40

زهرا رضایی

   زنگان شاعیرلری آراسیندا قادین شاعیرلریمیزین سایی آز اولمامیشدیر. بو شاعیرلرین ایچینده زهرا رضایی خانیم بو نئچه ایلرده چوخ فعال صورتده چالیشیر و شعرلری آلقیشلارلا اوز – اوزه گلیر. بو آلقیشلار رضایی خانیمین شعرلرینین اوره یه یاتان پاک و صمیمی دویغولار و یوکسک فیکیرلردن یارانیر. شاعیریمیزین مهارتی ده بو اوره یه یاتمالارا یول وئریر و گونو – گوندن داها آرتیق اورکلرده یئر آچیر.

حیات ایلگی لریمی قیریب.
آز گتیردیگیم یئرلرده،
شیریخ شیریخ پارچالاری
ناخیش ناخیش
یاماقلادیم.
گاهدان دیرناق لاریما ایلیشه ن ناخیش لار،
گاهدان ساپی چکیله ن.
گاهدان سا،
آرزیلاریمی تیکیرم ناخیشلارا
حیات قیران ایلگی لریمی
پارچا پارچا یاماقلایام.

   دانسو تخلوصونو اؤز شعر آدی سئچن شاعیریمیزده اجتماعی دوشونجه لر دیله گلمکده و هرگون یئنی قالیبلرده بیان ائدیلمکده دیر. اونون شاعیرانه دیلی اوخوجونو اؤزونه چکیر و شعری دقت لری جلب ائدیر:

انا یوردوم

 

بیر سس وار
های­سیز، حزین
بیچیلمیش بوغازدان سوزولور دئمه،
لال دیلدن،
یورغون دوداقلاردان،
دیشله­نه – دیشله­نه بیر سس گلیر،
قیریق قیریق..
بؤلوم بؤلوم..
پارا پارا..

هیسسسسسس
سینمده زوققوللویان دردلر
اؤلوم یاتاغینا آپاریر
و اوستومه بیر اووج توپراق
تاق..
تاق..
کیمدی اؤلوم داشیما داش چالیر!؟
چکیر سکوت صحیفه­سینه های - هارای داغی


داریخدیریر بو داریسقال یووام دئمه
آپار آپار منی زرین ورق لره
بیر شاعیرم کی وطن سیز وطنلی یم
بیر سس..
حزین،
بوغاز،
لال،
دوداق،
دیسکیندیریر منی اؤز آنلامیم و سن..
یات یات منیم یئریمده باخ منه، باخ شاعیره..
دئنه ن:
بوردا وطن­سئون
وطنین حسرتین چکه­ن
شاعیر قالارغی­دیر
دئنه: شاعیر اؤلر مگر?!....

  دانسو 1351جی ایلین خورداد آییندا زنگاندا آنادان اولدو. تحصیلینی بیتیریب، عائیله صاحیبی اولوب و بیر ایگید اوغلو وار؛ شهریمیزین مختلف درنک لرینده او جماه دن: مهرانه، قیزیل اوزن، اشراق و هنرمندان زن زنجان دا اویه اولاراق 93جو ایلدن تورکجه شعر و ادبیاتا ماراقلانیب و قلم اله آلاراق چالیشیر. عئینی حالدا فولکلور توپلامادا چالیشیر. بو ایل تهرانین کتاب سرگیسینده ایلک کتابی اولان صنک عنوانلی زنگان ناغیللاریندان توپلادیغی اثر یاییلدی. بو کتابدا آقای مصطفا رزاقی ایله ایش بیرلیک ائتمیشدیر. اینانیرام کی بو تئزلیکده بو اینجه دویغولو، درین دوشونجه لی شاعیره میزین شعر دفتری ده چاپ اولوب ایشیغا چیخاجاقدیر. شاعیرین دویغولاری دا شیرین و گؤزلدیر. او اجتکاعی دویغولار بیر طرفده، اؤز دویغولارینی دا شعر قالیبلارینا تؤکور و اینجه دویغولو شعرلر یارادیر:

دنیز قیراغینداکی قوملار اوستونده آدینی یازدیم.
دالغالار، شپه لر
آدینی گؤتوروب، دنیزه قاچدی.

شوشه­نین (جامین) باغرینا آدینی یازدیم.
شوشه­نی تر باسیب
آدینی اریتدی.

آدینی داغلارا پیچیلداییردیم،
یئل قاپیب آدینی، گؤزومدن ایتدی

آدینی دیلیمه!!
یوخ گتیرمه­رم !!

آدینی
آدینی
سالدیم اوره­گه..
دؤیوندو، دؤیوندو
ساخلادی سنی..

اورکدن اورگه یول اولار دئمه
آدینی اؤزونه قایتاریم بلکه...

***

باشقا بیر شعری:

خیالیمدا ساچ­لارینی هؤرورم.

تئل گولو یئرینه،

 شعر سوسله­ییرم باشینا.

بلکه;

یئله تاپشیردیغین ساچ­لارین عطری،

سئوگیلی­لری سئویندیریب،

سئوگی­­سیزلرینی  آییخدیرا.

                        سنه سئویلمک یاراشیر.

***

   دانسونون شعرلرینده توپلومسال قونولار چوخدور. او دردسیز یاشامامیش، زحمتله یاشایان بیر شاعیر ده دردلی­لرین دردینه تانیش اولار. شعرلرینده دالغالانان اجتماعی قونولار چوخلوق قازانیر. بو نوع شعرلریندن بیر نمونه:

اوجا بیر سس بئینیمی یئییر

جیبی بوش یورقون آتالارین سسی

اوجاقدا، بوش قاینایان چولمک

جان­سیز اوشاقلارین آغلاماسی

ایچی بوش سس­لر

فایداسیز،

ایزسیز.

 

میلیون میلیون تریبون­لاردا عدالت ساتیلیر!!!

جنت­لرده ائو

قدح­لرده چاخیر

قوجاقلاردا هوس

و آلماق ایستمیَن­لره!! طنف، چاتی. . .

بئله دونیادان آجیغیم گلیر

نه اوجاغیمدا چولمک قاینایا بیلیر

نه عدالتی اله گتیرمک اولور. . .

   دانسونون شعر دونیاسیلا داها آرتیق تانیش اولماق اوچون، نئچه شعرینی گتیریرم:

اوزومه چکیلَن اوزلوک­لری آچیرام

ایپک دوستاغیندان اوچوشان کپنک­لر کیمی

قاناد قاناد، چیچک­لره قاتیلیرام

گئدن اسین­لره سیرداش

گله­ن عطیرلره یولداش

و باغریما گوللر دولور گؤزللیک­له.

نه بیر ایپک­لی قاندالا سیغدیم نه اوزلوگه سیغانام

منیم آدیم یاشیل احساس­دی، عنوانیم سئودا.

***

 

آغاجلار جانیندا یارا وار

خاطیره ایزلری

سئوگی دن

آیریلیق دان.

اورگیمده کی آه لار کیمی

سایقی سیز

 درین

خاطیره لرین چوخ...

***

حالیم نه گؤزل دی..

اوتاغیمین دووارلاری دا منی باغرلارینا باسیرلار

توزلارینی آلاندا

آتوشگه نین اورگی آچیلماغا تله سیر

گوللرین دوداغی ایواندا قاچیر

یئل ساچلاریمین عطیرلرینی گؤیلره پایلیر

گونش منی گؤرمگه تامارزی دوشور

بایرام سیفراسینی کینه­سیزلیک هاواسینا سریرم

سنین آدین ایله ایل دولانیر..

 ***

بایرام گونلری

"سین"لر دوزولمکده،

سئل "سین"لری گؤتوروب گئدیر.

بیر سن قالیرسان

بیر حزین سس..

قایغی دنیزینه چئوریلیر اؤلکه

آق قالا دا، قارا گونلر.

گونش باتی­دان دوغویا قالخمالی­دی،

قارانلیقی سؤکمگه.

***

هر گون بویاقچی­لاردا توی وار

ساری

قیرمیزی

نارینجی

مورگولو

یاشیل باغلاردا گلین چیخیرلار

یئل­لر ماهنی­سی ایله اویناییرلار

من ده بو تویدا..

قاشیق چالیرام

چپیک چالیرام

فیشقا چالیرام

بویانیرام

اویانیرام

اویانیرام

اویانیرام

***

قیزارمیش کؤمور

ایستی کورسی

داغ چای

و بیر اووج یئمیش..

زامان الدن چیخان کیمی گونلر سووشور.

تکجه سندن قالان خاطیره­لر

اتاقداکی گیزلی اؤپوش کیمی

شوشه­ده،

اوتانقاج شکیلیم ترله­ییر..

ترله­ییر، ترله­ییر

و ایندی ده ایللردی تر آپاریر منی..

***

خیاواندا دارا چکیلیرم.

هاوارلار آراسیندا.

و یئل­لر قولاغیندا اعلامیم پایلانیلیر.

دیندن دؤنموش،

آرزیسی یانمیش،

قول قانداسیز قیز،

گؤز یاشلاریلا قوش اولدو..

***