آذربایجان چاغداش شعری
مییانا شاعیرلری
ارشد نظری
ایصلاحات
توسباغا قیندا
قاری قورباغا
چپر آلتیندا
"ایصلاحات"
باغیریرلار
اولمایا گونش،
باتیدان چیخیب:!
***
یول گئدیر
چوخداندی سنله ویداعلاشدیغیم قاتار
بئینیمده یول گئدیر
بایرامدا یوللا گؤزلریمی
یولدا قالماسین.
***
3
یاپیشدیردیم اوره ییمی
قاپیمیزین اورتاسینا
یار گلرسه اونو دؤیسون
او دؤیونسون.
***
4
قورباغا گؤلو
داش آتاندا قورباغانین گؤلونه
بیر نئچه آن، قورباغالار گیزله نر
سوندان یئنه هه نیرتیلر اوجالار
باشلارینا داش دا یاغسا دیلله نر.
***
5
بزه ک
بیر گؤزه لی بزه دیلر
بزه دیکجه کیفیرلندی
اونو گؤره ن کدرلندی
آمما اؤزو چوخ یه یندی
چوخ سئویندی!
بیر کیفیری بزه دیلر
گؤزه ل اولدو
اونو گؤره ن چوخ به یندی
اؤزو باخدی کدرلندی
نه سئویندی
نه ده دیندی.
***
ابراهیم احمدی – آیدین ار
قاراچی
داغلار آغلار یارالی
داغ دره دن آرالی
یوواسیزدان سورمایین
هارالیسان هارالی؟
گونش گؤیون اورتاسیندا، بیر بوزارمیش یاماق کیمی
بالتا – بالتا کسیلیردی، یاشیل لیقلار.
بویلو قادین قان اییینه، یئریکلرکن بیر بیریله
ساواشماقدا دوغولمامیش اکیز تای لار.
دوداقلاردان اؤپوش سورگون گئده ن چاغدا
بؤلوک – بؤلوک وارلیغیمی، قالاق – قالاق نیسگیل لره قاتیب چاتدیم اؤز یوکومو
یولا دوشدوم قاراچیلار کروانییلا، او اوبادان بو اوبایا
داشییارکن یوخلوغومو، سیلینمه دی گؤز ائویمدن قارا دومان
یئنه بالتا، یئنه یالان
اؤلکه – اؤلکه هارایلاندیم، قاراچیلار هاراییندا
داغلار آغلار یارالی
داغ دره دن آرالی
یوواسیزدان سورمایین
هارالیسان هارالی؟
***
یانغین ایستک
باشیم گؤیده اولدوزلاری تالان ائدیر
آیاغیمدا پاسلی قاندال
بؤیوم اوجا
الیم قیسسا
دامارلاریم ایلان کیمی
اؤزلوگومده قالخا – قالخا
سورونرکن
قابار – قابار اللریمده
اولدوزلانیر
یانغین ایستک!
***
ابوالفضل حسینجانی
خوش گلیبسن
سالام!
خوش گلیبسن اؤلکه میزه
سؤیله نه لر واردی سنین خورجونوندا –
پای وئره سن بوتون قاران کؤرپه لره
پاییز؟
***
سون شعر
تاپدالاندی سوکوت توفنگی ایلن
هارایلانان شاعیر
آسیلدی، گولله لندی
دانین ایلک پرده سینده
بیر الینده کاغیذ، بیر الینده قلم
یازدی سون شعرینی، یازیلمامیش!
***
جلیل درهمجانی
یازیق کؤنلوم
گیزله نیب سئوگی لر
سینیق گولوشلر آرزدیندا
سوچسوز اوشاق گؤزلریم
جایناق آتیر یانلیشلارا
هورومجکلر یووا سالارکن
دوداقلاریما یئنه سئودا امیرم
یاساقلاردان
ه....ی منیم یازیق کؤنلوم
پارایا دالدانیب
سن اومان سئوگی
سن یالقیز قالاجاقسان
یالقیز، یازیق کؤنلوم!
***
2
بیر دوندوروجوم اولسایدی
دوندوراردیم اوره گیمی
بو شیطانلی هاوادا
کیفسیمه سیم – دئیه!
***
3
سئوگی دنیزینده مایاغیم سن سن
کوره گیم سینیق دیر
یئلکه نیم جیریق
نئیله رم اوندا کی سن ده سؤنه سن؟
***
4
سن گئتدین
من ده هارایلاریمدا دیله ییرم سنی
گونش سولدو
قانداللی آرزیلاریم
یالوارارکن اولدوزلارا
ایزلرینی گزیردی سنین
قانادی سینمیش دورنادان
سن گئتدیم
گونش سولدو
دورنا اؤلدو
اؤز هارایلاریمدا ایزله ییرم سنی.
***
محمد شیخ الاسلامی
دوستاق اولدوم دییار – دییار
سوروندم...
ایللر کئچدی
هئچ بیر، گؤر من گؤروندوم؟
شعریم تکین بولودلارا بوروندوم
شاخ قامتیم دار ایپیندن آسلاندی
دووارداکی سازین تئلی پاسلاندی.
***
آذربایجان ادبیاتی، تاریخی و اینجه صنعتی