خانیم سوسن شیرکوبی بوگون زنگان تورکجه ادبی ییغینجاقلاریندا، شاعیرلر جرگه­ سینده باشدا اوتوران قادین شاعیرلردن­دیر. او اصلینده تبریزلی ­دیر و تبریزین گؤزل دانیشیق شیوه ­سینی ده حفظ ائتمیشدیر. شیرکوبی 19 یاشیندان تبریزدن چیخمیش و بیر زامان موغاندا یاشایاندان سونرا 1379جو ایلده زنگاندا ساکینله­ شیر و ادبی ییغینجاقلاردا اشتراک ائدیر. دبیرستان دؤوروندن قلم اله آلمیش، آنجاق تورکجه شعر یازماغی 80جی ایللردن باشلامیشدیر. بیر بالاجا شعریله سؤزه باشلاییرام:

اورمو گُولو دولدو

منله ، سنین گوز یاشلاری لا

اورمو گولو دولدو

باجی ، قارداشلاریمین

قان یاشلارییلا

اورمو گولو ، گوی دییل

قیرمیزی دیر ، قان بویالی دیر

 ***

باشقا بیر شعر:

باراما باغلامیشیدیق

اوچماق ایچین

کپنکلنیریدیک

یاشام ایچین

بارامانی یاردیق

قانادلاریمیز آچیلمامیش

چامیرا دوشدوک

قیزیل ، آلا قانادلاریمیز

قیریلمیش

پوزولموش

جانیمیز اوزولموش

داریسقانلیغا دوشدوک

***

یئنه باشقا بیر شعر:

من بیر سسم

قاندالا دوشموش

کوچه نین هاراییندا

عصیر لر ائشیدیلمیش

نغمه لر ،لای لالار

اوخونور منده

کورپه لر ، بالالار

دینله نیر منده

من تومروسون

من هجرین یارالی سسیم

نیگارین دیلینده

کوراوغلیا اوخوموش

نغمه سیم .....

 

ائشیت منی

یاشات منی

***

گونشی اوغورایاجاغام

صاباح گلنده سوسگه لییم ساچلاریما

اولدوزو ساچام اوره ییمه

دنیزی دوادورام گؤزلریمه

باخاندا گؤزلریم ماوی لنسین

اوره ییم محبت شافاغی پارلاسین

ساچلاریم بوغدالانسین

سئوگی حیاتیمدا چیپچالانسین

اومود گله جه ییمده دالغالانسین

   خانیم شیرکوبی موغاندا یاشادیغی ایللر، بو گؤزل طبیعتلی وطنیمیزله برابر اورادا ترنم اولونان شن نغمه لر و ماهنی­لارلا عؤمور کئچیریب و گؤزل نغمه ­لری زمزمه ائده ­رک او لطافت و یوموشاقلیغی جانینا آلیب و بوگون او گؤزه ­للیک­لری شعرلرینه سپه ­له ­ییر. شیرکوبی اوشاقلارا درین محبتی نی اونلارا یازدیغی شعرلرینده گؤسته­ ریر. اوشاق شعری سؤیله ­مک اونون شاعیرلیک یارادیجیلیغیندا اؤز یئری واردیر. اوشاق شعرلریندن بیر اؤزنک:

منیم قوزوم بیردانا

ال آیاقی قاپ قارا

آناسیندان سوت امیر

کلله ورور،باش اییر

اونون توکو فئرفئری

یونو قارا، گؤن دری

دئدیم قوزو آی قوزو

بیلین سیزده بو سوزو

امیب سوت بویویرسن

یونون بیزه وئررسن؟

یونو وئررم جهریه

اونو اییره خان ننه

سونرا بویار قئرمئزی

جوراب توخور عم قیزی.

*** 

گویده غازلار قاقیلدیر

یئرده سولار شاپبلدیر

آچ قانادین گوزل غاز

گویده اوچان سرو ناز

اوچوب گئدیر هریانا

قونوب گلیر هر داما

کاش منده غاز اولیدیم

گوزل آواز اولیدیم

 ***

   آنجاق اوشاقلارین نئجه شن یاشامالارینا چالیشیر، انسانلارین دا شن اولدوقلارینی دیله­ ییر و بؤیوک انسانلارین دا چالیب اویناماقلارینی آرزیلاییر و اونلارین دا اوینامالارینی بگه­ نیر:

ساچلاری  شلاله­لیم

آماجلاریما جان

دیلک­لریمه ایلهام

اوینا  اوینا،

من سنده­یم

بیر آیاقین دالی، بیر آیاق قاباق

بیرده فریلدان ،گینه ده دولان

 جیران تک دولان

دونیانی حیران ائت،

شن نغمه­سیله، قوللاروی اویناد

باشین بیر یاننی

غمزه ­لی متانتلی، دونیانی حیران ائت

دونیانی حیران ائت

***

    بونو اونوتماییرام کی شیرکوبی توپلومدا اولان یانلیش حرکت­لردن سؤیله ­مه ­یی اونوتماییر. بیر سیرا گؤزه ­للیک­لرین ساختا اولدوغو، بزک – دوزکله اورتایا دوشن­لری و سئرچه ­نی بولبول بزه­ ییب انسانلاری آلداتمانی پئشه ائدنلری ده تنقید ائدیر. شیرکوبی ­نین داها باشاریلار گؤسترمه ­یینی و شعریمیزده یئنی جیغیرلار آچدیغینی گؤزله­ ییریک.

***