42

دکتر یونس قاسمی

 

   یونس قاسمی 1344جو ایلده بیر مذهبی و ائله دایانان حؤرمتلی عائیله ده طارومون مامالان کندینده دونیایا گؤز آچدی. اوشاقلیغینی آتاسی­نین تئز دونیادان کؤچمه ­سی اوزوندن چتینلیکله کئچیرسه ده، آنا محبتی اونون کؤوره­ک اوره ­یینی سویودا بیلمیشدیر. او آنا و آتاسیندان درین محبت گؤرموش و دوزگون بیر تربیه آلمیشدیر و عؤمور بویو بو محبتی اؤزویله گزدیریر و شاعیرلیگه باشلادیغی زاماندان همین محبت و سئوگینی شعرلرینه سپه­ له­ ییر. دوکتور یونس قاسمی، اینجه کؤنول تاخما آدییلا شعر دونیاسینا اوز گتیرمیش. اونون ایلک شعر دفتری 1384جو ایلده "طاریم ساز دیلینده" عنوانیله تهراندا چاپ اولدو کی بیر اینجه کؤنوللو انسانین اورک دؤیونتولرینی سسلندیریر. بو کتابا دکتور محمدعلی فرزانه ده ­یرلی بیر اؤن سؤز یازمیشلار و اوندا بئله دئمیشلردیر:

"سیزین شعرلرینیزده ایستر سؤز بیچیمی و ایسترسه ده آنلاییش باخیمیندان اینجه و دویغولودور. شعرلر بیر سسله و بیر نفسله هاوالانیر. طاریم و زنگان لهجه­ سی­نین رایحه­ سی داشیدیغی حالدا اونون اؤزه ­للیک­لری گؤزه گلیر. طاریمین طبیعی گؤزه ­للیک­لرینین جانلی تصویری و انسان حیاتی­نین انسان امه ­یی­ نین گؤرونوشو ده جانلی دیر."

دوکتور قاسمی جنابلاریندان بیر غزل ایله شعر بؤلومو تانیتیمینا باشلاییرام:

دئمیشم کؤنلومه، اولسون دایاغیم

      او اولا یاشلی بولود، من ده یاغیم

او قدر سئیر ائله ­یک یار کوچه ­سین

    یار یولوندا قابار اولسون آیاغیم

دئمیشم کؤنلومه: ای داغلی کؤنول

    تئز اوزولمه! گله­ جک شانلی چاغیم

او زامان من دئیه­ رم اؤز – اؤزومه

   یئنه ده شعله­له­نیر کور اوجاغیم.

قاسمی 1365جی ایلده وطندن مودافیعه ائتمک اوچون ساواش جبهه لرینه اوز قویوب وطندن دفاع ائتدی. درسینی همدان و قزوینده اوخویوب و بوگونه قدر تهراندا هم بیمارستاندا و هم اؤز مطبینده چالیشیر، آنجاق اوره­یی آنایوردو ایله چیرپینیر و شعرلریله چیلغین اوره یی نین اودونا سو سپیر. شاعیر اؤزو - اؤزونو بئله تانیتدیریر:

من یونوسم ذوالنون

قابیل بالالاری ایچره بوی آتدیم

عمیم هابیله بنزر گؤره بیلمه ­دیم

کوسدیم

آجیخلی آجی ائلدن

باش دنیزه آپاردیم

کوسمه مجازاتینا

ناققا قارنیندا

دوستاقا دوشدیم

باغیشلاندیم

ناققادان یینی دوغولدیم

آنادولودا آغ دنیزدن

قارا دنیزه

"یونوس ایمره" اولوب قابیل بالالاری ایچره

گؤز دولاندیردیم

عمیم هابیله بنزر گؤره بیلمه­دیم

کوسدوم

اوزومو کاغاذا یاخیب

غزل اولدوم

خزل اولدوم

توپراق اولدوم

یئل اسدی کپنک تک طاریمدا گؤز آچدیم.

 

من یونوسام

طاریملی اینجه کؤنول

طاریمدان تهرانا

اینجه بوروندان

گئن بورونا

قابیل بالالاری ایچره دولانیرام

عمیم هابیله بنزر وارمی؟؟؟؟؟

منه بیلیندیرین.

دؤکتور قاسمی گؤرکملی بیر شاعیر اولوب بوتون یاشاییشینی، اولغونلاشدیغینی شعره چکیب اؤز دیلیجه دانیشیر. شاعیر آنایوردونون طراوتلی باهاریلا، گول – چیچک­لرین عطریله بوی آتمیش، زنگین کولتوروندن نفس آلیب دده قورقوددان اؤیره ­نیب، کوراوغلو – نیگارلا دلی­لیک ائدیب، اصلی – کرمدن نجابت، سئوگی، وفا، صداقت اؤیره­نیب، طارومدا بوی آتیب، یاشا دولموشدور. شاعیر ائله محبتله طاروما باخیر اینانیرسان جنت ائله بورادیر، وطن سئوگیسی­نی اوره ­یه آخدیریر، محبت و سئوگینی جانا یاپیر، گؤزه­للیک­لری جانلاندیریر،. زیتون باغلاری، نار آغاجلاری، اوزوم باغلاری "اینجه کؤنول"ون شعرلرینده نازلانیرلار، گؤزلله ­شیرلر، گؤز اؤنونده انسانلارا یاشاییش میوه ارینی داددیریرلار:

بیلمه­دیم هانسی فیریشته قولاغیما اوخودی:

هذالبلدی طاریم

بیتدی گؤزومون قارشیندا

والتین والزیتون

و آتام عاشیق اولوب

بیر المایا آللاندی

جنتدن واز گیچدی

بیزیم کنده یوللاندی

بیزیم کندیمیز سر به سر

المالیق

سویداشلاریمیز

هامیسی عاشیق

آداملار

حاوالار

انجیر یارپاقیندان شرم اؤرتدولار

کومه داشدان

گیزلین داشا

شامان داشا

ابلیسی داشا باسدیلار

اوندان سونرا شیطان رجیم اولدو

اوشاقلار زیتون اقاجلارین اته­ گینده

واقعه سوره سین ایه ایه ازبرله دیلار

گویون اللهی

بیر نار چیچگی تک

بیزیم نارلیقدا پاریلدادی

و

 جنتین (سی دی)سین

طاریمده ینی دن رایت ائله دی

اوندان سونرا

حضرت ددم قورقود(ع)

قوپوزون بیزیم حایاتدا

نار آغاجینا

آسلادی

کور اوغلو نیگاریله

یانیق کرم اصلی ایله

قریب قاغا شاه صنم ایله

بیزم باغدا ال - اله لزگی اوینادیلار

آشیق موسلوم

بادامستاندا ن

توم طاریمه

گیلانکشه گیلانکشه

کلبی­نی اوخودی

ایندیسه طاریمده

آقاجلار آشیق اولوب

ساز چالار شاعیر

قیزیل اوزنین بویون اوخشاییلار

هازاریدین

کوچه باغلاری قوشما قوشولار

اووبرین خیاوانلاری

بیر دامچی غزله یئریکله ­ییرلر

مامالاندا بیر یازیق شاعیر

ایللر بویی مثنویه بویلودور

تشویرده

بیر سوسماز مغنّی

اودا موسلوم سسینی طاریم چوللرینه پایلاییب

کجر ده

خرمنسره

قوجاق قوجاق چیچک اتحاف ایدیر

ایللر بویی

فیلیسطینده

زیتون اقاجلاری قان قوسورلار

شاماتدا

زیتون باغلاری

موسلمان قانی ایله سیراب اولور

اما

طاریمده

من ایت ایله پیشیگی گوردوم

زیتون اقاجلاری دیبینده

قیرجاما داش اویناییرلار

............

شاعیریمیز شعرلریله اورک­لری اوخشاییر، عاطفه لری یوموشالدیر، اوخوجولاری شعر دونیاسینا آپاریر. آنجاق شاعیری وطن عشقی، ائل سئوگیسی شاعیرلیگه یؤنلتمیش و گونو گوندن شعرلری پارلاق و ایشیقلی اولمادادیر. شعرلری گؤزل، اوره ­یه­ یاتان، محکم دایاقلی اولمادادیر و اینجه ­لیک­لری آرتمادا. گؤزه للیک لری قاباریلمیش و دوشونجه عالمی دریتلشمه ­ده ­دیر.

اینجه کؤنول، هم کلاسیک قالیبلاردا غزل، قوشما، مخمس – حیدربابایا سلام سایاغی شعرلری وار و هم سربست و یئنی شعر آدلانان فورمالاردا. آنجاق اوخوجونو ماراقلاندیران قاسمی نین شعرلرینده اولان نجیب، صمیمی و تمیز دوشونجه­لردیر. او خالقی­نین فرهنگ و عنعنه­لریندن آلان ایلهاملارا دایاناراق اخلاق و گلیشینی دوزگون ائتمیش و شاعیر آرزولاری دا خالقی­نین فرهنگی و اردمی کیمی نجیب و انسانی دیر. بو نجابت و تمیزلیک تام شعرلرینی بوروموشدور.

   قاسمی شعرلرینی باشدان باشا وطنه، خالقینا باغلاییر. مسلم بودور اؤز وطنینی سئومه ین، اؤز خالقینا محبت بسله­مه­ین کیمسه انسان سئورلیکدن بشریته حؤرمت قویمادان دانیشماغی عبث­دیر. بیزیم شاعیر همین خاقینا عشق ایلع سئوگی ایله یاناشماسی، طارومو سئومه سیندن انسان سئور اولموش و بشریته باغلانمیشدیر. شاعیر دیلینده بوتون انسانلارا و بشریته سئوگی گؤسته­ ریر، آنجاق بو سئوگی اؤز عائیله سیندن باشلاییب بشریته یؤنه­لیر.

   دوکتور یونس قاسمی شاعیرلرله، آشیقلارلا شهرله دئییشمه­ لره گیریر. اونون اونوتمازلا شعرلشمه ­سی چاغداش ادبیاتیمیزین عنعنه ­لرینی داها محکملندیرمکده­ دیر. بورادا ایکی شاعیرین دئییشمه سیندن تکجه بیر بند اؤرنک اولاراق گتیریرم:

قاسمی:                  نه فرقی وار هایاندایام؟

                     طارمدایام تهراندایام؟

                    ایله بیل کـی زنداندایام

                سن قارشیمدا اولمایاندا . . .

 

اونوتماز:         آسئوگیلیم آی نـــازلانان

                 گونوم گئچیر هده­ ر - یالان

               یازیق عومروم اولدو تالان

               سن قارشیمدا اولمایاندا. . .

یئنه اوره­ ییمدن گلمه ­ییر "بیرلیک" عنوانلی غزلینی بیرگه اوخومایاق:

هلمیمیز بیرلیک ائدیب ال – اله تاخساق نه اولار؟

   قطره – قطره ییغیشیب دریایا آخساق نه اولار؟

هامیمیز باخچا – باغا سئیر ائله ­سک یازیله – قیش

   بولبوله عشوه ساتان گوللره باخساق نه اولار؟

گؤز یاشیله سوواریب اول سارالان گوللری بیز

   شاختا وورموش چیچگه گون کیمی شاخساق نه اولار

دوز اولوب، دوزلوگیله عؤمر سوروب، شاد یاشیاق
    هرنه غم غصه یوکو وارسا، بوراخساق نه اولار

نکجه سن – من دئمیرم، اؤلکه ­نین اهلی نه­کی وار

  حقله بیرلشمک اوچون سئل کیمی شاخساق نه اولار؟

   دوکتور قاسمی بیر دیش جراحی و اوزمانی دیر. گونوزلر خالقیمیزین جسمی دردلرینی آراییب درمان ائدیر، ایشدن یورولدوقدا ال قلمه آپاریب و شعرلریله، داستانلاریلا یئنه درمانا داوام ائتدیریر و بو دؤنه روحی – روانی دردلریمیزه داوا قویور. بو آز مدتده شاعیرین حاققیندا دانیشماق آخساق قالیر. آنجاق باشقا فرصت­لرده یئنه ده شاعیرین شعرلرینه گؤز گزدیرمک گره ­کیر. بئله بیر عالیمه یوزلر آلقیش، مینلر احسنت.

 

********