دانیشیق متنی

آزادلیق، عدالت، ملی حکومت!

عزیزلر! بوگونلر وطنیمیزده بؤیوک اولایلار اوز وئریر و آذربایجان دوشمانلاری اؤز ماهیتینی آشکارا گؤسته ریر. بیر یاندان اورمو دریاچاسینی عمدی قوروتماسینا اعترافلار ائدیر؛ او بیری یاندان تامام باش قالدیران خالقیمیزی قیریر و سکوتا چکیر. اینانیریق بو دریاچانی قوروتماقلار، 15 – 20 میلیون انسانی، آذربایجانلینی کؤچدورمه­یه چالیشیر. آذربایجانی چؤل و صحرا ائتمک ایسته­ ییر. کئچن گونلرده بونا قارشی دوراراق نئچه ییغینجاقلاری پوزموشلار و بیر سیرا ایگیدلری توتوقلامیشلار. آنجاق مبارزه داوام ائدیر.

مهسا امینی ­نین اؤلدورولمه­ سی هر بیر انسانی کدرلندیریر. بیر انسانی باشینا اؤرتوک چکمه­ دییندن نئجه اؤلدورمک اولور؟ بو، انسان کرامتی­دیر؟ بو خالقیمیزین باشینا گلن ماجرالار، داعش گؤرن ایشلردیر. بئلنچی ایشلر داعش ایشلرینی داوام ائتدیریر. بونا قارشی خالقیمیزین حرکتینی زورلاندیرماق گره­کیر. یئر کوره سینده انسانلارین یاریسی قادینلاردیر و قادین لا ایگیدین هئچ بیر فرقی یوخدور. زورلا قادین باشینا چادیرا سالماق انسانیتدن اوزاقدیر؛ هر بیر انسان اؤز ایسته­ دیگی اساسدا پالتار گئیمه­ لی­دیر و آذربایجان بو حق – حقوقو ایسته­ مکده گئری قالمامیش و قالمایاجاقدیر. البته بونو خاطیرلایاق فارس اوپوزیسیون چالیشیر مهسانی او قدر بؤیوتسون کی باشقا دردلر دئییلمه ­سین. بیز خانیملارین حققی ضایع اولماسینا اعتراض ائدیب، خانیملاری بو حرکتده بیر اؤنجول کیمی آلقیشلاییریق. آنجاق بو اعتراضلار خانیملارین حقلرینی ایسته­ مک­له برابر اختلاسلارا، اوغورلوقلارا، ائتنیکی و ملی زوراکیلیغا، بشر حقلری­نین ازیلمه­ سینه اولان اعتراضلاری دا سسله­ مه ­لی­ ییک.

آزربایجان ملتی­نین بوگون شعار بودور:

آزادلیق – عدالت – میللی حکومت!

بو شعار موقتی، کئچرگی و تکجه بوگونه – یا بیر حرکته عایید دئگیلدیر؛ بلکه بیزیم استراتژیک شعاریمیزدیر.

هر بیر شعارین بیر زامانی وار. بیرسیرا شعارلارین عمرو چوخ آز اولار، آنجاق بیر سیرا شعارلار عؤمور-بویو انسانلارین ایستک و آرزیلارینی تمثیل ائدر. بوگونلر اؤلکه­ میز - اؤزللیکله وطنیمیز آذربایجان بؤیوک اولایلارلا اوز – اوزه ­دیر. ملتیمیز "مهسا امینی"­نین اؤلومونو و "حدیث نجفی­"نین شهادتینی خاطیرلایاراق آیاغا دورموشلار و ایرانین باشا-باشیندا اؤز حقلی اعتراضلارینی گؤسته­ریرلر. بو آرادا آذربایجان خالقی و ملتی بو نظامدان داها آرتیق صدمه­ لر گؤرموش، ائلناز بابایی، ائلناز صناعی و فاطمه نویدی­پور کیمی فدا اولانلاریمیز اولموشدور. بوگون، حدیث نجفی بو شهیدلرین سیراسیندا میدانا چیخیب جانینی فدا ائتدی. اولابیلر بئله بیر سورو اورتایا گلسین نییه بونلار قوربالیق گئدنده سس – کوی او قدر اولمامیشدیر آما مهسادان اؤتور اولور نئچون بوتون ایران لاخلادی؟ بونون جاوابی تاریخی شرایطه باغلی اولدوغونو دوشونورم. دئمیشلر سو 100 درجه­یه چاتمایینجا قایناماز. بوگون سویون همان قایناغا گلمه ­سی­دیر؛ یوخسا نه مهسانین قارشی بو عزیزلردن قارایدی و نه قانی بونلاردان غلیظ­ایدی. اما ملت نئچه ایللر تحمل ائتدیکلری ظولمودن، زوراکیلیقدان، اوغرولوقلاردان، رانتلاردان، اختلاسلاردان، بئکارچیلیقلاردان و یوزلرجه جامعه ­ده اولان قانونسو.زلوقلاردان جانا گلمیش، داها تحملی بیتمیشدیر. هامی­نین جانی کدرله، سیخینتییلا اوزولموشدور، نفرتینی ساخلامیش و بوگون پاتلامیشدیر. تاریخین دیالکتیکیندن دانیشاندا همین سؤز نظرده توتولور.

نئچه ایللردیر قادینلارین بیرینجی حاققی ازیلیر، آغیر دورومدا یاشاییرلار. هانسی قانوندور قادینی بو قدر ازیب – اؤرتوک دالیندا ساخلاسین؟ هانسی انسان بئله بیر آلچاقلیغی انسانلارین یاریسینا حاکیم ائده بیلیر. گؤروروک خانیملار موسیقی اوخویابیلمز، خانیملار ایدمانلارا اشتراک ائده بیلمز! هانسی قانون بونلاری دئییر؟ بئله بیر قانون جهالت دؤورونه عاییددیر. 21جی یوزایلده بئله قانونلار پوزولمالی­دیر. هئچ قانون، انسانی بو قدر تحقیر ائده بیلمزدی. آما دین آدینا، مذهب آدینا بو تحقیرلری و زوراکیلیقلاری خالقین باشینا گتیریرلر.

ایران ملیت­لری تامامیله میدانا چیخیب، اؤز اعتراضلارینی سسله­ییر. آنجاق ائشیتدیکلری جواب نه­دیر؟ یالان، تهمت، باتوم و گولله! بو آرادا گؤزل شعارلار دا آرایا گلدی. بو شعارلار آراسیندا بیر شعار همیشه ­لیک قالابیلر. او دا "آزادلیق - عدالت – ملی حکومت"دیر. آذربایجان بو حرکتلرده اؤز مستقل صفی­له میدانا گلیر. اؤز اعتراضلارینی اؤز ایستک­لری اساسیندا سسله­ ییر. "آزادلیق، عدالت، ملی حکومت!" بونلارین هر بیرینی آچیقلاماق لازیمدیر و من ده – بو سطیرلرین یازاری - بلکه اؤز اینامینی بو حاقدا سؤیله ­ییرم. اما هامی اؤز نظرینی وئرمه ­لی و بو شعاری میللی­لشدیرمه­ ییمیز لازیمدیر. بیز گؤرودوک بو شعار تامام خالق طرفیندن سسلندی. هامی آزادلیق ایسته­ ییر، هامی عدالت ایسته ­یر و ملتیمیزین بیر چوخو میللی حکومت دالیجادیر. 100 ایلدیر بو ایستکلر آردیجا قاچیب، اما نه یازیق کی بو یوزایلده همیشه ازیلیب و ایستک­لرینه چاتابیلمه ­ییبدیر. بو شعار، ایراندا یاشایان تامام ملت­لرین سسی ده اولابیلر. بو شعار تامام پارتییالارین شعاری دا اولابیلر. بو شعار هر زمان اؤز استراتژیک مفهومونو ساخلاییر.

آزادلیق نه دئمکدیر؟

آزادلیق هر انسانین حاققی­دیر. آزادلیقدان منظور نه­دیر؟ هر انسان آزاددیر اؤز سئودیگی کیمی یاشاسین و باشقاسی­نین آزادلیغینا توخونمایینجا آزاددیر. بو آزادلیق ایستر یاشاییش طرزی، ایسترسه دینی – اینام، گئییم، دیل، دین، و باشقا ساحه ­لرده اولسون. بو آزادلیق اوچون مختلف تعریفلر اولورسا دا بوگون تامام انسانلار اؤز ایستک­لرینی بیلیرلر. مطلق آزادلیق بوگون معناسیز دا دئییلدیر. مختلف ساحه ­لرده آزادلیغین تعریفینی آچیقلاماق ایسته­ مه ­ییریک، اما بیلیریک بو آزادلیق اورایا قدردیر کی باشقا انسانلارین آزادلیغینا صدمه یئتیرمه­سین، طبیعتی – تمام جنبه ­لریله: سو، هاوا، مئشه، چئوره و باشقا ساحه ­لری - کورلاماسین، چونکی بو طبیعتدن یارارلانماق هامی­نین حاققی­دیر. آما عدالت اولمایان یئرده حاکیم اولان صینیفلر هر نه اللرینه گلیب بهره­ سینی آلیب و باشقالاری­نین دا حاققینی آرادان آپارمیشلار. بونلار تکجه طبیعته ظولم ائتمیرلر، بلکه بوتون خالقین حقلرینی – مادی و معنوی حاقلارینی یئییرلر. هم بو زاماندا یاشایان انسانلارین حاققینی هدر وئریرلر هم گله ­جک انسانلارین و گلن نسیللرین حاققینی ضایع ائدیرلر. بیت المال سانکی بونلارین­دیر؛ دنیز، مئشه، چئوره سانکی بونلاریندیر، بانکلاردا اولان پوللار بونلارین­دیر، خالق دا بونلارین برده­سی، قولو – قاراواشی­دیر. سسلری ده چیخمامالی­دیر! هر نه ایسته ­ییرلر بیت المالدان گؤتورورلر – اختلاس، وام، و . . . سونرادا قایتارماییرلار، 44جو اصلین سایه ­سینده میللی کارخانالاری، معدنلری و ثروتلری اؤز آرالاریندا پایلاشیرلار. خالق آیاغا دوروب اعتراض ائدنده ده اغتشاش ساییلیر. اوتانماییب اغتشاش آدی وئریب و اعتراض ائدنلری ده بیگانه­یه باغلی، مرزلردن ائشیکدن دستور آلان کیمی تبلیغ ائدیرلر. اوتانماز – اوتانماز اؤز ایشلرینی، اوغرولوقلارینی، رانت، اختلاس و باشقا غارت یوللارینی گئده ­رک خالقی سوچلاییرلار. اعتراض ائدنلری کافیر بیلیرلر.!

آزادلیق جمعی و فردی آزادلیقلارا بؤلونور.

فردی - بیرئیسل آزادلیق نه­دیر؟ هر انسان اؤز یالنیزلیغیندا آزادلیقلارا محتاج­دیر. بو آزادلیقلار اینام، سیاسی، جنسل و گئییم آزادلیقلاری اولاراق بین الخالق حقلری عنوانی آلتیندا یازیلمیشدیر. جمعی - توپلو آزادلیق دا پارتیالارین، مطبوعاتین، هنرین آزادلیغینی نظرده توتماق اولور.

انسان آزاددیر هر نه دینی – اینامی وارسا، اونا باغلانسین؛ هئچ کیم باشقاسینا زورلا مسلمان، شیعه – سنی، کلیمی یا حتا دین­سیز اولدوغونا ضرر یئتیره بیلمز. دین هر بیر انسانین شخصی ایسته­ یی­دیر. من بهشتی بو دونیادا ایسته ­مه ­سم اؤزگه ­نین حاققینا تجاوز ائتمه­ ییرسم نه مانعی اولابیلر؟ نییه سنین دین واجباتین منه ده واجب ساییلیر؟ نیه سن ایسته ­ین، سن اینانان دوزدور، آما منیم اینامیم یانلیش­دیر؟ بونلارین بو غلط دوشونجه ­لری اسلاما دا صدمه یئتیریر. انقلابدان اؤنجه بیر کس تاپابیلمزدیک اسلام حاققیندا سرت دانیشسین، آما بوگون بونلارین غلط سیاستلری و عمللری سبب اولوب گنجلریمیز آشکارا اسلامی داهی ­ییرلار.

قادینلار ایگیدلرله برابردیر. هامی انسان اولاراق، گئییمده، ایشده، توپلومدا، ثروتده، ایدماندا و هر بیر شئی­ده انسان اولاراق برابردیرلر. قادینلار هئچ بیر شئیده نه آرتیقدیرلار و نه اسگیک. کیشی ماهنی اوخویا بیلیر، قادین دا اوخویابیلر، کیشی ایدمانلاردا اشتراک ائدیر قادین دا هئچ بیر تضییقه باش اگمه ­مه ­رک اشتراک ائده بیلر. 1400 ایل اؤنجه­ نین قانونلاریلا قادینلارین بشر حقلرینی ضایع ائتمک اولماز. گئییمده کیشیلر آزاددیرسا قادینلار نییه باشلارینا اؤرتوک سالمالی­دیرلار. 42 ایل بوندان اؤنجه بیر جمهور باشقانی – اؤزونو اوروپادان یاشایان سایاراق – بنی صدر – سفئه – سفئه سؤزلر دانیشدی. او قادینلارین حجابی حاققیندا دئمیشدیر – تلویزیوندا دئمیشدیر قادینلارین توکونده بیر جاذبه وار شهوت گتیرر!؟. آخی هانسی علم بو سؤزو تصدیق ائدیر؟ بئله سفئه بیر جمهور باشقانینی کیم تائید ائتدی؟ کیم آرخاسیندا دایاندی؟ و نییه ائشیگه آتدینیز؟ آنجاق بوگون ملت سیزین 43 ایل یالان دانیشماقلارینیزی، اوغرولوقلارینیزی، ملت جیبیندن کئف چکدیگینیزی، بانکلاری سویدوغونوز، بو قدر رانت­لارینیزی گؤرور. داها 43 ایلدیر خالق سیزی تانییر. نه­ ییز وار دفاع ائده سینیز؟

حجاب واجبدیرسه، نییه آقازادالار خارجده اوجور گئیینیرلر. آقالار دا اونلارین یانینا گئدیب اونلارین آچیق گئینمه­ لری یانیندا شکیللر چکیرلر؟ عجب سیزین اوغوللاریزا، قیزلاریزا بو قانون یوخدور! ائله قانون گلیب مهسالارین باشیندا عمل اولونور؟

دیل آزادلیغی –

نئچون منیم مین ایللیک­لر تاریخه مالیک اولان دیلیمی یاساقلامیش و ضعیف – آلچاق دئیه ­رک بیز آزربایجانلی­لاری بیرینجی انسانی حقیندن محروم ائتمیشلر. یوز ایله یاخین­دیر ایراندا تکجه بیر دیل رسمیت تاپمیش و وطنیمیزین و ملتیمیزین تامام وار – مالی – ثروتی بیر دیل یولوندا خرجله ­نیر، باشقا دیللر اوندان محروم قالیرلار. کیم دئییر تورک دیلی­نین ادبیاتی، گؤزللیگی و گوجو فارس دیلیندن آشاغی­دیر؟ شاه رژیمی زامانیندان 100 ایلدیر دیلیمیزی یاساق ائدیب، بیر ضعیف دیلی عرش اعلادا گؤرورلر و ملتیمیزی تبلیغات گوجو ایله آلدادیب، ذهن­لری یانلیش یؤنلره چکمیشلر. آزادلیق دیله ده عایید اولمالی­دیر.

آزادلیق هر بیر عرصه­ ده اولمالی­دیر. هئچ بیر قانون بو آزادلیقلاری محدود ائتمه­ میش و ائده بیلمز، ائدیرسه غیرانسانی ساییلیر و بوگونون بشر حقوقلاری اونو نفی ائدیر.

بیر اؤلکه­ ده بیر ملت اوچون آزادلیق اولان چاغدا، او ملت - او اؤلکه گلیشر، خالقی امنیتده یاشاییب اونون تامام ثروتلری – مادی و معنوی وارلیغی انکشاف تاپار، یاشاییش شیرین اولار و انسانلار دا گونو گوندن یوکسه­ لر و انسانیت ده گؤزل­له­ شر.

عدالت نه دئمکدیر؟

عدالتین ده معناسی چوخ گئنیشدیر؛ هر بیر کس اونون بیر کسیمینی اینانیر. آنجاق عدالت: قانون، عقلانیت، انصاف و وجدان یا اخلاق کیمی پارامترلرله تعریف اولونور. فلسفه­ ده "هر بیر شئی اؤز یئرینده اولماقلا" تعریفله­ نیر. باشقا سؤزله: هر کسین لیاقتی قدر سهمی اولمالی­دیر. لیاقت اساسیندا مسندده اوتورا بیلر. آنجاق بو تعریفلرین هامیسی بوگون هر بیر ایدئولوژودا بیر جور معنا تاپیر. توپلوما گلدیکده عدالت انسانلارین برابر اولدوغونا دایانیر. اونلارین باجاردیقلاری قدر سهملری اولدوغونو معنا وئریر.

عدل ایله ظولم همیشه بیری - بیری نین یانیندا بیری - بیرینی آچیقلاییر. عدالت ده بیرئیسل و توپلو اولابیلیر. حکومتین یارانماسینی آراشدیراندا گؤروروک: عدالتی یئرینه یئتیرمک اوچون حکومت یارانمالی­دیر. بس، عدالتی و ظولمی حکومت گؤزوندن گؤروروک. بیر توپلومدا عدالت خالقین حاققینی ساخلاماق، آزادلیغینی ساخلاماق، اونون لیاقتی اساسیندا اوندان ایسته­ مک و اونا تکلیف ائتمک معناسیندادیر. عدالت تکجه مادی یوخ، بلکه معنوی فورمو دا واردیر. بیر خالقین دیلینی ازمک عدالتی پوزماق و ظولم ائتمک­دیر. بیر عده­نین مذهبینی رسمیت وئریب باشقالارین مذهبینی دانماق ظلمدن اورتایا گلیر، عدالت ساییلماییر. مسندده اوتورانلار – میز دالیندا اوتورانلارین لیاقتسیزلیگی جامعه­ ده هامی­نین حاققینی ضایع ائتمکدیر. بس نئجه اولور بوگون اؤز حکومتیمیزی آراشدیرماق؟

عدالت مادی برابرلیکده ده معنا اولور. عدالت - توپلومون، طبیعتین، بیت المالین بهره­ سیندن هامی فایدالانمالی­دیر. هامینین حقی وار بو اؤلکه ­ده باشی اوجا یاشاسین، تعلیم و اؤیره ­تیمی مجانی آلسین، ساغلیق و ساغلاملیق هامی اوچون مجانی اولمالی­دیر. هامی­نین باشی اوستونده بیر دامی اولمالی­دیر. بوگون ایراندا بونلارین هانسی واردیر؟ 43 ایل کافی دئییل­ایدی؟ عدلتی بلکه همان سوسیالیسم معنا ائدنلر ده حقلی دیرلر. بو باره­ده آرتیق دانیشماقلار گره­ کیر. سوسیالیسمدن دانیشاندان دانیشانلارا کومونیست مارکی ووراراق، دوشمان سایماق دا یانلیش فیکیرلردن دوغورور.

عدالت اولان یئرده آزادلیق وار، آزادلیق اولان یئرده عدالت ده قورولار. بو ایکیسی بیر-بیرینه باغلی­دیر. عدالتله آزادلیق بیری-بیریندن آیریلماز.

آنجاق سون عبارت "ملی حکومت"­دن گئدیر.

ملی حکومت ده عئینی حالدا چوخ گئنیش و درین معنالی اولاراق، بؤیوک اهمیته مالیک­دیر. بو عباره­نی مختلیف آچیلاردان آراشدیرماق لازیمدیر. ملی حکومت بوگون ایران ملت­لری­نین ایسته ­یی­دیر. وطنیمیز بوگون ملی بیر حکومت ایسته ­ییر. باخین بورادا سؤز تامام اولورسا، بو شعارین قارشیندا دایانان یوخدور. دوز؟ آما بونونلا بیتمیر، تامام ملت­لر بو اؤلکه ­ده اؤز ملی حکومت­لرینی قورماقدا آزاددیرلار. ایستر ایران چرچووارسیندا، ایسترسه ده مستقل بیر حالدا. گؤرونور بونون دا معناسی نه قدر گئنیشدیر. هامی ملیت­لر بو شعارین آلتیندا – بیری بیری نین یانیندا توپلانا بیلرلر. هر حالدا آذربایجان بو استراتژیک شعارینی وئره­رک گله­ جه ­یه نورلو بیر ایشیق ساچیر. دوغرودان دا گونش آذربایجاندان ساچیلیر.

بو باره­ده چوخلو دانیشیقلار و یازیشمالار گرکدیر. خواهش ائدردیم بو قونودا اؤز نظرلرینی – علمی، منطقی و سیاسال باخیشلارییلا پایلاشسینلار. منجه بو شعار بیزیم بو مرحله ­ده و آتی ایللراوچون دوزگون بیر عمل یولو، داها دوغروسو مانیفست­دیر. بونو داها آیدین فورمادا آچیقلامالی و فورمالاشدیرمالی­ ییق.

ملی حکومتده تامام پارتییالار اؤز ایستک­لرینی اورتایا قویابیلیرلر. فدرالچی، کونفدرالچی، استقلالچی و سوسیالیستلر ده بو ساحه­ده ال­بیر اولورلار. بوگون بو شعارا تاکتیکی صورتده یوخ، بلکه بیر استراتژیک شعار کیمی باخیریق. آنجاق هر بیر دوروم اوچون ده اؤزوموزو حاضیرلاییب او دوروملا تطبیق ائتمه­ لی­ ییک.

سون سؤزوم بو اولور، بو اوچ قونو آزادلیق، عدالت، ملی حکومت بیر-بیرینه باغلی­دیر. تکجه ملی حکومت یاراناندان سونرادیر کی آزادلیق تام معناسیندا یارانیر و عدالت قورولور. بونلار بیر-بیریندن آیری یارانما امکانی اولورسا دا ناقص اولور.

من بوندان آرتیق دانیشماق ایسته­ مه ­ییرم. بیلیرم کی گؤزل نظرلر اورتایا گله­ جک و گلجکده بو قونو حاققیندا یازیشمالاری داوام ائتمه ­لی ­ییک، مساله­ نی خالقیمیزلا پایلاشمالی و هامینی بو شعار چئوره­ سینده توپلامالی­ ییق.

آزادلیق، عدالت، میللی حکومت!

ساغ قالین!