قوناقلیق

بیر داخما، اوچ دووار و بیر پالچیقلی تابان، اوچ قیسسا تخته قاپی اوچ دوواردا، بیر اوز – اوزه دیر، ایکیسی یانلاردا. اوتاق آراسیندا بؤیوک آغ سوفره آچیقدیر و سوفره ایچینده بؤیوک بیرق ارا علم یئره سانجیبلار. علمین چؤپونه بیر سالخیم اوزوم باغلاییبلار.

هر قاپی نین اؤنونده بیر کیشی دایانیب، دؤرد دؤشلو و یاشیل عمامه ایله. قاپی نین اؤنونده چوخلو جمعیت دایانیب و قاپینی آچماق ایستیرلر. بیرینجی قاراوول قاپییا دایانیب، قاپی نین آچیلماسینا مانع اولور. ایکی باشقا کیشی اونو تاماشا ائدیرلر.

بیرنجی کیشی، جمعتین گیرمه سی نین قارشیسینی آلاراق، قاپینی آزجا آچیر. جمعتین سس – کویو چوخالیر. بیر کیشی زورونان اؤزونو داخمایا سوخور. سئوینیر. دایانیر و داخمانین ایچینه دقتله باخیر، یاواش – یاواش ایره لی گلیر، سوفره یانیندا دایانیر، علم و اوزوم سالخیمینی گؤزدن کئچیریب، دیزی اوسته سوفره یانیندا اوتورور. اوزوم داناسین قوپاریر و یئییر. باشی آستا – آستا اگیلیر، بدنی ده اگیلیر، یئر اوزونده اوزانیر و اؤلور.

*** 

ساغ طرفده کی قاپی نین یانیندا دایانان آقا، قاپینی آچیر. دؤرد ملائکه آغ و تمیز قانادلاریلا گؤزه ل تابوت چیگینلرینده، موزون آددیملاریلا ایره لی گلیرلر، سوفره یانیندا دایانیرلار. تابوتی یئره قویورلار، اؤلونو قالدیریب تابوتا قویورلار. خوش بویالی بیر حریر تابوت اوزه رینه چکیرلر و قالخیرلار و ائله آددیملارلا ائشیگه گئدیرلر سانکی سئوینجدن اویناییرلار. ساغ طرفده کی قاپی باغلانیر.

***

جمعیت گوج گتیریر. بیرینجی آقا قاییدیب باخیر. امین گولور. قاپینی یاریمچیق آچیر. جمعیتین سس – کویو آرتیر؛ باشقا بیر کیشی اؤزونو ایچه رییه یئتیریر. سئوینجک و باشاریلی دیر. دایانیر، داخمانین ایچینی دقتله سوزور. یاواش – یاواش ایره لی گلیر، سوفره یانیندا دایانیر، علم و اوزوم سالخیمینی گؤزدن کئچیریب، دیزی اوسته سوفره یانیندا اوتورور. اوزوم داناسین قوپاریر و یئییر. باشی آستا – آستا اگیلیر، بدنی ده اگیلیر، یئر اوزونده اوزانیر و اؤلور.

***

سول طرفده کی قاپی اؤنونده دایانان کیشی قاپینی آچیر. ایکی گوجلو و یئککه کیشی ، توستولو قیافه ایله، یانیق قانادلاریلا ایچه ری گیریرلر. صبیرسیز اؤلونون قاباغینا گلیرلر. ایکیسی ده بیرگه اگیلیب، هر بیری اؤلونون بیر آیاغینی توتوب قالخیرلار، اؤلونو چکه – چکه آپاریرلار. ائله آددیملارلا ائشیگه چیخیرلار سانکی اؤلودن بتر کینه لی دیرلر. سول طرفین قاپیسی باغلانیر.

***

جمعیت گوج گتیریر. بیرینجی سید قاییدیب باخیر. امین گولور. قاپینی یاریمچیق آچیر. جمعیتین سس – کویو آرتیر؛ باشقا بیر کیشی اؤزونو ایچه رییه یئتیریر. سئوینجک و باشاریلی دیر. دایانیر، داخمانین ایچینی دقتله سوزور. یاواش – یاواش ایره لی گلیر، سوفره یانیندا دایانیر، علم و اوزوم سالخیمینی گؤزدن کئچیریب، دیزی اوسته سوفره یانیندا اوتورور. اوزوم داناسین قوپاریر و یئییر. باشی آستا – آستا اگیلیر، بدنی ده اگیلیر، یئر اوزونده اوزانیر و اؤلور.

***

ساغ طرفده کی قاپی نین یانیندا دایانان آقا، قاپینی آچیر. دؤرد ملائکه آغ و تمیز قانادلاریلا گؤزه ل تابوت چیگینلرینده، موزون آددیملاریلا ایره لی گلیرلر، سوفره یانیندا دایانیرلار. تابوتی یئره قویورلار، اؤلونو قالدیریب تابوتا قویورلار. خوش بویالی بیر حریر تابوت اوزه رینه چکیرلر و قالخیرلار و ائله آددیملارلا ائشیگه گئدیرلر سانکی سئوینجدن اویناییرلار. ساغ طرفده کی قاپی باغلانیر.

***

جمعیتین فشاری آرتیر. بیرینجی آقا قاییدیب باخیر و امین اولور. قاپینی یاریمچیق آچماق ایستیر. جمعیتین گوجو قویمور. بوتون هئیکلی ایله قاپییا دایانیر. جمعیت یورویور. قاپییا تنه وورورلار. قاپی بیرد نبیره آچیلیر و جمعیت تؤکولور داخمایا.

سوفره اورتاسینداکی علم، اوزوم سالخیمی ایله یئره گیریر. تکجه علمین پنجه سی سوفره نین اورتاسیندا قالیر. جمعیت یاواش – یاواش تعجوبله ایره لی گلیرلر، سوفره نین چئوره سینه توپلانیب باخیرلار. هامیسی بیرگه اگیلیب و سوفره اورتاسینداکی پنجه یه باخیرلار. مات آپارمیش بیر – بیرلرینه باخیرلار. هامیسی ساکیت دیرلر.

*** 

جمعیت توپلو.ملا قاییدیرلار، ساغ طرفده کی آقایا باخیرلار. سید اللرینی ایکی یانا آچیب باشینی ترپه دیر و اطلاعسیز اولدوغونو بیلدیریر.

جمعیت قاییدیرلار و بیرینجی سیده باخیرلار. بیرینجی سیر جمعیته دال چئویریب دووارا ساری دایانیر. سانکی گؤلمکده دیرلر کی چیگینلری تیتریر.

***

توپلوقلا قالخیرلار و قاییدیرلار و آستا آددیملارلا ائشیگه گئدیرلر.

***

جمعیت ائشیگه چیخدیغی زامان، قاپی باغلانیر و علم، اوزوم سالخیمی ایله یئردن چیخیر.

***