انسان/ دیل/ آنا دیلی - سوسن نواده‌رضی
آنا دیلینده دانیشمایان‌لارین روحو دوستاق، وارلیغی بیلینمز، کیملیگی تانیماز قالار.
مدرن انسانین جسارتی، بیلیم (علم) قامچیسی ایله بوتون بشریت تاریخینی آیاغا قالدیرار، دیل آچدیرار، دانیشماغا مجبور ائدر. هر بیر هیروگلیف لؤوحه‌سی، یا میخی لؤوحه‌لر انسانین درین باخیش‌لاری و کسین ایسته‌یی گوجویله دانیشمالی، گیزلرینی (رازها) آشکارا چیخارتمالی‌دیرلار. او، داش- قایا تیکه‌لرینده، یا خیریم- خیردا کاغیذ پارچالاریندا یازیلان هر بیر اونودولموش دیلی اوخویوب، سیرلارینی آچمالی‌دیر. اونون اؤنونده آغزی مؤهورلو هئچ بیر شئی قالمامالی‌دیر، چونکو او، گیزلری آچان، سیرلاری ایشیغا چیخاردان انسان‌دیر.
دیل، معظم بیر بینا، تاریخسل بیر اولقودور. بیلینجلی (شعورلو) انسانین دیله اولان آراشدیریجی، ده‌یرلندیریجی و قورویوجو باخیشی، بیلینجسیز انسانین اورکک و هراسان باخیشی ایله فرقله‌نر، چونکو دیلینی قورومایان، دونیاسینی ایتیرر.
آنا دیلی، انسانین مدنی ژئنی دئمک‌دیر. بو ژئن، چوخ قدیم‌لردن، بؤیوک- بؤیوک آتا-آنالاردان گلمه‌دیر. انسان، هله آنا قارنیندا ایکن، بوتون قانی و جانی‌ایله بو وارلیغی تانیر، اؤیره‌شیر، آلیشیر و منیمسه‌ییر.
دانیشماق، سس ایله دوشونمک‌دیر. انسان دوشوندویونده، سس‌سیزجه اؤزو ایله دانیشیر دئمک. باشقا تهر دئمک ایسته‌سم، آغیز آچیب دانیشدیغیمیزدا، سسلی اولاراق دوشونوروک.
آنا دیلینده دانیشاندا، دیل و دوشونجه آراسیندا دولایی‌سیز (مستقیم) بیر باغلانتی یارانیر. داها دوغروسو، اورک، دیل و دوشونجه آراسیندا ایچ- ایچه ایلیشگی‌لر اولوشور. چونکو آنا دیلی، یاشادیقلاریمیزی، دنه‌دیکلریمیزی (تجربه‌ها)، سینادیقلاریمیزی، دویدوقلاریمیزی... بَلله‌ییمیز (ذهنیمیز) و تینیمیزده (روحوموزدا) جانلاندیریر. هر بیر سؤزجوک ایله، درین دویغولار یاشاییب، سئوینیریک، دؤیونوروک، اؤیونوروک، قایغیلانیریق، دؤزومسوزلشیریک یا دا دؤزوروک... سونرا، کؤنلوموزده، بئینیمیزده یوغرولان سؤزلر جانلانینجا، دیله‌دیکلریمیزی دیله گتیریب، بوتون دویوب- دوشوندوکلریمیزی باشقالارینا آنلادیریق. دئمه‌لی، آنا دیلینده دانیشاندا، اورک، دوشونجه و دیل آراسیندا، انسانین طبیعته بوسبوتون اویغون اولان اوچلو (سه‌گانه) بیر مکانیزم اولوشور.
بو اوزدن ایسه، آنا دیلی انسانین ایچ دونیاسینی آچان، انسانلیغین گرچه‌یینی سرگی‌له‌ین بیر آناآچار دیر. آنا دیلینده دانیشمایان‌لارین روحو دوستاق، وارلیغی بیلینمز، کیملیگی تانیماز قالار.
آذربایجان ادبیاتی، تاریخی و اینجه صنعتی