخل اولماميش اوستادي گؤردوم، اوره ييم گؤينه دي وقتي اوستادين نئچه ساعات معطل اولدوغونو ائشيتديم. اوستاد تكجه گؤرروشدويوموزو خاطرلايیب، آجي ساعاتلاري دالدا قويدوغوموز اوچون منيم سئوينمهييمي ايستهدي. من بو عظمت قارشيندا اؤزومو چوخ كيچيك گؤردوم.
اميد زنجان درگيسي «حبيب ساهر» اوچون اؤزهل ساييسيني چيخارتماق اوچون نئچه دوستلارلا قرارلاشميشديم. دؤكتور زهتابي نه قدر سئويندي آللاه بيلير. منه خاطرلاتدي كي مرحوم حبيب ساهر اونون معلمي اولموش و اونون بوينوندا حقي واردير. ايندي كي فرصت اله گليب اوستادي حقينده وظيفه سيني اؤده مك ايسته ييردي.
آمما اوچ گوندن سونرا بو اؤزل سايي چيخدي، آنجاق دؤكتور زهتابينين مقاله سي اليمه چاتماميشدي. اوستاد درگينين چيخماسيني ائشيتديكده قيچلاري سوستلاشدي، اما من دايانماديم، اوندان سونراكي ايلك ساييدا اوستادين حبيب ساهر حقينده يازديغي خاطرهني چاپ ائتمهيي ائشيديب نه قدر سئوينير! و نه قدر معلمه حرمت قايلدير؟!
۷۷ اينجي ايل ايدي. دؤكتور صديق زنجانين آزاد دانشگاهيندا تدريسه مسغول اولموشدو. بيز ده فورصتي غنيمت بيليب اونون دؤرونده توپلانيب، ادبي ييغينجاقلار قوروردوق. اوستادين وجودو زنجان شاعرلري اوچون بؤيوك بير نعمت اولموشدو. دؤكتور صديق زنجانا نه قدر خدمت ائتدي بورادا اونلاردان سؤز آچميرام: آنجاق، بيليرم كي اوستاد شهريار اوچون قوردوغو بير گونلوك قورولتاي، زنجانين و زنجانليلارين خاطريندن چيخماياجاقدير. بو قورولتايدا پروفسور زهتابي، پروفسور حميد محمدزاده، دؤكتور فرزانه و اوتلارجا قوجامان شاعرلريميز اشتراك ائتميشديلر. بو طنطنهلي قورولتايدا پروفسور زهتابي آرام توتا بيليميردي. پروفسور حميد محمدزاده ايله ياناشي هر بير شوونيستي چيخيشلارا جواب وئرمهده بير ـ بيريندن ايرهلي چيخيرديلار و بو ايكي عاليم قهرمان كيمي بوتون تحريفلره توخونوب چيركين لكهلري ادبياتيميزدان سيليرديلر.
بورا قدهر بونلاردان آيري بير انتظار يوخودو؛ آنجاق اصلي سؤز بوندان سونرادير. اوگون پروفسور زهتابي تهراندان زنجانا بير لكه نتي مينيبوسلا گلميشدي، ايكي ـ اوچ چيخيشي اولموشدو و گئجه اولموشدو آمما عاليم هله ده چيرپينيردي. گئجه ني هوتئلده قالميشديق؛ من ده سوسوز بير انسان كيمي دنيز قيراغينا چاتميشديم. آمما دنيز دالغانيردي، ساكت اولموردو. گئجه ياريني كئچميشدي، من سوروشوردوم اوستاد يورولمادان، هله حرارتله جواب وئريردي. منيم هر جوابي آلديقدا سئوينديگيمي گؤروب داها قيزيشيردي. سحره ياخينلاشميشديق، امّا يورقونلوق سيماسيندا گؤرونموردو. بو حرارت، بو هيجان، بو چاليشما نهدن و هاردان واريدي؟ اونون اؤيرتمه يه درين هوسي و خاليقينا بؤيوك محبتيندن گوج آلميشدير. دوغرودان بئله انرژي ايله دولو انسان نئجه اولور ايندي قارا تورپاقدا ساكت اولا؟
پروفسور زهتابيدان ياديمدا قالان، اونون گئنيش معلوماتي يانيندا، اؤيرهتمگه بؤيوك هوسي، يورولمامازليغي، گنجلره درين محبتي، ائل اوغروندا دايانمادان چيرپينماسي، گئجه ـ گونوزونو علمه خدمت گؤسترمه سي، گلهجك اوچون اومود بسلهمهگي، عاليمي ائلیميزين ايچينده ابدي ديري ساخلاياجاقدير. اونونچون اولوم معناسي يوخدور. پرفسور زهتابي بؤيوك انساني سجيه لره مالك اولاراق، مثلسيز متخصص عالم ايدي.
او، آنا ديليميزين متخصصي، مهارتلي و قدرتلي بير شاعري، تاريخ متخصص و نهايت اينجه روحلو پوبليت و قلمي گوجلو بير يازيچي ايدي. ديليميز حقينده يازديغي قيمتلي كتابلارلا ياناشي شعر و صنعت آراشديرمالاري، هابئله تاريخ ساحهسينده ايره لي سوردويو يئني نظريهلر و گؤز قاماشديريجي يئني معلومات، اونو تورك دنياسيندا ابدي ياشاداجاقدير. روحو شاد، يولوگئدَرلي اولسون.
باغبان
آلوولار دياريندان عالملره،
تانيتديرماق ايستير سؤزوم؛
بيرين، مين ايگيت قهرماندان بيرين،
زلال چشمه تك ساده، پاك
واولدوز كيمي لكه سيز؛
بيرين، بير بؤيوك كهكشاندان بيرين؛
يئرين سينه سيندن چيخان
صاف بولاقلار كيمي،
ائلين سينه سيندن قوپوب ايلديريم تك شاخاندان بيرين؛
نه قلبينده پول وار، نه شهرت، نه آد؛
اؤزو ساده باغبان،
اوركدن پولاد
اونون دردي بير ائل اولوب، بير وطن،
چؤركسيز قاليب خلق دردين چكن،
توكنمز پولاگوز چكن
واوولادي شامسيز ياتان
بير انسان
كي قاتسان
اگر جوهرين
اونون داغ قدركوللره،
دؤنر قهرمان ائللره،
جوشوب، كوكره ين سئللره،
اسير ائللري هايلايان يئللره،
قارانليقلارا سون قوياق شيمشكه!
تانيتديرماق ايستير قلم
ائله بير ايگيت اركي، اؤز وارليغين
ائل اوغروندا آتديقدا آتشلره
تشكر بئله اومماميش؛
بير انساني كي، خلقي بوغدوقدا غم،
اوجالديقدا مظلولارين ناله سي
ياتيب بير عؤمور سنگره
گؤرهن وارسا، قوي سؤيله سين
ائله ساده بير انساني
كي، اولموش جوانليقدا گول باغباني،
ايگيت غیرتين عصياني
جوشان گونلر، ائل باغباني.
گؤرن وارسا، قوي سؤيله سين
انسان كي، يارميش قارانليقلاري
اونون ايلديريم قهرماليقلاري
هنر گؤستريب تا، ايگيت ملتي
قوجوب، اؤپسون اؤلمز آزادليقلاري
گؤرهن وارسا، قوي سؤيلهسين
ائله ساده بير خلقتي
كي زحمت چكن انسانا حرمتي، زورا، ظلمه، ظلمتلره نفرتي،
ائل عصيانينا پاك صميميتي
ائديبدير اونو ائللره سئوگيلي.
گؤرن وارسا قوي سؤيله سين
ائله ساده بير خلق پرورده سي
كي آنجاق ايگيتليكلري
ائديبدير اونو اوردو سركرده سي.
گؤرن وارسا قوي سؤيله سين
ائله ساده بير انساني
كي آخديقدا سنگرده اسلان قاني
اونا ياس توتوب آغلاميش
همي دوستو، هم دوشماني.
او بير گون بئجرميشدي بوستان، اكين
كي شاه خلقي آج قويماسين
و بير گونده الده توفنگ
گهريب سينه خاقانلارا،
خانلارا
اولوب مظلوم انسانلارا باغبان.
بوتون وارليغيله جوشان،
چارپيشان
باغبان.
اوجالديقدا مظلولارين ناله سي
دولاندا فلاكتله پيمانه سي،
حياتي بوغاركن اسارتده چن
وطن تورپاغين قاپساياركن دومان
و بوغدوقدا هر ياندا مظلوملاري اهرمن
آلووياغديران
ايلديريم تك شاخان.
[۱]) عاليمين ياشاييشي حاققيندا معلوماتي، اؤز خاطيرهلريندن آلميشيق: بو بيوگرافي كيمي يازيني چيچكلر گروهو عاليمين اؤلومو موناسيبتي ايله يايميشدير.
[۲]) م. كريمي، نيسكيل قالاغي، زنجان، انتشارات عود، ۱۳۸۴، ص ۷٫
[۳]) م. كريمي، پروفسور زهتابينين ياشاييشي، اميد زنجان درگيسي، نمره ۳۰۱، ۱۳۷۸٫
[۴]) م. كريمي، ائليميزين نيسگيل قالاغي، زنجان، ص ۱۱٫
[۵]) م . كريمي، نيسگيللي اؤلوم، اميد زنجان، نمره ۳۰۱، ۱۳۷۸٫
[۶]) دوكتور صديق، نيسگيللي اؤلوم، اميد زنجان، نمره ۳۰۱، ۱۳۷۸٫
[۷]) م. كريمي، ائليميزين نيسگيل قالاغي، زنجان، ۱۳۸۴،، ص ۱۶٫
[۸]) م. ميشوولو، پروانهنين سرگذشتي، تبريز، ۱۳۵۸٫
[۹]) م . كريمي، همان، ص ۱۹٫
[۱۰]) همان.
[۱۱]) همان، ص ۲۰٫
[۱۲]) م . كريمي، ائليميزين نيسگيل قالاغي، زنجان، انتشارات عود، ۱۳۸۴، ص ۲۰٫
[۱۳]) م. كريمي، همان، ص ۲۱٫
[۱۴]) اوميد زنجان هفته ليگي، نمره ۳۰۲، ۱۳۷۸٫
[۱۵]) بيرليك درگيسي، نمره ۲، ۱۳۵۴٫
[۱۶]) همان.
[۱۷])م. كريمي، همان، ص ۳۱٫
[۱۸]) م. كريمي، پروفسور زهتابي و انقلاب دوشونجهسي، اميد زنجان، نمره ۳۰۳، ۱۳۷۸٫
[۱۹]) بيرليك درگيسي، نمره ۳۷٫
[۲۰]) بيرليك، سايي ۵۱، ۱۳۵۷٫
[۲۱]) بيرليك درگيسي، نمره ۵۲، ۱۳۵۷٫
[۲۲]) بيرليك، سايي ۵۲، ۱۳۵۷٫
[۲۳]) بو منظومهده، عاليم فدايي لردن اولان آذربايجانلي قهرمان – جهانبخش پايدار – ياشاييشي و مبارزهسيني قلمه آلير.
-) م. مشوولو، چريك حماسهسي، مترقي ايرانلي تورك روشنفكرلر جمعيتينين نشريه سي، ۱۳۵۶٫
[۲۴]) بو معلوماتي، عالم اؤز اثرلرينين مقدمهسينده يازميشدير. بو اثر بوگونه قدر مستقل صورتده چاپ اولماميش، آنجاق «اميد زنجان» هفته ليگينده چاپ اولموشدور.
[۲۵]) اميد زنجان، نمره ۲۸۵، ۱۳۷۸٫
[۲۶]) م . شبسترلي، پروانهنين سرگذشتيع تبريز، ۱۳۵۷٫
[۲۷]) پروفسور محمدتقي زهتابي، شاهين زنجيرده، تبريز، ۱۳۷۸٫
[۲۸]) پروفسور محمد تقي زهتابي، ائل اوغلو باغبان، تبريز، ۱۳۶۸٫
[۲۹]) همان، ص ۶۸٫
[۳۰]) همان، ص ۱۳۱٫
[۳۱]) پروفسور محمد تقي زهتابي، قوي اولسون اون، تبريز، ۱۳۷۲٫
[۳۲]) همان، ص ۱۷٫
[۳۳]) علم صفاني، تركيب لغوي زبان آذري ادبي معاصر، تبريز، ۱۳۷۲٫
[۳۴]) پروفسور محمد تقي زهتابي، معاصير ادبي آذريديلي، تبريز، ۱۳۷۹٫
[۳۵]) م. كريمي، پروفسور محمدتقي زهتابي و مطبوعات عالمي، اميد زنجان، نمره ۳۰۴، ۱۳۷۸٫
[۳۶]) بيرليك، نمره ۱، ۱۳۵۴٫
[۳۷]) همان، اؤن سوز.
[۳۸]) بو درگي حقينده، بو سطيرلرين يازاري بير مقاله ايله ديلماج درگيسينده معلومات وئرميشدير:
-) ديلماج، نمره ۳۲، ۱۳۸۶٫
[۳۹]) اميد زنجان، نمره ۳۰۳، ۱۳۷۸٫
[۴۰]) م. كريمي، ائليميزين نيسگيل قالاغي، زنجان، ۱۳۸۴، ص ۵۵٫
[۴۱]) م. كريمي، ادبيات باستان آذربايجان، تبريز، ۱۳۵۸، ص۴۲٫
[۴۲]) پروفسور محمد تقي زهتابي، همان، ص ۵۳٫
[۴۳]) اميد زنجان، نمره ۳۰۵، ۱۳۷۸٫
م. کریمی
پروفسور محمد تقي زهتابي آذربايجان چاغداش ادبياتينين سؤنمز اولدوزو، پارلايان سيماسيدير. ائليميزين باشيني دنيا خالقلاري آراسيندا اوجالدان، تاريخيميزين قارانليق بوجاقلارينا ايشيق ساچان، چاغداش شعريميزين زيروه سينده دايانان بؤيوك شاعر، تاريخچي و ائل اوغلودور. خالقيميز بئله بير اوستاد، غيرتلي و عالم اوغلونا دونيا بويو و تاريخ بويو گووه نه جكدير.
محمدتقي ۱۳۰۲ اينجي گونش ايلي آذر آيينين ۲ سينده شبسترده دنيايا گلدي[۱]. عائلهسي كيريشچيليك ايشينده چاليشان، الي آغزينا چاتان صنعتكار بير عائله ايدي. آتا و آناسي مذهبي ايناملارا محكم ياپيشان و علمه ماراق گؤسته رن انسانلار ايديلر. بالاجا محمدتقي ۶ ياشينا چاتاركن، باجيسي صديقه ايله قران مكتبينه گئديبن قرآني اؤيره نير. ۱۳۱۰جو ايلده شبسترده تازا اوصولونان قورولان مدرسهني قورتارديقدا، مادي امكاناتين اولماديغي اوچون كيريشچيليكده، هابئله باغ واكين ايشلرينده چاليشير. همين ايللرده عميسينين كتابخاناسيندا بوللو ـ بوللو توركجه كتابلارلا تانيش اولوب، آنا ديلينه ماراق گؤسته رير. پرفسور اؤز ترجمهي حاليني يازاندا، بو حادثه يه اشاره ائديركي ۱۳۱۷جي ايلده آتاسينين دوستلاري و تجارب ايشداشلاري تبريزدن شبستره گلديلر، اونون درس اوخوماغا علاقهسي چوخلو سبب اولدو آتاسي دوستلاري تبريزه قاييداندا، اودا اونلارلا تبريزه گئتدي. البته گئتمه دي بلكه قاچدي؛ چونكي آتاسينين خبري اولمادان عماوغلوسو غلامرضا ايله قاچميشدي. قارداشي يوسوف دا تبريزده اورتا مكتبده اوخويوردو. محمدتقي، فيوضات مدرسه سينده ۹جو كلاسي بيتيرير. ۱۳۲۰جي ايلده رضاشاه ايراندان قاچيب، اوغلو محمدرضا، شاهليقا كئچير.
متفق اوردولاري دا ايرانا سوخولورلار. سياسي دوروم يارانير و مختلف سياسي پارتيالار باش قووزايير. همين ايللرده «آذربايجان» غزئتي، ميرزه علي شبستري همتي ايله تبريزده بوراخيلير. گنج محمدتقي بو غزئته ايله امكداشليق ائدير. اوردافارسيجا شعرلريني چاپ ائتديرير.
آناديليله لاپ ياخيندان تانيش اولور. همين ايللرده دانشسرايا دخل اولور. همين زامان تبريزده فرانسا ديليني اؤيره نير و دانشسرادان چيخيب، تبريزده «فردوسي» مدرسه سينده ادبي بؤلومو ديپلم آلير، اما تبريزده هله بيليم يوردو قورولماميشدير، تكجه تهران بيلم يوردو واريدي، لاكن گنج محمدتقينين مادي امكاني تهراندا درس اوخوماغا يوخودو. عاليمين علاقه سي درس اوخوماغا بير يئره چاتمادي. ۱۳۲۳ و ۱۳۲۴جو ايللرده تبريزده «فرياد»، «خاورنو» غزئتلري چيخيردي. زهتابي اثرلريني بو ايكي غزئته ده چاپ ائتمه يه چاليشدي، حتي نئچه اثري فرانساجادان ترجمه ائديب چاپ ائده بيلدي. ۱۳۲۴جو ايلده «آذربايجان» غزئتي تبريزده يايينلاندي. آنا ديليميز چيچكلنمه يه باشلادي. زهتابي اورادا مقالهلر يازماغا باشلادي. همين ايل «جوانلار» غزئتيني رهبرليك ائديب، مقاله لر و شعرلري چاپ اولاراق، سياسي فعاليته قاريشير و بير ايل ملي حكومتله ياناشي، اوز ائلي و يوردو خدمتينده چاليشير. ۱۳۲۵جي ايلين آذرين ۲۱ينده شاه اوردوسو تبريزه سوخولدوقدا، ملي حكومت ييخيلير و آنا ديليميزده اولان كتابلار اود ايچنده يانديريلير. عالي تحصيل آلماق اوچون جان آتان زهتابي، سوئت اتفاقينا گئتمك ايسته يير، آمما توتولوب مشهدده قند كرخاناسيندا ايشله ييب، اورادا تازادان ديپلم آليب، باكييا گئدير و دانشگاها داخل اولوب، «آذربايجان ديل و ادبياتي» تدريس ائدير، همين يئرده دوكتورلوك تئزيندهن مدافعه ائدهرك دؤكتورلوك پيتيگي آلير.
عالمين دؤكتورا رسالهسي «ابونواسين حيات و ياراد يجيليغي» ايدي. بو رساله ابونواس شناسليغين اهميتلي قايناقلاريندان ساييلير. عاليم باكي دانشگاهيندان دوكتورا درجه سيني آلير. اوردا درس وئرمهگه باشلايير و اورادان دو چنت (دانشيار) عنواني آلير. ۱۹۷۸ ايلينده عاليم پروفسورلوق درجه سيني بغدادين دانشگاهيندان آلير. [۲]
دؤكتور زهتابي باكي شهرينده خانيم دؤكتور خاور آسلان ايله ائوله نير. آنجاق ۱۳۵۰ ايلينده سياسي اويونلارا گؤره عائلهسيندن آيريليب شورويدن قاچماق مجبوريتينده قالير. بغدادا قاچيب و ۸ ايل اورادا اسكي تورك ديللريني تدريس ائدير، آمما همين ايللرده عالم «حزب توده»ني آتير و اونا خائن كيمي توخونور. اؤزو دؤنه ـ دؤنه اونلاردان ضربهلر يئديگينه اشاره ائديبدير. حزب توده نين ماهيتيني تانيماقلا سوئتلر اؤلكهسيندن قاچماغا جان آتير. نهايت ۱۹۷۱جي ايلده احمد حسن البكر عراقدا ايش اوستونه گلهرك، عراقين مسكووادا سفيري اولان «شاذل طاقه» يارديمي ايله بغدادا كؤچمه يه امكان تاپير. زهتابي نين محكوميت ايللري چوخ آغير كئچميش. بوايللرين خاطره لريني قلمه آلان عاليم چوخ آجيناجاقلي گونلريندن سؤز ائدير[۳]. اونون «سورگون ايللري» اثري، بيزيم چاغداش مقاومت ادبياتيميزين سئچگين يازيلاريندان ساييلاجاقدير. زهتابي بوتون عمرونده قاباقجيل، دوشونجه لي، ايشلك و مهربان بير انسان ايدي. او يورولمادان چاليشيب، اؤيره نيب ـ اؤيرتمه گه جان آتميشدير.
بورادا اشاره ائتمهليييك ۱۳ ايل آذربايجان جمهوروسوندا و داها دورزگون، سوئتلر اتفاقيندا ياشايان ايللرده چوخلو اثرلر يازير، اما چاپ امكاني تاپمير. عراقا كؤچمه سينده بونلاري اؤزويله آپارير. بغداد دانشگاهیندا شرقشناسليق دانشکدهسينده «فارس ديللر» و «قديم تورك ديللري»ني تدريس ائدير. ۸ ايل بو بیلیم یوردوندا تدريسه مشغول اولوب، ادبي فعاليتيني ده گئنيشلنديرير. همين ايللر ده «اتحاد يولو» آدلي غزئتهنين چيخماسينا همّت گؤسته رير. بو غزئت ايله، ايران ملتلري اوچون بئش ديلده راديو وئرليشلريني يولا سالير. همين زامان درين علمي تحقيقلره جوموب، آذربايجان و تورك ديللري و ملتلري حقينده بؤيوك باجاريقلا چاليشيب، اثرلر يارادير، علمي معلوماتيني گئنيشلنديريب، دنيا سويهسينده دنيا بيلگينلري آراسيندا يئني تئزلر آرايا قويوب، دنيا عالملرينين دقتيني جلب ائدير.
۱۳۵۷جي ايلده ايراندا اسلامي انقلاب غلبه چالديقدا، عالم اؤز آنا يوردونا قاييتماغا جان آتير. ايلك غلبه گونلرده «مهدي بازرگان»دان جواب آلاراق تير آيينين اوچونده ايرانا گلير (۱۳۵۸). تبريزه دؤنور و تبريز دانشگاهیندا عرب و تورك ديللريني تدريس ائتمه يه باشلايير. آمما ۱۳۶۲جي ايلده حزب تودهنين تهمتلريله دوستاق اولور. ۴ ايل دوستاقدا قالير. ۱۳۶۶ دا آزاد اولور. داها علمي ايشلره جدي صورتده باشلاييب، علمي اثرلريني ترتيبله ييب، چاپ اوچون جدي صورتده چاليشير.[۴] نهايت ۱۳۷۸جي ايلين آذر آيينين اوتوزونندا دنيادان گؤزونو يومور.[۵]
عاليمين اؤلومو
عالمين اؤلومو ائله بير زاماندا اوز وئردي كي دنيا دا بؤيوك تأثيرلر ياراتدي. اونونلا برابر شايعهلر ياييلدي، هر حالدا ائليميزه بؤيوك بير كَدَر و نيسگيل اولدو. يابانجي خبر قايناقلاري عاليمين اؤلدورولمه سيني ادعا ائتديلر، اما خالقيميز بونو اينانمادي، اينانسايدي نيسگيلي لاپ دا آغير اولاردي. دؤكتور صديق بئله ادعايا قارشي چيخاراق يازدي: «بو ادعانين پوچلوغو حقينده هئچ بحثه احتياج يوخدور، ولاكين من بونو دا تأكيد ائتمه لييم كي زهتابي عمر بويونجا مينلر دفعه گولله لنميشدير. وطندن ائشيكده، اجنبيلر و روس شوونيستلري طرفيندن و اؤز وطنينده ايسه شاهچيلار، عكس انقلابچيلار و اسلامي انقلابيميزي سئومه ينلر يوز مينلر دفعه توطئه يه معروض قالميش و گولله لنميش. نيسگيللي بير وارليغيني قوروماغا جان آتان مظلوم وارليق ايدي. زهتابي اؤز اجلي ايله اؤلموشدور.» [۶]
دؤكتور صديق عاليمين اؤز اجلي ايله اؤلمهسيني ثبوتا يئتيرمك اوچون، عاليمين ياخين آداملارينين و قونشولارينين شاهد اولدوقلاري صحنهلري گتيريب و اونلارين ديليجه اثبات ائتمهيه چاليشير. هر حالدا بؤيوك عاليمين اؤلومو اينانيلماز بير زاماندا اوز وئردي. عاليم تازا ايستيردي بؤيوك و درين دوشونجهلري يايماق اوچون زمينه ياراتسين، شاه اثري اولان ـ ايران توركلرينين اسكي تاريخي- لاپ تازا چاپدان چيخميشدي. بو اثر دنياني ترپه ده بيلردي، دوشمانلاري ترپتميشدي.
عالمين اؤلومو دنيادا بير بومبا كيمي پاتلاميشدير. دنيانين بؤيوك عالملري، اديبلري، شرقشناسلاري، ديلچيلر، تحقيقاتچيلار اونون اؤلومون آجيليغيني آيدينجاسينا بيان ائتمكده ن چكينمه ميشديلر. هر ياندا، هر شهرده، هر اؤلكه ده بؤيوك تؤرنلر، بؤيوك ييغينجاقلار قورولموش و مختلف بيلگينلر و عالملر اؤز تاثراتيني سؤيلهميشديلر. عاليمين اؤلومو، اونون دوشونجهسينين خلق ايچينده ياييلماسينا بير زمينه ياراتميشدير. خليقيميز بئله بير ده يرلي عالمي الدن وئرديگيني تازا دويوردو! اونا گؤره ده حقلي اولاراق اينانميردي. بو اؤلومو ساده اؤلوم سانا بيلميري.
عالمين بير طرفدهن گئنيش معلوماتي و بير طرفدهن گؤزهل دورانيشي، ياخشي اخلاق، اونون يازيجيلار ايچينده و عموم خلق ايچينده محبتله قارشيلاشديغينا سبب اولموشدو. بير ايل عرضينده مينلرجه مقاله چاپ اولدو. بوتون يازيچيلار طرفيندهن، عالمه اولان بورجلاريني شعر، مقاله و تحقيقي ايشلرده اؤدهمكده چاليشديلار. زهتابينين درين و گئنيش معلوماتي ايله ياناشي، تميز و انساني اخلاق و رفتاري هاميني اؤزونه جلب ائتميشدير. زهتابي آد ـ سان اهلي دئييل ايدي. تهراني، تبريزي، بوشلاييب شبسترده بير بالاجا ائوده قاليب، آمما بؤيوك ايشلر گؤرمه يي بؤيوك روحونا اويغون گؤروردو.
۷۵ ياشي اولاركن بير آن ايشلهمكدن دايانمادي، گئجه ني گوندوزه قاتيب، گوندوزي گئجه يه باغلادي. يورولمادان ائل اوغروندا تحقيقي ايشلري ايره لي آپاردي. چوخ متواضع اولاراق، ايرانين هر يانيندا الينه تازا قلم آلميشلارلا تلفونلا قرارلاشير، يول گؤسترمه دن دايانمير. اوشاقلارلا اوشاق، بؤيوكلرله علمله توخونوب، عامي جماعتله ساده توخونوردو و بو رفتاري، هاميني اؤزونه چكيردي.
زهتابي بير آن يورولمادي، هميشه ايشين چوخ اولدوغونو خاطرلاييردي. او، گنجلريميزده، گلهجهگه نسبت اومود ياراديب، گنجلري صاباح اوچون تربيه ائتمهگه چاليشيردي. عالمين انساني رفتاري، گؤزهل اخلاقي، درين علمي، ساغلام بدني، گولر سيماسي، آمما تئز اينجيهن، پيس رفتارلاري تحمل ائتمه ين بير ذات ايدي. قبري نورلا دولوب، روحون شادليغيني تانريدان ديله ييب، آرزيلاييريق يولوگل ـ گئدلي اولسون.عالمين اثرلري
عاليمين چوخلو اثرلري چاپ اولوب، بير سيرا اثرلري ده كامل صورتده و كتاب شكلينده يوخ، بلكه مقالهلر صورتينده مختلف درگیلرده چاپ اولموشدور.
بير سيرا اثرلري ده واردير كي هله گون اوزو گؤرمهييبدير. بوندان علاوه زهتابي اوچ ديلده توركجه، فارسجا و عربجه ـ اثرلر ياراتميش و بو ساحهده اولو بابالارينا تاي تعصبدهن ايراق، بشريته باغلي قالميشدير.زهتابينين اثرلريني بئله سيرالاماق اولار
۱ ـ پروانهنين سر گذشتي، شعر مجموعه سی، بغداد/ تبريز
۲ ـ ائل اوغلو باغبان، شعر منظومهسي، بغداد/ تبريز
۳ ـ بختي ياتميش، منظومه، بغداد.
۴ ـ بذ قالاسيندا، منظومه، برلين.
۵ ـ چريك حماسه سي، منظومه، برلين.
۶ ـ قوي اولسون اون، حكايه لر مجموعه سی، تبريز.
۷ ـ آنا ديليميزي نئجه يازاق؟ بالاجا كتاب، تبريز.
۸ ـ معاصر ادبي آذري ديلي/ علمي ـ تحقيقي اثر، تبريز.
۹ ـ ايران توركلرينين اسكي تاريخي، تحقيقي اثر، تبريز.
۱۰ ـ ايران توركلرينين اسكي تاريخي، تحقيقي اثر، ايكي جلد، تبريز.
۱۱ ـ ايران توركلرنين ديلي و ادبياتي، تحقيقي اثر، تبريز، مهد آزادي.
۱۲ ـ شاهين زنجيرده، شعر منظومه لري، تبريز.
۱۳ ـ دافعه سياستي، جاذبه سياستي اولماليدير، اروميه، نويد آذربايجان.
۱۴ ـ عروضون تورك فولكلوروندا كؤكلري، تحقيقي ـ علمي اثر، زنجان، اميدزنجان.
۱۵ ـ قاشقايي يايلاغا كؤچور، منظومه، زنجان، اميدزنجان.
۱۶ ـ زبان ادبي آذري معاصر (فارسي)، تبريز.
۱۷ ـ علم معاني (فارسي) تبريز.
۱۸ ـ هستي نسيم، شعر فارسي، بغداد.
۱۹ ـ جنايت ۲۵۰۰ ساله شاهان، (فارسي)، بغداد.
۲۰ ـ آيا زبان فارسي به زبانهاي ملل ديگر ايران برتريت دارد؟
۲۱ ـ القوائد الفارسيه (عربي)، بغداد.
۲۲ ـ آذربايجانين يئر آدلاري، تبريز، مهد آزادي.
۲۳ ـ آذربايجان ديلينين نحوي، تبريز فجر آذربايجان.
۲۴ ـ ابو نواس الحسن بن هاني ـ دؤكتورلوك تئزي.
عاليم لرين اثرلري مختليف اؤلكهلرده و شهرلرده دفعهلرله چاپ اولوب، ياييلميشدير.چاپ اولماميش اثرلري
۱ ـ بير اوخدا نئچه نيشان ـ نمايشنامه
۲ ـ سارا و محمد ـ نمايشنامه.
۳ ـ ملك محمد ناغيلي
۴ ـ ابدي دوستلوق ـ منظومه.
۵ ـ ميشوون افسانهلري ـ منظومه
۶ ـ گنجلر چلنگي ـ شعر و نثر.
۷ ـ ميرزه مهدي شكوهينين شعرلري و ياشاييشي.
۸ ـ حبيب ساهرين اثرلري
۹ ـ علي آقا واحيدين خاطيرهسينه ـ منظومه
۱۰ ـ بيرجه جوت گؤز ـ منظومه.
۱۱ ـ قرآن و مليت (فارسي)
۱۲ ـ مادران ميهن پرست (نمايشنامه) فارسي.
۱۳ ـ مجموعه مقالات فارسي.
۱۴ ـ مجموعه اشعار فارسي.
شوبههسيز، بو اثرلرين چاپ اولوب ياييلماسي، چاغداش ادبياتيمیزدا يئني بير حال – هاوا ياراداجاقدير.عالمين شعر دنياسي
آذربايجان شعر كروانيني عصرلر بويو مختلف شاعرلر ايرهلي آپارميش، آغير زحمتلر سايهسينده بو گونكو ادبيات بيزه قاليبدير. بو كروانين ايرهلي آپارماسيندا چوخلو دوستاقلارا، اشكنجه لره، دار آغاجلارينا معروض قالان عالميميز آز اولماميشدير. عمادالدين نسيمي، نابي، واقف و. . . نه اذيتلركي چكمه ميشلر. معاصر شعريميزي قوران شاعرلريميز ده بابالارينا تاي، بوتون اشكنجه لري، دوستاقلاري، سورگونلري تحمل ائديب، هئچ بير زامان سارسيلماييب، قهرمانجاسينا ظلمه قارشي دؤيوشده هميشه دوز يولو آراييب، حقيقت داليجا گئديبديرلر. دؤكتور زهتابي دا اؤز سلفلري كيمي، قارشينا آلديغي دوز يولدان دؤنمه ييب و خالقينا گؤزهل، درين معنالي شعرلر تقديم ائديبدير. زهتابي اوشاق ايكن شعره ماراق گؤستهريب، آمما ۱۳۲۵ اينجي آذر آيينين ۲۲سينده تبريزين ساهات قاباغيندا توركجه كتابلارين يانديرماسيني گؤردوكده[۷] فارس شعرينه دال چئويريب، آناديلينه ائله محبت بسلهدي كي، عمرونون آخيرينه دك اونا وفالي قالدي، بوتون وار قوّهسيله بو يولدا آدديم آتيب، جان قويدو. همان گونلرده «سن اوسان من ده بويام» عنوانلي شعريني سؤيله دي. بوشعر ۵۰ ايلدن سونرا، بوگون ده ديللر ازبريدير:
سودئييبديرمنه اولده آنام، آب كي يوخ
يوخو اؤيرتدي اوشاقليقدامنه خواب كي يوخ
ايلك دفعه كي چؤرك وئردي منه نان دئمه دي
ازليندن منه دوزدانه نمكدان دئمه دي
آنام اختر دئمه ييبدير منه، اولدوز دئمييب او
سو دوناندا دئمييب يخدي بالا، بوز دئييب او.
قاردئييب، برف دئمه ييب، دست دئمه ييب ال دئيب او
منه هئچ وقت بيا… سؤيله مه ييب، گل دئييب او
ياخشي خاطرلاييرام ياز گوني، آخشام چاغلار
باغچانين گون چيخانيندا ايليق گون ياييلار
گل دئييردي ـ داراييم باشيوي اي نازلي بالام
گلمه سن گر، باجيوين آستاجا زولفون دارارام
اودئمه زدي كي بياشانه زنم بر سر تو
گر نيايي بزنم شانه سر خواهر تو
بلي داش ياغسادا گؤيدن سن اوسان، من ده بويام
وارسنين باشقاآنان، واردي منيم باشقا آنام
اؤزومه مخصوص اولان باشقاائليم واردي منيم
ائليمه مخصوص اولان باشقاديليم واردي منيم
ايستهسن قردهش اولان، بير ياشاياق، بيرليك ائدهك
وئرهسن قول ـ قولا بوندان سورا بير يولدا گئدهك
اوّلا اؤزگه كولكلرله گرك آخميياسان
ثانياوارليغيما، خلقيمه خور باخميياسان
يوخسا گر زور دييه سن، ملتيمي خوار ائدهسن
گون گلر، صفحه چؤنر مجبور اولارسان گئده سن![۸]
همين بو شعر، اوگونلرده هامينين ديلينده اوخونوردو، شاعرين ده شعر عالمينده بير دؤنوش نقطه سي اولدو.
زهتابي عمرونو دوستاقلاردا، سورگونلرده كئچيرتدي، هله پهلوي استبدايندان قورتولماميشدي كي، سووئت حاكميتي الينده اسير اولدو. هر حالدا شاعر اوزولمه دي، بؤيوك بير جسارتله ظالملر قارشيندا داياندي و سسيني اوجالتدي:
آزاد دوغولان انسانا قاندال نه گركدير؟
قاندانلاري قيرميشلارا زندان نه گركدير؟ [۹]
انسانلارين آزاد دوغولوب، آزاد ياشامالاريني ايستهين شاعر، بو آزادليغين دليليني تاپيپ گؤستهرمك ايستهیير:
طبيعتين آناسي هر زادي دوغار آزاد
يئري، گؤيو، چيچهيي
آيي، گونو، فلهيي
نسيمي، هم كوله گي
مگر دوغولماز آزاد گؤي ائوينده قار پيله گي؟
بشر طبيعتين اوغلو طبيعتين گولودور؟
سبب نديركي بو آلچاقدي ديگري اولودور؟
عدالتين مي بويول؟ يا حقيقتين يولودور؟
عجب عدالتدير!
عجب حقيقتدير! [۱۰]
زهتابي بوتون حياتيني اؤز خالقينا حصر ائتميشدير. خالقينين تاريخينين كئچمیشيني دوشونوردو، هر نه شعر دئييردي خالقيني توشلاييب، خالقينا يول گؤستهرمك هدفيله يازيردي. وطن سئوه رليك، خالق پرستليك بوتون ايلك و سون آمالي ايدي: نه دونيا ماليندا گؤزو واريدي، نه شهرت آختاريردي، يوخسا فرانسه، آلمان، انگليس و آيري -آيري اؤلكهلرين دانشگاهلاري دؤكتور زهتابينين معاشيني ياخشي تأمين ائتمك قولونو وئره رك، اوستادي ساخلاماق ايستيرديلر، آمما يئنه وطنه باغلي، وفالي و محبتلي ياشادي و يازديغي اثرلر خاليقيميزا هويت سندي كيمي ده يرلي و قالارقيدير.اوستادين اثرلريني اوچ اصلي بؤلومه بؤلمك اولار
۱ . تحقيقي ايشلر ـ بواثرلر تاريخي، ديلچيليك، ادبي تنقيد و سياسي اجتماعي موضوعلاري احتوا ائدير.
۲ . شعرلر ـ مختلف مستعار آدلارلا ـ ميشوولو، شيسترلي، كريشچي و… يازديغي اثرلر گاهدان اوزون منظومه لر، گاهدان قيسا شعرلر اولور. هاميسيندا شاعرين مبارز و خالقا اوره يينين دويونتولريني دويماق اولار.
۳ . نثر ساحه سينده يازيلان حيكايه لر و خاطره لر.
هر اوچ بؤلومده، عالمين گوجلو بير يازيچي اولدوغونو گؤروروك.شعرلري بونلاردير
الف. پروانه نين سرگذشتي ب. ائل اوغلو باغبان ـ منظومه
ج. بختي ياتميش ـ منظومه د. بذقالاسيندا ـ منظومه
هـ. چريك حماسه سي ـ منظومه ز. شاهين زنجيرده
شعرله يازيلان بو منظومه لر، هر بيري، بير ديري رومان كيمي، قهرمانلارين ايچ دنيالاريني، فكر دنيالاريني آچيقلايير. شاعر روحي- معنوي دنياني او قدر دهيرلنديرير كي اوخوجو اؤزونو همان قهرمان سايير. شاعرين ديلي او قدر آخيجي و شيريندير، او قدر گوجله سؤزلري بير ـ بيرينه دوزوب ـ باغلاييركي آدام حيران قالير، منظومهني قورتارمايينجا يئره قويماق ايستهمير. شاعرين قهرمانلاري، ملي قهرمانلارديلاركي وطن اوغروندا، ائل يولوندا جاندان ال اوزوب، شرافت و منليكدن مدافعه اوچون جانلاريندان اسيرگهميرلر. وطن تعريفينده ديلي آچيلاندا، سانكي داغ ـ داش ديل آچيب انسانلارلا دانيشير. اونون وصفين اوخوياندا سانكي طبيعت ديله گلميشدير. مختلف موضوعلارلا وطن سئوگيسي، ائل قايغيسي بير ـ بيرينه قاريشير. ملتلر آراسي دوستلوق، قاباريق شكيلده اؤزونو گؤسته رير. عالمين ديلينده وورغو ايله هر ياتميشي اويادير، اونا ضربهلر وورور، وطن عشقي اويادير، قايغيسينا قالماغي اؤيره دير.
قدريني بيلمير بير چوخو
تئزده بو غفلتدن آييلماز اولار؛
تاكي دئشر سينه لرين غربتين
زهرلي تحقير اوخ
اوندا بيلرلر وطنين قيمتين.[۱۱]
شعر، عالمين الينده بير دؤيوش وسيله سيدير، اويانيش وسيله سيدير.[۱۲]
ملتي اويادير، مبارزهيه يؤنَلدیر، اوندا هيجان يارا دير و اونا شعور باغيشلايير و گؤزلجه سينه آتالار سؤزلريندن شعرينه بزك وئرير.
شاعرين شعرلرينده هر زاددان آرتيق آتالار سؤزو ايشلنميشدير:
تك الين اولماز سسي، ائل كيمي يولداش گرك.
( بختي ياتميش)
آنلاسا ائل قدرتين، اؤز وارليغين، ذلتهده، ظلمه ده أيمز باشين.
( بختي ياتميش)
قسمت اگر اولسان يمن ده ن گلر، اولماسا گر توخلو چمنده ن گئدهر،
لوقما دهندن دوشَر.
( بختي ياتميش)
پئنديري ساخلار دري، آروادي ساخلار اري.
( بختي ياتميش)
موفته سعادت قوشو گلمز اله.
( بختي ياتميش)
هر شئيه غالب گلن
ائل گوجودور،
يئل گوجودور،
سئل گوجو.[۱۳]
زهتابي وطندهن اوزاقدا ياشاييرسادا وطن اوچون ياشاييردي، ائلينين درديني، كدريني اورهيينده داشييردي. ديلينه، ائلينه و آنايوردونا دريندن بسله ديگي محبتله هله گنجليك سوروردو. زهتابي كيمي شاعر، منليك دردي اوچون، آنايوردو اوچون، شاعر اولموشدور. او، شعريله چاليشيردي اؤز ديلداشلاريني، تاريخ، فرهنگ و هويتلرينه تانيش ائديب، كولتورلرينين حل اولماسيندان ممانعت ائدسين. بوناگؤره اونون شعري بو گونكو گؤزلليكلر، فرم ايله محتوا نسبتلري رعايت ائتمه ده اؤلچولمور. بلكه اونون شعري مستقيم صورتده اوخوجولاردا هيجان، شور، شوق و اويانيش ياراتماق اوچون يازيلميشدير. بو شعر داوام تاپيرسا، شعريميز ظرافتدن دوشر. اما زهتابي شعرينده پيام، او قدر درين و دهيرليدير كي مستقيم دانيشيق اؤز اثريني گؤستهرير. هله ده اورهكلره ياتير، هله ده اوخوماغيندان لذت آپارماق اولور.
شاعرين موفقيتي تكجه صداقت و صميميتي اوچوندوركي هر اوخوجونو ايستر ـ ايسته مز ياراتديغي فضالارا آپاريب، شاعرين خيالي و ذهني ايله بيرلَشديرير و اوندا همدرد اولماغي اويادير؛ همين بو، شاعرين گوجونو گؤسته رير.
پروفسور زهتابي و انقلاب دوشونجه سي[۱۴]
پروفسور زهتابي بؤيوك بير عالم، ديرلي شاعر، دوزگون مورخ، بيلگين ديلچي، عيني حالدا بؤيوك بير انسان ايدي. او، خالقينين، يوردونون و زامانينين ايستكلرينه گؤره انقلابي و دوزگون بير دورومدا دايانميش، اونلارا اويغون جواب وئرميشدير. عاليمين قاباقجيل دوشونجهلري، دوزگون فكرلري، دهيرلي تاپينتيلاري، ديل، شعر، تاريخ و صنعت حقينده، دنيا بيلگينلريني اؤزونه جلب ائتميشدير. قديم دونيا ديللري حقينده ايرهلي سورولن نظريهلرين بوتون دوگماتيك، ساختاكار، محافظه كارانه فكرلريني بير- بيرينه ووروب، بو علمين عالمانه و حقيقت آختاران آراشديرمالاريندا بير دؤنوش نقطهسي ياراتميشدير.
اونون بو ساحهده كي باخيشلاري، دنيانين مختلف اؤلكهلرينده ايگيرمينجي يوزايلين آراسيندان ايرهلي گليبسه ده، اونون نسيمي اسلامي انقلابيميزدان سونرا بيزيم قولاغيميزا چاتميشدير.
دؤكتور زهتابي ۳۰ ايل دنيانين مختلف بیلیم یوردلاریندا ـ شوروي، آلمان، عراق و ايران دانشگاهلاريندا ـ فارسي، توركو و عربجهني درس وئرميش، اونلارجا كتاب بو ديللره يازميشدير. اونون توركو، فرانسه، روس، عرب، انگليس، آلمان و فارس ديللرينه تايسيز احاطهسي بو امكاني ياراتميشدير كي دنيانين مختلف علمي قايناقلاريندان فايدالانيب، درين و علمي آراشدير مالار ايرهلي آپارميش و نهايت دوزگون نتيجهلر الده ائتميشدير.
دؤكتور زهتابي تاريخ علمينده بؤيوك باجاريقلار گؤستهرميش، تاريخده حق و عدالت ايزلريني آختارميشدير. يالتاق مورخلر واسطهسيله، تاريخده كي ظالم و قولدورلارين ظلملري باسديريليب و حقيقتلر قويلانميشدير، تكجه خالق ايچينده، خالقين ياراديجيليغيندا بو حقيقتلري آراماق اولار. رسمي تاريخ، قتل و غارت، اؤلدورمه و ظلملري توجيه ائديرسه خالقين اصيل قهرمانلاريني اونودماغا چاليشير. سانكي تاريخ ياراديجيلاري خالق يوخ، بلكه جنايتكار شاهلار، اميرلر، سلطانلار و خاقانلار اولموشلار. آمما بيزيم بو عالميميز، خالق و اونون قهرمانلاريني تاريخ يارادان گؤرور.
ائله اونا گؤره بابك، ستارخان، باقرخان، كوراوغلو، قاچاق نبي، شيخ محمد خياباني، حسين خان باغبان و… قهرمان تانينير. هارادا بو قهرمانلارين عصيان روحوندان دانيشماق ايسته ييرسه، شاعرين و عاليمين محكم ايناميندان، خالقا باغلي اينانجيندان آلينميشدير.
پرفسور زهتابي زامان طلبلرينه نئجه جواب وئرمهسي اوغروندا ياشاييشين بوتون ساحهلرينده تحقيق و ياراتماغا ال وورموش و خالق حاقلاريني غصب ائدن ظالملر قارشيسيندا، اصولي و انقلابي موضع توتور. ايران معاصر تاريخي، بئله مبارز و حق طلب شاعر دنيا اؤزونه گؤرمه ييبدير. عالم، ايراندا گئچهن امپرياليزم سياستلريني ياخشي تانيردي و حقلي اولاراق شاهي، استعمار نؤكري بيليردي. شاعر، هر ياندا شاها حمله گتيرير، اونون اربابي آمريكاني اونودمور. بيليريك عالمين اوتوز ايل دوستاق و سورگون اولماسي بو مبارزهلره و حق سؤزلري دئمك اوچون اولموشدور؛ اما اونون شاعرانه روحو بير آن بو مبارزه دن دؤنمه ميش و مبارزهنين حقّانيتنده شبهه ائتمه ميشدير و اينانيردي كي خالقي ال ـ اله وئريب بوتون قانداللاري قيراجاقدير، داغلاري سؤكه جكدير و ظالملري ازهجكدير:
ائلين بيرليگي سيلكه لر داغلاري دايانماز اؤنونده نه سلطان، نه خان
چكيب اهرمن خلقي زنجيره، ليك هميشه گونو اؤرته بيلمز دومان
اونون چارهسي تكجه بيرليكدهدير!
شاعر، خالقي اوياتماق اوچون، اونون اليني توتوب اؤز قهرمانلاريلا، اونلارين ظالملرله نئجه دؤيوشدويونو تانيتديرير، اسير اولماغي خالقينا بگنمير. ۱۳۵۰جي ايلده شاه، مبارزلري قانا بله ديكده شاعر «سوسانماز ائليم» شعرينده هايقيرير:
«وئر ايچسين بو ائل بير دؤيوش بادهسين» !
بو ايللرده، بوغونتو بوتون اؤلكهميزي باسديقدا، شاعر خالق اورهيينده اومود قيغيلجيملاريني اكير و اونلارا اينانديرير كي بو تئزليكده حق توفان قوپاريب، ايلديريم شاخاجاق، قارانليقلار اؤلكه ميزدهن كؤچه جكدير. گؤركملي عالم، ايرانين نئچه ديللي خالقلارينين بيرليگيني ايستهيير: بو يولدا چاليشير، هاميدان آرتيق ديلداشلارينا و قهرمان آذربايجان خالقينا آرخالانير:
هميشه اولموش وطنيم ايران
آزادليق اوچون اولارام قوربان
ايران خلقلرين تانيير هر يان
سلاملار اولسون قارداش ائللره.
***
فارسيله توركلر دورسون ياناشا
عرب، كورد، توركمن گلسينلر قوشا
بلوچ، قشقايي داغ آشا ـ آشا
سلاملار اولسون قارداش ائللره.
***
گلسين قوشولسون بوشن دؤيوشه
شاهلارا قارداش گئده يوروشه
***
آلقيشلار دئسين قارداش ائللره.
بو ايللرده تكجه بئله بير بؤيوك مبارز شاعر لازم ايدي تا خالقلاريميزي بيرليگه دعوت ائتسين. بونلاري اوخوياندا اؤزوموزه گووه نيريك كي عالميميز شوونيستلر قارشيندا، اونلارا تاي يوخ، بلكه خالقلارين بيرليگينه چاليشير: ايراني بوتوؤلوكده ايسته يير و اوره يي بوتون ايرانليلارلا چيرپينير.
عالم، تبريزين تاريخيني تانيير؛ ۱۳۵۳ و ۱۳۵۴ جو ايللرده بو شهرين سوسماسيني گؤردوكده بئله بير سورغويا گلير:
كئچميشين اوخويوب واراقلاديقجا
يا زندان گؤرونور يا قانلي عصيان
چوخداندير گئنه ده سوسدورولوبدور
بواؤلوم سكوتون پوزماقچون هاچان
بير داها قايناييب جوشاجاق تبريز؟
ارلره بو قدر دؤزوم ياماندير!
سوسانلار ازيلير، سوسما آماندير.
ائللر سوروشور خئيلي زاماندير:
هاچان سون نغمه سين قوشاجاق تبريز؟[۱۵]
تبريزده بو سون نغمهسيني ۵۶جي ايلين بهمن آیينين ۲۹ اوندا قوشدو.
۱۳۵۵جي ايلدهن، خلق اعتراضلاري يوكسلديكده شاه رژيمي بير سيرا دهييشيكيليكلره بويون اگير، او جملهدن هويداني گؤتوروب، يئرينه آموزگاري قويور. شاعر خالق حاضرليغيني خاطرلادير و «قوللارين ائل چيرمالار» عنوانلي شعريله سياسي حركتلري قارشيلايير. شاعر بو شعريده، هويدانين تؤرهتديگي جنايتلري افشا ائدير.
دوزدور بو ايللرده، شاعر هله سورگونده و وطندهن اوزاقدا ياشايير، آمما درين بير باخشيلا و كامل دوشونجه ايله اؤلكه نين سياسي اولايلارين دالين توتور و اونلارا مناسب موضع توتور. اونون ديلي گاهدان هجو ايله، گاهدان طنز ايله و گاهدان جدي صورتده اولاراق شاه ظلمونون قالالاريني ييخماق هدفيله آچيلير. بورادا طنز ديليله بئله باشلايير:
قارقا گليب وئردي خبر قارهاقار
گئتدي هويدا، گلير آموزگار.
قوي كاكا توفيق ايشيني آنلاسين
جورجوقون سيلكهلهييب دانلاسين
صوبح آچيلير لاري خوروز بانلاسين
قارقا خبر وئردي چؤنور روزگار
گئتدي هويدا، گلير آموزگار. [۱۶]
بو شعرده، شاعر هويدانينوزارت و صدارت دؤره سينده بوتون تؤرهتديگي جنايتلري، ايرانين ملتينين ازديگيني، وطني ويرانليغا، آرادان گئتمه گه سوق وئرديگي ـ «اما تمدن بزرگ»[۱۷] ادعا ائدن اوچوروما ايتهلهمهگيني افشا ائدير و خلقي عصيانا چاغيرير، خالقدان ايسته یير استعمار اويونجاغيني قوام تاپماغا مجال وئرمه سينلر، بلكه او دا شاهلا برابر قاچسين.
خالقا بئله اورهك وئرير:
قويما يئرينده توتا حاشا قرار
قوللارين ائل چير مالار
ال آپارار كرپيجه
باش گؤتوروب تولكوتك
شاهلا برابر قاچار
حضرت آموزگار!
شاعر، خالق اورهيينده اومود چيراغي يانديرير، اينانديرير كي بو چتين گونلري ده باش اوجاليقلا كئچيرتسهلر، خيانت و جنايتلر قاشيسيندا باش اگمهسهلر، غلبه چالماق ياخيندادير.
بو ايللر، شاعرين ياراديجيليق و فعال زمانيدير. وطندهن اوزاقدا اولاركن، اؤلكه ميزده اولان اولايلاري دقتله گؤز آلتينا آلير، شاهين رياكارليق، دغلبازليقلارينا توخونوب، افشا ائدير. بو زامان آلمانيادا «بيرليك» آدلي نشريهني چيخاريردي و اورادا شعرلريني چاپ ائتديريردي.
بو نشريه، ايرانا چاتديقدا الدهن ـ اله گزيب، اؤلكهميز ضياليلاري آراسيندا دولانيردي. عاليمين سياسي شعرلري بو زمان خالق و سياسيلار ايچينده آلقيشلانير. شاهين مذهبه رياكارليقلا آرخالانماسي، آمما ظلمه، جلادليقا يول آچماسيني گؤزهلجه سينه قلمه آلير. شاهين حوققابازليغيني آچيقلايير. بونا بير اؤرنك اولاراق «جلاد آچير ملته عرفان يولو» شعريني بورادا گتيريريك:
بنده ووروب ديللري ـ عرفانلاري اوددا ياخيب شعريله ديوانلاري
دوستاق ائديب حق سئون انسانلاري دار قوروب انسانلارا هر يان دولو
جلاد آچير، ملته عرفان يولو!
آخارسي سام، هر ياني جلاد ـ نؤكر قان ايچن اسرائيل اولاردان بتر
آرخالانيب زنجيره، سؤز مختصر گولله ـ توفنگ، داردي بوتون ساغ ـ سولو
جلاد آچير ملته عرفان يولو!
گولله سيخير ائللره، ملتلره قان چيله يير هئي مدنيتلره
گؤندهرير عالملري غربتلره ديرسگه دك قيرميزي قاندير قولو
جلاد آچير ملته عرفان يولو!
سيلكه له نير خالقلار اصلان كيمي قالخاجاق آخيرده ده توفان كيمي
دار قوراجاق ظولمه باقرخان كيمي جلاد آچانماز ائله درمان يولو،
عصيان آچار ملته عرفان يولو، چاره دي چون دردلره عصيان يولو[۱۸]
زهتابي، همين ايللرده شاهين بير طرفدن جنايتلريني، اؤلدورمه لريني افشا ائدير؛ بير طرفدن ده علمي اوجاقلاري ـ بيليم يوردلارينين باغلانماسيني خاطيرلاییر. خالقين سئويملي اولادلارينين دوستاقلاردا چورومهسيني، هر كوچه باشيندا دار آغاجلارينين قورولماسيني، قهرمانلارين خياوان آسفالتيني قانا بوياماسيني دؤنه ـ دؤنه آچيقلايير و دئيير: بير حالدا كي شاهين قوللاري ديرسگه دَك خالق قانينا بلنميشدير، «تمدن بزرگ»؟ آزادليق و صلحدن دانيشير؛ آمما خالقيميزين چارهسي تكجه عصياندادير، بلكه رژيمين قصرينه ولوله ساليب، توفان قوپارسين. شاعر ۵۶جي ايلين بهمن آييندا تبريزي عصيانا چاغيرير و بئله دئيير:
اي هله ده سينه سي قان تبريزيم
يونجا يئييب حقين آلان تبريزيم
شير كيمي سنگرده ياتان تبريزيم
سيلكه له زنجيرلري قير بير داها،
ميدانا اصلان كيمي گير بير داها !
***
تاريخه زينت دي سنين مرد آدين
لرزه ساليب قرنلره فريادين
سنسن اؤزون آخري اؤز امدادين
دور كي اسارت ياراماز تبريزيم،
ظولمه اؤلوم فرماني ياز تبريزيم! [۱۹]
شاعر بو شعرده تبريزين يوكسك همتيني اؤيومكله ياناشي، بو شهرين اهلينه ظلمه دؤزمهيي بگَنمیر، بئله گؤزله يير كي بابكلر، كوراوغلولار، ستارخانلار بؤيودن آنا، عصريميزين يئني بابكلريني دوغمالي و عصريميزين فرياديني چكمهليدير. عصرين شيخ خيابانيسيندان ايستير بلكه دوشونجه يارادان دانيشغي ايله خالقي يوخودان اوياتسين.
دوغرودان شاعر حقلي اولاراق ايستهمير تبريزي دايانميش گؤرسون، بلكه بوتون ايرانين آزادليغين ايسته ميشدير. شاعر يئنه ده تبريزي عصيانا چاغيريب بئله باغيرير:
قوي غضبون گورلايا توفان كيمي قان جوشا قلبونده بير عمان كيمي
ميدانا گير قورخمايان آسلان كيمي سنگر ائله داغ ـ داشيني بير داها
قدرتيوي گؤستر او ساتقين شاها!
دوغرودان همان ايل بهمن آييندا قانلي تبريز آياغا قالخيب قانا بلندي. شاعر بو فاجعهلري گؤردوكده ايران ملتينه اوز چئويريب «شاه گنه قان ـ قان دئيير» شعريله شاهين جنايتلريني افشا ائدير:
قيزدي هاوا، واي! ده لي هذيان دئيير،
شاه گنه ملت لره قان ـ قان دئيير! [۲۰]
بو اوزون شعرده، شاعر شاهين يالانچيليغيندان، اؤلدورمهلريندن، كوروش و داريوش جنايتلرينه اؤرتوك ساليب، اؤزوده اونلارا تاي جنايتلره ال ووردوغوندا، مملكتي اوجوز قيمته آمريكايا و آيري اؤلكهلره ساتماغيني، يئرينه توپ و تفنگ آليب مظلوم خالقيميزين سسيني بوغماغا چاليشديغيني افشا ائدير. شاعر بورادا هر مبارز، هر خطيبدن قاطع اولاراق شاها قارشي دانيشير و شاه رژيمينين ييخلماسيني ايستير. «قوللارين ائل چيرمالار» شعرينده خالقين، رژيمي ييخماسينا حاضيرليغيني گؤستهرير.
شاعيرين ديلي گاه كسرلي، گاه توند سياسي، گاهدان دا طنزله دولودور؛ آمما هر حالدا حق آختاران، ناحقي باساندير. شاهين ۵۷جي ايلين سـونلاريندا اؤزونو مسلمانليغا وورماسي، شاعيرين اثرينده بئله گؤستهريلير:
موشدولوغون بورج اولا اي خوش خبر
شاه باباميز كهنه مسلمان اولوب!
ملت اسلامي قيراندان سورا
توبه ائديب قائل قرآن اولوب![۲۱]
اما انقلابين غلبه چالماسيني ياخين گؤرهن خائنلر، چانتالاريني دولارلارلا دولدوروب قاچيرلار. بورادا شاعر دئميشدي:
خالقي سويان بوينو يوغونلار بويون
چانتا دولو، قويما! قاچير اي دادش!
دؤكتور زهتابي بو گونلرده بوتون ايران خالقلاريني بيرليگه چاغيرير. و تكجه توركو يوخ، بلكه فارسيجادا شعر دئيير. «نداي شهيدان بلوچ» شعرينده بئله بير ايديياني آچيقلايير:
اي بلوچ شيردل!
تا بدست آري وطن را
تا براندازي زبن رسم كهن را
تا كه فرزند تو تندر ميهنش آزاد باشد
تا بلوچستان تو آباد باشد
و اندر آن نسل جوانت بختيار و شاد باشد
آن تفنگي را كه ماه هشتيم برگير؛
و بدين پيكان با تدبير
دست در بازوي فارس و ترك و كرد و عرب زن
چون نباشد دست تنها را صدايي.[۲۲]
زهتابي شاها قارشي مبارزهلري آلقيشلايير و «چريك حماسهسي»[۲۳] آدلي اثريني ۱۳۵۵ ايلينده يازير و اورادا امپرياليسم و شاها قارشي مسلحانه دؤيوشو مدافعه ائدير. شاعر ۱۳۵۰دن ۱۳۵۷يه قدر ايللرده ان آچيق انقلابي و حماسي شعرلر دئيير و شاهدان، جنايت و خيانتلريندن نفرت بسلهييب، خالق قهرمانلارينين شاها قارشي گئدهن مسلح گنجلري اويور. ۵۷جي ايلده ايران خالقلارينين شاها قارشي مبارزه سي آيدينلاشديقجا شاعرين ده ديلي آيدينلاشير؛ خالقدان قاباق يول گؤسته قانابليره؛ سونرا توبه ائديب مسلمان اولماغيني دئيير.
شاه بو حيلهلرله خالقين كسرلي مبارزهسينين قارشيني آلماغا چاليشير، اما انقلاب دايانمير، يولوندا هر نه وارسا ووروب – سينديرير و نهايت بهمن آيينين ۲۲سينده غلبه چالير. بوتون ايراندا بئله بير شاعر كي، اوتوز ايل ـ بوغونتولو گونلردهن انقلابين غلبه چالماسينا كيمي شاه قارشيندا دايانيب، بير آن سوسماييب، گئري قاييتمايا، … يوخدور؛ البتده ايرانين انقلابي حركتلرينده دوكتور زهتابينين انقلابي شعرلرينين ائتكي سيندن دانيشماق بوندان دا آرتيق مجال ايستير، آمما زهتابي تكجه انقلابي شاعر دئييل، بلكه بؤيوك بير عالم، محقق، اديب، ديلچي و اجتماعي مصلحدير؛ بوندان آرتيق بو ساحه ده دايانماق لازم دئييلدير.
عالمين اثرلريني اينجهله مك عروضون تورك فولكوروندا كؤكلري
عالمين دهيرلي علمي، تحقيقي اثرلريندن بيريسي ده بو كتاب «اميد زنجان» در گيسينده چاپ اولموش (۱۳۷۶جي ايلين مختلف ساييلاريندا) و اديبلر طرفيندن قارشيلانميشدير. بو اثري، عالمين ۳۰ ايل زحمتلرينين نتيجهسي كيمي قيمتلنديرمك گركدير. دؤكتور زهتابي باكيدا اولان ايللرده (۱۹۷۱ ـ ۱۹۵۴ اينچي ايللده) اورادا اولان ادبياتشناسليق ساحه سينده عروضا اولان منفي مناسبتي گؤروب و هر ياندا اوخويودو:«عروض بيزه گلمه دير، بيگانه دير».
عاليمين فيكرينده، باكيدا تدريس ائدركن، بوفكره قارشي شبهه يارانير. ائله بونا گؤره بو بارهده گئنيش بير مطالعه و تحقيقه اوز گتيرير و چوخلو يادداشتلار گؤتورور. بو ايشدَن اؤترو هر ملي ادبياتين منشايي و ايلك بولاغي اولان او ملّتين فولكلورونا دقت يئتيرير. فولكلورو موزدا منظوم و منثور اثريلري باشدان اوخويور. اؤزبكستان، توركمنستان، تاجيكستان و … هر يانا سفر ائدير. چاپ اولموش فولكلور نمونه لريني نظردن كئچيرديب، قيدلر گؤتورور. دوستلاريندان، شاگردلريندن كؤمك آلاراق، تورك دنياسيندان آغيز ادبياتينين اؤرنكلريني توپلايير. مسكو، لنينگراد و باكيدا الينه كئچهجن كتابلاري آراشديرير. تكجه تورك ديلينده آراشديرمالارا محدود قالمير، بلكه فارس و عرب ادبياتينين دا فولكلوروندا دقت ائدير. فولكلور نمونهلريني توپلايير، توتوشدورور و آراشديرير. بغداددا اولان ايللر، استانبول و آنادولودا اولان ايللرده بو آراشديرمالارا داوام وئرير. قديمكي اثرلريميزي بير ده باشدان اوخويور. دده قورقود، ديوان لغاتالتورك، حتي كوراوغلو داستانلاريني، عاشيقلارين شعرلريني اوخويور. عراق توركلري، توركمن، اوزبك، قازاخ، قيرقيز، تاتار، ياكوتلار، كريم تاتار لاري و … فولكلور نمونه لريني الده ائديب هيجا و عروض عنصرلري باخيميندان دقتله نظردن كئچيريب، قيدلر گؤتورور.
تبريزه گلديكده ايراندا چاپ اولان اثرلري دؤنه ـ دؤنه اوخويوب توتوشدورور. ۱۳۶۱جي ايلده بير واحيدهني بيان ائتمه يه چاليشير، چونكي داها بونا اينانميشيدير كي «عروض بيزه گلمه، ياد و بيگانه يوخ، بلكه دوغمادير». اما ايشي قورتولمور، دوستاغا دوشور. دؤرد ايلدن سونرا يئنه آزاد اولاراق بو فكريني داها بيان ائتمه يه دايانير. دؤرد آي گئجه ـ گوندوزونو بير ـ بيرينه باغلاييب، بو ۶۰۰ صحيفه ليك اؤلمز اثري يارادير و ۳۰ ايلليك زحمتينين نتيجه سي اولان اثريني خالقينا اتحاف ائدير[۲۴] و بئله يازير:
«بو اثري يازماقلاري باغلي اولان آذري خلقين مدنيت و ادبياتينا، ائلهجه ده عموم تورك كولتورو و ادبياتينا كيچيجيك خدمت ائتميش اولسام، اؤزومو خوشبخت و بختيار حساب ائدهرم.»[۲۵]
زهتابينين درين آراشديرمالاري نتيجهسي چوخ اؤنملي و دهيرليدير. بيليريك هر بير ملي ادبياتين ايلك قايناغي، اوميللتين فولكلورودور. آذربايجان ادبياتيدا بو عمومي قانوندان استثنا دئييلدير. قديم دورلردن ـ بوگون ايگيرمينجي يوزايلين سونلارينا قدر يازيلي تورك ادبياتينين شعري ايكي وزنده ـ هيجا و عروض وزنلرينده يازيلميشدير. ايگيرمينجي يوزايلين اوّللرينده آذربايجان دا وزنلرـ عروض و هيجا عالملريميز طرفيندن آراشديريلير. بير سيرا عالملر، عروضا قارشي چيخاراق، اونو ياد، بيگانه سانيب، شعريميزدن اوزاقلاشديرما فكريني ايرهلي سورورلر، بير سيرا عالملر ده، هيجا وزنيني دوغما بيلهرك عروضي ائشيگه آتماغا اورهكلريندن گلمير؛ اما دانشگاهلاردا بو عمومي قكر اولوب، رسمي بير شكل الاراق، داها عروض تدريس اولونمور. بونون نتيجهسي بو اولور كي گنج نسليميز عروضا قارشي چيخير و اونا بيگانه قالير و اونو يابانجي تانييير.
دؤكتور زهتابي بو وضعيتي گؤردوكده، ساكت اوتورا بيلمزدی. نتيجه ده آذربايجاندا اولان آراشديرير، علي اكبر طاهر زاده ـ صابرين بو ساحه ده فكرلريني آچيقلايير و هاميسينين حرمتيني دريندهن ساخلاياراق، اولان قكرلري آراشديرير، عرب ادبياتيندا دا بو آراشديرماني داوام ائدير.
بو بحث مختلف بينالخالق سئمينارلاريندا دانيشيغا آلينميش و دؤكتور زهتابي بونلارين هاميسيندا اؤز نظريه لريندن مدافعه ائتميشدير و دنيا سويه سينده يانليش فكرلره قارشي دايانميشدير.
اوستاد، تورك، فارس و عرب ادبياتيندا عروضون نئجه دوغما اولدوغونو آچيقلايير، عروضون ماهيتيني و كؤكلريني آختارماق اوچون يازيلي ادبياتدان چوخ قديم اولان فولكلورا اوز گتيرير.
اوستاد، بونا اينانير كي عروض بيزده ده واريميش. ايلامدان اؤنجه آتالار سؤزونده، مختلف فولكلوريك شعرلريميزده عروض وزني ايشه گئديب؛ آمما عروض علميني عربلر يارادير و بوگون دؤكتور ناتل خانلري، همان يولو داوام وئرير. اوستاد زهتابي، بو اوچ ديلين ـ تورك، فارس و عرب ـ عروضون بيري ـ بيريندن فرقلي اولدوغوغو دويور و بو فرقلرين كؤكلريني آراشديرير. پروفسور، آذربايجان شعر وزنلرينه گلديكده، هيجا وزنلريني دقيق بير صورتده آرايير، گؤتور ـ قوي ائدير و نهايت دوزگون علمي نتيجه لر آلير. گؤزلليكلريني آيدينلاشديرير. بئله ليكله بو ۶۰۰ صحيفه ليك اثر خالقيميز او چون اؤلمز ادبي آبيده كيمي قالير.
پروانه نين سرگذشتي[۲۶]
بو اثر «م. شبسترلي» تخلصو ايله ايلك دفعه بغداددا، سونرا تبريزده چاپ اولدو. بو اثري احتوا ائدهن شعرلر عبارتدي:
۱ . ساغ اول بغداد
سن اوسان، من ده بويام
باغلي قاپيلار
بير ديلَك
بير داها
رخشندهنين آرزوسو
قربتدهكيلر
توفان قوپاجاق، توفان!
سهنددن پيراما قرونا پيغام!
سوسانماز ائليم!
ائل قيلينجي
يوردومون قبلهسي
سعادت وطندهدير و نئچه بالاجا شعرلر
۲ . منظومهلر:
كيچيك قردشيمه مكتوب
پروانهنين سرگذستي
يوخي
غزللر
زهتابي بير مكتوبدا كيچيك قارداشيلا دانيشير. اوزامان شاعر سوئت اؤلكه سينده ياشاييردي. بوردا باشينا گلن حادثهلري قلمه آلير و بير وطن سئوهر انسانين ايچ حاللاريني، پاك دويغولاريني تصويره چكير.
«پروانهنين سرگذشتي» منظومه سينده، بوگون آذربايجانليلارين او تايا قاچماسي و اوراداكي چتين شرايطده ياشامالاري، كيملره بويون اييب، تحقيرلره دؤزمه لريني تصويره چكميش و پروانه ديليجه اؤز حاليني يازميشدير.
بو اثر نئچه منظومهني احتوا ائدير كي قاباقجا او بيري اثرلرده ده گلميشدير. بو منظومهلر بونلاردير:
ـ يوخي
ـ بختي ياتميش
ـ بذ قالاسيندا
ـ كيچيك قارداشيما مكتوب
ـ افسانه دي شمشيره دايانمازسا آزادليق
بو اثرين ايلك منظومهسي اولان «شاهين زنجيرده[۲۷]»، شاهين قوشونو، بير آزاد سمبوليك قوشو كيمي تصويره آليب، اونون ديليجه وطنداشلاريني وطن سئومهيه، دوست ـ دوشماني دوزگون تانيماغا، يادلار سؤزلرينه آلدانماماغا چاغيرير.
بو اثرينده ده، شاعرين بوتون بشريته آرزيلاديغي سعادت و كرامتي آنلاماق ساده دير، باشدان باشا وطنداشلاريني خطاب ائدهرك، وطنين مقدسليگيني آنلاتماق ايستهيير و ملتلر بشريتين عضو و اولاراق:
بير عائلهدير بشريت
دايم آراميشدير او سعادت
و كرامت
ملتلر اونون عضوو كيميندير
يوكسلمهسه لاكن، سورونر هميشه كاروان اوجالانماز.
انسانليغا لاييق اولان انسان
اؤز ملتين دردينه بيگانه قالانماز
اؤز قونشوسونو غمده گؤروب، كئفده اولانماز.
انسان دئييل همجنسيني بدبخت گؤروب، جام آرايانلار
خلقي ازيلن حالدا سوسوب نام آرايانلار!
شاعر وطندهن اوزاق غربتلري گزيب، خوشختليك آختارانلاري هارايلير، ائلين داردا اولماغيني سؤيلور.
شاعر سعادت آرديجا دنياني يئرسيز بيليب، آزادليغي آنا تورپاقدا بيلير و گوهري وطنده تاپماغي لازم بيلير. شاعر جسارتله ايللر بويو زنجيرده قالماغينا اشاره ائديرسه، ذرجه ده ايمانيني الدهن وئرمهديگيني خاطرلايير و اينانير كي بير گون زنجيرلريني قيراجاقدير:
شاهين گئنه زنجيريني دارتير
قوب بوپ! دئيير ـ آخير قيرارام من سني، زنجير!
چون قير مالييام من سني آخير!!
شاعر «بذ قالاسيندا» بابك قالاسيني گؤز اؤنونده جانلانديريب، اوندان الهام آلير و بوگون آنا وطنين يئني بابكلره احتياجي اولدوغونو سؤيلور.
و «افسانه دي شمشيره دايانمازسا، آزادليق» منظومه سي اؤزو بير سؤز دئمهميشدهن اؤزونو آچيقلايير.
بوعنوان اؤزو بير مقاله دير. «بختي ياتميش» منظومه سي ده يئنه شاعيرين بوتون مبارزه دويغو سونو احتواائدير، شاعرين آمال ـ آرزيلاريني، انسانلارين آزاد ياشاييشيني قلمه آلير.
باغبان ائل اوغلو
زهتابينين ده يرلي و اوزون منظومه لريندهن بيريسي «باغبان»[۲۸] اثريدير. حسين خان باغبان مشروطه انقلابينين اصيل قهرمانلاريندان، ستارخان، باقرخاندان سونرا بو انقلابين اوچونجو شخصيتي و قهرماني ايدي. پروفسور زهتابي بو اثرين اوّلينده گؤزل علمي و تاريخي بير مقدمه يازاراق، حسينخانين ياشاييشيني، هابئله اونون مشروطه انقلابي ايله مناسبتيني ده يرلي بير تحليل ايله آچيقلايير. آمما شعره گلديكده زهتابينين قلمي يئني بير قول ـ قاناد آچير، ايلهام پريسي گؤيلره يوكسه لير:
قوي آچسين قاناد اودلو شاهين كيمي
افقلرده الهام پريم بير داها
قوي عصيانچي طبعيم آتي
سمالار كيمي كيشنهييب بيرده قالخسين شاها.
سانكي شاعر بير داها فضا ايسته يير، بلكه او فضا دا اورك سؤزلريني ديله گتيرسين، اوناگوره قلمه اؤيونور؛ بو اؤيونمه نين دليلي بودور كي:
تانيتديرماق ايستير قلم
ائله بير ايگيدوار، اؤز وارليغين
ائل اوغروندا آتديقدا آتشلره
تشكّر بئله اومماميش
گؤرهن وارسا قوي سؤيله سين
ائله ساده بير انساني
كه اولموش جوانليقدا گُل باغباني.
ايگيد خلقينين عصياني
جوشان گونلر، ائل باغباني.
اوبير گون بئجرتميشدي بوستان، اكين
كي شاه خلقي آج قويماسين
و بير گون ده الده توفنگ
گريبسينه خاقانلارا
اولوب مظلوم انسانلارا باغبان.
اوجالديقدا مظلوملارين نالهسي
حياتي بوغاركن اساتدره چن
وطن توپراغين قاپساياركن دومان
و بوغدوقدا هرياندا مظلوملاري اهرمن
آلو ياغديران
ايلديريم تك شاخان
باغبان. [۲۹]
زهتابينين عصيانچي روحو دا «باغبان» كيمي جوشا گلير، بوتون مظلوملارا داياق، ظالملره قارشي دايانير، ايگيدلري اؤيورسه، نامردلري نفرت اوخونا توشلايير.
نعمت يارادانلاري نه قدر مرد اولورسا
سردارلاري هر قدر جوانمرد اولورسا
حق اوغرولاري بير او قدر تولكو صفتدير.[۳۰]
زهتابي شعرينده، هميشه خالق قهرمانلاري بير مقدس سيما ايله تصويره آليناراق، خالق دوشمانلاري همان قدر چيركين، ظالم، ييرتيجي گؤسته ريلير و هر ايكي طرفين سيماسي آيدينجاسينا ايشيق آلتينا آلينير. قهرمانلارا گوونمك، اونلاري اؤيمكله ياناشي، دوشمانلارا نفرت، زهتابي نين بوتون شعرلرينده گؤز اؤنوندهدير. بو اثرينده ده حسين خان باغبانين قهرمان و ايگيد سيماسي داها گؤزل، داها آيدين گؤسته ريلمكده دير. حسين خان، ملي سرداريميز ستارخانا داياق و انقلابا بايراقدار اولموشدور. هر ياندا سردار يالقيز قاليرسا، باغبان دادينا چاتير، ائل ايگيديني تك قويمايير. بو تاريخي حقيقتي زهتابي بئله قلمه آلير:
سردار اؤز ايچينده تك و تنها دؤيوشركن
هر ان تله سير عمرونه سون قويماغا دوشمن
لاكين بونو بيلميركي سردار قالا داردا
سيمرغ تك حاضر اولار اوردا.
باغبان
مشروطهيه بايراقدار اولاندان
بايراق گئجه ـ گون دالغالانيبدير
افسوس كي لالدير قوجا تاريخ
قادر دئييلدير اچسين كي حسين خان
اوخ نئجه رد اولدو يانار او ددان ـ الودان
شيمشك كيمي دوشمن صفيني ياردي بير آندا
ائل سرداري دوشمن صفينين آرخالاريندان
قورشون سهسي سنگردهن ائشيتديكده، دئميشديباخ، گلدي حسين خان!
شاعر، ائل اوغلونون بؤيوك رشادتلريندهن دانيشاركن، اونون اورك دؤيونتولريني ده تصويره چكير. قهرمانين ايگيدجه احوال روحيه سيني آچيقلايير. «نايب اصغر» كيمي ائل طرفداري، دوشمن صفينه قووشماقدا آجينير؛ چاليشير ائل سئوه ني ائله ساري چكسين.
باغبانين نايب اصغره سؤيله ديگينه بير باخاق:
باغبان: كيملردي بوگون آرخا دوران سيزلره، كيملر؟
قاجار دورور آرخاندا سنين، يوخسا يتيملر؟
كيمدن سن گولله آتيرسان؟
گولله ندن اؤلن اَلسيز ـ آياقسيزدي و يا خان؟
بيز قان تؤكوروك، تؤكمه يه سلطان
ناحق يئره تاقان!
بيز، قان تؤكوروك، اينله مه سين ظلمده انسان
بيز، قان تؤكوروك، حّر ياشاسين يوردوموز ايران!
بو دانيشقلاري سونرا «نايب اصغر» دوشونوب، يئنه ده انقلابا وائله قووشور. گؤروروك حسين خان تكجه قولونا، توفنگينه دايانماييب، بلكه ديلينه و عقلينه دا دايانماقدادير. چاليشير. دويدوغو حقيقتلري خالقينا يئتيرسين، خالقيندا دوشونجه ياراتسين و دوشمنلري آزالديب، ائل سئونلري آرتيرسين.
شاعر، تاريخه صادق قالاراق، ايگيدين قهرمان سيماسيني، رئال وارليغي كيمي قلمه آلير، اونون آتشين دؤيوشلريني، فداكار ايشلريني، ائله ـ يوردونا عاشقانه و مردانه جان وئرمه سيني شعره چكير.
دوغرودان دا بئله بير قهرمان هانسي ملت ايچينده اولموشدور؟
شاعرين بو حماسه ني يئنيدهن ياراتماسينا دليلي، تاريخي ثبت ائتمه مه سيندن ايره لي گلير و منظومهنين هر يئرينده بو موضوعا اشاره ائدير كي:
داش قلبليميش افسوس
بير كلمه سؤزوندن؛
شايد ده جواب آلمادي هئچ كيم
گر سوردو اؤزوندهن.
شاعر بئله اينانير كي تاريخ بويوبئله بير ايگيد دنيايا گلمه ميش و هئچ ايگيدي اونا بنزهتمك اولماز. باغبان ياشاييشي هئچ بير اري، هئچ بير آسلاني آنديرمير. او، مين بير ايكيدليك گؤستهريبسهده:
باغبان دونونون ساده دؤشوندن
آسلانمادي بير شانلي نشان دا
لاكين اؤزو بير شانلي نشان تك
حق عاشقي ايرانليلارين قيرميزي قان تك
قلبيندن آسيلدي.
باغبان ياشاييشي بير ياندا قالسين، زهتابينين عصيانچي روحو، ايگيدليك دوشونجه سي، مبارزه روحو دالغالانماقدادير. زهتابي بو اثري ياراتماقدان مقصدي، اؤز دوغما ائلينه قهرمان روحو باغيشلاماق و اونلارا مبارزه ضرورتيني آنلاتماق ايدي. شاعر هر صحفهده يئري گلديكده ائله گؤزل و سئوگيلي تصويره آلير كي اوخوجو اختيارسيز گؤزلري ياشا دولوروبئله اوركدن اؤيونور.
قوي اولسون اون[۳۱]
بؤيوك عالم هنر عالمينده، بوتون يازيچيلاريميزدان اوستون و علمي، آخيجيدير. ايستهر تاريخ مادهلري، ايستهر شعر آراشديرمالاري، ايستهرسه ده ادبي هنرده هاميدان با جاريقلي بير يازيچيدير. آدي كئچهن اثر، نثر اولاراق نئچه حيكايه و خاطرهني احتوا ائدير. بو يازيلار عاليمين وطندن اوزاق قالديغي ايللرده، ياد اؤلكهلرده يازييا آلينميشدير. البتده دئمك لازمدير كي بونلارين بير سيراسي مختلف درگيلرده قاباقجا ياييليب، ايلك دؤنه اولاراق ۱۳۷۰جي ايلده، يازيچي طرفيندن توپلانيب و ۱۳۷۲جي ايلده تبريزده چاپ اولموشدور.
موضوع جهتيندن حيكايه لرين مضمونو بيز ايران آذربايجانليلاري اوچون نامأنوس نظره گلير؛ اما يازار اؤزو تأكيد ائدير كي بونلارين هاميسي رئال حادثه لردير. ائله بونا گؤره ده بو خاطرهلر و حيكايهلر دقيق و ادبي- علمي جهتيجه آراشديرماغا گرهكير؛ بونا گؤرهكي بو خاطره لر عاليمين اؤز باشينا گلهن حادثه لردير.
اونودماماق كي عالم سولچولاردان ضربه و صدمه آلديغينا گؤره، عنادلي بير باخيشلا بئله موضوعلارا توخونور[۳۲]؛ بونون دا گناهي عاليمده يوخ، بلكه زامان شرايطيندن يارانان حادثه لر و آداملارا قاييدير؛ عاليم چاليشيب سولچولار طرفيندن خالقيميزا و ورورلان ضربهلري آچيب ـ گؤسترسين؛ آمما بو ساحهده تمام حقلري عالمه وئرمك اولماز.
بوگون سياسي شرايط دؤندوكده بيز ده دؤنمه لي دئيیليك؛ بو گونكو دوشونجهميزي، دويغوموزو تامام گونلره، بوتون زامانا تعميم وئره بيلمهريك؛
بلكه دهگيشيلمه، تكجه، حقدير و حقيقت. حقيقت آختاران هر زمان اولموش، حقيقت گيزلهنيبسه ده آرادان گئتمه ييبدير. حيكايه لر وطنيميزدن اوزاق يئرلرده باش وئرير و بئله گؤسته رير كي عالمين پسيكولووژودان نه قَدَر بيليكلي اولدوغو يوخ، بلكه اجتماعی موضوعلار، پسيكولوژيكال حاللارادا دريندن واقف اولدوغونو دويوروق.
علم معاني (لكسسيكولوژي)تركيب لغوي زبان آذري ادبي معاصر[۳۳]
بو اثر فارسيجا يازيليبدير. دؤكتور علي اكبر ترابي (حلاج اوغلو) اونون رداكتورلوغونو بوينونا آلميشدير. بو اثرده عالم ديلچيليك علمينه آرخالاناراق، چوخ علمي و دهيرلي اثريني ياراتميش و گؤستهرميشدير كي بو علمده هاميدان بير قاريش اوجادا دايانيبدير. بو اثرده عالم چاليشير كلمه لري و سؤزلري معنا جهتيندن آراشد يريب، گتيرديگي معنالاري چاغداش ادبياتيميزين و معاصر شاعرلريميزين اثرلريندن، هابئله چئشيدلي ژانرلاريندان اولسون. همن گتيرديگي مثاللار، اونون چاغداش ادبياتيميزين بوتون اينجهليكلرينه و بوتون كيچيك ـ بؤيوك شاعيرلرينين اثرلرينه دريندهن تانيش اولدوغونا تايسيز بيرسنددير.
چكيجي حال بوراسيدير كي، عالم هر بؤلومده بير موضوعو آراشديراراق، او موضوعون بوتون بوجاقلاريني نظرده توتوب، تام گوشه لريني آچيقلاميشدير و اؤيره نجيلري آنا ديليميزين گؤزلليكلريله، هابئله گئنيشليگي ايله تانيش ائدير. بو اثر، دنيا ديلچيليگينده، لئكسيكولوژي علمينده گؤزل بير اؤرنكدير. اديبيميزين بو جهتدن باجاريغي و گوجونو گؤسترمكده دير.
معاصر ادبي ـ آذري ديلي[۳۴]سس- صرف
ديليميزه عايد اولان و آز مدت ايچينده بوللو ـ بوللو يازيلان كتابلار ايچينده هلهده دهيرلي و علمي سؤيّه يه مالك اولان اثرلرين بيريسي پروفسور زهتابي نين بو كتابيدير.
بو اثر بير عمر آراشديرما، چاليشما و تحقيقلرين نتيجه سي اولان بير كتابدير. بؤيوك بيلگين بغداددا ياشايان ايللر، عائلهسي ايله هر ايل آوروپايا گئديب اونلارين آنا ديللريني اورادا مختلف علمي ـ ادبي چخيشلاري اولاردي ـ اورادا آذربايجانليلارين اؤيرهنمهگه ماراغيني گؤروردو. اونا گؤره بو اثري يازيب، ۱۳۵۵جي ايلده چاپ ائدير، هابئله بغداد دا آذري ديلليلرده بونو ايستهييرديلر؛ اونا گؤره بو كتابي بيرده باشدان حاضرلاييب چاپا وئردي. آمما اورادا بو كتاب اؤزگه نين آدينا چاپ اولدو. اسلامي انقلابدان سونرا، زهتابي وطنه قاييديب، اؤز وطنينده بئله بير اثرين يئريني بوش گؤرور. بيرداها يازماغا باشلايير. نئچه كتابي پلي كپي صورتينده چاپا حاضرلايير؛ او جملهدن «آنا ديليميزي اؤيرهنك»، «زبان ادبي معاصر آذري» اثرلريني پليكپي اولاراق علاقمندلرين الينه چاتديرير. ۱۳۶۸جي ايلده تبريز راديوسو اوچون راديو امكچيلرينه توركجهني تدريس ائتمهيه دعوت اولونور. اونون اوچون ده بئله بير اثر حاضيرلامالي اولور. بونلارين هاميسي ال ـ اله وئريب بو اثر يارانير واينديكي صورتده- علمي سويهيه مالك اولاراق مكمل اولموش صورتده ۱۳۶۸ ايلينده تبريزده چاپدان چيخير.
بو اثرده ديليميزي لاپ ساده دن باشلاييب، سون درجه چتين جملهلره قدر اؤيرتمه يه چاليشير، سس حقينده، حرفلر و الفبا، سسلرين مختلف طبقهلنديگي (اينجه، قالين، دوداقلانان دوداقلانمايان و …) سس اويغونلوغو، توالورقانونو، هيجانين نه اولدوغو، وورغو، كلمه، كلمهنين يارانماسي، ساده و دوزهلتمه سؤزلر، شكيلچيلر، سوزلرين يازيليش قايدالاري، جملهنين مختلف قسمتلريني تشكيل ائدهن اسم، صفت، فعل، ساي، ضمير، مصدر، زامانلار، حاللار و … بونلارين مختلف بؤلوملري و … هاميسي بيرـ بيرينين آراديجا گلير. جلب ائديجي حال، هر درسين آخيرينده تاپشيريقلاردير. بو اثر علمي سويه ده ديليميزي اؤيرتمه گه چاليشير.
دئديگيميز كيمي بو اثر عالمين ۲۵ ايلدهن آرتيق درس وئرمكلرينين و مختلف اؤيرنجيلرين ايستكلريني يئرينه يئتيرمك اوچون يازيلان اثريدير و اولدوقجا مكمل و ايستكلري قانع ائدهن بير اثردير.
آنجاق ممكوندور بوگون بو اثردهن كامل ده بو ساحهده كتاب يازماق اولسون كي بيز چوخ دا اونلان موافق اولماياق، آنجاق بئله اولورسادا، اونون دهيري هئچ ده آزالمايير.
زهتابي و مطبوعات عالمي[۳۵]
پروفسور زهتابي ۲۵ ايل سورگونده ياشاركن، بير آن وطنيندن غافل اولماميش، اوره يي خلق ايله دؤيونوب، وطنه خاطر چيرپينيري. غدار شاهليق رژيمي، عاليمين وطنيني استبدادا چولقاييب و بؤيوك استاد، ادبي ايشي ايله ياناشي، سياسي مبارزهيه ده قاريشميشدير. اونون يانيندا سياسي مبارزه ايله فرهنگي مبارزه و علمي مبارزه بيرلشميشدير. اوستاد آلمانيادا، روسيادا، و يا عراقدا اولان زامانلار بو مبارزهدن چكينمه ميش، گاه مطبوعات ايشينده چاليشيب، درگيلر يولا سالميش، گاه راديو وئرليشلريني سهمانلاييب آنا ديلينده، ملي مسئلهيه توخونماغي وائللريميزين، وطنيميزين اولان خالقلارين فرهنگي دردلريني سؤيله مك اوچون چاليشميشدير؛ هر حالدا بيليم يوردلاريندا چاليشمالاريلا بو مبارزهيه دوام وئرميشدير و هئچ زامان «يورولدوم» دئمهييب، يئره اوتورماميشدير. زهتابينين راديو وئرليشلريني آراشديرما اوچون هله الده سند يوخوموز، ائشيدهنلرين خاطرهلريندهن علاوه بير زاد الده ائده بيلمه ديك؛ آنجاق گله جكده بو امكانلار ياراناجاق و عاليمين بويولدا چاليشديغي فعاليتلر اوزه چيخيب، مبارزه يوللاري آيدينلا شاجاقدير.
مطبوعات طريقي ايله ايرهلي سوردويو مبارزهسي اوچون تانيش اولماغا، اليميزده نئچه ـ نئچه سند وار و اونون بير بؤلومو ساييلان «بيرليك» درگيسي چاپ اولوب و بوگون اللرده گزير.
«ايرانلي مترقي تورك روشنفكرلر جمعيتي»نين اورگاني اولان «بيرليك» نشريهسينين ايلك ساييسي ۱۳۵۴جو ايلين شهريور آييندا ـ آذربايجان دموكرات فرقه سينين رسميتله آچيليشي مناسبتله ۱۳۲۴جو ايل شهريورين ۱۲سي چيخميشدير. هر سايينين باشيندا بو عنوان يازيليردي:
«بيز ستارخان، علي مسيو، حيدر عمي اوغلو، خياباني، اراني، پيشهوري و بهرنگينين يولو ايله گئديريك».[۳۶]
بو نشريهنين ايلك نمرهسينده، روزنامهنين هدفي نه اولدوغونو ايضاح ائدركن يازير:
«ايران زحمتكشلري و ملتلرينين رژيم عليهينه مبارزه سينين غلبه سينه هئچ شبهه يوخدور» و ايضاح ائتميشدير: «داها سلطنت رژيمي اوزون عمر سورمه ييب، آرادان گئده جكدير».[۳۷] بو نشريهنين «ايلك هدفي ايرانلي مترقي تورك روشنفكري بيرينجي نؤبهده وطندن خارجده ياشايان تورك روشنفكري آراسيندا علاقه، فكر و هدف بيرليگي ياراتماق» ايدي. ايكينجي مسئله و يا هدف، ملي حقوق بارهده و ملي مسئله يه توخوناراق علمي معلومات وئرمه و ملي اويانيش ياراتماق اولموشدور. بو نشريه ايكي صحيفه ده و ايكي ديلده ـ توركجه و فارسيجا ـ چاپ اولوب ياييليردي. نشريهنين مجموعه سي ۱۳۵۸جي ايلده تبريزده ياييلدي. نشريهنين هر ساييدا آذربايجان چاغداش قهرمانلاري و روشنفكرلري اولان صمد بهرنگي، جعفر پيشهوري، شيخ محمد خياباني، ستارخان و … ياشاييشينا و فكرلرينه داير علمي مقاله لر يازيليب، هر ساييدا ملي مسئله يه بير زاويهدن توخوناراق، مهم شخصيتلر وسياسي گروهلارين باخيشيني بو بارهده آراشديريب آچيقلاييردي. بو نشريهنين سون ساييسي ۵۷ اينجي ايلين بهمن آيينا عايد اولور و اسلامي انقلاب غلبه چالديقدا، عاليم وطنينه قاييديب و هدفه چاتماغي ياخين گؤرموشدور.
بو نشريه ۴ ايل آيليق صورتينده چاپ اولاراق سياسي و فرهنگي مسئلهلري بيرگه ايرهلي آپاريب، شاه رژيمينين چركين خيانتلريني آچيقلاييب و اوخوجولاريندا ملي و سياسي اويانيش ياراديردي. هر ساييدا م. شبسترلي و يا م. ميشوولو تخلصو ايله عاليمين شعرلري چاپ اولوردو. زهتابينين يازديغي موضوع، گونون سياستلرينه مربوط اولوردو. دئمك لازمدير اسلامي انقلابين تاريخيني دوزگون آراشدير ماسي لازم گليرسه، بو درگينين شعرلرينين اينجه لمه سي ده لازم اولاجاقدير.[۳۸]
ايران توركلرينين اسكي تاريخي
بو دهيرلي كتاب انقلابدان سونرا ياييلان كتابلار آراسيندا بير پارلاق اولدوز كيمي پاريلدير. بو كتاب وطنيميز ايرانين ميلاددان ۴۵۰۰ ايل قاباقدان، اسكندرين هجومونا قدر تاريخيني احتوا ائدير.
ايندييه قدر وطنيميزين بودؤوروندن چوخلو متعصب تاريخچيلر واز كئچيب و بير سيراسي دا تام ترسينه گؤسترميشلر و تاريخيميزي هخامنشيلرله باشلانان بيلميشلر؛ حال بو كي بوگون تاريخ علمي، قطعي اولاراق گؤسته ريركي توركلر ۳۵۰۰ ايل فارسلاردان اوّل، ايران تورپاغيندا مدنيت و حكومت قورموشلار. پروفسور محمدتقي زهتابي بو اثري اوچ جلدده يازميشلار:
بيرينجي جلد: ۴۵۰۰ ايل ميلاد دان اؤنجهدن اسكندرين ايرانا هجومونا قدر.
ايكينجي جلد: اسكندردن ايسلاما قدهر.
اوچونجو جلد: اسلامدان سونرا كي تاريخي احاطه ائدير.
بيرينجي جلد ۱۳۷۷جي ايلين ايكينجي ياريسيندا چاپدان چيخيب، چوخ آز بير زاماندا بازاردان قورتولدو. ايللربويو چتينليكلرله اوز ـ اوزه دايانان و بوتون وارليغي ايله چاليشان اوستاد، بو كتابي يازماقدا گؤزلرينين ايشيغيني، اورهيينين ياغيني اريديب، اؤز خالقينين زنگين كئچميشيني دنيايا تانيتديرميشدير. اوستاد بو اثرينده كوله بورونموش ياناركؤزلري، قلم گوجو ايله دئشهلهييب، يئنيدن آلولانديرميشدير. بو اثره آرخالاناراق، بيزلر بوگون ياشيميزي اوجا توتوب اؤز كئچميشيميزدن مدافعه ائده بيليريك. حقيقتده اوستاد بو اثر يله آذربايجان تاريخينين گيزلين بوجاقلاريني آيدينلاشديريب، مزدور و ساتقین تاريخچيلرين گؤزونه تورپاق سپميشدير.
عالم بو اولمز اثرينده توركلر تاريخيني علمي بير مئتود ايله، مختلف تاپيتيلار والده اولان فاكتلار اساسيندا آچيقلاييبدير. اوستاد، نئچه ديله ـ توركو، فارسي، عربي، فرانسا، روس، آلمان، و انگليسجه يه تانيش اولدوغو مناسبته گؤره باجارا بيليبدير يازديغي تاريخي، چوخ درين مطالعه سايه سينده دقتلي و صداقتلي اولاراق، دنيايا باغشيلاسين؛ ائله اونا گؤره بو اثر حيرت ائديجي حالدا ائتكي بوراخيب و هر اوخوجونو يئني بير دنيايا آپارير؛ بئله اثر اؤلكه ميزده و شايد دنيا اوزونده تايي گؤرونمز اولسون. بو اثر شاهد گتيرديگي كتيبه لر، گؤسترديگي آبيده لر، سايديغي يئر اوستو و يئر آلتي قازينتيلاردان تاپيلان سندلر، استفاده ائتديگي قايناقلار هاميسي اوستادين درين و گئنيش معلوماتيني گؤستهرير.[۳۹]
دؤكتور زهتابي بو اثرينده، ميلادان ۴۵۰۰ ايل قاباقدان باشلاييب اسكندرين ايرانا هجوم گتيرديگي زمانا قدر تاريخيميزي آچيقلايير و بوتون ايران تاريخچيلرينه قارشي تاريخي اورتادان ـ هخامنشيلردن باشلاديقلارينا رغماً، ۴۰۰۰ ايل اونلاردان ايرهلي گئديب تاريخ و تمدن تاريخيني آراشديرير. اوستاد گؤسته رير كي آرياييلارين ايران تورپاغينا گلمه سيندن ۳۵۰۰ ايل اؤنجه بو اراضي ده تورك ديللي مدنيتلر قورولموشدور. عالم بو چاشديريجي معلومات اوچون، علمي قايناقلار، فاكتلار تانيتديرير و اينكار ائديلمز بير منطقله آرياييلارين بورايا گلمه سيندن اؤنجه، توركلرين بورالاردا ـ عراق و ايرانين بوتون دوغو، مركزي و خزرين گؤنئي و قوزئيينده و بو گونكو آذربايجاندا بشريتين ايلك مترقي و پارلاق مدنيتي ياراتميشدير.
بورادا سومئرلر، آراتتالار، ايلاملار، كاسيلر، هورريلر، قوتتيلر، لوللوبيلر، گيلزانلار، امردلر، كاسپيلر، ماننالار، اورارتولار حكومت قوروب، مدنيتلر ياراتميشلار.
عاليم بو مدنيتلري تانيتديراراق، علمي آراشديرمالاريندا گؤسته رير كي بونلارين هاميسينين ديللري التصاقي اولوب و آريا ديللريندن فرقلي اولاراق، تورك ديللرينين كؤكو ساييلير. عالم درين بير معلومات وئرهرك، هئچ بير سورغونو جوابسيز بوراخمير و دقتلي اوخوجونو قانع ائده بيلير.
اوستاد، موضوعلاري هر بوجاقلي طرح ائدهرك، بحثي او قدر آچير كي داها بير سورغويا يئرقالمير و علمي اثبات يوللاريلا ايران توركلرينين مدنيتيني آچيقلايير. تاريخدن علاوه، اونلارين ديل، دب، مدنيت و آيري ـ آيري موضوعلاريني آچيقلايير. بورادا گتيرديگي فاكتلار، انكار ائديلمز صورتده بوتون شووينيستلري رسواي ائتمه گه امكان يارانير و ادبي رياكارليغي افشا ائدير.
بو كتابدا آدلاريني چكديگيميز قبيله لردن سونرا ميلاددان ۹۰۰ ايل اؤنجه پاسارگاد قبيلهسينين رهبرليگي آلتيندا اولان اون پارس قبيلهسي شرقدن ايرانا گلمه سيني يازير و گؤسته رير كي بو ابتدايي حيات كئچيرن قبيله لر، بو اراضي نين اصيل مالكلري اولان و بؤيوك مدنيت يارادان التصاقي ديلليلر اونلارا قابا قجيل حيات، ياشاييش، يازي و ساير اؤيرهتميشلر. هابئله اوغوزلارين، ساكالارين آذربايجانا گلمه سي، ماد حكومتينين قورولماسي، هخامنشي سُلاله سي ايش اوسته گلمه سي، كوروش تومروس خانيم ايله دؤيوشوب اؤلمه سي، سونرا هخامنشلرين ملي ظُلمو قارشيندا قانلي قالخيشلار، هابئله اسكندرين ايرانا هجوم گتيرمه سينين سببلري ايضاح اولوناراق، مختليف مدنيت، ديللر، فولكلور، ادبيات، اوئستا كتابي، نوروز بايرامي و آيري ـ آيري مراسيملرين كؤكؤ آچيقلانير.
بئله بير اثري او خودوقدا اينانيريق دؤكتور زهتابي تكجه آذربايجان يا ايران عالمي يوخ، بلكه ۳۰۰ ميليون تورك ديللي خالقلارين، اوندان دا اوستون بشريت عالميدير.
او، حقيقت آختاران انسانيت عالميدير. «ايران توركلرینين اسكي تاريخي» نين ايكينجي جيلدي ۱۳۷۹دا چاپدان چيخدي. بو اثرده اسكندر هجوموندان سونرا آتروپاتن دولتي، پارتلار و ساسانيلر سُلاله لري آچيقلاناراق، اونلارين سياسي قورولوشي، مدنيت دورومو، مدنيت، ديل و ملي دوررومونو آراشديرير. اؤزلليكله ساسانيلر زامانيندا آذربايجان ملتينين تشكّولو و ادبي ديليميزين فورمالاشماسي ساحه ده چوخ گؤزل و علمي معلومات وئرير.
پروفسور زهتابينين بو اثري دنيا سوّيه سينده تايسيز علمي ـ تاريخي اثردير و توركلرين، اؤزلليكله بيز آذربايجانليلارين ايللر بويو تاريخيميزين اوستو باسديريلي قالديغيني درك ائده رك علمي سويه ده آچميش و تاريخ قارانليقلاريندا پارلاق بير گونش يانديرمشدير. بو گونشين ايشيغيندا، بيز گله جگه اطمينانلا آدديم آتاجاغيق.[۴۰]
بو دهيرلي اثري تانيماق اوچون، اونو اوخوماق لازمدير. هئچ بير ديل ايله اونو تعريف و توصيف ائتمك اولماز. گرهك اوخوماق.
اسلاما قَدَرايران توركلرينين ديلي و ادبياتي
دؤكتور زهتابينين دهيرلي اثرلريندن بيريسي ده بو كتابدير. بو كتابدا ايران توركلرينين ديلي و ادبياتيني ان قديم زامانلاردان اسلاما قدر آراشديرير. بو علمي آراشديرمادا، سياسي دوروملاري و اونلارين علمه قارشي آماجلاريني گؤسته رير و بيلينديرير كي حقيقت و علمه ضد اولان فكرلرين نتيجه سينده، بيزيم زنگين و قديم ادبياتيميزين كؤكو، ميلادي يوزايللرين ۱۳ندن ايرهلي گئتمه ميش و اوندان اؤنجه ده كي ديليميزي آراشديريب، فاكتلار اله گتيرمگه چاليشيردي. پان توركيست! آدلاناراق دامغالانيردي. بئله لیکله زنگين و نئچه مين ايله مالك اولان ديليميزين تاريخي و ماترياللاري دانيلير و هئچ ديلچي، اديب و آراشديرماچي بو ساحهده قلم اله آلماغا جرأت تاپمايير. يانديريجي حال بوايدي كي، كتاب دده قورقود دنيا سوّيهسينده تانيناراق، اونون تاريخيني ۵۰۰ ايلدن ايره لي آپاراندا، بير سيرا قلم صاحبلرينين تهمتلري باشلانيردي. نهايت حسن اوغلو و عمادالدين نسيمي ايله ادبياتيميزين باشلانغيجي يازيليردي و بونلارين درين فلسفي، ادبي فكرلري و هنرلري گؤيدن دوشمه، كؤكسوز و گؤبهلك كيمي يئردن چيخما تانينيردي.
آمما دؤكتور زهتابي بو كتابي ايله آذربايجان ديلي تاريخينده بير گونش يانديردي، بو قارانليقلاري ايشيقلانديري.
۱۳۵۸جي ايلده بو قلم صاحبينين «ادبيات باستان آذربايجان[۴۱]» عنوانلي كتابي چاپ اولموشدور و ميلاددان اؤنجهيه عايد اولان شعرلرين اؤرنهييني و ئرمهيي اوچون، شوونيستلرين گؤزلريني چيخمارتميشدي، ايندي پروفسور زهتابي بو اثرينده گؤسته ريردي آذربايجاندا «آريا»ييلرين گلمه سيندن ۴۰۰۰ ايل اؤنجه[۴۲]، زنگين بير ادبيات واريدي. بورادا علمي بير سوّيهده گؤسته ريركي اشكانيلر، ماننا، ماد، اورارتور، گيلزان، هورري، ساوير، قوتتي، لوللوبي، كاسي، كاسپي، اوتتي، ايلام و سومئر حكومتلري آرياليلاردان ۴۰۰۰ ايل قاباق يازيب ـ ياراديب و آذربايجاندا بؤيوك، زنگين و اينجه بير ديل و ادبياتلا برابر درين، محكم و بؤيوك مدنيت ياراتميشلار و بو مدنيتلرين نتيجهسي آذربايجانا عايد اولاراق، آذربايجان خلقي تورك ديللي اولموش و بو گونكو ديليميزين كؤكو ساييلير، يوخسا دده قورقود كيمي بير اثر، بير آنداگؤيدن دوشمه ييب و بيردن بيره يارانماييب، بلكه يوزايللر و مين ايللر ياراد جيليغين سونوچو اولموشدور.
مسلم بودور كي ديوان لغاتالتورك كتابيندا يازيلان شعرلر ۳۰۰۰ ايل بوندان اوّل يارانان واقعي و تاريخي حادثهلرين افسانهلنميش پارچالاري دير. آلپ آرتونقا، مادلار دؤرونده يارانان «داستانلارين قهرماني، عيني حالدا بير تاريخي سيما اولوب و اونونچون قوشولان شعرلر ۳۰۰۰ ايلليك شعر نمونه لريميزدير. دده قورقود كتابيندا يازيلان ۱۲ اوسطوره، مين ايللر بوندان قاباغا عايد اولان اوسطورهوي فكرين نتيجه سيدير. بوردا تاريخي حادثهلر انسانلارين ابتدايي دنيا گؤروشلرينه دوگونله نيب و بؤيوك اوسطوره لر يارانيبدير؛ يوخسا كيم ادعا ائده بيلر كي بو ۱۲ ناغيل بيردن – بيره انسانين ذهنيندن آخيب گلميشدير؟! بو كتاب مين ايللر بويو بؤيوك بير خالقين ائنيش ـ يوققوشلو تاريخين نتيجهسي اولا بيلر كي سونرا كي يوز ايللرده يازييا آلينميشدير.
دؤكتور زهتابي بو اثرينده هر تاريخي، بير دؤوره نين ديل خصوصيتلريني، ياراديلان اثرلري و يالانچي محققلرين، بيزي دانانلارين سياسي مقصدلريني آشكارا چيخارميش و اونلارين عمدي يا غير عمدي سهولريني، رياکارليقلاريني آچيقلاميشدير.
بورادا گؤسته رير سومئرلر ميلاددان ۴۰۰۰ ايل قاباق اورتا آسيادان، آذربايجان يولوايله، دجله و فرات چايلاري آراسينداكي تورپاغا گليب، اورادا ايلك بشر مدنيتيني قوروب، ايلك ميخي الفباني ياراتميشلار. سومئرلر تقريباً مين ايل سورهسينده ايكي چاي آراسيندا يوكسك مدنيت و بؤيوك شهرلر ياراتميشلار. بونلاردان بيزه چاتان ديلده اولان سؤزلر، كلمه لر، آدلار بو گونكو ديليميزده بير بالاجا ده ييشيكليكله ايشه آپاريلير. گرامري بو گونگي ديليميزه اويغوندور. بئله بير ديل، بيزيم توركجه ميزين كؤكو اولماسا، پس نه دير؟ اونلارين ديللري التصاقي اولموش و بيزيم ده بو گون ديليميز التصاقيدير. بوندان سونرا يارانان ايلام حكومتي و ايلام ديلي حكومتي و ايلام ديلي، سومئر مدنيتي و ديلينين طبيعي داوامچيسي اولور و داها سونرا ايرانين مركزي و غربي ايالت و ولايتلرينده، ائلهجه ده آرازين شمالي و جنوبي يئرلرينده ياشايان مختلف التصاقي ديللي، ائللر و خالقلار: قوتتي، لوللوبي، كاسسي، هورري، گيلزان، ساوير، اوتتي، آران، آلبان، ماننا، و ماد و … يوزايللر بويو، رسمي دولت و تجارت ديلي و همين ديلين الفباسي ميخي الفبا ـ ايلام ديلي و الفباسي اولموشدور.
ايلاملار ايلك اؤنجه هيروگليف خطيندن استفاده ائديب، سونرالار سومئرلرين ميخي الفباسيندان يارارلانيب و اوندان سونرا كي مدنيتلر ايلام اليفباسيني منيمسه ميشلر. بو الفبا بوتون توركلرين، هابئله ماد و ماننالارين دا الفباسي اولموشدور.
اكثر تاريخچيلر گؤسته ريرلر، هند آوروپا ديللي ائللر، ميلاددان قاباق دوققوزونجو يوز ايلين اوّللرينده اورتا آسيا و بلخ يولوايله ايران فلاتينا گلميشلر. دؤكتور زهتابي بو ساحه ده بوتون سندلري آراشديرير، حتي فردوسينين شاهنامه سيندن ده واز كئچمير و شاهنامه ده يازيلان بو بيتي:
نبـشتن به خـسرو بياموختـند دلش را به دانش بر افروختند
گؤستهرير آرياييلار ايرانا گلديكده، يئرلي خالق يازماغي پارس شاهلارينا اؤيرهتميشلر و يئرلي اهالي يعني ايلاملار، قوتتيلر، كاسيلر، ماننالار و مادلار نئچه يوز ايل سورهسينده مترقّي حيات، مدنيت و بيليك اؤيرتديلر و نهايت ۵۵۰ ايل ميلاددان قاباق ماد اوردوسونون باشچيسي هارپاكين خيانتي نتيجه سينده، هخامنش شاهلارينين ملي ظلمونه معروض قالديلار.
تاريخه آرخاناراق گؤرونور كي ايراندا سومئر مدنيتيدن هخامنش حكومتينه قدر، ۳۵۰۰ ايل سورهسينده بوتون ايراندا ياشايان خالقلارين ديلي، التصاقي ديللر اولموش و الفبالاري ميخي الفبا اولموشدور. مادلارين سون ايللرينده زردشت ديني، آذربايجاندايارانيب و اَوِستا كتابي ماننا ديلينده ـ آيري سؤزله دئسك آذربايجان تورك ديلينده يارانميشدير. بوگون اليميزده اولان اوستا همين تورك ديلينده يارانان اَوِستانين ساسانيلر اليله چئويرمه سيدير؛ بوندان بئله تورك ديلينين ائتكيلريندن قورتولا بيلمه ميشدير؛ هله ده فارسلاشديريلان اوئستا تورك ديلي و گرامري تاثيريني گؤسترمكده دير. ميلادان ۳۳۱ ايل اؤنجه اسكندر ايرانا حمله گتيرميش و هخامنشلره غلبه چالميش، آمما آذربايجان «آتروپات» رهبرليگي مستقل حكومتيني ساخلاميشدير. دؤكتور زهتابي بونو دا آيدينلاديركي اسكندر حمله ائدن زامان، بوتون اثرلري او جمله دن اوستا كتابيني داغيديب، نسخه لريني آرادان آپارميشدي. اوناگوره اوستا ساسانيلر دؤورونده باشدان يازيلاندا، تورك ديلينده يوخ، بلكه ساسانيلارين ديلينده يازيلير.
اسكندرين جانشينلري ـ سلوكيه حكومتي اوزون سورمهدي و ميلاددان ۲۵۰ ايل قاباق بو گونكو عشق آباد ـ اشك + اووا ـ دا تورك ديللي پارت ائللرينين رهبري ارشك ـ ار+ شك ـ سلوكيه حكومتينه سون قويدو و اشكاني سلسله سيني ياراتلاركي ۵۰۰ ايل بوتون ايرانا حكومت سوردولر. اشكانيلرين ۴ سياسي و مدني مركزلري واريدي كي
۱ . نيا شهري بو گونكو عشقآباد ياخينليغيندا
۲ . شيز = گزگ = گنجك بو گونكو تخت سليمان، اورمو گؤلونون جنوب شرقينده، سايين دژله زنگانين آراسيندا يئرله شير كي آلپ آرتوتقا تيكميشدير.
۳ . اُكباتان يا اوخ باتان مادلار مركزي ايدي
۴ . خوزستاندا يئرلهشن شوش شهري.
اشكانيلر دؤرو يارانميش فولكوريك اثرلر، ساساني شاهلاري زاماني فارس ديلينه چئوريلديكدهن سونرا، يازيلميش (كارنامه اردشير بابكان) و … كيمي اثرلرده ثبت اولموش و يازيلي شكله دوشموشدور.
فارس ساساني شاهلاري، حكومتي اله گتيرديكده ماد و اشكانيلرين دموكراتيك و ملي برابرليك سياستلرينين يئريني ديكتاتورلوق، استبداد، ملي ظلم و شوونيستي سياست توتدو. ساسانيلر دؤورونده اورتا آسيا و شمالي قافقاز توركلرينين آرديجـيل صـورتده هجـومـلاري داوام ائديـر و ساساني شاهلاري بو هجوملارين قارشيسيني آلماق اوچون ايران توركلرينين مهم مركزي اولان آذربايجاني فارسلاشديرماغا چاليشيرلار. بو سياست هئچ زامان نتيجه وئرمه دي و بو گون ده نتيجه وئرمه ييبدير.
پروفسور زهتابي بو اثرينده علمي شيوهلريله تاريخدن علاوه، ديلچيليك يولو ايله تاريخ بويو تورك ديللرين كؤكونو بوتون ايران فلاتيندا گؤستهرير: او جملهدن فونتيك و لئكسيك واحدلرين مقايسه سي يولو ايله، اساس لغت فوندو ـ آنا سؤزلرين مقايسهسي ايله، صرف ـ مورفولوژي قايدالارينين مقايسهسي يولوايله (اسملرين حاللانماسي، جمع علامتلري، مختلف شكيلچي لري) گؤستهرير كي بوتون ايران يئرلي اهاليسينين آناديلي تورك اولموش و اونون ايزلريني بو گونلره كيمي قالان آبيده لرده تاپماق چتين ايش دئييلدير.
بؤيوك عاليم هند ـ اوروپالي ديللرده، التصاقي و سامي ديللرده اولان قايدا ـ قانونلاري مقايسه ائديب هر جهتدن آنا ديليميزين كؤكونو و اوستونلوغونو گؤسته رير و بو اثرينين مهم بير حيصهسيني بو مسئله یه عايد ائدير.
اثرين داها بير حيصه سينده ديوان لغات التورك كتابيندا اولان شعرلر و داستانلار اساسيندا آذربايجان تورك ديلينين گوجونو و زنگين ادبياتا مالك اولدوغونو آچيقلايير. عالم، كتابينين سون حيصه سينده ماد ادبياتي، پارتلارين ـ اشكانيلرين ديليني، تورك فولكورو و ادبياتيني آراشديرميش و اونون گؤزهلليكلريني گؤسترميشدير. عالم يازيلي ادبيات حقينده بئله قناعتهگلير:
«دئمك اشكانيلر دؤورونون يازيلي ادبي اثرلري، ساساني شاهلاري طرفيندن يا آرادان آپاريلميش، يادا فارس ديلينه چئوريلهرك، منبعي گؤسته ريلمه دن، اصلي محو ائديلميشدير، يا دا كي، او دؤورون زنگين شفاهي ادبياتي و اثرلري فارس ديلينه چئوريليب، يازيلي حالا ساليناراق قالميش، لاكين اونلارين تورك ديلينده اولموش شفاهي اصيللري تدريجله اونو دولموشدور». اثرين سون حيصهسينده ديوان لغاتالتورك كتابيندا اولان آتالار سؤزلريني بير ـ بير گتيريب و بو گونكو ديليميزه، نه صورته دوشدويو شكليني گؤسته ريب و بو گونلو آتالار سؤزلرينين كؤكونو بو اثرده آختارير. همين كتابدا اولان شعرلري آراشديريب اسلامدان اؤنجه شعر اؤرنكلريني گؤسته رير و اونون اساسيندا اسلاما قدر تورك شعرينده فورما، وزن و صنعت گؤزلليكلريني آراشديرير.
دوغروسو بودور كي زهتابينين تكجه بو اثري، زهتابينين دنيا بويو جاويدان و قالارقي اولدوغونا كافيدير.
عالم حقينده يازيلان اثرلر[۴۳]
دؤكتور زهتابينين نفسي گله نه قَدَر، آذربايجان اوچون و دوغما ائلي اوغروندا چاليشدي؛ اؤزونو بير باشا اونودوب خالقيني توتموشدو. سانكي ائلينه گؤره ديري ايدي. او، بير اؤيرهتمن يارانميشدي. حتا ابتدايي تحصيليني بيتيرمهميشدن درس وئرمهيه باشلاميش، اوشاق ايكن ياشيتلارينا اؤيرتمه يه جان آتيردي. عمر بويو عشق و محبتله وطنداشلارينين معلوماتيني آرتيرماق اوچون چاليشيردي. بير عمر يازيب ـ ياراتدي؛ ائليميزين قهرمانلاري اونون شعرلريله، منظومه لريله ابديّته قوووشدو. آنجاق اؤزو حقينده، حياتي ـ اثرلري حقينده ايستهينده قيسا بير معلوماتا قناعت ائديردي. لازم ايدي اؤزگه لر اونون حقينده يازالار. ائليميزده، بيليردي بو عاشيقي، حق وورغونونون دهيهري نه قدر آرتيق و چوخدور. اونو الدن وئرن گون، خالقيميز توپلانيب عالمين بالا شهري، شبستره اوز قويدولار. شبستر اوگون بئله عالمي قوينوندا بسلهديگي اوچون گووهنيردي. اونون شاگردليگينه گووهنن يازيچيلار، گنج اؤيرهنجيلر اورهكلرينده آغير بير نيسگيل ايله بؤيوك اوستادي يئره تاپشيرماق اوچون گلميشديلر. نه سؤزلر، نيسگيللي سؤزلر كي اورهكلردن دوداقلارا سوزمهدي. دانيشماق لازم دئييل ايدي. باخيشلار سؤز دئييردي. عالمي تازا تانيماغا باشلاميشديق، تئز الدن وئرديك. آنجاق صاباحي گون، قلملر اله آليندي. تكجه زنجاندا بو بارهده يازيلان متنلر آرايا قويولسا، بيلينر ايراندا نه خبر ايدي. بو زامانلار «اميد زنجان» درگيسي ياييليردي، اونون صفحهلرينه بَزَك وئرهن اوستادين قلميندن سوزن مقاله لر و شعرلر اولموشدور. بودؤنه اوستادين شاگردلري، شاعرلر و يازيچيلار انجمنلري، اؤيرهنجي گروهلار، مؤسسه و شخصيتلر، اوستادين نيسگيللي اؤلومونه خاطره، ائليميزه باش ساغليغي وئريرديلر. بو گروهلارين، ياخود شخصيتلرين آديني چكمك، سؤزو اوزانديرار.
«اميد زنجان» نئچه سايي عالم حقينده اؤزل يازيلاري اولدو. عاليمه حصر اولموش نئچه ساييسي ـ ۲۵۵ نمرهلي، ۲۵۶، ۲۵۹، ۲۶۰ و نئچه ـ نئچه آيري ساييلاري اولدو. هر ساييدا ايكي صفحه، عالمين حياتي و اثرلري حقينده مقاله لر گئديب، دوشونجه عالمي آراشديريليردي. عالمين قيرخي، زنجان شاعرلري طرفيندن طنطنه لي بير مراسم ايله توتولدو. بونلارين هاميسي عالمين اورهكلرده قويدوغو ايزلي خاطرينه اولموشدور.
بوندان سونرا اؤيرهنجيسل درگيلر اونون حقينده يازماغا اؤزهل يئر آچديلار. درگيلرين اوز قابيغي، عالمين پورتره سينه و ايچهري صفحه لري اونون زنگين مقاله لرينه حصر اولوندو. بلكي ده بو اثرلري بير يئره توپلاياندا نئچه ـ نئچه كتاب اولار.
«ائليميزين نيسگيل قالاغي» عالم حقينده يازيلان اثرلرين ايلكيني اولدو؛ چونكي عاليمين اؤزو و اثرلري حقينده يازماق، آذربايجان حقينده يازماق يئريندهدير.
عالِمدن خاطره لريم
عالمين ايلك گؤروشو هميشه ليك گؤزومون اؤنوندهدير. دؤكتور زهتابي اؤز بؤيوكلوگو ايله آلچاق گؤيول و متواضع بير انسان ايدي. او اميد زنجانا محبتلي مكتوبلار يازيب، اثرلرينده بيزه تحفه گؤنده رردي. بيزده درگينين صفحه لريني اونلارلا بزهيرديك. درگيلر سرگيسينده و فستيواليندا عاليمين اميد زنجان غرفه سينه گلديگي هميشهليك و ابدي بير خاطره كيمي اورهييميزده قاليب اونودماياجاغيق.
دؤكتور زهتابي نئچه هفتهدن، بير تلفونلا دانيشيب درگيده اولان آخساقليقلاري خاطرلاديب، يول گؤسته رردي. بير دفعه تبريزدن تهرانا گئتمك حاليندا، يولونون اوستونده، زنجاندا دوشوب مني آختارير. گون اورتايا قالميش زنجانا چاتير، درگي نين دفترينه گلير، تأسفله اوستادا نه بير آدرس وئرهن اولور، نه حتا بير تلفون نمرهسي. اوستاد آخشاما دك قالير، من ده اوگون خبرسيز، دفتره گئتديم، دفتره داخل اولماميش اوستادي گؤردوم، اوره ييم گؤينه دي وقتي اوستادين نئچه ساعات معطل اولدوغونو ائشيتديم. اوستاد تكجه گؤرروشدويوموزو خاطرلايیب، آجي ساعاتلاري دالدا قويدوغوموز اوچون منيم سئوينمهييمي ايستهدي. من بو عظمت قارشيندا اؤزومو چوخ كيچيك گؤردوم.
اميد زنجان درگيسي «حبيب ساهر» اوچون اؤزهل ساييسيني چيخارتماق اوچون نئچه دوستلارلا قرارلاشميشديم. دؤكتور زهتابي نه قدر سئويندي آللاه بيلير. منه خاطرلاتدي كي مرحوم حبيب ساهر اونون معلمي اولموش و اونون بوينوندا حقي واردير. ايندي كي فرصت اله گليب اوستادي حقينده وظيفه سيني اؤده مك ايسته ييردي.
آمما اوچ گوندن سونرا بو اؤزل سايي چيخدي، آنجاق دؤكتور زهتابينين مقاله سي اليمه چاتماميشدي. اوستاد درگينين چيخماسيني ائشيتديكده قيچلاري سوستلاشدي، اما من دايانماديم، اوندان سونراكي ايلك ساييدا اوستادين حبيب ساهر حقينده يازديغي خاطرهني چاپ ائتمهيي ائشيديب نه قدر سئوينير! و نه قدر معلمه حرمت قايلدير؟!
۷۷ اينجي ايل ايدي. دؤكتور صديق زنجانين آزاد دانشگاهيندا تدريسه مسغول اولموشدو. بيز ده فورصتي غنيمت بيليب اونون دؤرونده توپلانيب، ادبي ييغينجاقلار قوروردوق. اوستادين وجودو زنجان شاعرلري اوچون بؤيوك بير نعمت اولموشدو. دؤكتور صديق زنجانا نه قدر خدمت ائتدي بورادا اونلاردان سؤز آچميرام: آنجاق، بيليرم كي اوستاد شهريار اوچون قوردوغو بير گونلوك قورولتاي، زنجانين و زنجانليلارين خاطريندن چيخماياجاقدير. بو قورولتايدا پروفسور زهتابي، پروفسور حميد محمدزاده، دؤكتور فرزانه و اوتلارجا قوجامان شاعرلريميز اشتراك ائتميشديلر. بو طنطنهلي قورولتايدا پروفسور زهتابي آرام توتا بيليميردي. پروفسور حميد محمدزاده ايله ياناشي هر بير شوونيستي چيخيشلارا جواب وئرمهده بير ـ بيريندن ايرهلي چيخيرديلار و بو ايكي عاليم قهرمان كيمي بوتون تحريفلره توخونوب چيركين لكهلري ادبياتيميزدان سيليرديلر.
بورا قدهر بونلاردان آيري بير انتظار يوخودو؛ آنجاق اصلي سؤز بوندان سونرادير. اوگون پروفسور زهتابي تهراندان زنجانا بير لكه نتي مينيبوسلا گلميشدي، ايكي ـ اوچ چيخيشي اولموشدو و گئجه اولموشدو آمما عاليم هله ده چيرپينيردي. گئجه ني هوتئلده قالميشديق؛ من ده سوسوز بير انسان كيمي دنيز قيراغينا چاتميشديم. آمما دنيز دالغانيردي، ساكت اولموردو. گئجه ياريني كئچميشدي، من سوروشوردوم اوستاد يورولمادان، هله حرارتله جواب وئريردي. منيم هر جوابي آلديقدا سئوينديگيمي گؤروب داها قيزيشيردي. سحره ياخينلاشميشديق، امّا يورقونلوق سيماسيندا گؤرونموردو. بو حرارت، بو هيجان، بو چاليشما نهدن و هاردان واريدي؟ اونون اؤيرتمه يه درين هوسي و خاليقينا بؤيوك محبتيندن گوج آلميشدير. دوغرودان بئله انرژي ايله دولو انسان نئجه اولور ايندي قارا تورپاقدا ساكت اولا؟
پروفسور زهتابيدان ياديمدا قالان، اونون گئنيش معلوماتي يانيندا، اؤيرهتمگه بؤيوك هوسي، يورولمامازليغي، گنجلره درين محبتي، ائل اوغروندا دايانمادان چيرپينماسي، گئجه ـ گونوزونو علمه خدمت گؤسترمه سي، گلهجك اوچون اومود بسلهمهگي، عاليمي ائلیميزين ايچينده ابدي ديري ساخلاياجاقدير. اونونچون اولوم معناسي يوخدور. پرفسور زهتابي بؤيوك انساني سجيه لره مالك اولاراق، مثلسيز متخصص عالم ايدي.
او، آنا ديليميزين متخصصي، مهارتلي و قدرتلي بير شاعري، تاريخ متخصص و نهايت اينجه روحلو پوبليت و قلمي گوجلو بير يازيچي ايدي. ديليميز حقينده يازديغي قيمتلي كتابلارلا ياناشي شعر و صنعت آراشديرمالاري، هابئله تاريخ ساحهسينده ايره لي سوردويو يئني نظريهلر و گؤز قاماشديريجي يئني معلومات، اونو تورك دنياسيندا ابدي ياشاداجاقدير. روحو شاد، يولوگئدَرلي اولسون.
باغبان
آلوولار دياريندان عالملره،
تانيتديرماق ايستير سؤزوم؛
بيرين، مين ايگيت قهرماندان بيرين،
زلال چشمه تك ساده، پاك
واولدوز كيمي لكه سيز؛
بيرين، بير بؤيوك كهكشاندان بيرين؛
يئرين سينه سيندن چيخان
صاف بولاقلار كيمي،
ائلين سينه سيندن قوپوب ايلديريم تك شاخاندان بيرين؛
نه قلبينده پول وار، نه شهرت، نه آد؛
اؤزو ساده باغبان،
اوركدن پولاد
اونون دردي بير ائل اولوب، بير وطن،
چؤركسيز قاليب خلق دردين چكن،
توكنمز پولاگوز چكن
واوولادي شامسيز ياتان
بير انسان
كي قاتسان
اگر جوهرين
اونون داغ قدركوللره،
دؤنر قهرمان ائللره،
جوشوب، كوكره ين سئللره،
اسير ائللري هايلايان يئللره،
قارانليقلارا سون قوياق شيمشكه!
تانيتديرماق ايستير قلم
ائله بير ايگيت اركي، اؤز وارليغين
ائل اوغروندا آتديقدا آتشلره
تشكر بئله اومماميش؛
بير انساني كي، خلقي بوغدوقدا غم،
اوجالديقدا مظلولارين ناله سي
ياتيب بير عؤمور سنگره
گؤرهن وارسا، قوي سؤيله سين
ائله ساده بير انساني
كي، اولموش جوانليقدا گول باغباني،
ايگيت غیرتين عصياني
جوشان گونلر، ائل باغباني.
گؤرن وارسا، قوي سؤيله سين
انسان كي، يارميش قارانليقلاري
اونون ايلديريم قهرماليقلاري
هنر گؤستريب تا، ايگيت ملتي
قوجوب، اؤپسون اؤلمز آزادليقلاري
گؤرهن وارسا، قوي سؤيلهسين
ائله ساده بير خلقتي
كي زحمت چكن انسانا حرمتي، زورا، ظلمه، ظلمتلره نفرتي،
ائل عصيانينا پاك صميميتي
ائديبدير اونو ائللره سئوگيلي.
گؤرن وارسا قوي سؤيله سين
ائله ساده بير خلق پرورده سي
كي آنجاق ايگيتليكلري
ائديبدير اونو اوردو سركرده سي.
گؤرن وارسا قوي سؤيله سين
ائله ساده بير انساني
كي آخديقدا سنگرده اسلان قاني
اونا ياس توتوب آغلاميش
همي دوستو، هم دوشماني.
او بير گون بئجرميشدي بوستان، اكين
كي شاه خلقي آج قويماسين
و بير گونده الده توفنگ
گهريب سينه خاقانلارا،
خانلارا
اولوب مظلوم انسانلارا باغبان.
بوتون وارليغيله جوشان،
چارپيشان
باغبان.
اوجالديقدا مظلولارين ناله سي
دولاندا فلاكتله پيمانه سي،
حياتي بوغاركن اسارتده چن
وطن تورپاغين قاپساياركن دومان
و بوغدوقدا هر ياندا مظلوملاري اهرمن
آلووياغديران
ايلديريم تك شاخان.
[۱]) عاليمين ياشاييشي حاققيندا معلوماتي، اؤز خاطيرهلريندن آلميشيق: بو بيوگرافي كيمي يازيني چيچكلر گروهو عاليمين اؤلومو موناسيبتي ايله يايميشدير.
[۲]) م. كريمي، نيسكيل قالاغي، زنجان، انتشارات عود، ۱۳۸۴، ص ۷٫
[۳]) م. كريمي، پروفسور زهتابينين ياشاييشي، اميد زنجان درگيسي، نمره ۳۰۱، ۱۳۷۸٫
[۴]) م. كريمي، ائليميزين نيسگيل قالاغي، زنجان، ص ۱۱٫
[۵]) م . كريمي، نيسگيللي اؤلوم، اميد زنجان، نمره ۳۰۱، ۱۳۷۸٫
[۶]) دوكتور صديق، نيسگيللي اؤلوم، اميد زنجان، نمره ۳۰۱، ۱۳۷۸٫
[۷]) م. كريمي، ائليميزين نيسگيل قالاغي، زنجان، ۱۳۸۴،، ص ۱۶٫
[۸]) م. ميشوولو، پروانهنين سرگذشتي، تبريز، ۱۳۵۸٫
[۹]) م . كريمي، همان، ص ۱۹٫
[۱۰]) همان.
[۱۱]) همان، ص ۲۰٫
[۱۲]) م . كريمي، ائليميزين نيسگيل قالاغي، زنجان، انتشارات عود، ۱۳۸۴، ص ۲۰٫
[۱۳]) م. كريمي، همان، ص ۲۱٫
[۱۴]) اوميد زنجان هفته ليگي، نمره ۳۰۲، ۱۳۷۸٫
[۱۵]) بيرليك درگيسي، نمره ۲، ۱۳۵۴٫
[۱۶]) همان.
[۱۷])م. كريمي، همان، ص ۳۱٫
[۱۸]) م. كريمي، پروفسور زهتابي و انقلاب دوشونجهسي، اميد زنجان، نمره ۳۰۳، ۱۳۷۸٫
[۱۹]) بيرليك درگيسي، نمره ۳۷٫
[۲۰]) بيرليك، سايي ۵۱، ۱۳۵۷٫
[۲۱]) بيرليك درگيسي، نمره ۵۲، ۱۳۵۷٫
[۲۲]) بيرليك، سايي ۵۲، ۱۳۵۷٫
[۲۳]) بو منظومهده، عاليم فدايي لردن اولان آذربايجانلي قهرمان – جهانبخش پايدار – ياشاييشي و مبارزهسيني قلمه آلير.
-) م. مشوولو، چريك حماسهسي، مترقي ايرانلي تورك روشنفكرلر جمعيتينين نشريه سي، ۱۳۵۶٫
[۲۴]) بو معلوماتي، عالم اؤز اثرلرينين مقدمهسينده يازميشدير. بو اثر بوگونه قدر مستقل صورتده چاپ اولماميش، آنجاق «اميد زنجان» هفته ليگينده چاپ اولموشدور.
[۲۵]) اميد زنجان، نمره ۲۸۵، ۱۳۷۸٫
[۲۶]) م . شبسترلي، پروانهنين سرگذشتيع تبريز، ۱۳۵۷٫
[۲۷]) پروفسور محمدتقي زهتابي، شاهين زنجيرده، تبريز، ۱۳۷۸٫
[۲۸]) پروفسور محمد تقي زهتابي، ائل اوغلو باغبان، تبريز، ۱۳۶۸٫
[۲۹]) همان، ص ۶۸٫
[۳۰]) همان، ص ۱۳۱٫
[۳۱]) پروفسور محمد تقي زهتابي، قوي اولسون اون، تبريز، ۱۳۷۲٫
[۳۲]) همان، ص ۱۷٫
[۳۳]) علم صفاني، تركيب لغوي زبان آذري ادبي معاصر، تبريز، ۱۳۷۲٫
[۳۴]) پروفسور محمد تقي زهتابي، معاصير ادبي آذريديلي، تبريز، ۱۳۷۹٫
[۳۵]) م. كريمي، پروفسور محمدتقي زهتابي و مطبوعات عالمي، اميد زنجان، نمره ۳۰۴، ۱۳۷۸٫
[۳۶]) بيرليك، نمره ۱، ۱۳۵۴٫
[۳۷]) همان، اؤن سوز.
[۳۸]) بو درگي حقينده، بو سطيرلرين يازاري بير مقاله ايله ديلماج درگيسينده معلومات وئرميشدير:
-) ديلماج، نمره ۳۲، ۱۳۸۶٫
[۳۹]) اميد زنجان، نمره ۳۰۳، ۱۳۷۸٫
[۴۰]) م. كريمي، ائليميزين نيسگيل قالاغي، زنجان، ۱۳۸۴، ص ۵۵٫
[۴۱]) م. كريمي، ادبيات باستان آذربايجان، تبريز، ۱۳۵۸، ص۴۲٫
[۴۲]) پروفسور محمد تقي زهتابي، همان، ص ۵۳٫
[۴۳]) اميد زنجان، نمره ۳۰۵، ۱۳۷۸٫
+ نوشته شده در چهارشنبه سی ام آذر ۱۴۰۱ ساعت 23:39 توسط م. کریمی
|
آذربایجان ادبیاتی، تاریخی و اینجه صنعتی