قافلان، آذربایجان موسیقی سی ایله یاشاییب، بؤیویوبدور. زنگانا کؤچمه میشدن اؤنجه، اؤلکه میزین گؤرکملیب آشیغی "اوستاد ایمران حیدری" یانیندا "ساز" اؤیره نیب و همین ساز، شاعیری اؤز آنا توپراغینا وورغون ائدیبدیر و بو وورغونلوق سبب اولوب قافلان چوخلو شعرلرینده آشیق شعر فورماسینا علاقه بسله سین. بونو دا آرتیرماق لازیمدیر قافلانین آتاسی، گنج شاعیریمیزده بؤیوک ائتکی بوراخیبدیر. شاعیر دئمیشکن "آتام اوشاقلیقدان منه اؤیرتدی کی همیشه وطن قاشیسیندا هر وطن داشی نین اؤنونده "باش ایمک گره ک". آتام اؤزو ده هنردن بهره لی ایدی. موسیقی آلت لری دوزه لدر. همی ده رساملیقدا الی واردیر. قافلان تخلوصونو او منه بیه نمیشدیر".

شاعیر، ساز هاوالاریندا شعرلر یازیب، بلکه ده اوخوموشدور:

اویناقلایار اوره ک لر آذربایجان دئینده،

آل بزه نر دیلک لر آذربایجان دئینده.

***

اوخور بولبول اوخو یار عشقه یووا توخویار

گونش گول تک قوخویار آذربایجان دئینده.

***

تئله اینجی دوزولر بئلده ایپک بوزولر

کؤنلوم قوپوب اوزولر آذربایجان دئینده.

***

تئللی سازیم سازلانار شعر باغیم یازلانار

"قافلان" ائله نازلانار آذربایجان دئینده.

شاعیر، خالق ماهنی لاریندان، ائل ادبیاتیندان باجاردیقجا یارارلانیبدیر. خالق ماهنیلاری ایچینده "ساری بولبول" آدلانان شعره بیر بنزه تمه ده یازیبدیر:

قیش فصلیدی ناله ائله

گول هیجرینده زاری بولبول.

اوره ک تئلین وئره ر یئله

سن چالاندا سازی بولبول.

***

غم قالیران تایا – تایا

باشی قالخیب دئییر آیا؛

دار گونلری سایا – سایا

عؤمروم اولدو یاری بولبول.

***

آلوولودور آهیم منیم،

غم اولوبدور شاهیم منیم،

یوخ سینمده شاهیم منیم،

سه سله گلسین "یاری" بولبول!

***

"قافلان" تؤکر سوزلی یاشلار،

داغ دؤشوندن چایلار باشلار،

قار دا یاغسا یاتماز قوشلار،

قووار باغدان ساری بولبول.

شهریمیزین گنج شاعیری قافلان، آنادیلیمیزین اینجه لیک لریله تانیشدیر، بؤیوک باجاریقلا ایشه آپاریر. دوغرودان شهریمیز بئله بیر شاعیری قوجاغیندا بسله دیگینه گووه نه بیلر. اومید زنجان درگیسینی بیر ایلدن آرتیق گؤزه ل شعرلریله ایشیقلاندیریر. قافلان، آشیق شعری فورمالاریندا چوخلو شعر یازیبسا دا، ایندی سربست شعرلرده باجاریغینی گؤسترمکده دیر. قافلانین دویغوسو، مفکوره سی و یارادیجیلیغی شاعیرانه دیر. شوبهه سیز زنگانین آذربایجان ادبیاتینا نئچه ده یرلی بخش ائتدیگی شاعیرلردن بیرسی ده حتمن قافلان و اونون اثرلرینی سایماق اولار. گنج شاعیریمیزه نائلیت لر دیله ییب، گلن ساییلاردان شاعیرین سذبست شعرلریندن اؤرنک وئرمه گی سؤز وئریریک.

یاریم یاردیر، یاریم یارا؛

الینیزه آلدیغینیز کتابین عنوانی"یاریم یاردیر، یاریم یارا؛" . عنوان اؤزو گؤسته ریر کی بورادا ائله بیر اثریله اوز – اوزه گله جه ییک کی یاریسی سئوگی و یاردان صحبت، قالان یاریسی دا درد، کدر و غمدن دانیشاجاق. ایلک آددیمدا بیر دویغولو، دوشونجه لی شاعیرین اوره ک سؤزلرینی اوخوماغا حاضیرلانماق گره کیر. بئرادا دویغو قول – قاناد آچیر و شاعیرین خیال پریسی محبت یوردونو اوچوشو ایله گزیشیر و سئوگی ایله برابر دردلری ده تاپیر. آشاغیداکی بالاجا شعره دقت بویورون:

یاستسغسمدان؛

بو قاوزانان

یایلیم لار...

قویماییرلار

راحات یاتام گئجه لر.

اولمایا کی؛

ایچینده کی للک لر

گولله له نن کهلیک لردن

یولونوب!؟

بو بالاجا شعر، بوتون شاعیرانه گؤزه للیک لره مالیک دیر. بونو اوخودوقدا واز کئچمک مومکون دئییل. بیر بالاجا دایانیب، بیر ده اوخویورسان؛ داها آرتیق لذت دویورسان. یئنه اوخویورسان، بلکه اوره یینله ایچیرسن! بونا دئیر لر: - شعر!

بیلیرسینیز، شعریمیز زامانلا آددیملاشیب، آلچاق – اوجالاری گئریده قویوب و بوگون تجروبه لری الده ائده رک مئیدانا گلیبدیر. گنج شاعیریمیز ده، گنج یاشینا باخمایاراق، شعریمیزین ائنیش – یوققوشونا تانیشدیر. ائله بونا گؤره چالیشیر، چیرپینیر و نهایت الی دولو مئیدانا گلمک ایسته ییر و بیلیر کی شاعیر اولماق اوچون سئیر و سلوک ائتمه لی دیر. شاعیر ائله بونا گؤره کؤکسونده دؤیوش مئیدانی آچاراق، اوره یینی گئنیشلندیریر. بونون اوچون ده – یئنی دن یاراتماق ایسته یه رک – گئتمه گه معروض قالیر:

ایندی کی اؤزومده سیغماییر اوره ک،

گئدیرم یئنی دن یارانام گلم!

بیر دؤیوش مئیدانی آچام سینه مده،

یایلیم لی داعلاردا تالانام گلم

گئدیرم

گئدیرم

گئدیرم داها.

دوغرودان دا ، گنج شاعیر هر بیر شعرینده یئنی دن یارانیب و یئنی دوشونجه – دویغو دیله گتیریر و هر بیر شعرینده اجتماعی اولایلاردان ایلهام آلاراق، شاعیرانه دیل و استعاره لرله ایماژلارلا سؤزونو یئتیرمه یه چالیشیر؛ "آه...کؤکسوم بویو" شعری نین بیر یئرینده بئله دئییر:

هردن ده؛

بیر سؤیود – بیر یاشیل اورکستر –

اودا چکیلدی؛

قوقنوسلارین توی گئجه سینده

یانیق کرمی

چالینماق ایچین.

شعرین بو پارچاسیندا، شاعیرین موسیقی و شعر عالمینده باغلانان ایلگی لر گؤز اؤنونده جانلانیر. بیر "سؤیود"و "یاشیل اورکستر" آدلاندیراراق "ساز" آله تینی نظرده آلمیش و نه گؤزه ل ایماژلارلا شعر یاراتمیشدیر! بورادا من بیر تنقیدچی کیمی یوخ، بلکه بیر اوخوجو کیمی، شاعیره احسنت دئمه لی یم؛

چونکی شاعیرین ادبیات عالمینده احاطه سی گؤرونور. قوقنوس قوشونون اؤزه للیک لرینی نظرده توتاراق، "یانیق کرمی" نین چالینماسی آدامی حیسرتده قویور! شعرین سون پارچاسیندا بیر سونوجا چاتیب، دئییر:

سونرا دا؛

من

اؤز سونومدان

یایلیم لارلا

باشلاندیم...

سؤزو اوزاتمادان، بونو آرتیرمالییام کی شاعیرین هر شعرینده: شاعیرانه گؤزه للیک لر، ایماژلار، استعاره لر و گؤزه ل سؤزجوکلرلله اوز – اوزه گلیریک. هر شعرین بیر معنالی عنوانی واردیر و بو عنوانلار اؤزلری شعر کیمی اوره یه یاتیر. "تاختا دورنا" شعرینده، شاعیرین شاعیران باخیشینی گؤروب، خایال دونیاسییلا تانیش اولوروق. شاعیر دووارلارین دویغوسونو دویور، ماوی خایال لاری گزیشیر، دورنانی قانادیندان میخلانماغی گؤروب، گؤزه ل صورتده شعره چکیر. "اؤز دردیمین، یاری منم" شعرینده، شاعیرلری تانری اوولادی بیله رک، تسلی وئرمه یه چالیشیر و نهایت بو عبارتله:

قورشون دویغولو گؤزلر

للک لره قان قوسدورور....

یئتیم شاعیرلره تسلیت وئریر.

"حسین رزمی" جنابلاری "یایلیم" تخلوصونو سئچمیشدیر. یایلیم ین شعرلرینده هم "یار" ایله تانیش اولوروق، هم "یارا" ایله. یار ایله یارا بیر – بیریندن آیری اولمامیشدیر. شاعیر، "بیلیمسل" شعریمیزه آرخالاناراق، دایاق اولموشدور. شاعیر آشیق فئرمالاریندان باجاردیغی قده ر یارالانمیش، آنجاق بیر یئرده قالمامیشدیر، بلکه چالیشیر آشیق شعریندن یوکسه له رک، اونا یئنی لیک آرتیرمیش و دوغرودان دا باشاریلار گؤسترمیشدیر. شاعیریمیزین دونیاسی باغلی بیر دونیا دئییل، توپلوموزون دردلری، شاعیرین شعرینده دیله گلیر. نئجه اولا بیلر الینده ایشیق بایداسی اولان ییخیلان انسانین الیندن توتا بیلمییه ک؟

سولارین دورغون چاغی ایدی

سوکوت ایله قارانلیغین چالغیسی نین

اویغون،

موگولو گؤزلرین ده

یورغون.

کور کوچه نین قوخموش چلاسیندا

بیر بایدا ایشیق، الینده اولان قیزین

چؤکمه سینی گؤردوک

آمما؛

اللریندن توتماسینی

گوناه بیلدیک!

من، سؤزو چوخ اوزاتماق ایسته میرم، هابئله ایسته میرم اوخوجولاری بو گؤزه ل شعرلری اوخوماقدا انتظاردا قویام. دوشونجه لی شاعیریمیزه یئنی باشاریلار دیله ییب، ساغلاملیق آرزیلاییرام.