عباس بارز / م. کریمی

عباس اسلامي- بارز تخلوصو ايله 70 ايلدن آرتيق آذربايجان شعري و مدنيتي ايله چاليشاراق، ائل داياغي اولوب، ائلين سؤزلرين يازيب و ائليندن مدافعه ائديبدير. ائل قايغيسيني چكن ائل اوره‌يينده ده ياشايار. بوتون وارليغيني ائلين وارليغي بيليب، اؤزوندن ال چكيب، اؤزلويون تاپيب. منمليك يئرينه كيمليگيني آراييب. عباس بارز بئله بير شاعيريميزدير.

آذربايجان چاغداش مدنيتي باسيلماز بير قالاديركي هئچ توفان، سئل اونا صدمه- يئتيره بيلمه‌ييب و يئتيره بيلمه‌يهجكدير. بوقالاني آذربايجان ادبييات و مدنتيني يارادانلار، شاهليق رژيمي نين بوغونتولو و سيخيتي‌لي دؤورونده قورخماييب، سوسماييب و شعردن بير قالا تيكيبلر. بارز كيمي قهرمانلارين روحوندان جوشوب، قلملريندن داشيب گلن شعرلرله بو قالانين بينؤرهسي قورولوب و كرپيج لري دوزولوبدور.

عباس بارز بوتون عمرونون گوجونو، وار- يوخونو شعرينه حصر ائتميش و ياراديجيليغي ايله وطنيندن، ائليندن و ديليندن مدافعه ائديبدير.

عباس 1298جي ايلده اهرين بير آغاجليغيندا يئرلهشن آي پيرزن كندينده دنيايا گلدي. آتاسي قاراداغ عاليمي شيخ الاسلام ميرزا جعفر ايدي. بالاجا عباس اؤز روحاني آتاسيندان درس آليب و ديني – حوزهوي تحصيليني داوام ائدير. 16 ياشيندا اولاندان آنا ديلينده شعر قوشماغا باشلايير. مالاريا ادارهسينده ايشله‌يه‌رك، سونرالار 1340 دان 1370 ايلينه قدر معلمليك ائتميش و بوايلده تقاعد اولموش دور. اونون ايلك شعر كتابي «ائل داغينا سلام» شهريارين «حيدر بابا سلام» اثرينه بنزه‌تمه اولاراق 1333 جوايلده يازيلير سادا 1346 جي ايلده چاپ اولوب ياييلير^{^[1]}. 1350 ايللرينده اونون نئچه- نئچه بالاجا شعر دفتري ياييلاراق، 1355 جي ايلده «ياسلي ساوالان»، شعري ديللره دوشور و «عباس بارز» آدي آذربايجان خالق شاعري كيمي تانينير. اونون شئعرلري كاسئتلره توتولور، موسيقي بستهلهنير و آغيزلاردا اوخونور. 1357 جي ايلده «قيزيل قوش» آديندا كتابي فرامرز هاشمي و قهرمان خطيبي شعرلريله بيرليكده باسيلير^{^[2]}. 1379 دا «ياسلي ساوالان»^{^[3]} كتابي 316 صفحه ده 332 شعريني احتوا ائدهرك چاپدان بوراخيلير. 1382 جي ايلده شاعرين 85 ايلليك تؤرهني تبريزده ثبوتا يئتيرميشديركي شاعر خالقين دير و بو يوكسك مقامي- اونون- بونون مدحينده شعر دئمكله اوجوز الدن وئرهن شاعر دئييلدير.

عباس بارز بوگون بوتون آذربايجاندا و ايران مرزلريندن اوتايدا تانينميش بير شاعردير، اورالاردا دا اونون شعري ديللر ازبري اولاراق، اونون شعري آراشديريلير و اونون حقينده مقالهلر گئدير. عباس بارزين صميمي شعرلري، وطن دوشونجهسي، طبيعته باغليليغي، آناديلينه سؤنمز محبتي، كئچهجهييميزده و كولتوروموزه باغلي‌ليغي ايله اونو ياسلي ساوالان كيمي آذربايجانليلارين اوره يينده يئرساليبدير. او، ملي حركتلري جانلانديرماغي اوچون، آناديلينه وخالقينا سونسوز محبتيني گؤستريك اوچون، يوردونون داغلاري، چايلاري، بيتگيلريندن توتدو گؤيلرينين قوشلارينا قدر اوره‌كدن سايغي گؤسترديگينه گؤره و يازديغي اثرلرينه گؤره بير ائل شاعري و ملي بير شخصيت‌كيمي تانينير^{^[4]}. شاعر دؤرونون كئچيرتدگي حادثيه لرينه بؤيوك مهارتله ياناشير، قارانليق گئجه ده ائلي‌نين باشينا گلن فلاكتي«گئجهلر» رديفلي شعرينده اؤز ديليجه تصويره آلير. اونون وطن آدينا يازديغي شعرلرين باشقا بيردادي واردير. شاعير بير دئمير، اون دئمير، بلكه وطن آدينا يوزلرجه قوشما قوشوب، يئنه ده دويمور و كتابيندا هر نهدن آرتيق وطن موضوعسونا يئر وئرميشدير.

شهريار،حيدربابا يا سلام شعري ايله بير قاليب و بير سبك ياراتدي و بو قاليبي و سبكي يوزلرجه شاعريميز منيمسهييب ايشه آپارديلار. بونلارين اؤنونده عباس بارز گئدير. او دا بير عمر ائل داياغي و ساري‌داش داغلاريلا ياخين اولفتي و توكنمز ايلگيسي اولدوغو اوچون، شاعرين سيرداشي و مهربان همدمي كيمي اولور و شاعيراونو خيطاب ائده رك تاريخي واراقلايير و بوگونون درديني اونونلا اورتايا قويور. بارز، بير دوزگون تاريخ يازان كيمي كئچن قادالي گونلري و بوگونون دورومونو داغلا آرايا قويوب، ايرتيجا، ايستيبداد و امپرياليزمين داياغي و مدافعهچيسي اولان شاهين «ثُبات آداسي»، «اولو جنت» دئيه اؤلكه‌ني جنت كيمي جيلوه لنديرمك ادعاسي اولان ايللرده، شاعر اونون عكسينه اولاراق، همين اؤلكه‌ده كؤك سالان ساوادسيزليغي، موهوماتي، جهالتي، گئريليگي ايفشا ائديردي^{^[5]}. او، كندلرين نئچه قات ظلم آلتيندا مادي چتينليگين سويون جهنمينده ياشاديغيني شاهد اولوب، بؤيوك اوره‌ك آغريسي ايله يازديردي:

قيش گلدي يئنه قالديلار آواره كاسيبلار

آللاه بو قارا گونلو بو بيچاره كاسيبلار.

***

بير كؤهنه پالاز پارچاسي تاپمير ائوه سالسين

پول يوخ، نه ايلن كورسونو قورسون، كومور آلسين؟

پالتار تؤكوب شاختادا عوريان نئجه قالسين؟

ايندي بوگؤزو ياشلي، گونو قاره كاسيبلار

قيش گلدي، يئنه قالديلار آواره كاسيبلار.^{^[6]}

***

بوشئعر، ايراني بهشت كيمي قلمه وئرمك ايسته‌ين تبليغ شعارلارينين و ساتين آلميش بورژوا مطبوعاتينين دنيادا يالان و بُهتان توزاناغي قالديرديغي بير زماندا يازيلميشدير:

از بس كي چؤره‌كسيزليك ائديب خالقي هراسان

جوتلر آچيلير، جوتچو اولور ديده سي گريان

كندلرده بو ساعت بالالار آغلير آجيندان

بيليم نه ائديب گردش دؤورانه اكينجي؟

گؤردوم سني گلديم يئنه افغانه اكينجي.^{^[7]}

جامعه‌ده كي عدالتسيزلييه بئله اعتراض ائدهن بارز، ياراديجيلغينين اساس ثقلتي مبارزه و افشا موتيولري دير. او، بونلارلا ياناشي، كاسب خالقيندا اولان گؤزهلليكلري ده اورهك چيرپينتي لارينا هيجان، كدر و حسرت هوپدوروب اوخوجويا چاتديرا بيلير. استبدادين حاكيم اولدوغو و هر شئيي يالان اوستونده قورولموش جامعهده سئوگي‌نين اوزو كدر، غم و برابرسيزليك نغمهلريله موشايعت اولونور. شاعرله قونشولوقدا اولان «ائل داياغي»داغي نين شيش و سرت قايالاري، يام ياشيل اتكلري اونون الهام قوشونون يوواسي اولور. بارز، بو داغي گؤزلرينده كیپريكلري اوجوندا، اورهيينين باشيندا ائوه گتيرير، گاهدان اونو اؤز عالمينده كؤرپه اوشاق كيمي بَلَكلهيير، قوينوندا ياتيرير، عطريندن تبريزه آپارير، گاهدان اؤزو بير اوشاق اولوب، مغرور داغين اتكلرينده الهام آتينا مينيب، دؤرد طرفه چاپماقدان يورولمور. ائل داياغي شاعرين عنادكار، اينجيك ايلهامي نين بئشيگي و حيدر بابانين ادبي و ابدي قارداشي اولاراق، شاعر اونا خطاب ائدهرك دردلريندن، دويغولاريندا، گؤردوكلريندن و بيلديكلريندن صحبت آچير و حتا اؤزونون دارا چكيلمهسيله عيبرت آلان اولورسا، شاعر بونا راضيدير:

كاش بو فلك بير دايانيب دورايدي

عدالتين قورقوسونو قورايدي

لاپ قاباقجا مني دارا وورايدي

باخان گؤزلر باخيب عيبرت ائدئيدي

اوندان سونرا دوز يولونان گئدئيدي.^{^[8]}

بارزين ياراديجيليغي چوخ چئشيدلي، الوان و بوياليدير. عيني حالدا غزل، قوشما، گرايلي- عروض و هيجالي شعر فورمالاريندا شعرلري واردير. غزلده اولان باجاريغي تايسيزدير، قوزئيده علي آقا واحيد غزل شاعريديرسه، گونئي آذربايجانين غزل شاعري ده عباس بارزدير^{^[9]}. غزل ائله بير شعر فورماسيديركي عشقه حصراولونور.آنجاق عباس بارز غزلي عشق ايله باشلاسادا، اجتماعي موضوعلاري اونا ياپيشديريب، اونونلا قورتارير:

هردم كي دئديم اول منيله بير گئجه همدم

مندن اؤزونو مين گئجه پنهان ائلهدين، گئت.

داغ تك دايانان كؤنلومو داغلار قاباغيندا

بير گونده ييخيب خاك ايله يكسان ائلهدين، گئت.

گؤردون كي ضعيفم آياغين باشيما قويدون

ييخدين اوزوم اوسته يئره، نالان ائلهدين،گئت.

ظالم فئوداللار كيمي اي قوللاري گوجلو

سن ده مني ظلمونله هراسان ائلهدين، گئت.

خان نوكري كندلرده ائدهن جور و جفاني

سالدين ياديما صبريمي تالان ائلهدين، گئت.^{^[10]}

غزلده قاراداغين كلاسيك- گؤركملي شاعري ابوالقاسم نباتينين يولونو داوام ائتديرهن عباس باريز اؤزشاعرليك رسالَتيني غزل فورماسيندا دا ياراداراق آلني آچيق و اوزو آغ اولموشدور:

خالقيميزا اوندا بيزيم ياسدان چيخار، بايرام ائدهر

كي حقيقت گون كيمي اؤز وارليغين اعلام ائدهر.

صولح بايراغين آلار ايمان اليله چيگنينه

قان تؤكنلر گوندوزون بيرليك اليله شام ائدهر.

نه ياغار گؤيده‌ن يئره بومبا، نه ائو آلت – اوست اولار

نه ووروب، اؤلدور دييه ن جاني، خيال خام ائدهر.

قارداشي اؤلدوتدوروب قارداش اليله تؤكمه قان

كي بو قان تؤكمك سني دنيا قدر بدنام ائدهر.^{^[11]}

گؤردويوموز كيمي عباس بارز اورهيي سؤزله دولو، قلمي آخيجي بير شاعردير. بئله اولماسايدي شعرلري جوشقون بولاقلاركيمي آخمازدي. او ائل ايله ياشاييب، ائل ابله برابر آدديملايير. او ائلدن آيريلمايان شاعر اولاراق، شعرلري ده ائللر آراسيندا ياشايير. او بوتون صراحتله وطن- وطن سؤيله‌يير:

جيسميمده منيم تاب و توانيم وطنيمدير

قانيم- ايلي ييم، روح روانيم وطنيمدير.

آرزيم، ديله ييم كعبة آمال و اوميديم

شانيم، شرفيم نام و نشانيم وطنيمدير.

قورباندي وطن تورپاغينا باش ايله جانيم

بوجان ايشه گلمز، منه جانيم وطنيمدير.

بير لحظه وطنسيز دؤزه بيلمز دل زاريم

كؤنلوم قوشونا طُرفه مكانيم وطنيمدير.^{^[12]}

باريز او چون 1382 جي ايلده عزيزلهمه تؤرهني قورولدو، آنجاق شاعر اورادا اشتراك ائتمهدي. بونون نه دنيني بئله سؤيلور: «منيم سكسن بئش ايل رنگسیز و بزه‌كسيز ياشاييشيمدا هئچ بير قدرت طرفيندن عزيزلنمهديگيمه گؤره بو به اصطلاح نكوداشتي دا اؤز ياشاييشيملا اويغون گؤرمهديم و بيرده ايش قاباغا گئتديكجه بير عدّهنين سياسي آماجلار داليندا اولماغيني باشا دوشدوم و اونون اوچون بو تؤرهنده اشتراك ائتمهديگيمي خالقيميزين و اؤزومون صلاحينا گؤرمه‌ديم^{^[13]}». «قاراداغ» درگيسيله دانيشيقلا سؤيلهين بوسؤزلرين آرديجا، بو سورغايا: شعر سياستله نه ايلگيسي وار؟ بئله جواب وئرير: «منيم عقيدهمه تمام هُنرلر و اؤزهلليكله شعر، خالقينان واسيطهسيز ايلگي قوردوغونا گؤره هر حالدا سياستيله ايلگيسي وار. يازيلي تاريخلري اوخوياندا گؤروروك كي نه چوخ شاعرلر، حاكميت طرفيندن دوستاقلانير، اؤلدورولور و نه چوخ شاعركي حاكملري ياخجي تعريفلهديگينه گؤره اونلارين طرفيندن عزيزلهنير. دئمهلييم هميشه سياستچيلر و قدرت صاحبلري چاليشيبلار شئعردن اؤز نفعلرينه فايدالانسينلار و بوگونو دنياميزدا سياسي بيلگيلرده تبليغاتين اؤنملي يئري اولدوغونا گؤره بو ايكي موضوع داها آرتيق بير- بيرينه باغلي دير.»^{^[14]}

قوجومان شاعيريميز، ايندي 30 ايلدن آرتيقديركي ياسلي ساوالان شئعريله ديللره دوشوب، جوان – قوجا، كندلي – شهرلي، عباس بارزي بير ملي شاعركيمي تانيير. ياسلي ساوالان، سانكي خالقيميزين و ائليميزين بوتون تاريخيني، وارليغيني، درديني- كدريني بير يئرده توپلاييب سؤيلهيير. شاعرين بورادا هر زادين اليندن آلميشلار، آنجاق، او سوسماييب، وارليغيني گؤسترمهليدير. بلكه ساوالان داغي اونون تاريخيني يادداشيندا ساخلاميش و بوگون شاعريميز بوتون تاريخين آغيرليغيني اونونلا پايلاشماق ايستهيير. آذربايجان نين ميللي- تاريخي دوروملارين بوگونكو اولايلارين و توپلومسال پسيكولوگيسي ايله اويقونسوزلوغو، توپلومسال شاعرلري حماسهلي و ائپيك روايتلره ساري ايتهلير و اوسطورهلر ياراتماق تراژيك روايتلري شعرده چولقاييب اؤز سارسيلماز روحونو تسكين وئرير. بوشيوه بلكه ده توپلومسال رومانتيزم آدلانا بيلير. آذربايجان چاغداش شعري بئله بير دورومدادير. شاعر داغلارلا، طبيعتين بؤيوك آبيدهلريله، حتا يازيجي آبيدهلريله سؤزو- صؤحبتي بئله بير دورومدان يارانير. اوروپانين رومانتيزيمي توپلومسال اولايلاردان فارغ اولاراق ايچهري دنيا ايله يارانيرسا، آذربايجان شعرينده بو رومانتيزم، توپلومسال اولاي‌لارلا قورولور و بئله ليكله فلسفي- اجتماعي دنيا گؤروشو يارانير. بيز بو حركتي ياسلي ساوالان شعرينده بوتونلويو ايله- كيچيك بير شعرده گؤروروك. شاعر بوشعريني 11 بندده و هر بند 5 مصرع اولاراق ياراديبدير. ايلك اؤنجه، بورادا- شنليك و كدر، آلچاق- اوجاليقلا گؤزهلليكلريني اورتايا قويور و بير بوتوو تراژدي شعره حاكم دير:

هر زمان باخيرام باشينا قار وار گؤرورم،

اوغلو اؤلموش آنا تك گؤزلرين آغلار گؤرورم.

ايكينجي بندده، ياواش- ياواش گئجهجهيه دؤنور و بئله سؤيلور:

سالارام ياديما بير لحظه او كئچمشلريوي،

ايزلرم بير- بير او حيرت يارادان ايشلريوي،

6 جي بندده، ساوالان- وطن سيمگهسي تك غرورلا اورتايا گلير و بير پارالاق گونش كيمي، قارا بولوتلار آراسيندان چيخير:

ساكت اول، آغلاما، قوي بيرجه چكيلسين بو دومان

گون چيخيب ظولمتي بير يوللوغا قووسون بورادان.

8 و9 جي بندلرده بو گونشين غرورلو اورتادا دايانماسينا شاهد اولوروق:

بابكين گئتديسه بوش قالمادي آمما قوجاغين

دولودور مين ائله اوغلانلاريلا هر بو جاغين

نه قدر يئل اسه – توفان قوپا، سؤنمز اوجاغين،

و نهايت 11 جي بندده پارلايان گونش، ساوالانين زيروهسينده دايانيب و شاعر اينانيركي بوگونش ابدي ياناجاقدير:

بابالاردان بيزه قالميش بو مثل هامّي بيلر

سوگلن آرخا دئييب يئنه بير گون سوگلر!^{^[15]}

«ياسلي ساوالان» شعريني شاعر، 1355 جي ايلده تبريزده قورولان شعر آخشامي شاعرلر مجلسي و آذربايجان موسقي كونسئرتلريندن بير اتمسفر ائتكيسي آلتيندا سؤيلهميش و بلكه ده شاعرين شاه اثري دير:

ياسلي ساوالان

هر زامانكي باخيرام باشينا قاروار گؤرورم

اوغلو اؤلموش آنا تك گؤزلرين آغلار گؤرورم

هر طرفدن چكيليب سينه وه داغلار گؤرورم

آي آلان اوستونو غم چيسگيني، هر ياني دومان